Read Kuranko 1 Mansɛnu 4 Bible Online

1 Mansɛnu 4 - Kuranko bible

1 Mansɛnu 4

¹Silamɛni mɛ mansɛ la Isirɛla mɔgɛnu kun na,

²ala mɔgɔ-banu le kɛnu na. Sedokila den Asaraya, wo le saraka-masɔla-wɛ la.

³Sisala dannu Ɛlihorɛfa anubɛ Ahaya, sɛbɛli-kɛlɛ le wonu na. Ahiludila den Yɛhosafati, wo le kɛdi-sɛbɛnɛ-lamaralɛ la.

⁴Yɛhoyadala den Bɛnaya, wo ye kɛlɛ-dannu kun na. Sedoki anubɛ Abiyatari le saraka-masɔ-wɔlɛ la.

⁵Netanna den Asaraya, wo ye sigisɔn-mansɛnu kun na. Netanna den, Saraka-Masɔla Sabudi, wo le mansa-makawandilɛ la.

⁶Ahisari, wo ye mansɛla bonna-wɔli-kɛlɛnu kun na. Abidala den Adonaram, wo ye fɔrɔsɔya-wɔli-kɛlɛnu kun na.

⁷Wo kɔma, Mansa Silamɛni ya mɔgɔ tan-ni-fila yabɔ ka anu ma sigisɔn-mansɛnu na Isirɛla nyamanɛ rɔ. Kɛnuta wɔlɛ le ka dɔn-fan makele anu nyɛrɛta sigisɔn rɔ ale mansɛ anubɛ ala mɔgɛnu ye. Karɛ-wo-karɛ, mɔgɔ-ba kɛ kelen si na dɔn-fan la mansɛ ye iko kelen. Anu si wo ma san-bo-san.

⁸Mɔgɔ-ba wonu tɔgɛ le kɛnu na. Bɛn-Huri, wo ye Ifɛrɛm kɔnkɔ-nyamanɛ kun na.

⁹Bɛn-Dika ye so-kun nani kun na, Mekasi wo, Salabin wo, Bɛti-Simɛsi wo, Ilɔn wo, anubɛ Bɛti-Hanan.

¹⁰Bɛn-Hɛsɛdi ye so-kun fila kun na, Arubɔti anubɛ Sɔkɔ. A ye Hifa sigisɔn-nyamanɛ bɛɛ kun na fanan.

¹¹Bɛn-Abinadabu ye Dɔɔ sigisɔn-nyamanɛ kun na. Ala musi le Mansa Silamɛnina den Tapata la.

¹²Ahiludila den Beyana ye Teyanaka anubɛ Magidɔ soenu kun na. A ye Bɛti-Seyan sigisɔn-nyamanɛ kun na fanan min bi Saraten soe dafɛ, Yɛsɛreli soe dugula wara la. Ala sigisɔn-nyamanɛ wo le ye tala furr, ha ka ta ke Abɛli-Mɛhola soe anubɛ Yokameyam soe ma.

¹³Bɛn-Kibɛri ye Ramɔti-Kaliyadi soe kun na. A ye so-nɛ donu fanan kun na minnu bi Manasa kegeyɛ do bolo min tɔgɛ Yeya. Wonu bi Kaliyadi sigisɔn rɔ. A ye Arakobi sigisɔn-nyamanɛ kun na Basan nyamanɛ rɔ, so-kinama bi-wɔrɔ ye min tɔ. Tarɛ mininɛ soe wo kelen-kelennamɛ-bɛɛ ma min dɛnu balannɛ sila-bonda-sɔgɔ-kɔnnu na.

¹⁴Idola den Ahinadabu, wo ye Mahanama sigisɔn-nyamanɛ kun na.

¹⁵Ahimahasi ye Nafatali sigisɔn-nyamanɛ kun na. A ya Mansa Silamɛnina den Basimati furu.

¹⁶Husayila den Beyana ye Asɛra sigisɔn-nyamanɛ anubɛ Beloti soe kun na.

¹⁷Paruwala den Yɛhosafati ye Isakari sigisɔn-nyamanɛ kun na.

¹⁸Ilala den Simayi ye Bɛnyamɛ sigisɔn-nyamanɛ kun na.

¹⁹Yurila den Kibɛri ye Kaliyadi sigisɔn-nyamanɛ kun na. Sigisɔn wo ye Amora mɔgɛnuna Mansa Saihɔn anubɛ Basan mɔgɛnuna Mansa Ɔku bolo nun. Ale kelen[1] pe le kun-tigiyɛ la sigisɔn wo rɔ.

²⁰Kɛ wati rɔ, Yuda nyamanita-mɔgɛnu anubɛ Isirɛla nyamanita-mɔgɛnu siya iko ba-kɛnkɛn. Anu sewanɛ bɛrɛkɛ! Anu bi fen-dɔn anubɛ tolɔn kun na.

