Read Kuranko 1 Mansɛnu 10 Bible Online

1 Mansɛnu 10 - Kuranko bible

1 Mansɛnu 10

¹Mansa Silamɛni ya hɛnkili sɔrɔn Mari bolo min kɛ, Siba musu-mansɛ ya ala hɛnkilimayɛ mankan wo lamɔɛn. Wo le ya a ma, ale nara Mansa Silamɛni hɛnkili mafɛlɛn tinɛ.

²A nara a gba-fɛ-bilala-siyaman na. Wo kɔma, a ya kɛnɛ-dunɛnu anubɛ sɛnɛ-dunɛnu anubɛ dugu-kɔrɔ-nɔnfulu siyaman-dunɛnu kiri nyomɛnu kɔ tɛma. Ale musu-mansɛ ya Mansa Silamɛni taran min kɛ Yerusalɛm soe burɔ, a ara a miri nyinikalɛ min bɛɛ ma, a ya mansɛ manyinika wonu ma.

³Ala nyinikalɛ wo do-wo-do ma Mansa Silamɛni kɔndɔfili. A ya wo bɛɛ yabi a kilɛ fɛ.

⁴Siba musu-mansɛ ya a tole masɔ mansɛla hɛnkilimaya-kumɛnu na. Wo kɔma, musu-mansɛ wo tara Mansa Silamɛnina bolon sɔnɛ mafɛlɛn.

⁵Mansɛ ye dɔn-fen-sufa min dɔnna ala tebulu kuma, musi wo ya wonu yen a yɛ la min kɛ, a yɛ bɔra wonu na ka kawa. A ya ala mɔgɔ-banu sigi-bole yen anu sansan-yili ma tebulula foolɛ rɔ nya min, a yɛ bɔra wonu fanan na ka kawa. Wo kɔma, a ya mansɛla wɔli-kɛlɛnu makiri-nya anubɛ ala baan-bɔlɛnu yen nya min, a yɛ bɔra wonu fanan na ka kawa. Wo kɔma fanan, a tara Mari Bato-Bɔn la ka saraka-mintantɛnu yen Mansa Silamɛni ye minnu dila Mari ma nyɔ. A ya kɛ dama yen a yɛ la min kɛ, a kawara ha a ya a bole sa a dɛ la.

⁶A ya a fɔ Mansa Silamɛni ye ko, “N bara ita hɛnkilimaya-koe min bɛɛsi lamɔɛn nta nyamanɛ rɔ nun, tonyɛ le wonu na.

⁷Ni n ma na a rayen n yɛ la nun, n ti la a la hali! N bara minnu tayen kɛ la, wo kolo ka tenbi min takaranta n ye pirr! Anu tara ita hɛnkilimayɛ anubɛ ita fen-tigiyɛ rakaran n ye nya min, n bara na a rayen n yɛ la nya min kɛ la, kɛ tenbira a rakaran wo la.

⁸Ila mɔgɛnu anubɛ ila mɔgɔ-ba minnu siginɛ i dafɛ, anu sewanɛ kamasɔrɔn anu bi ita hɛnkilimayɛ kun-nadiyɛ kɔrɔ.

⁹Tantolɛ ni kɛ ita Mari Alla ma. Ile ara Alla hɛnɛ min kɛ, woletɔ ale ara ile ma mansɛ la Isirɛla mɔgɛnu kun na. Isirɛla mɔgɛnu keninɛ Mari bolo min kɛ tolon, woletɔ a ara ile ma mansɛ la anu kun na alako i ni tɔnnu mabalan ka kitinu tɛgɛ telenbagayɛ la.”

¹⁰ Musu-mansɛ wo ya Mansa Silamɛni sanba kɛnɛ anubɛ dugu-kɔrɔ-nɔnfuli siyaman na. Wo kɔma, a ya sɛnɛ min di a ma, wo gbiliyɛ anubɛ fui-fan bɔrɔ bi-wɔrɛ rakɛn de! Ale Siba musu-mansɛ wo nara kɛnɛ min nyɔgɛ la mansɛ ye, mɔgɔ-wo-mɔgɔ ma ke nala wo nyɔgɛ la tun.

¹¹(Mansa Hairamna kulɔn minnu nara ka bɔ Ɔfiri nyamanɛ rɔ, wonu nara sɛnɛ-siyaman na anu tɔ nun. Wo kɔma, ale kulun kelan kɛnu denu nara kɔlɔma-hakikɛnu anubɛ dugu-kɔrɔ-nɔnfulinu na anu tɔ ka bɔ Ɔfiri nyamanɛ rɔ.

¹²Mansa Silamɛni ya kɔlɔma wonu denu bi ka anu ma Marita Bɔn anubɛ a nyɛrɛta bolon sɛnbɛ-don-fannu na. A ya kɔlɔma-su wonu denu bi ka anu ma sɔrɔnnu anubɛ bɔlɔnnu na ka wonu don fɔli-kɛlɛnu bolo. Ka a bi wati wo ma ha ka a sigi kaka la, mɔgɔ-wo-mɔgɔ ma ke kɔlɔma-su kelan wo lanala Isirɛla nyamanɛ rɔ.)

¹³Mansa Silamɛni ya musu-mansɛ wo diyana-fannu bi ka wonu sa a masara-fannu kuma. Anubɛ a gba-fɛ-bilalɛnu sɛgira Siba nyamanɛ rɔ.

