Read Kuranko 2 Samuwɛli 3 Bible Online

2 Samuwɛli 3 - Kuranko bible

2 Samuwɛli 3

¹Kɔnɔ hali wo, kɛlɛ-nyɔgɔnyɛ tora Mansa Sɔlita fɛ-biralɛnu anubɛ Dawudala keminɛnu tɛma wati-yan kɔrɔ. Dawudala sɛnbɛ ma tora kofula kɔnɔ Sɔlita sɛnbɛ ma tora yigila.

²Dawuda ya den-kei mɔgɔ wɔrɔ le sɔrɔn Hiburɔn soe burɔ. Ala sarɛ tɔgɛ le Aminɔ. Wo na le Ahinowan la min bɔra Yɛsɛreli soe rɔ.

³Ala dan fila nyɔgɛ tɔgɛ le Keleyabu. Wo na le Abigɛli la, Nebalila musu-tonɛ, kɔni min bɔra Kamɛli soe burɔ. Ala dan sawa nyɔgɛ tɔgɛ le Abasalɔm. Wo na le Meyaka la. Mansa Talamayi min bi Kesa nyamanɛ kun na, wola dunmusi le kɛ la.

⁴Ala dan nani nyɔgɛ tɔgɛ le Adonaya. Wo na le Hagiti la. Ala dan loli nyɔgɛ tɔgɛ le Sɛfataya. Wo na le Abitali la.

⁵Ala dan wɔrɔ nyɔgɛ tɔgɛ le Itiriyam. Wo na le Ɛkila la. Kɛ dama sɔrɔnta Hiburɔn soe burɔ le.

⁶Kɛlɛ tora Mansa Sɔlila kɛlɛ-dannu anubɛ Dawudala keminɛnu tɛma. Kɔnɔ Sɔlila kun-tigi Abina tora fanka sɔrɔnna kɛlɛ rɔ.

⁷Kɔnɔ lunyɛ do, Sɔlila den Mansa Isibosɛti ya karamɛ do layɛlɛ Abina ma. A ko wo ara a sa a fala gbɛrɛnya-musi Risipa fɛ, Ayala dunmusi, kɔni.

⁸Kumɛ wo ya a ma, Abina diminyara bɛrɛkɛ! A ko, “Ile lara a la ko n si bila i fa Sɔlila denbayɛ la? Ile lara a la ko n bi ma yogenu denu fɛ, Yuda mɔgɛnu, kɔni? Kebi fɔlɔ nun, n sɔnɛ i fa anubɛ a dɔgɛnu fɛ anubɛ a diyana-mɔgɛnu. N ma sɔn Dawuda bole ni sa ile rɔ. Kɔnɔ a sɔgɛ ye i la, i ni fɛɛ sa n na musu-koe rɔ bi, wa?

⁹ Mari le ya lanyiri kɛ kiri ko fɔ a wa mansayɛ bi i fala bɔn la ka a di Dawuda ma. A ko a si nyamani filɛ kɛ tonko nanɛ don a bolo, Isirɛla anubɛ Yuda, kɔni. Ni wo ma ma n bolo tonyɛ la, alamɛ Alla ya n gbesi a rɔ.”

¹¹Kumɛ wo ya a ma, Mansa Isibosɛti kilanta Abina la dɔgɔma-ma-de! A ma ke fenfen fɔla.

¹²Abina ya kilayɛnu nata Dawuda ma Hiburɔn soe burɔ. A ko, “Yon si to mala nyamanɛ kɛ kun na? A sɔgɛ ye n na, ma ni to kan kelen tɔ. N ni i dɛnbɛ, Isirɛla mɔgɛ bɛɛ ni don i wara-koe rɔ.”

¹³Dawuda ya a fɔ kilayɛ wonu ye ko, “Wo kin kɔnɔ ko kelen bi nyɔ. Ni a sɔnta wo ma, n si sɔn de worɔ, ma ni to kan kelen tɔ. Wo le, a tenbi nala n yen tinɛ, a ni na Mansa Sɔlila dunmusi la n ma min tɔgɛ Mikali.”

