Read Kuranko 2 Samuwɛli 24 Bible Online

2 Samuwɛli 24 - Kuranko bible

2 Samuwɛli 24

¹Mari fonde bɔra Isirɛla mɔgɛnu ma tun, woletɔ a ya a ma, Mansa Dawuda ya anu yakɔrɔ-mamɔ. Mari ya a fɔ Mansa Dawuda ye ko, “Ta Isirɛla nyamanita-mɔgɛnu anubɛ Yuda nyamanita-mɔgɛnu dan ka anu yatɛ lɔn.”

²Mansa Dawuda ya a fɔ ala kɛlɛ-den-kunyɛ Yohabu ye ko, “Ta ila mɔgɔ-banu na i bolo. Ka a bi Isirɛla nyamanɛ-dan doi ma ka a sigi a dan doi la, wo ni ke bɔnsɔn damasi ma ka a mɔgɛnu dan. A sɔgɛ ye n na, n ni a lɔn mɔgɛ min nyɔgɔn yatɛ ye nyamanɛ kɛ rɔ.”

³Kɔnɔ Yohabu ya a fɔ ale mansɛ ye ko, “N tigi, alamɛ ita Mari Alla ya a ma, kɛlɛ-dan min nyɔgɔn bi nyɔ kaka, wo nyɔgɔn kɛmɛ ni sa anu kuma. Alamɛ i mɛra ka wo yen i yɛ la. Kɔnɔ n tigi, nfenna mɔgɛ kɛnu yatɛ-lɔn-sɔgɛ ye i la?”

⁴Kɔnɔ mansɛta kumɛ wo tora a gbɛ rɔ. Yohabu anubɛ ala mɔgɔ-banu tara Isirɛla mɔgɛnu dan tinɛ.

⁵Anu ya Yorodan bɛ tɛgɛ tumɛ min, anu ya anu daga makɛ Arɔra soe dugu la. Arɔra soe wo sɔnɛ lɛɛ tɛma Kadi bɔnsɔn-mɔgɛnuna nyamanɛ rɔ. Anu bɔra nyɔ ka yɛlɛ kan tɔ ka ta Yasa soe burɔ.

⁶Anu bɔra nyɔ fanan, anu tara ha Kaliyadi nyamanɛ rɔ. Wo kɔma, anu tara furr, fɔɔ Kɛdɛsi soe burɔ Hɛtinuna nyamanɛ rɔ. Wo fanan kɔma, anu bɔra nyɔ ka ta soe do burɔ min tɔgɛ Dan. Anu bɔra nyɔ fanan ka ta Saidon soe burɔ tele-yigi wara la.

⁷Wo kɔma, anu bɔra nyɔ ka ta Taya soe burɔ, tarɛ mininɛ min ma dugula wara la. Wo kɔma, anu bɔra nyɔ ka ta soe wonu burɔ minnu bi Hefanu anubɛ Kenannu bolo nun. Anu tara a laban Biri-Siba soe ma min bi Yuda nyamanɛ dugula wara la.

⁸Karɛ kɔnɔntɔ tele mogan, anu bi nyamani filɛ wo ratagamana. Anu ban nyamanɛ wonu tatagamana, anu sɛgira anu kɔma Yerusalɛm soe burɔ.

⁹Mɔgɛ min nyɔgɔn yirika si ke kɛlɛ kɛla nyamanɛ wonu tɔ, Yohabu ya wo yatɛ fɔ Mansa Dawuda ye. A ko mɔgɔ waga kɛmɛ segin (800,000) le Isirɛla nyamanɛ rɔ. Mɔgɔ waga kɛmɛ loli (500,000) le Yuda nyamanɛ rɔ.

¹⁰Mansa Dawuda ban mɔgɛnu danna, a yisi ma kima tun. A ya a fɔ Mari ye ko, “N bara min ma kɛ la, n bara hakɛ-wɛ le kɛ kɛ la ka bila ile Mari le la wo la. I yandi, Mari, n makoto. N bara kun-takolonya-koe le ladan kɛ la.”

¹¹Mari ya a fɔ Mansa Dawudala ko-rayennɛ Kadi ye ko, “Ta a fɔ Dawuda ye ko ko sawa ye nyɔ n bi min yirala a la, a ni kelen bi wonu tɔ. A wa fenfen bi kɛ sawɛ rɔ, ale le wo la.” Mansa Dawuda ya a lasɔ min kɛ sɔgɔma,

¹³Nɛbi Kadi tara a taran. A ya Mari kuman-kan wo latenbi a ma, a ko, “I ni ita bi kɛ sawɛ rɔ, san sawa, kɔnkɔ-fitinɛ ye ila nyamanɛ rɔ wo, karɛ sawa, wo ye wo burila wo yogenu kɔrɔ wo, tele sawa, kiraya-fitinɛ yɛ ila nyamanɛ rɔ wo. I miri a kilɛ fɛ. I ni ita bi. N ni ta wo fɔ Mari ye.”