¹⁴Yilanu taranta duti dila Mansa Silamɛni ma min kɛ, ale fanan bi tɔnɛ sɔrɔnna anuna yilayɛ fɛ. Arebiya mansɛnu bi a sanbala. Hali ata sigisɔn-mansɛnu minnu bi Isirɛla nyamanɛ rɔ, wonu bi hinala a la. Min sanɛ wo kuma, san-bo-san Mansa Silamɛni si sɛnɛ sɔrɔn minna gbiliyɛ anubɛ fui-fan bɔrɔ kɛmɛ sawa, bɔrɔ bi-sawa ani bɔrɔ sawa (333) rakɛn de!

¹⁶Silamɛni ya kɛlɛ-dannu matanka-fen kɛmɛ fila ladan ka sɛnɛ sa wo bɛɛ ma. A matanka-fen-kelan-sɛnɛ, wola gbiliyɛ anubɛ fui-fan pani-kunbɛ-nya sawɛ rakɛn de!

¹⁷Wo kɔma, a ya kɛlɛ-dannu matanka-fen-dɔgɔma kɛmɛ sawa ladan ka sɛnɛ sa wonu fanan ma. Sɛnɛ min nyɔgɔn sanɛ a matanka-fen-dɔgɔma kelan wo do ma, wola gbiliyɛ anubɛ fui-fan pani-kunbɛ-nya kelen ani a talɛ rakɛn de! Mansa Silamɛni ya matanka-fan wonu namara bɔn wo la min kelenɛ ko “Lɛbanan Gbɔngbɔn Kɔlɔma Bɔn.”

¹⁸Wo kɔma, a ya sogo-ba-nyin ladan mansaya-waganɛ la ka sɛnɛ-hakikɛ sa wo dama ma.

¹⁹Kin-sɔ-tina wɔrɔ siginɛ ye yɛlɛla anu nyɔgɔn kuma ka ke mansaya-waganɛ wo ma. Yarɛla muninyɛ tan-ni-fila ladannɛ yɛlɛla kin-sɔ-tina wɔrɛ wo tɔnkɔn filɛ bɛɛ rɔ. A kɔɛn filɛ sa tinɛ tɔnkɔn rɔ, yarɛla muninyɛ ladannɛ wonu fanan ma. Mansɛ lɛngbɛn tinɛ wo latintannɛ.[9] Ala mansaya-waganɛ wo nyɔgɔn sa mansa-wo-mansa bolo duninya rɔ fɔ ale kelen pe.

²¹Ala yi-lafɛnu anubɛ ala bonna-mirannu, wo damasi ladanta sɛnɛ le la. Ala bɔn min kelenɛ Lɛbanan Gbɔngbɔn Kɔlɔma Bɔn, miran minnu bi bɔn wo la, wo bɛɛ ladanta sɛnɛ le la. Anu ma miran-wo-miran ladan wodi-gbɛ la mansɛ ye bawo anu ma wodi-gbɛ lɔn fen-koloma la ata wati wo rɔ.

²²Kulun-siyaman bi ale mansɛ bolo kɔgɔ-yi kuma. Wonubɛ Mansa Hairamta kulɔnnu bi tala anu nyɔgɔn fɛ. Kulɔn kɛnu ba ta san fila, a sawa nyɔgɛ, anu si sɛgi sɛnɛ anubɛ wodi-gbɛ anubɛ sogo-ba-nyin anubɛ gbɔn-kɛndɛ anubɛ wɔrɔn-kɛndɛ la anu bolo Yerusalɛm.

²³Mansa Silamɛni mara fen-tigi anubɛ hɛnkilimɛ la ka tenbi mansɛ bɛɛ la duninya rɔ.

²⁴Alla ya hɛnkilimaya-kumɛ min di Mansa Silamɛni ma, a sɔgɛ ya duninya-mɔgɛnu bira ka ta anu tole masɔ wo la.

²⁵San-bo-san, min ba wuli tala bɔla a wara, wo si a sanba. Donu si ta wodi-gbɛ la, donu si ta sɛnɛ la, donu fanan si ta duruku-ba la, donu si ta kɛlɛ-kɛ-fan la, donu si ta kɛnɛ la, donu si ta soeenu na, donu si ta sofɛlɛnu na anu bolo.

²⁶ Mansa Silamɛni ya kirindi min sɔrɔn, waga kelen, kɛmɛ nani (1,400). A ya kɛlɛ-kɛ-soee min nadɛn a nyɛrɛ ye, waga tan-ni-fila (12,000). A ya donu namara Yerusalɛm soe burɔ. A ya donu namara soe donu tɔ.

²⁷Mansa Silamɛnita wati rɔ, wodi-gbɛ rakanɛ Yerusalɛm soe burɔ iko kuru-kundi. Lɛbanan fɛran minnu dɛ gbɛlɛ, wonu bi nyɔ duk! Kurukurun ti a ban, tarali ti a ban. Anu siya iko kɔlɔma minnu bi anu halala-nyamanɛ rɔ.

²⁸ Mansa Silamɛnina yilanu ya soeenu san a ye Musiri nyamanɛ anubɛ Silesiya nyamanɛ rɔ.

²⁹Anu ya kirindinu san a ye Iyipiti nyamanɛ rɔ. Wo kɔma, anu denu ya wonu mayira Hɛti mansɛnu anubɛ Siriya mansɛnu ma. Anu ya soeenu mayira wodi-gbɛ la minna gbiliyɛ anubɛ fui-fan pani-nya kelen ani a talɛ rakɛn. Anu ya kirindi wonu mayira wodi-gbɛ la minna gbiliyɛ anubɛ fui-fan pani-kunbɛ-nya wɔrɔ rakɛn de!