¹⁴ Wo kɔma fanani, Dawuda ya kilayɛnu nata Mansa Isibosɛti ma ka a fɔ a ye ko, “Nna musi Mikali don n bolo, n ya min furu Filisiti mɔgɔ kɛmɛ sogo-kundi la.”

¹⁵Mansa Isibosɛti ya a tirisan-musi wo bi ala kei bolo, Layisala den Palatiyɛli ka a lata Dawuda ma.

¹⁶Palatiyɛli tara dila ala musi wo gba la ha soe do burɔ min tɔgɛ Bahurim. Kɔnɔ Abina ya a fɔ a ye wati min ko, “Sɛgi i kɔma,” a ma a masɔsɔ. A sɛgira a kɔma a warɛ.

¹⁷Abina tara Isirɛla mɔgɔ-banu bara. A ya a fɔ anu ye ko, “A ara mɛ, wo ye nɔrɔla a ma ko Dawuda ni ma wola mansɛ la.

¹⁸Wo ara fɛrɛ-bɛrɛbɛrɛ sɔrɔn gbɛ! Mari ara min fɔ nun, wo ni wo miri wo ma. A ko a si a ma, Dawuda ni Isirɛla mɔgɛnu kumafunfan Filisitinu bolo anubɛ anu yoge damasi.”

¹⁹Wo kɔma, a tara kuma Bɛnyamɛ bɔnsɔn-mɔgɛnu na. A ban ko-rabɛn wo la, a nara to tala Dawuda wara Hiburɔn soe burɔ. Abina anubɛ mɔgɔ mogan tara Dawuda warɛ. Anu ke a ma, Dawuda ya anu nadiya-belebele-wɛ kɛ. Isirɛla mɔgɛnu anubɛ Bɛnyamɛ bɔnsɔn-mɔgɛnu sɔnta koe minnu ma yɛ, Abina ya wo bɛɛ rakaran a ye.

²¹A ya a fɔ a ye tun ko, “N tigi, n bi tala le kɛ la. N ni a ma, Isirɛla mɔgɛ bɛɛsi ni don i wara-koe rɔ ka sɔn ila mansaya-koe ma. Wo kɔma, ile ye nyinina min ma, i si wo sɔrɔn ka Isirɛla nyamanɛ bɛɛ mara.” Dawuda ya ale Abina masara. A tara yisi-kimɛ rɔ.

²²Abinala tɛ a warɛ, a ma mɛ, Yohabu anubɛ Dawudala keminɛ donu nara ka bɔ kɛlɛ rɔ. Kɛlɛ ya minnu bira, anu nara wonuna fen-siyaman na anu bolo. Kɔnɔ anu ya a taran, Abina wo ara ta nun bawo Dawuda ara ban wo masarala ka a lata yisi-kimɛ rɔ.

²³A fɔɛ Yohabu ye ko Abina nara le Dawuda wara nyɔ kɔnɔ a ara sɛgi yisi-kimɛ rɔ,

²⁴Yohabu tara a fɔ mansɛ ye a ko, “I wara nfen ma kɛ la? Abina ni na, i ya a boloka nfenna? A ni ta a warɛ wo nya fufafu?

²⁵Ile ma a lɔn ko a nara i yanfa tinɛ le wo la? A ye i ta tinɛ anubɛ i ko-ladan-bole le lɔn-koe rɔ. Ha bi, ile ma wo lɔn?”

²⁶Yohabu bɔra a dafɛ. A ya Abina kelelɛnu nata. Wonu ya Abina taran Sirala kɔlɔn dafɛ. Anu nara a la kɔnɔ Dawuda ma kala sɔrɔn wo ma.