¹⁴Mansa Dawuda ko, “Kɔndɔfili-bɛrɛbɛrɛ le kɛ la n bolo. A ma di n ye n hadama-den-nyɔgɛ ni n tɔrɔ. Yanni wo ni ma, ale Mari nyɛrɛ ni n tɔrɔ bawo kinikinɛ ye ale rɔ.”

¹⁵Wo le ya a ma, Mari ya kiraya-fitinɛ layigi Isirɛla mɔgɛnu kuma ka a dabira wo wulun sɔgɔmɛ ma, fɔ a wati-latɛgɛnɛ kenɛ Mari bolo. Mansa Dawudala nyamanɛ mumɛ bɛɛ rɔ, mɔgɔ waga bi-wɔrɔnfila (70,000) le kunyɛ tora kiraya-fitinɛ wo rɔ.

¹⁶Marita niyi-bɔ-melika gbɛrɛnnɛ Yerusalɛm soe ma tumɛ min, Mari kinikinita Isirɛla mɔgɛnu ma ka a miriya yɛlɛma. A ya tɔn sigi anu kasarɛ la. A ya a fɔ ala melika wo ye ko, “A to ka. Minnu bara faga kɛ la, wo ara a bɔ!” Wo ya a taran, niyi-bɔ-melika wo ara ke Arɔnala gbere-kole ma. Yɛbusi mɔgɛ le ale Arɔna la.

¹⁷Mansa Dawuda ya ale niyi-bɔ-melika yen. A ya a fɔ Mari ye ko, “Ko-tinyanɛ ye nde le la. Nde le wara ko-yogomɛ ma. Mɔgɔ-makinikininɛ kɛnu bara nfen ko-yogoma ma? A bɛnnɛ tɔrɔyɛ kɛ ni sigi mabɛ nna denbayɛ le la.”

¹⁸Tele wo nyɛrɛ rɔ, Nɛbi Kadi tara a fɔ Mansa Dawuda ye ko, “Ta Arɔnala gbere-kole ma. I ni saraka-mintan-tinɛ ladan Mari ye nyɔ rɔ.”

¹⁹Mansa Dawuda ya Marita kumɛ bira ka a ma iko Nɛbi Kadi ya a fɔ a ye nya min. A ya Arɔnala sɛnita-kilɛ bira.

²⁰Arɔna ya a yɛ layigi kɔnkɛ kɔrɔ. A ya mansɛ anubɛ ala mɔgɔ-banu yen nala ala sɛnɛ rɔ. A ya a laburun a ma Mansa Dawuda kɔrɔ.

²¹A ya a fɔ a ye ko, “N tigi, nfen ya i lana yan?” Mansɛ ya a fɔ a ye ko, “N nara ila gbere-kole kɛ le san tinɛ i ma alako n ni saraka-mintan-tinɛ sɔ Mari ye. Wo le si a ma, tɔn ni sigi kiraya-fitinɛ kɛ la.”

²²Arɔna ya a fɔ a ye ko, “N tigi, hali i ma fenfen bɔ. Gbere-kole kɛ dama bi. I ma nna sara-ninkinu yen? Wonu ma saraka-mintantɛ la Mari ye. Kɔlɔma minnu si sa sara-ninkinu kan ma anubɛ fui-fen-tatɛn-kɔlɔmanu, i ma wonu fanan yen? Wonu ni ma saraka-mintan-sɔgɛ la.”

²³Arɔna ban kɛnu dila Mansa Dawuda ma, a duwara mansɛ ye ko, “Alamɛ ita Mari Alla ya a ma, sarakɛ kɛ ni bira.”

²⁴Kɔnɔ Mansa Dawuda ya a fɔ a ye ko, “Fɔ n ba anu san i ma le serr, bawo ni n ma wusi tirindi fan minna ko la, n ti wo di nta Mari Alla ma.” A ya gbere-kole wonubɛ sara-ninki wonu san wodi-gbɛ-gbu bi-loli la.

²⁵A ya saraka-mintan-tinɛ sɔ nyɔ Mari ye. A ya saraka-mintantɛ anubɛ yisi-kima-sarakɛnu bɔ. Mari ya ala madiyali-kan lamɔɛn ka tɔn sigi kiraya-fitinɛ wo la Isirɛla nyamanɛ rɔ.