²¹ Wo wati rɔ, Mansa Silamɛni ya mansayɛ kɛ nyamanɛ wo bɛɛ kun na ka bɔ Yufereti bɛ ma ha ka ta a sigi Filisitinuna nyamanɛ la. Ala nyamanɛ wo le tara furr, ha ka ta ke Iyipiti nyamanɛ ma. Nyamanita-mɔgɛ wo damasi wɔlita Mansa Silamɛni ye ka duti di a ma. Anu tora wɔlila a ye a siyi-tele-bɛɛ kɔrɔ.

²²Mansa Silamɛni anubɛ ala bonna-mɔgɛnu duruta dɔn-fen min nyɔgɔn dɔnna ala bɔn la tele kelan kɔrɔ, wonu yirika le kɛ la. Anu si dɛgɛ-munke bɔrɔ kɛmɛ ani bɔrɔ bi-loli (150) dɔn. Anu si dɛgɛ-munku-hakikɛ bɔrɔ bi-wɔrɔnfila ani bɔrɔ wɔrɔnfila (77) dɔn.

²³Ninki tan, anu bi binyɛ sala minnu kɔrɔ anubɛ ninki mogan minnu si anu de-nyini binyɛ rɔ anubɛ saga kɛmɛ, anu si wonu dɔn tele-wo-tele. Mina anubɛ gbɔndan anubɛ sensɛ anubɛ kanbanma-fannu bɔnɛ a la.

²⁴Mansa Silamɛni ya kun-tigiyɛ kɛ nyamanɛ wo bɛɛ kun na. Ale le ye Yufereti bɛ tele-yigi waralɛ bɛɛ kun na ka a bi Tifisa soe ma ha ka ta sigi Kesa soe la. Mansɛ min bɛɛ ye Yufereti bɛ tele-yigi wara la, wonu bi ale le kɔrɔ. A ya yisi-kimɛ sɔrɔn a sigi-nyɔgɛ bɛɛsi bolo.

²⁵Ata wati rɔ, Yuda mɔgɛnu anubɛ Isirɛla mɔgɛnu tora yisi-kimɛ rɔ. Ala nyamanita-mɔgɛ bɛɛsi tora sewɛ rɔ ala mansaya-wati bɛɛ kɔrɔ. Dɔn-fen ma dasa ala nyamanita-mɔgɛ wo do-wo-do ma.

²⁶ So[2] lamara tinɛ waga nani (4,000) ye Silamɛni bolo ala soeenuna ko la minnu bi kirindi saganna. So-laburilɛ si soee minnu naburi, wonu waga tan-ni-fila (12,000) ye a bolo fanan.

²⁷Mansa Silamɛnina mɔgɔ-ba tan-ni-filɛ minnu bi nala dɔn-fan la, wonu kelen-kelennamɛ-bɛɛ nara anuna karɛ kelen dɔn-fan la Mansa Silamɛni anubɛ ala bonna-mɔgɛnu ye. Anu ya Mansa Silamɛni anubɛ ala bonna-mɔgɛnu de-nyini wo nya na le. Fenfen ma dasa anu bolo.

²⁸Mɔgɔ-ba wonu tora nala fui-fan donu anubɛ a fɔrɔnnu na mansɛla soee wonu ye fanan.

²⁹Alla ya ko-nya-yen hɛnkili-wɛ di Mansa Silamɛni ma min dan ma lɔn.

³⁰Mansa Silamɛni hɛnkili tenbira Iyipiti nyamanita-mɔgɛnu anubɛ kɔrɔn-fɛ-mɔgɛnutɛ la minnu bi Isirɛla tele-bɔɛ wara la.

³¹ Hɛnkilimɛ minnu fanan tɔgɔ bɔra, ale hɛnkili kolo wonutɛ ko, hali Itan min bɔra Ɛsara soe burɔ. Ale hɛnkili kolo Mɛholila dannutɛ ko, Himan anubɛ Kalikoli anubɛ Darada, kɔni. Ale Mansa Silamɛni tɔgɔ bɔra. A mankan sigira mɔgɛ bɛɛ ma minnu bi ala foolɛ rɔ.

³² A ya hɛnkilimaya-kuma waga sawa (3,000) fɔ. Wo kɔma, a ya bɛti waga kelen ani bɛti loli (1,005) sɛbɛ.

³³A ya kɔlɔmanu bara-koe fɔ ka a dabira a kinama-wɛ ma ha ka a sigi a dɔgɔmɛnu na. Kɔlɔma-kinama-wɛ minnu bi Lɛbanan nyamanɛ rɔ, a kumara wonu bara-koe rɔ. Hali bin-fɛran minnu bi fɛrɛnna dandan ma, a kumara wonu fanan bara-koe rɔ. A sogo wo, a kanbanma-fen wo, a gboloma-fen wo, a yi-kɔrɔ-fen wo, a kumara wonu damasi wara-koe rɔ.

³⁴Duninya-mansɛ bɛɛ ya ata mɔgɔ lata ka anu tole masɔ Mansa Silamɛnita hɛnkilimaya-kumɛnu na bawo anu bara Mansa Silamɛnita hɛnkilimayɛ mankan lamɔɛn.