Read Kuranko 1 Mansɛnu 21 Bible Online

1 Mansɛnu 21 - Kuranko bible

1 Mansɛnu 21

¹Kei do ye nyɔ, a tɔgɛ le Nebɔti. Nɔnbɔ-gbɔ-sɛnɛ ye a bolo Mansa Ehabula bolɔn dafɛ Yɛsɛreli soe dafɛ.

²Lunyɛ do, Mansa Ehabu ya a fɔ Nebɔti ye ko, “N bi nyinina ila nɔnbɔ-sɛnɛ kɛ ma bawo a ye nna bolɔn dafɛ le. N bi a fɛ ka fan donu ki nyɔ rɔ. Ni i si sɔn, n si kan-tina-hakikɛ do di i ma. Ni wo ma, n ni a san i ma.”

³Nebɔti ya a fɔ ale mansɛ ye ko, “Ka dugi kɛ latenbi i ma, alamɛ Mari ya n kisi wo ma bawo benba kɛɛ-dugi le.”

⁴Mansa Ehabu diminyanɛ sɛgira a warɛ bɔn la ka a tɛgɛ kumɛ wo ma Nebɔti ara min fɔ a ye. A ya a sa ala sofa rɔ ka a ya-lamunun dandan la. A ya a ban fen-dɔn-koe ma yisi-tinya bolo.

⁵Ala musi Yɛsɛbɛli tara a manyinika a ko, “Nfen bara i yisi tinya? Nfenna i ye i banna fen-dɔn-koe ma?”

⁶A ya a fɔ ala musi wo ye ko, “A sɔgɛ ye n na, n ni Nebɔtila dugi san a ma. Ni wo ma, n ni dugu-hakikɛ do di a ma kɔnɔ a ko n ti wo sɔrɔn muk!”

⁷Yɛsɛbɛli ya a fɔ a ye ko, “Mansɛ le ma ile la? I yisi-kimɛ. I lasɔ. Ta fen dɔn tinɛ. Nde si Nebɔtila dugi sɔrɔn de i ye.”

⁸Ala musi sigira ka kɛdi donu sɛbɛ iko mansɛ. A ya Mansa Ehabu tɔgɛ sa kɛdi wonu tɔ ka ale mansɛta tamasere sa kɛdi wonu ma. A ya kɛdi wonu nata kun-tiginu anubɛ mɔgɔ-ba-sɛbɛnɛnu ma Yɛsɛreli soe burɔ, ale Nebɔti siginɛ kan min.

⁹A ya min sa kɛdi wonu tɔ, a ko, “Mɔgɛ bɛɛ la ni dɛn ka sunyɛ don tele kelen kɔrɔ. Wo ni Nebɔti sigi mɔgɔ-banu tɛma.

¹⁰Wo ni karagbɛlɛ mɔgɔ fila sigi a yakɔrɔ. Mɔgɔ filɛ wonu ni to ko kelen tɔ, anu ni a fɔ ko, ‘Nebɔti kɛ le ya Alla anubɛ mansɛ rasɛ.’ Wo ni ale Nebɔti bira ka a labɔ soe kɔma. Wo ni a mabon kuri la ha a ni faga.”

¹¹Kun-tiginu anubɛ mɔgɔ-ba-sɛbɛnɛ minnu bi Yɛsɛreli soe wo burɔ, wonu ya a ma iko Yɛsɛbɛli ya kɛdi sɛbɛ anu ma nya min.

¹²Anu ya anu kundɛn kan-tina-kelen ka tele-kelen-sunyɛ don. Anu ya Nebɔti sigi mɔgɔ-banu tɛma.

¹³Karagbɛlɛ fila sigira a telen tɔ. Wonu ya tɔgɛ sa a la ka a fɔ ko, “Nebɔti kɛ le ya mansɛ anubɛ Mari rasɛ.” Anu ya a labɔ soe kɔma ka a mabon, a fagara.

