Read Kuranko 1 Mansɛnu 11 Bible Online

1 Mansɛnu 11 - Kuranko bible

1 Mansɛnu 11

¹ Hali Iyipiti mansɛla dunmusi bɔnɛ a la, nyamani-gbɛrɛkɛ-dunmusinu diyara Mansa Silamɛni ye. Woletɔ a ya dunmusi donu furu ka bɔ Mohabu anubɛ Saidon anubɛ Amon anubɛ Idɔm nyamanɛnu tɔ. A ya Hɛtinuna dunmusi donu furu fanan.

² Hali Mari ara tɔn sigi Isirɛla mɔgɛnu ma ko anu kana sibolo-gbɛrɛkɛ-dunmusu-wo-dunmusu furu, ale Mansa Silamɛni ya a tui ka furi kɛ sibolo-gbɛrɛkɛ-mɔgɛnu ma. Mari ya tɔn wo sigi bawo a ya a lɔn ko anu bi donna musi wonuta bɛsi-kɔ-koe rɔ. Hali wo, a niyi burita ala musinu fɛ.

³A ya mansa-den kɛmɛ wɔrɔnfila (700) furu. Wo kɔma, a ya musi kɛmɛ sawa (300) ma a fɛ-sigi-musinu na. Ala musu-siyamɛ wonu ya a ma, a ya a kan-kɔ sɔ Alla la.

⁴San-siyaman tenbinɛ, musi wonu ya Mansa Silamɛni yisi tintan anuna bɛsɛnu bara la. A ma a telen ata Mari Alla ye iko a fa Mansa Dawuda duruta a mala nya min nun.

⁵A donta Saidon kɛnuna bɛsi Asitɔra kɔ-koe rɔ min nadannɛ musila muninyɛ rɔ. A kɛnɛna Amonnuna bɛsɛ fanan kɔla min tɔgɛ Molɛki. Wo wara-koe sɔgɔ labɔnɛ Alla la lass!

⁶Mansa Silamɛni bilara Mari la. A ma sɔn a latelenna Mari ye iko a fa Mansa Dawuda ya a ma nya min.

⁷A ya bɔn sɔ Mohabu kɛnuna bɛsi Kimasi ye kɔnkɛ kuma Yerusalɛm soe tele-bɔɛ wara la. Bɛsɛ wo sɔgɔ labɔnɛ Alla la. Wo kɔma, a ya bɔn sɔ Amonnuna bɛsi Molɛki ye fanan kɔnkɛ wo kuma.

⁸Wo kɔma, a ya bɛsi-kɔ-tinɛ donu sɔ ala musi bɛɛ ye, wonu si to sarakɛnu bɔla kan min ka isɛnti mintan anuna bɛsɛnu ye.

⁹Hali Isirɛlata Mari Alla ara a nyɛrɛ yira Mansa Silamɛni na kiyo rɔ nun iko fila, ado Mari ara a fɔ a ye ko a kana don bɛsi-kɔ-koe rɔ, a ma Allata kumɛ bira fɔ ka a kan-kɔ sɔ Mari la. Wo le ya a ma, Mari fonde bɔra Mansa Silamɛni kuma.

¹¹Mari ya a fɔ a ye ko, “Bawo i ma nta kumɛnu to a gbɛ rɔ, ma sarata nna sereya minnu ma, i wara wonu tinya, fɔ n ba nyamanɛ kɛ bɔ i bolo ka a di ila wɔli-kɛlɛ do ma.

¹²Kɔnɔ bawo ka a tɛgɛ i fa Dawudala ko ma, fananta i ye i kɛndɛ la, n ti mansayɛ kɛ bi i bolo, fɔ ila dan min bi sigila i gbɛ rɔ.

¹³Ka a tɛgɛ nna wɔli-kɛla i fa Dawuda anubɛ Yerusalɛm soela ko ma n bara min ma n halala-soe la, n ti nyamanɛ kɛ dama to ila dan bolo. Fɔ bɔnsɔn kelen pe, n bi wo le tola ila dan wo ye.”

¹⁴Mari ya a ma, Mansa Hedadi min bi Idɔm nyamanɛ kun na, wo wulita Mansa Silamɛni kan ma.

