Read Kuranko 1 Mansɛnu 17 Bible Online

1 Mansɛnu 17 - Kuranko bible

1 Mansɛnu 17

¹ Nɛbi do bɔra Tisiba soe burɔ Kaliyadi nyamanɛ rɔ. A tɔgɛ le Ilaya. Nɛbi wo tara a fɔ Mansa Ehabu ye ko, “N bi Isirɛlata Mari Alla-nimɛ min batola, n bara n keli wo tɔgɔ rɔ ko duri ti yigi, bandɛ ti na san-dande kɛ kɔrɔ Isirɛla nyamanɛ kɛ rɔ yan fɔ nde, Ilaya wa a fɔ ko bandɛ ni na.”

²Wo kɔma, Mari ya a fɔ Nɛbi Ilaya ye ko,

³“I bɔ kan tinɛ kɛ rɔ yan. I kunyɛ telen tele-bɔɛ waralɛ la. I ni ta i dogon yi-nɛ do dafɛ min bi Yorodan bɛ tele-bɔɛ wara la. Yi-nɛ wo tɔgɛ le Kereti.

⁴I si i min yi-nɛ wo la nyɔ rɔ. N bara a fɔ mansa-wala-konanu ye ko anu ni i de-nyini nyɔ rɔ.”

⁵Nɛbi Ilaya ya Mari Allata kumɛ to a gbɛ rɔ. A tara a sigi yi-nɛ wo dafɛ.

⁶Mansa-wala-konanu tora nala sogenu anubɛ biredinu na a ye sɔgɔma ani wurɛ la. A ya yi wo min.

⁷Wati tenbinɛ, yi wo gbalata bawo banda sa nala.

⁸Yi-nɛ wo gbalata min kɛ, Mari ya a fɔ Nɛbi Ilaya ye ko,

⁹ “Ta Sarɛfati min bi Saidon soe bolɔn do rɔ. N bara a fɔ kɛɛ-musi do ye nyɔ ko a ni i de-nyini nyɔ rɔ.”

¹⁰Nɛbi Ilaya ya Sarɛfati kilɛ bira. A ke soe don-dɛ ma, a ya kɛɛ-musi do yen sɔgɔ-nyinɛ la. A ya a fɔ musi wo ye ko, “N kɔ yi-ni tɔ, n ni n min.”

¹¹Musi ye tala yi wo bila, a ya a kuli lake a ma ka a fɔ a ye ko, “I yandi, na biredi-kundu-ni na n ye fanan.”

¹²Musi wo fanan ya a fɔ a ye ko, “A ye mabɛ ita Mari Alla-nimɛ tɛma, biredi-wo-biredi sa n bolo. Min bi n bolo nyɔ kaka, fɔ dɛgɛ-munke bolo-nya kelen anubɛ tulu pɛtɛpɛtɛ-ni! Wo ye n bolo bɔnku-daga-nɛnu tɔ. N nara sɔgɔ kɛ nyini tinɛ le alako n ni ta dɛgɛ-munku-nɛ wo ladan mabɛ nna dan ye. Mala dɔn-fen-laban le wo la. Ma wa ban a dɔnna tumɛ min, ma si sigi ka sayɛ makɔnɔ.”

¹³Nɛbi Ilaya ya a fɔ a ye ko, “Wo hɔnya kana sigi i kan la. I wa ke bɔn la, i ni biredi-nɛ do ladan nde fɔlɔn ye ka bɔ ila dɛgɛ-munke wo rɔ. I ni na wo don n bolo. Wo kɔma, i ni na to tala a toe ladanna wobɛ ila dan ye.

¹⁴Bawo Isirɛlata Mari Alla ya a fɔ n ye ko dɛgɛ-munke anubɛ tuli ti ban miran wonu tɔ fɔ ale Mari wa bandɛ lana tumɛ min.”

¹⁵Kɛɛ-musi wo tara ka biredi wo ladan iko Nɛbi Ilaya ya a fɔ a ye nya min. Anubɛ Nɛbi Ilaya tora dɔn-fan sɔrɔnna tele-wo-tele.

¹⁶Tuli anubɛ dɛgɛ-munke ma ban kɛɛ-musila miran wonu tɔ iko Mari ya a fɔ Nɛbi Ilaya ye nya min.

¹⁷Wati tenbinɛ, kɛɛ-musi wola dan kirayara. Wola kirayɛ tara yarɔ ha a fagara.

¹⁸Kɛɛ-musi wo ya a fɔ Nɛbi Ilaya ye ko, “Ile Allata mɔgɛ, nfenna i wara kɛ ma n na? I nara le alako ka n hɛnkili bila n hakɛnu ma ka nna dan faga, wa?”

¹⁹Nɛbi Ilaya ya a fɔ ko, “Ila dan don n bolo.” Nɛbi Ilaya ya dan wo bi a bolo. A yɛlɛta a yiyɛ la san-bɔn la. A ya dan wo sa ala sofa rɔ.

²⁰A ya a kuli mayɛlɛ Mari madiya tinɛ, a ko, “E, nta Mari Alla! Nfenna i wara tɔrɔyɛ lana musi kɛ kuma ka ala dan faga? Musi kɛ le ye n fɛ-birala ka ko-siyaman kɛ n ye.”

²¹ Nɛbi Ilaya ya a sa dan wo kuma iko sawa. A ya Alla matara. A ya a fɔ ko, “E, nta Mari Alla, dennɛ kɛ niyi lasɛgi a rɔ tun.”

²²Mari ya Nɛbi Ilayala matarali-kan yabi. A ya dennɛ wo niyi lasɛgi a rɔ tun.

²³Nɛbi Ilaya ya dan wo bi ka ta a la a na wara. A ya a fɔ a ye ko, “I ma ila dan yen? A ara kɛndɛya.”

²⁴Musi wo ya a fɔ a ye ko, “N bara a lɔn gbɛ ko Allata mɔgɔ-bɛrɛbɛrɛ le ile la. Ile ye kumɛ minnu fɔla, wonu bɔra Mari le bolo.”