¹⁴Anu ya anu sara mansɛla musi Yɛsɛbɛli wara ko Nebɔti ara faga.

¹⁵Yɛsɛbɛli ya wo lamɔɛn min kɛ, a ya a fɔ ala kei Mansa Ehabu ye ko, “Nebɔti ara faga. A ya a ban dugi min dila i ma, ta wo ma i halalɛ la.”

¹⁶Tiriyante wo rɔ, Mansa Ehabu ya a lasɔ ka ta dugi wo bi.

¹⁷Nɛbi Ilaya min bɔra Tisiba soe burɔ, Mari ya a fɔ wo ye ko,

¹⁸“Ta Mansa Ehabu warɛ Samariya soe burɔ. I si a taran, a ye Nebɔtila dugi bi-koe rɔ.

¹⁹ I ni a fɔ a ye ko nde, Mari ko a ara mɔgɔ faga, wo ma a wasa, a ni ala dugi bi tun? I ni a fɔ a ye tun ko wulinu ya Nebɔti yele manɛ kan min, anu si ale fanan yele manɛ nyɔ rɔ, yɔ!” Nɛbi Ilaya tara.

²⁰Mansa Ehabu ya Nɛbi Ilaya yen tumɛ min, a ya a fɔ a ye ko, “N yoge, i wara n gba bɔ?” Nɛbi Ilaya ko, “Ɔn! Koe minnu ma di Mari ye, i wara i nyɛrɛ ma wonu malɛ la.

²¹Woletɔ Mari ko a si kasarɛ lana i kuma. A ko a si wobɛ i kebilɛnu halaki, a keimɛnu, kɔni, a yɔɔn wo, a hɔrɔ wo.

²²Mari ko wobɛ ila denbayɛnu si ma iko Nebatila den Mansa Yɛrabowami mara nya min. A ko wobɛ ila denbayɛnu si ma fanan iko Mansa Ahayala den Mansa Beyasa mara nya min. Mari ko a si wo ma bawo i wara a fonde labɔ ka Isirɛla mɔgɛnu nadon hakɛ rɔ.

²³ Mari ko wulinu si ila musi Yɛsɛbɛli furi dɔn Yɛsɛreli soe burɔ tarɛ dafɛ,

²⁴ado i na-kelen-nyɔgɛ minnu ba faga soe burɔ, wulinu denu bi wonu suyi dɔnna. Ni minnu fagara binyɛ rɔ, konanu denu bi wonu suyi dɔnna.”

²⁵(Mɔgɔ-wo-mɔgɔ sa nyɔ min bara bila Mari la ka ala ko-yogomɛ sa gbɛ rɔ iko Mansa Ehabu kɛ, ado ala musi Yɛsɛbɛli le ya a latuntun ko-yogomɛ kɛnu ma-tinɛ.

²⁶A ya kisimiriya-koenu nadan ka bɛsɛnu kɔ iko Amoranu bi a mala nya min nun, ado Isirɛla mɔgɛnu nanɛ nyamanɛ wo rɔ Mari ya Amora wonu denu gben anu yarɔ.)

²⁷Mansa Ehabu ya Marita kumɛ wo lamɔɛn Nɛbi Ilaya bolo min kɛ, a ya ala duruki rafara yisi-tinya bolo ka kasa-kurɛ kiri a la. A ya a ban fen-dɔn-koe ma, a kira sani kasa-kurɛ wo kuma, ado hali a tenbi tagamana, a yisi magboyanɛ.

²⁸Wo kɔma, Mari ya a fɔ Nɛbi Ilaya ye tun ko,

²⁹“I wara a yen Mansa Ehabu ye a famayigila n ye nya min? Ka a tɛgɛ ala famayigi wo ma, n ti kasarɛ wo lana anubɛ ala denbayɛnu kuma a siyi-tele-bɛɛ kɔrɔ. Fɔ ala danta wati rɔ, n ni na to kasarɛ lanala anu kuma.”