Read Kuranko 1 Mansɛnu 19 Bible Online

1 Mansɛnu 19 - Kuranko bible

1 Mansɛnu 19

¹Mansa Ehabu tara a dantɛgɛ ala musi Yɛsɛbɛli ye. Nɛbi Ilaya ya koe min bɛɛsi ma anubɛ a ya Beyalita nɛbinu faga nya min, a ya wo bɛɛ rakaran a ye.

²Yɛsɛbɛli wo ya a sara Nɛbi Ilaya wara ka a fɔ a ye ko, “Kɛ nyɔgɔn tumɛ sina, ni n ti a ma i la iko i wara a ma nna nɛbinu na nya min, alamɛ nna bɛsɛnu ya n gbesi a rɔ.”

³Nɛbi Ilaya kilanta dɔgɔma-ma-de! A ya a buri. Anubɛ ala wɔli-kɛlɛ tara Biri-Siba soe burɔ Yuda nyamanɛ rɔ. Anu ke nyɔ, a ya ala wɔli-kɛlɛ wo to nyɔ.

⁴ Telen-gbɛn, Nɛbi Ilaya ye tagamana wulɛ rɔ. A ke kɔlɔma-kuru-wɛ do kɔrɔ, a sigira wo ninɛ la. A sɔgɔ labɔra a nyɛrɛ la. A ya Alla matara, a ko, “E, Mari, a la ara gbɛlɛya n kuma. N niyi bi kelenna! N ni ta n benbanu taran lakira.”

⁵A ya a sa kɔlɔma-kuru-wɛ wo kɔrɔ. Kinɔgɛ tenbira a ma peru! Melika nara a lakunden. A ya a fɔ a ye ko, “I lasɔ. I ni fen dɔn.”

⁶Nɛbi Ilaya ya a kunyɛ kɔrɔbi wati min, a ya biredi-lɔngbɔn anubɛ yi-barɛ yen a kun kantɔ. A ya wo dɔn ka a min. A ya a sa tun.

⁷Marita melika nara a lakunden tun. A ya a fɔ a ye ko, “I lasɔ. I ni fen dɔn. Ni wo ma, tagama kɛ si a lamoya i kuma.”

⁸Nɛbi Ilaya ya a lasɔ tun ka fen dɔn. Wo le ya a ma, a ya sɛnbɛ sɔrɔn. Su bi-nani tele bi-nani, a ye tagamana ka ta Allata kɔnkɛ kuma, Sinayi, kɔni.

⁹A ke Sinayi kɔnkɛ kuma, a tara ki faran do la. A ma mɛ, Mari ya a fɔ a ye ko, “Ilaya, i ye nfen mala yan tɔ?”

¹⁰ Nɛbi Ilaya ya a fɔ a ye ko, “Alla Sɛnbɛ-Bɛɛ-Tigi, n bi ile le kelen pe batola tuma-wo-tuma. Kɔnɔ sarama-kan min bi wobɛ Isirɛla mɔgɛnu tɛma, anu bara anutɛ wo tinya. Anu bara ila saraka-mintan-tinɛnu tinya ka ita nɛbinu faga. Nde kelen pe le ye nɛbiyɛ la gbɛ! A sɔgɛ ye anu na, anu ni nde fanan faga.”

¹¹Mari ya a fɔ Nɛbi Ilaya ye ko, “Bɔ faran la. I ni i sɔ n yakɔrɔ kɔnkɛ kuma bawo n ba tenbi, i ni n mafɛlɛn.” Mari ya fɔn-belebele-wɛ lana. Kɔnkɛnu tafarata. Kurinu tatiira kɔnɔ Mari sa fɔnyɔ wo rɔ nun. Fɔnyɔ wo ratora min kɛ, dugi yɛrɛyɛrɛnta. Kɔnɔ Mari sa dugi yɛrɛyɛran wo rɔ nun.

¹²Dugu yɛrɛyɛran wo ban, tɛ birara dugi la a nyɛrɛ ma. Kɔnɔ Mari sa tɛ wo rɔ nun. Tɛ wa ban, wɛwɛ-kan bɔra.

¹³Nɛbi Ilaya ya wɛwɛ-kumɛ wo lamɔɛn min kɛ, a ya ala duruki burun a yɛ la. A bɔra faran la ka a sɔ a dɛ la. A ya manyinikali-kan lamɔɛn, a ko, “Ilaya, ile ye nfen mala yan tɔ?”

¹⁴Nɛbi Ilaya ya a yabi ko, “Alla Sɛnbɛ-Bɛɛ-Tigi, n bi ile le kelen pe batola tuma-wo-tuma. Kɔnɔ sarama-kan min bi wobɛ Isirɛla mɔgɛnu tɛma, anu bara anutɛ wo tinya. Anu bara ila saraka-mintan-tinɛnu tinya ka ita nɛbinu faga. Nde kelen pe le ye nɛbiyɛ la gbɛ! A sɔgɛ ye anu na, anu ni nde fanan faga.”

¹⁵ Mari ya a fɔ a ye ko, “Sɛgi i kɔma wulɛ rɔ Damasika soe dafɛ. I wa ke nyɔ tumɛ min, i ni mansaya-tuli kɛ Hesiyɛli kunyɛ rɔ alako a ni ma Siriya mansɛ la.

¹⁶ Wo kɔma, i ni mansaya-tuli kɛ Nimisila den Yehu kunyɛ rɔ alako a ni ma Isirɛla mɔgɛnuna mansɛ la. Wo kɔma, i ni ta tuli kɛ Sefatila den Ilaisa kunyɛ rɔ, Abɛli Mɛhola kɛ, kɔni. Wo si ma nɛbi la ile gbɛ rɔ.

¹⁷Ni min ya a buri Hesiyɛli kɔrɔ, Yehu si wo faga. Ni min ya a buri Yehu kɔrɔ, Ilaisa si wo faga.

¹⁸ Kɔnɔ hali wo, n si mɔgɔ waga wɔrɔnfila to a niyi la Isirɛla nyamanɛ rɔ bawo wonu denu telennɛ n ye. Anu ma anu madu Beyali kɔrɔ. Anu ma a sunbu.”

¹⁹Nɛbi Ilaya bɔra nyɔ. A ya sara-ninki mogan-ni-nani taran wɔlila fila-filanyɛ ma. Kɔnɔ Ilaisa le ye a to filɛ lawɔlila doi wonu kɔma. Nɛbi Ilaya ya ala nɛbiya-duruki bɔ a kan na ka a don Ilaisa kan na.

²⁰Nɛbi Ilaya tanɛ, Ilaisa fanan ya ala sara-ninkinu boloka ka Nɛbi Ilaya sagaran. A ke nɛbi ma, Ilaisa ya a fɔ a ye ko, “I yandi, n ni ta n fa anubɛ n na kɔndɔn, n ni na to bilala i fɛ.” Nɛbi Ilaya ya a fɔ a ye ko, “Tana ma wo la. Awa, ta.”

²¹Ilaisa tara ala sara-ninki filɛ wonu faga. Kɔlɔma min kirinɛ wonu kan ma, a ya wo ma soge wo tɛ-sɔgɛ la. A ya ninki-soge wo di mɔgɛnu ma, wonu ya wo dɔn. Wo kɔma, a bilara Nɛbi Ilaya fɛ. Ale mara wola karan dan la.