Read Kuranko 1 Mansɛnu 1 Bible Online

1 Mansɛnu 1 - Kuranko bible

1 Mansɛnu 1

¹Nba, Mansa Dawuda kɔrɔyara tumɛ min, anu si kurɛ burun a ma kɔnɔ hali wo, kimɛ ti bɔ a la.

²Woletɔ ala mɔgɔ-banu ya a fɔ a ye ko, “Ma tigi, ma ni sunkurun-nasɔlɔnɛ do nyini i ye alako a ni a sa i buyi kɔrɔ ka kimɛ bɔ i la. Wo ni ma i fɛ-biralɛ la ka wɔlɛ kɛ i ye.”

³Anu ya anu yɛ lakalan Isirɛla nyamanɛ bɛɛ rɔ ka dunmusu-kinyanɛ do nyini ale mansɛ ye. Anu ya Sunam kɛ, Abisagi yen min mafɛlɛn di kati! Musi wo mara mansɛ fɛ-biralɛ la ka wɔlɛ kɛ a ye. A tora mansɛ fɛ kɔnɔ mansɛ ma a ma ala musi la.

⁴

⁵ Wo ya a taran, Mansa Dawudala den Abasalɔm bara faga. A tagbara-sɛ Hagiti-Adonaya siginɛ a gbɛ rɔ. Adonaya, wo mafɛlɛn di kɔnɔ a fa ma a kolo hali lun-kelen-bɛrɛn. Mansaya-sɔgɛ ya Adonaya bira kosɛbɛ! A ya soee-laburi-kirindinu sɔrɔn a nyɛrɛ ye anubɛ kemini mɔgɔ bi-loli minnu si sɔ a yarɔ.

⁶

⁷A ya Sɛruya-Yohabu anubɛ Saraka-Masɔla Abiyatari kele alako wonu ni bila a fɛ ka a dɛnbɛ ala mansaya-koe rɔ.

⁸Minnu ma sɔn bilala Adonaya fɛ, wo le, Saraka-Masɔla Sedoki wo, Yɛhoyadala den Bɛnaya wo, Nɛbi Netan wo, Simayi wo, Riya wo, anubɛ Mansa Dawuda makandannɛnu.

⁹Lun kelen, Adonaya ya sagɛnu anubɛ ninkinu anubɛ ninki-bulan-tɔlɔnɛnu ma sarakɛ la kuri do kuma min tɔgɛ Duguma-Fen-Kuri. Kuri wo sɔnɛ Ɛnrogɛli tenke dafɛ. Ale Adonaya ya a dɔgɛnu kele anubɛ mɔgɔ-ba min bɛɛ ye Yuda bɔnsɔn nyamanɛ rɔ alako anu bɛɛ ni bɛn saraka-bɔɛ wo rɔ.

¹⁰Kɔnɔ Nɛbi Netan wo, Bɛnaya wo, kɛlɛ-dan minnu bi a fa Mansa Dawuda makandanna wo, anubɛ a fala den Silamɛni, a ma sɔn wonu kelela.

¹¹ Nba, Nɛbi Netan tara a fɔ Silamɛni na Batasiba ye ko, “N na Batasiba, ile ma a lamɔɛn wa, ko Hagiti-Adonaya ara a nyɛrɛ ma mansɛ la kaka? Ma tigi Dawuda ma ko lɔn wo rɔ bɛ mumɛ!

¹²Ni i ye a fɛ, wobɛ ila den Silamɛni niyi la ni kisi, n bi nala min fɔla i ye kɛ la, i ni wo ma tiriya!

¹³Ta Mansa Dawuda wara kelenna! Ta a manyinika ni ale le ma lanyiri kiri i ye nun ko ila den Silamɛni le si ma mansɛ la a gbɛ rɔ? A manyinika ni min mara ko Adonaya ara ma mansɛ la a gbɛ rɔ.”

¹⁴Nɛbi Netan ya a fɔ tun ko, “I tenbi kumɛ kɛ fɔla mansɛ ye tumɛ min, n si ta i kɔma ka ila kumɛ sɛnbɛ-don.”

¹⁵Nba, Batasiba tara don mansɛ kuma. Wo ya a taran, Sunam kɛ Abisagi ye mansɛ fɛ-birala nyɔ bawo mansɛ ara kɔrɔya.

¹⁶Batasiba ya a nyɛnkin ala kei Mansa Dawuda kɔrɔ ka a kɔndɔn. Mansɛ ya a manyinika ko, “Nfen mara?”

¹⁷Batasiba ya a fɔ a ye ko, “Mansɛ, i ma lanyiri kiri n ye Mari Alla tɔgɛ rɔ nun ko nna den Silamɛni si ma mansɛ la i gbɛ rɔ?