¹⁵Idɔm nɔ-koe Mansa Dawuda bolo tenbi-n-kɔmɛ, yanni Mansa Hedadi ni koloya tumɛ min, wo ya a taran, Mansa Dawudata kɛlɛ-den-kunyɛ Yohabu ara ta furu togon tinɛ Idɔm nyamanɛ rɔ nun. Karɛ wɔrɔ kɔrɔ, anubɛ ala kɛlɛ-dannu siginɛ nyɔ. Karɛ wɔrɛ wo kɔrɔ, anu banta kei bɛɛ fagala fɔ Mansa Hedadi anubɛ a fala wɔli-kɛlɛ donu minnu ya anu buri ka Iyipiti nyamanita-kilɛ bira.

¹⁸Mansa Hedadi anubɛ a fala wɔli-kɛlɛnu bɔra Midiya nyamanɛ rɔ ka ta furr, fɔ Paran wulɛ rɔ. Wo kɔma, mɔgɛ donu tara kofu anu ma nyɔ rɔ. Anu dama bɔra nyɔ ka ta ha Iyipiti nyamanɛ rɔ. Anu ke mansɛ ma, wo ya anu yiya ka dɔn-fan di anu ma. A ya dugi do di anu ma fanan.

¹⁹Mansa Hedadi diyara Iyipiti mansɛ ye ha mansɛ wo ya ala musi, Tapanisi, wo dɔgɔ-musi di Mansa Hedadi ma.

²⁰Wo ya den-kei kelen sɔrɔn a ye min tɔgɛ Kɛnubati. Wonubɛ Iyipiti mansɛla dannu makolota anu nyɔgɔn fɛ mansɛla musi bolo.

²¹Mansa Hedadi ya a lamɔɛn min kɛ Iyipiti nyamanɛ rɔ ko Mansa Dawuda anubɛ ala kɛlɛ-den-kunyɛ Yohabu ara faga, a ya a fɔ mansɛ ye ko, “Sɔ, n ni sɛgi nta nyamanɛ le tɔ gbɛ!”

²²Mansɛ ko, “Nfen mara? N bara i beli fan do le la? Wo le ye a mala, i ye tala?” Mansa Hedadi ya a fɔ mansɛ ye ko, “Ta-sɔgɛ ye n na tun!” Woletɔ a sɛgira a warɛ Idɔm nyamanɛ rɔ.

²³Alla ya a ma, Ilayadala den Reson wulita Mansa Silamɛni kan ma fanan. Mansa Hadadisa min bi Soba nyamanɛ kun na, Mansa Dawuda ya wo nɔ kɛlɛ rɔ nun anubɛ Siriya kɛlɛ-dan minnu nara a dɛnbɛ tinɛ kɛlɛ rɔ. Wo kɔma, ale Reson ya a buri Mansa Hadadisa kɔrɔ nyɔ le. A tara ma mɔgɔ-mabuilɛnuna kun-tigi la. Anubɛ ala keminɛ wonu tara sigi Damasika soe burɔ. Anu tara a ma Siriya mansɛ la nyɔ rɔ.

²⁵Mansa Silamɛnita wati rɔ, anubɛ Mansa Hedadi mara Isirɛla yogo-bɛrɛbɛrɛ la, ado a ya Mansa Silamɛni yakɔrɔ-mamɔ.

²⁶Nebatila den Yɛrabowami min bɔra Sɛrɛda soe burɔ Ifɛrɛm nyamanɛ rɔ, Mansa Silamɛnina mɔgɔ-ba do le ale la. A na tɔgɛ le Seruwa. Kɛɛ-musi le wo la. Ale Yɛrabowami murutiyara Mansa Silamɛni ma.

²⁷Murutiyɛ wo mara nya min, lunyɛ do, wo tumɛ Mansa Silamɛni ye lɛnbɛn-lɛnbɛnya-rasiginɛ wo rakɛla Yerusalɛm tele-bɔɛ wara la ka tarɛ lawuli tun,

²⁸a ya kemini-tagbɛlɛ do yen wɔlila min tɔgɛ Yɛrabowami. Bawo Yɛrabowami kɛ kolo gbɛlɛyanɛ wɔli-kɛ-tinɛ, woletɔ Mansa Silamɛni ya a ma fɔrɔsɔya-wɔli-kɛlɛnu kunyɛ la Ifɛrɛm anubɛ Manasa bɔnsɔnnuna nyamanɛ rɔ.

²⁹Lunyɛ do, Yɛrabowami wo bɔra Yerusalɛm soe burɔ. Nɛbi do bɔra Sailo min tɔgɛ Ahaya, duruku-ba-kurɛ ye a kan na. Wo nara ale Yɛrabowami taran kila-wɛ do la gbɛkole rɔ.

