Read Kuranko 1 Mansɛnu 22 Bible Online

1 Mansɛnu 22 - Kuranko bible

1 Mansɛnu 22

¹San fila dɛgɛdɛgɛ, yisi-kimɛ ye Isirɛla mɔgɛnu anubɛ Siriyanu tɛma.

²Kɔnɔ a san sawa nyɔgɛ ma, Yuda Mansa Yɛhosafati tara Isirɛla Mansa Ehabu kɔndɔn tinɛ.

³Mansa Ehabu ya ala mɔgɔ-banu manyinika, a ko, “Nfenna ma ma ma raya ka Ramɔti-Kaliyadi soe bi Siriya mansɛ bolo, ado ma halalɛ le nyɔ la?”

⁴Mansa Ehabu ya Mansa Yɛhosafati manyinika, a ko, “I si kofu ma ma, wa? Ma ni ta Ramɔti kɛnu kɛlɛ?” Mansa Yɛhosafati ya a fɔ a ye ko, “I wulita tuma-wo-tuma, n bi i fɛ. I halalɛ le nna kɛlɛ-dannu anubɛ nna soeenu na.

⁵Kɔnɔ ma ni Mari fɔlɔn manyinika.”

⁶Wo le ya a ma, Mansa Ehabu ya ala nɛbi mɔgɔ kɛmɛ nani nyɔgɔn sufa kele ka wonu manyinika, a ko, “N ni ta Ramɔti kɛnu kɛlɛ, ka, n ka ta?” Nɛbi wonu ko, “Ta anu kɛlɛ. Mari si a ma, i ni nɔ-ko sɔrɔn anu ma.”

⁷Kɔnɔ Yuda Mansa Yɛhosafati ya a manyinika tun ko, “Nɛbi-gbɛrɛkɛ sa nyɔ rɔ min si Mari manyinika ma ye?”

⁸Mansa Ehabu ya a fɔ a ye ko, “Mɔgɔ kelen bi yan, Imilala den Nɛbi Mɛkaya, kɔni. Kɔnɔ wo ma di n ye mumɛ bawo a ti wɔlɔyiya-kuma-wo-kuma fɔ n ye min di n tole la fɔ a yogomɛ gbansan!” Mansa Yɛhosafati ya Mansa Ehabu makawandi ko, “A ma bɛn, i ni kuma-sufa kɛ fɔ muk!”

⁹Wo le ya a ma, Mansa Ehabu ya ala wɔli-kɛlɛ do sɔ ko a ni ta Nɛbi Mɛkaya kele a ye tiriya!

¹⁰Wo ya a taran, mansa filɛ kɛnu mayiginɛ anuna mansaya-waganɛnu tɔ gbere-kole ma Samariya soe don-dɛ la, anuna mansaya-durukinu bi anu kan na. Nɛbi-siyamɛ wonu bi wɔlɔyiya-kuma-fɔɛnu na anu yakɔrɔ.

¹¹Nɛbi do ye kɛnu tɛma, Kɛnayanala den Nɛbi Sɛdɛkaya, kɔni. Wo ya nɛgɛ donu bi ka anu nadan iko ninki-kere. A ya a fɔ Mansa Ehabu ye ko, “Mari ko i si Siriyanu fasafasan kɛlɛ rɔ iko ninki-tura-feremɛ si mɔgɛ fasafasan nya min. Wo le si a ma, i ni anu nɔ.”

¹²Nɛbi-siyamɛ wo dama ya kuma kelan wo le fɔ. Anu ya a fɔ ko, “Ta Ramɔti kɛnu kɛlɛ. Mari si a ma, i ni anu nɔ.”

¹³Mansa Ehabu ya kilayɛ min nata Nɛbi Mɛkaya kele tinɛ, wo ya a fɔ a ye ko, “N ya a to, nɛbi doinu bi a fɔla ko Mansa Ehabu si nɔ-ko sɔrɔn kɛlɛ rɔ. Ile fanan ni kuma kelan wo le fɔ de!”

¹⁴Kɔnɔ Nɛbi Mɛkaya ya a fɔ a ye ko, “A ye malebɛ Mari-nimɛ tɛma, a ye min fɔla n ye, n bi wo le latenbila mansɛ ma.”

¹⁵Ale nɛbi kenɛ Mansa Ehabu ma, mansɛ ya a manyinika ko, “Malebɛ Mansa Yɛhosafati ni ta Ramɔti kɛnu kɛlɛ, ka, ma ka ta?” Nɛbi Mɛkaya ya a fɔ a ye ko, “Awa, ta anu kɛlɛ tun. Fɔ i wa anu nɔ serr! Mari si anu don i bolo.”

¹⁶Kɔnɔ Mansa Ehabu ya a fɔ a ye ko, “N bara mɛ i makawandila iko siyaman, ni i ye kumala malebɛ Mari tɛma, fɔ i ni tonya-kunɛ fɔ n ye.”

