Read Kuranko 1 Mansɛnu 15 Bible Online

1 Mansɛnu 15 - Kuranko bible

1 Mansɛnu 15

¹Yɛrabowamila mansayɛ san tan-ni-segin-nyɔgɛ Isirɛla nyamanɛ rɔ, Mansa Rihobowamila den Abaya mara mansɛ la Yerusalɛm soe burɔ Yuda nyamanɛ rɔ. San sawa kɔrɔ, a ye Yuda mɔgɛnu kun na. Abasalɔmna dunmusi Meyakala dan le ale la.

³Mansa Abaya fanan ya hakɛ kɛ iko a fa ya a ma nya min. A ma a telen Mari ye iko a benba Mansa Dawuda ya a ma nya min nun.

⁴ Kɔnɔ ka a tɛgɛ Mansa Dawudala ko ma, Mari Alla ya dan di Mansa Abaya ma min si na a gbɛ bi. Yerusalɛm soe sɔra fanka rɔ ale Mari nyɛrɛ bolo.

⁵ Mari ya kɛ ma le bawo Mansa Dawuda taranta a sako kɛla nun fɔ Yuraya Hɛti kɛ wara-koe dɔrɔn.

⁶Kɛlɛ-nyɔgɔnyɛ min taranta Mansa Abaya wo fa Mansa Rihobowami anubɛ Mansa Yɛrabowami tɛma, kɛlɛ-nyɔgɔya-kelan wo le tora anubɛ Mansa Yɛrabowami tɛma Mansa Abaya siyi-tele-bɛɛ kɔrɔ. Abaya ya koe min bɛɛsi kɛ Yuda nyamanɛ rɔ wo tumɛ a ye mansayɛ la, anu ya wo damasi sɛbɛ Yuda mansɛnuna buku do rɔ.

⁸Wo kɔma, Mansa Abaya ya so-sɛgi-kɛ. Anu ya a togon Mansa Dawuda halala-luyi ma. Mansa Abayala den Esa sigira a gbɛ rɔ.

⁹Mansa Yɛrabowamila mansayɛ san-mogan-nyɔgɛ Isirɛla nyamanɛ rɔ, Mansa Abayala den Esa mara mansɛ la Yerusalɛm soe burɔ Yuda nyamanɛ rɔ. San bi-nani ani san kelen kɔrɔ, a ye Yuda mɔgɛnu kun na. A mama le Abasalɔmla den Meyaka la.

¹¹Mansa Esa ya Mari sako kɛ iko a benba Mansa Dawuda ya a ma nya min.

¹²Kɔli-kɛlɛ minnu bi yɛlɛnyɛ kɛla anuna bɛsi-kɔ-tinɛnu tɔ, a keimɛ wo, a musumɛ wo, a ya wo bɛɛ gben. A benbanu ya bɛsɛ minnu nadanni to, a ya wo damasi tinya.

¹³A ya a mama Meyaka wo bɔ mansa-musuyɛ la bawo a ara bɛsi-musumɛ Asura muninyɛ ladan min mamilita. A ya bɛsɛ wo bi ka a rakerikeri ka a mintan Kidirɔn lɛɛ rɔ.

¹⁴Hali Mansa Esa ma ban bɛsi-kɔ-tinɛ bɛɛ tinyana ata nyamanɛ wo rɔ kɔnɔ hali wo, ale ma bɔ Mari fɛ a siyi-tele-bɛɛ kɔrɔ.

¹⁵Mansa Esa ya sɛnɛ anubɛ wodi-gbɛ anubɛ miran donu bi anubɛ a fa ara minnu dantɛgɛ Mari ma nun ka wonu nadon Mari Bato-Bɔn la.

¹⁶Yuda Mansa Esa wo, Isirɛla Mansa Beyasa wo, kɛlɛ-nyɔgɔya kelan wo taranta anu denu fanan tɛma anuna mansaya-wati bɛɛ rɔ.

¹⁷Isirɛla Mansa Beyasa tara Yuda mɔgɛnu kan ma. A ya Rema soe bira. A ya wo ma so-latankanɛ la alako a si kilɛ tɛgɛ Yuda mɔgɛnu ma ka a lagbɛlɛya anu kuma. Mɔgɔ ti don, mɔgɔ ti bɔ Yuda nyamanɛ rɔ.

¹⁸Sɛnɛ anubɛ wodi-gbɛ minnu bi Mari Bato-Bɔn anubɛ ata bolɔn la, Yuda Mansa Esa ya wonu bi. A ya wonu don ata mɔgɔ-ba donu bolo. Wonu tara wonu to tinɛ Siriya Mansa Bɛnhedadi ma Damasika soe burɔ. Mansɛ wo fa tɔgɛ le Tabirimɔn. A benba tɔgɛ le Hisiyɔn. Mansa Esa ya a sara ala mɔgɔ-ba wonu na ko anu ni ta a fɔ Siriya mansɛ wo ye ko,

¹⁹“Ma ni to kan kelen tɔ iko ma fanu bi nya min nun. I sanbɛ le sɛnɛ anubɛ wodi-gbɛ kɛnu na alako wobɛ Isirɛla Mansa Beyasa kana to kan kelen tɔ. Wo si a ma, mansɛ wo fanan ni ala kɛlɛ-dannu bɔ nta nyamanɛ rɔ.”