³⁰Ale Nɛbi Ahaya ya ala duruku-ba-kurɛ wo bɔ ka wo rafara sigi tina tan-ni-fila la.

³¹Ahaya ya a fɔ Yɛrabowami ye ko, “Ile ni a kundu tan bira bawo Isirɛlata Mari Alla ko a si Isirɛla nyamanɛ bi Mansa Silamɛni bolo. A ko a si bɔnsɔn tan don ile bolo.

³²Mari ko ka a tɛgɛ ala wɔli-kɛlɛ Mansa Dawuda anubɛ Yerusalɛm soela ko ma a ya min ma a halalɛ la, a ko a si bɔnsɔn kelen pe le to Mansa Silamɛni bolo.

³³Mari ko ni i ya a yen, a ye bɔnsɔn kelen pe tola Mansa Silamɛni bolo, a ye wo mala bawo mansɛ ara a kan-kɔ sɔ a la. A ko Saidon kɛnuna bɛsɛ min tɔgɛ Asitɔra, a ye wo kɔla. A ko Mohabu kɛnuna bɛsɛ min tɔgɛ Kimasi, a ye wo fanan kɔla. Amonnuna bɛsɛ min tɔgɛ Molɛki, a ye wo kɔla ka a madu wo kɔrɔ. Mari ko Mansa Silamɛni ara ala tɔn tinya. A ma sɔn ata tɔn-bira-koe ma iko a fa Mansa Dawuda duruta a mala nya min.

³⁴A ko fananta Mansa Silamɛni ye a niyi la, a ti nyamanɛ bɛɛ bi a bolo. Silamɛni si mansayɛ kɛ a siyi-tele-bɛɛ kɔrɔ. Mari ko ni i ya a yen, a ye wo mala, a ye wo mala ka a tɛgɛ a fa Mansa Dawudala ko ma, ale ara min yabɔ, ado wo ara ata sereyanu bira.

³⁵Mari ko a si nyamanɛ kɛ bi Mansa Silamɛnina dan bolo ka bɔnsɔn tan di ile ma nyamanɛ wo rɔ.

³⁶Mari ko bɔnsɔn kelen pe, a ye wo le tola Mansa Silamɛnina dan bolo. Mari ko Mansa Dawuda bɔnsɔnnu si to mala mansɛ la Yerusalɛm soe burɔ bawo ale Mari le ya Yerusalɛm soe wo yabɔ alako mɔgɛnu si to a batola kan min.

³⁷Mari ko a si ile Yɛrabowami ma Isirɛla mɔgɛnuna mansɛ la. A ko ile ye nyinina kan tinɛ min bɛɛ ma, i si wo bɛɛ sɔrɔn.

³⁸A ko ni ile ya ata kumɛnu bira a kilɛ fɛ ka ala sereyanu mabalan, a ko a si to i fɛ burubukai! I wara-koe ni diya Mari ye alako a ye min fɔla i ye, i ye wo mala iko Mansa Dawuda ye a mala nya min nun. A ko a si i ma Isirɛla mɔgɛnuna mansɛ la. A ko a ara ban a latɛgɛla ko a si ila mansaya-bɔn sɔ iko a ya a ma Mansa Dawuda ye nya min.

³⁹Mari ya kumɛ-laban min fɔ n ye, a ko a si Mansa Dawuda kegeyɛnu tɔrɔ ka a tɛgɛ Mansa Silamɛni hakɛla ko ma. Kɔnɔ a ko a ti to wo mala burubukai!”

⁴⁰Woletɔ Yɛrabowami faga-sɔgɛ ya Mansa Silamɛni bira. Ale Yɛrabowami ya a buri Mansa Silamɛni kɔrɔ ka ta a kerifa Iyipiti mansɛ la min tɔgɛ Sisaki. A tora nyɔ le ha Mansa Silamɛni ya so-sɛgi-kɛ.

⁴¹Mansa Silamɛni ya koe min bɛɛsi ma ala mansayɛ kɔrɔ anubɛ a ya hɛnkilimaya-koe min bɛɛsi ladan, wonu damasi sɛbɛnɛ Mansa Silamɛnina ko-kɔrɔta-karan kitabu rɔ.

⁴²San bi-nani, a ye mansayɛ la Isirɛla mɔgɛnu kuma Yerusalɛm soe burɔ.

⁴³A fagara tumɛ min, anu ya a togon a fa Mansa Dawudala luyi ma. Ala den Rihobowami sigira a gbɛ rɔ.