¹⁸Kɔnɔ kaka, Adonaya ara ma mansɛ la, ado ile mansɛ ma ko lɔn a rɔ bɛ!

¹⁹Adonaya ye sarakɛnu bɔla ka a dan-natenbi, ninkinu anubɛ ninki-bulan-tɔlɔnɛnu anubɛ sagɛnu, kɔni. A ya ila dannu anubɛ Saraka-Masɔla Abiyatari anubɛ ila kɛlɛ-den-kunyɛ Yohabu kele saraka-bɔɛ wo rɔ kɔnɔ a ma sɔn ila den Silamɛni kelela muk!

²⁰Kɔnɔ mansɛ, Isirɛla mɔgɛ bɛɛ yɛ le bɛnnɛ i ma. Anu bi i mafɛlɛnna ka a lɔn ni min si na ma mansɛ la ile gbɛ rɔ.

²¹Ni i ma Silamɛni ma mansɛ la i gbɛ rɔ, wati do si ke, i wa faga tumɛ min, anu si mabɛ nna den Silamɛni mɔnima-birɛ-kɛ.”

²²Batasiba ye kumala mansɛ ye tumɛ min, ala fasalɛ, Nɛbi Netan nara.

²³Mɔgɔ-banu ya a fɔ mansɛ ye ko, “Nɛbi Netan ara na.” Netan donta anu kuma ka a madu mansɛ kɔrɔ ka a kɔndɔn.

²⁴Ale Netan ya a fɔ mansɛ ye ko, “N tigi mansɛ, ile le ya a fɔ, wa ko Adonaya ni ma mansɛ la i gbɛ rɔ?

²⁵A ara ta ka ninkinu anubɛ ninki-bulan anubɛ sagɛnu siyaman bɔ sarakayɛ la. A ya ila dan bɛɛ kele anubɛ ila kɛlɛ-den-kunyɛ Yohabu anubɛ Saraka-Masɔla Abiyatari, ado anu bi fen dɔnna kan-tina-kelen kaka. Anu bi duwala ko, ‘Alamɛ Mansa Adonaya mɛra!’

²⁶Kɔnɔ mansɛ, anu ma nde kele, anu ma Saraka-Masɔla Sedoki kele, anu ma Yɛhoyadala den Bɛnaya kele, anu ma ila den Silamɛni fanan kele.

²⁷N tigi, ile le sɔnta kɛ ma nun? Nfenna min bi sigila i gbɛ rɔ, i ma wo fɔ ma ye?”

²⁸Nba, Mansa Dawuda ya a fɔ ko, “Wo ni a na Batasiba kele tun.” Batasiba nanɛ,

²⁹Dawuda ya a fɔ a ye ko, “N bara n keli Mari nimɛ rɔ min bi n nakisila masibɛ ma

³⁰ko ila den Silamɛni si ma mansɛ la n gbɛ rɔ iko n bara lanyiri kiri Isirɛlata Mari Alla yala nya min. N si wo ma bi yati!”

³¹Woletɔ Batasiba ya a madu ka a nyɛnkin mansɛ kɔrɔ. A ya a fɔ a ye ko, “Mansɛ, alamɛ i siyi-fɛ yanyara!”

³²Wo kɔma, Mansa Dawuda ya a fɔ a ye ko, “Wo ni Saraka-Masɔla Sedoki anubɛ Nɛbi Netan anubɛ Yɛhoyadala den Bɛnaya kele n ye.” Wonu nara mansɛ yakɔrɔ tumɛ min,

³³mansɛ ya a fɔ anu ye ko, “Wobɛ n makandannɛnu ni nna den Silamɛni bi ka a sigi n nyɛrɛta sofɛlɛ la. Wo ni ta a la Kiyɔn tenke dafɛ.

³⁴Wo wa ke nyɔ tumɛ min, Saraka-Masɔla Sedoki anubɛ Nɛbi Netan ni dantɛgɛ-tuli kɛ Silamɛni kunyɛ rɔ ka a ma mansɛ la Isirɛla mɔgɛnu kun na. Wo ni buri fɛ ka a fɔ ko, ‘Alamɛ Mansa Silamɛni mɛra!’

³⁵Wo kɔma, wo ni bila a fɛ bawo n bara ale le to n gbɛ rɔ. Ka a dabira bi ma, nde le wara a fɔ ko a ni ma mansɛ la Isirɛla anubɛ Yuda mɔgɛnu kun na.”

³⁶Bɛnaya sɔnta wo ma. A ko, “N tigi, alamɛ ita Mari Alla ya i kuman-kan wo latɔnbagaya.

³⁷Iko Mari tora i fɛ nya min, alamɛ a tora ila den Silamɛni fɛ wo nya na le ka ala mansayɛ lasabati ka tenbi itɛ la.”