²⁷Abina ke soe tarɛ dɛ ma, Yohabu ya a bi. Anu ya anu mata doni. Yohabu ya a nyɛrɛ ma iko a ye gbundu-kumɛ do le fɔla a ye. A ya Abina buyi punsɔgɔ. A ya Abina faga bawo wo le fɔlɔn ya ale dɔgɛ Asahɛli faga.

²⁸Dawuda ya wo lamɔɛn tumɛ min, a ya a fɔ ko, “Mari nyɛrɛ ya a lɔn serr, ko mabɛ nna nyamanita-mɔgɛnu gba ma Abina faga-koe kɛ la.

²⁹Alamɛ Yohabu anubɛ ala denbayɛ ya tɔrɔyɛ kɛ sɔrɔn ka a tɛgɛ Abina faga-koe kɛ ma. Alamɛ anu ya tɔrɔya-su kɛnu sɔrɔn, kɔrɔsini-gbɛ wo, fɛrɛma-kirayɛ wo, ni wo ma, anu ni to wurundi-kɛ-wɔlɛ kɛla iko musu-kɔrɔnɛ, ni wo ma, anu kunyɛ ni to kɛlɛ rɔ, ni wo ma, anu ni faga kɔnkɛ bolo. Tɔrɔya-su kelen-kelan kɛnu ni a bɔnsɔn bɛɛsi tɔrɔ kelen-kelenyɛ ma.”

³⁰Yohabu anubɛ a dɔgɛ Abisayi ya anu dɔgɛ tayili sara bawo Abina le fɔlɔn ya anu dɔgɛ Asahɛli faga Kibiyon kɔnkɛ ma kɛlɛ kuma.

³¹Dawuda ya a fɔ Yohabu anubɛ ala kɛlɛ-dannu ye ko anu ni di Abinala ko la. Anu ni anuna durukinu tafara ka kasa-duruki don. Anu bi tala Abina furi la furi-bi-fan kuma kaburu-soe la tumɛ min, Dawuda nyɛrɛ-nyɛrɛ bilara anu fɛ.

³²Anu ban Abina togonna Hiburɔn soe burɔ, ale mansɛ ya a karɛ sa-a-rɔ di-kɛ-tinɛ anubɛ ala mɔgɛnu.

³³Ale Dawuda ya bɛti do bɔ Abinala ko la. Nfenna, Abina kɛ ara faga iko wunduyoge, ado a ma ko tinya?

³⁴Anu ma a kiannu nakiri. Anu ma a bolenu nakiri. A fagara le dɔrɔn iko karagbɛlɛnu ba mɔgɔ faga. A ban saya-tolon kɛ sala, mɔgɛnu donta di kɛ rɔ tun.

³⁵Telen-gbɛn, mɔgɛnu bi Dawuda madiyala fen-dɔn-koe rɔ kɔnɔ ale Dawuda ko, “Ni n ya dɔn-fan bila n dɛ rɔ bi, alamɛ Alla ya n gbesi a rɔ. N ni faga.”

³⁶Anu ya kumɛ wo lamɔɛn min kɛ, wo ya anu hɛnɛ, ado ale mansɛ ya koe min bɛɛsi ladan saya-koe wo rɔ, wo ya mɔgɛnu hɛnɛ.

³⁷Wo le ya a ma, Dawudata mɔgɛnu wo, Isirɛla mɔgɛnu wo, wonu dama ya a lɔn ko Dawuda ma ko lɔn Abina faga-koe kɛ rɔ.

³⁸Ale mansɛ ya a fɔ ala mɔgɔ-banu ye ko, “Wole ma a lɔn ko Isirɛla mɔgɔ-ba-koloma kelen de wara bɔ wo la kɛ la bi?

³⁹Hali Alla ara nde yabɔ ka ma wola mansɛ la, n yigi tɛgɛnɛ le kɛ la bi. Sɛruwala den-kei kɛnu, anu nyɛɛnɛ n kɔgɔ la kɔnɔ alamɛ Mari ya anu tɔrɔ iko a bɛnnɛ ka anu tɔrɔ nya min.”