¹⁷ Nɛbi Mɛkaya ya wɔlɔyiya-kumɛ fɔ a ye ko, “N bara Isirɛla kɛlɛ-dannu tanyɛnsɛnnɛ yen kɔnkɛnu kuma iko saga-fɛ-birala sa sagɛ minnu kun na. Mari ara a fɔ n ye ko, anu ni sɛgi anu barɛnu tɔ yisi-kimɛ rɔ dɔi, bawo kun-tigi sa anu kun na.”

¹⁸Mansa Ehabu ya a fɔ Mansa Yɛhosafati ye ko, “N ma a fɔ i ye nun? Kumɛ min ma di n tole la, kɛ si wonu denu fɔ n ye?”

¹⁹ Nɛbi Mɛkaya ya a fɔ a ye tun ko, “I tole masɔ Marita kumɛ la. N bara Mari mayiginɛ yen ala waganɛ rɔ Arinyɛni tɔ, ala melikanu kinkinɛ a la.

²⁰Ale Mari ya ala melikanu manyinika ko, ‘Yon si Mansa Ehabu yanfa ha a ni ta faga Ramɔti soe burɔ?’ Melika donu ya hɛnkili do labɔ. Melika doinu fanan ya hɛnkili-gbɛrɛkɛ labɔ.

²¹Kɔnɔ ala ban, melika do ya a madon Mari la, a ya a fɔ Mari ye ko, ‘Nde si a yanfa le.’

²²Mari ya wo manyinika, a ko, ‘Ile si ke a yanfala kama?’ Melika wo ya a fɔ Mari ye ko, ‘Nde si ta a ma, Mansa Ehabula nɛbi bɛɛsi ni ma foninya-fɔlɛ la.’ Mari ya a fɔ a ye ko, ‘Awa, nba, ta! I ni yanfɛ sigi a la bawo n bara la a la ko ile si a nɔ le.’ ”

²³Nɛbi Mɛkaya ya kumɛ kundon a ye ko, “A ara ma wo nya na le. Mari ara a ma, nɛbi kɛnu bara foninyɛ fɔ i ye ka i mayuwaya. Mari nyɛrɛ-nyɛrɛ ara ban a latɛgɛla ko i si kasara.”

²⁴A ban kɛ fɔla, Nɛbi Sɛdɛkaya tara a dɛ ratii, pɔ! A ya a fɔ a ma ko, “Marita sɛnbɛ ya nde boloka muntuma ka ta kuma ile ye?”

²⁵Nɛbi Mɛkaya ya a fɔ a ye ko, “Fɔ i wa ta i dogon tinɛ bɔn do burɔ lun min, i ni na to a lɔnna.”

²⁶Mansa Ehabu ya a fɔ a makandannɛ do ye ko, “Wo ni Nɛbi Mɛkaya kɛ bira ka ta a la so-tigi Amɔn wara. Wo ni a yira nna den Yohasi la.

²⁷Anu ni a ladon yele la. Anu kana fenfen di a ma fɔ biredi anubɛ yi ha n kɛndɛ ni sɛgi tun ka bɔ kɛlɛ rɔ.”

²⁸Nɛbi Mɛkaya ya a fɔ ale mansɛ ye ko, “Ni ile kɛndɛ sɛgira tun ka bɔ kɛlɛ rɔ, nba Mari ma kuma nde ye worɔ. Mɔgɛ bɛɛ ni a yili to nna kumɛ kɛ ko.”

²⁹Isirɛla Mansa Ehabu anubɛ Yuda Mansa Yɛhosafati tara Kaliyadi Ramɔti kɛnu kɛlɛ tinɛ.

³⁰Mansa Ehabu ya a fɔ Mansa Yɛhosafati ye ko, “Ma wa ta kɛlɛ rɔ tumɛ min, nde si n mayɛlɛma alako n ma ni filiya. Ile makirinɛ si to ila mansaya-kurɛnu tɔ.” Ale Mansa Ehabu ya a mayɛlɛma ka kura-gbɛrɛkɛnu bi.

³¹Kɔnɔ wo ya a taran, Siriya mansɛla kɛlɛ-den-kun-tigi mɔgɔ bi-sawa ani mɔgɔ filɛ minnu bi kirindinu kun na, a ya a fɔ anu ye ko anu denu kana na mɔgɔ-wo-mɔgɔ kɛlɛ fɔ Isirɛla mansɛ.

³²Wonu ya Yuda Mansa Yɛhosafati yen min kɛ, anu ya a lɔn ko Isirɛla mansɛ le ale la nun. Anu wulita a kan ma. Kɔnɔ Mansa Yɛhosafati gbele-gbelenta min kɛ,

³³anu ya a lɔn wo le ma ko Isirɛla mansa ma ale la. Anu ya a to nyɔ.

³⁴Kɔnɔ Siriya kɛlɛ-dan do ye nyɔ nun, wo ya ala kalabɛn lakɛ. Kalabɛn wo tara bɛn Isirɛla Mansa Ehabu la ka don a kɔgɔ-matanka-fan latugun tinɛ do rɔ. Mansa Ehabu ya a fɔ ala kirindi-laburilɛ wo ye ko, “N bara tanban. Ma sɛgi. Ma fara kɛlɛ la.”