³⁸Wo kɔma, Saraka-Masɔla Sedoki wo, Nɛbi Netan wo, Bɛnaya wo, anubɛ mansɛ makandannɛnu, wonu tara Silamɛni bi ka a sigi Mansa Dawudata sofɛlɛ la. Anu tara a la Kiyɔn tenke dafɛ.

³⁹Saraka-Masɔla Sedoki ya dantɛgɛ-tuli bi ka bɔ Marita Fani-Bɔn la ka a kɛ Silamɛni kunyɛ rɔ ka a dantɛgɛ. Anu ya buri fɛ. Mɔgɛ bɛɛ ya a lasɔnkɔ. Anu ko, “Mansa Silamɛni, alamɛ i mɛra!”

⁴⁰Mɔgɛ bɛɛ bilara a fɛ. Anu bi fulinu fɛla, tolɔn kɛnɛ a rɔ, dugi tugura a rɔ sewɛ bolo!

⁴¹Adonaya anubɛ a fɛ-mɔgɛnu bi banna fen-dɔn la kawo, anu ya buru-fɛ-kan lamɔɛn. Yohabu ya wo lamɔɛn tumɛ min, a ko, “Sɔnkɔ-sɔnkɔ kɛ kɔrɛ ye nfen na soe burɔ?”

⁴²Yohabu ma a kan wo laban, Saraka-Masɔla Abiyatarila den Yonatan nara anu taran. Adonaya ya a fɔ a ye ko, “I madon n na. N lanɛ a la ko nna mɔgɔ-nyimɛ le ile la. N lanɛ a la ko i wara na kuma-nyimɛ do le fɔ tinɛ n ye.”

⁴³Kɔnɔ Yonatan ya a fɔ a ye ko, “N ma na kuma-nyimɛ la de! Mansa Dawuda ara Silamɛni ma mansɛ la.

⁴⁴A ya Saraka-Masɔla Sedoki lata a fɛ anubɛ Nɛbi Netan anubɛ Yɛhoyadala den Bɛnaya. A ya a makandannɛnu fanan nata. Anu ya Silamɛni sigi i fala sofɛlɛ la.

⁴⁵Saraka-Masɔla Sedoki anubɛ Nɛbi Netan ya a dantɛgɛ ka a ma mansɛ la Kiyɔn tenke dafɛ. Anu nara tolɔn anubɛ sewa la anu bolo. Soe lafanɛ wo le sɔnkɛ la. I ya anu sɔnkɔ-sɔnkɔ-kan wo le lamɔɛn.

⁴⁶Silamɛni ara ban mala mansɛ la,

⁴⁷ado min sanɛ wo kuma, mansɛla mɔgɔ-banu tara ka duwa Mansa Dawuda ye ko Silamɛni ni tɔgɔ sɔrɔn ka tenbi atɛ la. Ala mansayɛ ni koloya atɛ ko. Wo kɔma, mansɛ ya a madu ala sa-fan rɔ ka baraka bira Alla ye.

⁴⁸Ale mansɛ nyɛrɛ ya a fɔ ko Isirɛlata Mari Alla ni tanto bawo a ara mɔgɛ do yabɔ ka a ma mansɛ la ale Mansa Dawuda nyɛrɛ yala.”

⁴⁹Adonaya ya mɔgɛ min bɛɛsi kele ala saraka-bɔɛ rɔ, wonu ya kɛ lamɔɛn tumɛ min, wonu kilanta kati! Anu kelen-kelennamɛ-bɛɛ tara ata kilɛ fɛ.

⁵⁰Adonaya fanan kilanta Mansa Silamɛni na. A burimatoe tara Marita Fani-Bɔn yarɔ ka saraka-bɔ-tinɛ bolon filɛ bira gbuturu, alako a ni kisi.

⁵¹Anu tara a fɔ Mansa Silamɛni ye ko, “I ma a yen, Adonaya ara kilan i la bawo a ara saraka-bɔ-tinɛ bolɔn filɛ bira. A ye a fɔla ko ile Mansa Silamɛni ni i keli a ye alako ni ile ti a faga.”

⁵²Silamɛni ko, “Nba, ni a ya a kɛ-nya latelen, n ti ko-wo-ko ma a la worɔ. Kɔnɔ ni a tora a gbɛ da la, n bi a fagala le worɔ serr!”

⁵³Mansa Silamɛni ya mɔgɛnu sɔ Marita Fani-Bɔn la Adonaya bi tinɛ. Anu nara a la tumɛ min, a ya a sa dugu ma Mansa Silamɛni kin kɔrɔ ka a madiya. Silamɛni ya a bole sa a kuma ka a fɔ a ye ko, “Ta ila bɔn la.”