Read Kuranko 2 Samuwɛli 9 Bible Online

2 Samuwɛli 9 - Kuranko bible

2 Samuwɛli 9

¹ Lunyɛ do, Mansa Dawuda ya nyinikalɛ sa. A ko, “Mansa Sɔli ya mɔgɛ do to le a kɔma, wa? Ni mɔgɛ tora le, a sɔgɛ ye n na, n ni ko-nyimɛ kɛ wo tigi ye Yonatanna ko la.”

²Mansa Sɔlila bonna-wɔli-kɛlɛ do ye nyɔ, wo tɔgɛ le Saiba. Anu ya a fɔ wo ye ko, “Ta Mansa Dawuda wara.” Saiba wo ke nyɔ, mansɛ ya a manyinika ko, “Saiba le ile la?” Saiba ko, “Ɔn, wo le nde la yɔ, ila keminɛ, kɔni.”

³ Mansɛ ya a manyinika tun ko, “I ya Mansa Sɔlila kebila-mɔgɛ do lɔn min bi a kɛndɛ la kaka? N bi a fɛ ka ko-nyimɛ kɛ wo ye iko n bara lanyiri kiri Alla ye nya min nun” Saiba ya a fɔ a ye ko, “Yonatanna den kelen de nyɔ. Namarɛ le wo la.”

⁴Ale mansɛ ko, “Wo ye mintɔ?” Saiba ko, “A ye Amiyɛlila den Makiri bolo Lodiba soe burɔ.”

⁵Ale Mansa Dawuda ya mɔgɛ lata a bi tinɛ.

⁶Yonatanna den Mɛfibasɛti, Sɔli mamanɛ, kɔni, wo nanɛ, a ya a madu Mansa Dawuda kɔrɔ ka a gbiliya. Mansɛ ya a fɔ a ye ko, “Mɛfibasɛti le ile la, wa?” A ya a labira. A ko, “Ɔn. Ila keminɛ le nde la.”

⁷Mansa Dawuda ya a fɔ a ye ko, “Hali i ma kilan. N si ko-nyimɛ kɛ i ye ka a tɛgɛ i fa Yonatanna ko ma. N si i benba Mansa Sɔli halala-dugi bɛɛsi lasɛgi ile ma. N si a ma, ma ni to ma de-nyinina kan-tina-kelen.”

⁸Mɛfibasɛti ya a madu a kɔrɔ tun. A ko, “N tigi, wulu-suyi tenbira nde la. Nfenna i ye ko-nyimɛ kɛla nde ye?”

⁹Saiba min bi Mansa Sɔlila bonna-wɔlɛ kɛla nun, Mansa Dawuda ya wo kele. A ya a fɔ a ye ko, “N si i tigi anubɛ ala denbayɛnu halala-fan bɛɛsi lasɛgi a mamanɛ kɛ ma.

¹⁰Wobɛ ila dannu anubɛ wola yɔɔnnu si to wɔlila wo tigi Mansa Sɔlila dugi rɔ. Wo ye ki-fan minnu tɛgɛla nyɔ, wo si na wonu na ka wonu ma Mansa Sɔlila denbayɛ beli-fan la. Kɔnɔ malebɛ ale Mɛfibasɛti si to fen-dɔn-kɛla kan-tina-kelen.” (Den-kei tan-ni-loli le Saiba bolo nun. Wo kɔma, yɔɔn mɔgɔ mogan de ye a bolo fanan.)

¹¹Saiba ko, “N tigi, i ya fenfen fɔ, n si wo ma le.” Mɛfibasɛti tora fen-dɔn-kɛla Mansa Dawuda fɛ iko a halala dan.

¹²Den kelen bi Mɛfibasɛti bolo nun kɔnɔ kemini-mɛsɛ le a la nun fɔlɔ. A tɔgɛ le Maika. Kɔnɔ Saibala denbayɛ bɛɛsi mara Mɛfibasɛtila wɔli-kɛlɛnu na.

¹³Ale Mɛfibasɛti min kin filɛ bɔnɛ a kɔrɔ, a tora fen-dɔn-kɛla Mansa Dawuda fɛ Yerusalɛm soe burɔ.