³⁵Tele wo nyɛrɛ rɔ, anu ya a lɛngbɛn fan do rɔ ala kirindi rɔ. A yɛ bɛnnɛ tora Siriyanu ma, wonu bi kɛlɛ kɛla. Telen-gbɛn, anu bi kɛlɛ kun na. Yele bɔra a rɔ ha a tora yele tɛma ala kirindi rɔ. Wurɛ la ale mansɛ niyi bɔra.

³⁶Tele ara wuli buila, Isirɛla kɛlɛ-dan bɛɛ ya a lasɔnkɔ ko, “Bɛɛ ni sɛgi a warɛ soe burɔ.”

³⁷Mansa Ehabu fagara ka le. Anu tara a furi togon Samariya soe burɔ.

³⁸Anu ya ala kirindi bi ka ta a maku yɛlannuna ku-kɛ-tinɛ Samariya soe kɔma. Wulinu ya a yele manɛ nyɔ le iko Mari ya a fɔ nya min.

³⁹Ala den Ehasaya sigira a gbɛ rɔ. Mansa Ehabu ya koe min bɛɛsi ma ala mansaya-wati rɔ, anu ya wonu sɛbɛ Isirɛla mansɛnuna buku do rɔ. Hali a ya ala bolɔn rabɛn sogo-ba-nyinnu na nya min anubɛ a ya soenu sɔ nya min, anu ya wo fanan sɛbɛ buku wo rɔ.

⁴⁰

⁴¹Isirɛla Mansa Ehabuta mansayɛ san nani nyɔgɛ ma, anu ya Esala den Yɛhosafati ma mansɛ la Yuda nyamanɛ rɔ.

⁴²Yɛhosafati ya mansayɛ sɔrɔn a san bi-sawa ani a san loli nyɔgɛ le ma. San mogan-ni-loli kɔrɔ, a ye mansayɛ la. A siginɛ Yerusalɛm soe le burɔ nun. A na le Silihayila den Asuba la.

⁴³Mansa Yɛhosafati ya ko-telennɛ kɛ Mari yala iko a fa Mansa Esa ya a ma nya min. Fɔ fɛɛ kelen min taranta a la, a ma bɛsi-kɔ-tinɛnu tinya, ado mɔgɛnu tora sarakɛnu bɔla nyɔ anubɛ ka isɛnti mintan ka anuna bɛsɛnu kɔ.

⁴⁴Mansa Yɛhosafati ya a ma, yisi-kimɛ taranta anubɛ Isirɛla mansɛ tɛma.

⁴⁵A ya koe min bɛɛsi ma anubɛ a ya a kerinteya kɛlɛ rɔ nya min ala mansaya-wati rɔ, anu ya wo bɛɛ sɛbɛ Yuda mansɛnuna buku do rɔ.

⁴⁶Kɔli-kɛlɛ minnu bi yɛlɛnyɛ kɛla bɛsɛnu ye iko anuta namu ye nya min, kebi a fa Mansa Esata wati rɔ, a ya wonu bara-koe ka-a-la, kei wo, musu wo.

⁴⁷Kɔnɔ kɛ wati ya a taran, mansa sa Idɔm nyamanɛ kun na nun. Wo le ya a ma, Yuda mansɛ ya mɔgɛ do sigi anu kun na.

⁴⁸Isirɛla Mansa Ehasaya ara a fɔ Yuda Mansa Yɛhosafati ye nun ko ata keminɛnu ni kofu Mansa Yɛhosafatila keminɛnu ma kulɔn rɔ kɔnɔ ale mansɛ ya a ban. Mansa Yɛhosafati ya kulɔnnu nadan minnu bi tala nun sɛnɛ bi tinɛ Ɔfiri nyamanɛ rɔ. Kɔnɔ kulɔn kɛnu ma ta bawo anu tinyanta Iseyɔn-Kiba soe dafɛ.

⁴⁹

⁵⁰Mansa Yɛhosafati ya a so-sɛgi-kɛ tumɛ min, anu ya a togon a benba Mansa Dawudala halala-luyi ma. Ala den Yɛhoram sigira a gbɛ rɔ.

⁵¹Yuda Mansa Yɛhosafatila mansayɛ san tan-ni-wɔrɔnfila nyɔgɛ ma, Ehabula den Ehasaya mara mansɛ la Isirɛla nyamanɛ rɔ. San fila kɔrɔ, a ye mansayɛ la. A siginɛ Samariya soe burɔ.

⁵²A ya ko-yogomɛ ma iko a fa Mansa Ehabu anubɛ a na Yɛsɛbɛli anubɛ Mansa Yɛrabowami ya a ma nya min nun ka Isirɛla mɔgɛnu nadon hakɛ rɔ. Wo le ya a ma, a bilara Mari la.

⁵³A ya Beyali bɛsɛ kɔ iko a fa ya a ma nya min nun ka Isirɛlata Mari Alla ladiminya.