²⁰Kilayɛ wonu kenɛ Siriya mansɛ wo ma, anu ya anu dantɛgɛ a ye. Mansa Esa ya mɔgɔ-ba wonu sɔ min na, ale fanan sɔnta wo ma. Wo le ya a ma, ale fanan ya ala kɛlɛ-den-kunyɛnu anubɛ ala kɛlɛ-dannu nata ka ta bui Isirɛla mɔgɛnuna so-kunbɛnu ma. Anu ya soe minnu bi Isirɛla nyamanɛ rɔ, wonu tɔgɛ le kɛnu na, Iyɔn wo, Dan wo, Ebɛli-Bɛti-Meyaka wo, anubɛ Kalili dalɛla foolɛ bɛɛ. Wo kɔma, anu tara Nafatali bɔnsɔn-mɔgɛnuna dugi bɛɛ bi anu bolo.

²¹Mansa Beyasa ya a lamɔɛn min kɛ ko Siriyanu bara ta bui ala nyamanɛ ma, a ya Rema soe latanka-ko-wɔlɛ boloka ka ta Tirisa soe burɔ.

²²Mansa Esa fanan ya a lamɔɛn min kɛ ko Mansa Beyasa ara bɔ Rema soe burɔ, a ya a fɔ ala nyamanita-mɔgɔ kelen-kelan bɛɛ ye ko Mansa Beyasa ya kɔlɔma anubɛ kuri minnu ma so-latanka-fan la, anu ni wonu bi ka ta anu na, ado mɔgɔ-wo-mɔgɔ ti ke a bɔla wɔlɛ wo rɔ. Anu tara kuri wonubɛ kɔlɔma wonu na Misipa soe anubɛ Kiba soe rɔ Bɛnyamɛ nyamanɛ rɔ ka wonu ma soe wonu natanka-fan la.

²³Mansa Esa ya koe min bɛɛsi kɛ Yuda nyamanɛ rɔ anubɛ a ya anuna soenu natanka nya min wo tumɛ a ye mansayɛ la, anu ya wo damasi sɛbɛ Yuda mansɛnuna buku do rɔ. Kɔnɔ a kɔrɔyanɛ, a ya kirayɛ do sɔrɔn a kian ma.

²⁴Ale Mansa Esa ya so-sɛgi-kɛ tumɛ min, anu ya a togon a benba Mansa Dawudala halala-luyi ma. Ala den Yɛhosafati sigira a gbɛ rɔ.

²⁵Esala mansayɛ san fila nyɔgɛ Yuda nyamanɛ rɔ, Mansa Yɛrabowamila den Nedabu mara mansɛ la Isirɛla nyamanɛ rɔ. San fila kɔrɔ, Nedabu ye mansayɛ la Isirɛla nyamanɛ kun na.

²⁶A ya hakɛ kɛ Mari la iko a fa ya a ma nya min, ado a ya a ma fanan Isirɛla mɔgɛnu ya hakɛ kɛ.

²⁷Mansa Nedabu ya ala kɛlɛ-dannu bi. Anu tara bui Filisitinuna soe do ma min tɔgɛ Kibɛtɔn. Anu bi kɛlɛ wo kun na tumɛ min, Mansa Ahayala den Mansa Beyasa min bɔra Isakari bɔnsɔn rɔ, wo ya yanfɛ rabɛn Mansa Nedabu ma ka wuli a kan ma ka a faga wati kelan wo rɔ.

²⁸Wo le ya a ma, Mansa Beyasa sigira Mansa Nedabu gbɛ rɔ ka ma Isirɛla mɔgɛnuna mansɛ la. Mansa Esa min bi Yuda nyamanɛ kun na, kɛ mara wota mansayɛ san sawa nyɔgɛ le ma.

²⁹ Beyasa mɛ mansɛ la, a donta Mansa Yɛrabowamila denbayɛ fagɛ rɔ. Ni i ya a yen, Mansa Beyasa ya kɛ damasi ma bawo Mansa Yɛrabowami ya a ma, Isirɛlata Mari Alla fonde bɔra. Mansa Yɛrabowami ya hakɛ kɛ ka Isirɛla mɔgɛnu fanan nadon hakɛ rɔ. Marita kumɛ kɛ ara bɔ a la iko Nɛbi Ahaya Sailo kɛ ya a fɔ Mansa Yɛrabowami ye nya min nun.

³¹Mansa Nedabu ya koe min bɛɛsi kɛ Isirɛla nyamanɛ rɔ wo tumɛ a ye mansayɛ la, anu ya wo damasi sɛbɛ Isirɛla mansɛnuna buku do rɔ.

³²Yuda Mansa Esa wo, Isirɛla Mansa Beyasa wo, kɛlɛ-nyɔgɔya kelan kɛ taranta wonu fanan tɛma anuna mansaya-wati bɛɛ rɔ.

³³Esata mansayɛ san sawa nyɔgɛ Yuda nyamanɛ kun na, Mansa Ahayala den Beyasa fanan mara mansɛ la Isirɛla mɔgɛnu kun na. San mogan-ni-nani kɔrɔ, Mansa Beyasa ye mansayɛ la. A siginɛ Tirisa soe burɔ.

³⁴Ale fanan tora hakɛ kɛla iko a ya Mansa Yɛrabowami min taran a yarɔ, wo ye hakɛ kɛla nya min ka Isirɛla mɔgɛnu nadon hakɛ rɔ.