Read Kuranko 1 Mansɛnu 5 Bible Online

1 Mansɛnu 5 - Kuranko bible

1 Mansɛnu 5

¹Mansa Hairam min siginɛ Taya soe burɔ, Mansa Dawuda diyana-mɔgɛ le wo la nun. Wo ya a lamɔɛn tumɛ min ko Mansa Silamɛni bara ma mansɛ la a fa Dawuda gbɛ rɔ, a ya ala mɔgɔ-ba donu nata Mansa Silamɛni kɔndɔn tinɛ.

²Wonu ke Mansa Silamɛni ma, mansɛ ya kilayɛ lata Hairam ma. A ko,

³“I ya a lɔn ka a tɛgɛ kɛlɛ-nyagbɛ ma, n fa Dawuda ma fɛrɛ sɔrɔn ka bɔn sɔ ata Mari Alla ye. Ha Alla ara a yoge bɛɛsi nɔ, a ma ke Mari Bato-Bɔn sɔla.

⁴Kɔnɔ kaka, nta Mari Alla ara lafɛrɛ anubɛ yisi-kimɛ di n ma kan tinɛ bɛɛ rɔ. N yoge mumɛ sa tun hali! Sika-wo-sika sa nde rɔ tun kɛlɛ wara-koe rɔ.

⁵ Mari ya a fɔ n fa Dawuda ye ko ala dan min si ma mansɛ la a gbɛ rɔ, wo si bɔn sɔ ale Mari ye. N bara bɔn wo sɔ-koe latɛgɛ n yisi rɔ nta Mari Alla ye kaka.

⁶Woletɔ a fɔ ila mɔgɛnu ye ko anu ni kɔlɔma-kuru-wɛ donu tɛgɛ n ye Lɛbanan nyamanɛ rɔ. Nna wɔli-kɛlɛnu anubɛ ita wɔli-kɛlɛnu si wɔlɛ kɛ anu nyɔgɔn fɛ. N si ila wɔli-kɛlɛnu sara iko i ye a fɔla n ye nya min. I ya a lɔn ko nna mɔgɛnu ma kusan kɔlɔma tɛgɛla iko ila mɔgɛnu.”

⁷Mansa Hairam ya Mansa Silamɛnina sarakanɛ wo lamɔɛn tumɛ min, a sewara bɛrɛkɛ! A ya a fɔ ko, “Gbiliyɛ ni di Mari ma min ya den-hɛnkilimɛ di Mansa Dawuda ma ka a ma kun-tigi la Isirɛla mɔgɛnu kun na.”

⁸Nba, Mansa Hairam ya kilayɛ lata Mansa Silamɛni ma tun ko, “I ya kilayɛ min nana n ma, n bara wo lamɔɛn. I ya min bɛɛsi fɔ sarakanɛ rɔ, n si wo bɛɛ ma. N si kɔlɔma-kuru-wɛ wonu nyini i ye.

⁹Nna wɔli-kɛlɛnu si na kɔlɔma wonu na ka ta anu na kɔgɔ-yi dafɛ. Nba, anu si anu kiri anu nyɔgɔn ma ka anu nata yi kuma. I ye kan tinɛ min yirala n na kɔgɔ-yi dafɛ, nna wɔli-kɛlɛnu si anu nafulen nyɔ. Ita mɔgɛnu si kɔn wonu maduni. Ileta wɔlɛ ye min na dɔrɔn, ka nta bonna-mɔgɛnu de-nyini.”

¹⁰Mansa Hairam ya kɔlɔma siyaman di Mansa Silamɛni ma ha a wasara.

¹¹Mansa Silamɛni fanan ya dɔn-fan di Hairam ma. A ya fui-fan bɔrɔ waga bi-loli (50,000) di anu ma. A ya tulu-durɔmu waga fila, durɔmu kɛmɛ sawa (2,300) di anu ma. San-bo-san, a tora dɔn-fan kɛ nyɔgɔn dila a ma.

¹²Mari ya hɛnkili di Mansa Silamɛni ma iko a ya lanyiri kiri a ye nya min. Yisi-kimɛ taranta Mansa Hairam anubɛ Mansa Silamɛni tɛma. Anu mɔgɔ filɛ tora kan kelen tɔ.

¹³Wo kɔma, Mansa Silamɛni ya mɔgɔ waga bi-sawa (3,000) bi ka bɔ Isirɛla mɔgɛnu tɛma ka anu ma fɔrɔsɔya-wɔli-kɛlɛnu na.

¹⁴ Mansa Silamɛni tora anu natala waga tan-tanyɛ (10,000) ma Lɛbanan nyamanɛ rɔ ka wɔli-kɛlɛnu yɛlɛma karɛ-wo-karɛ. Wɔli-kɛla-kurɔn min ba ta wɔli-kɛ-tinɛ, wonu si karɛ kelen bɔ Lɛbanan nyamanɛ rɔ. Wo kɔma, anu si sɛgi anu barɛ karɛ fila kɔrɔ ka anu sulen. Mansɛ ya Adonaram ma wɔli-kunyɛ la.

¹⁵Mɔgɔ waga bi-segin (80,000) bi Mansa Silamɛni bolo minnu bi kurinu lɛsɛla kɔnkɛnu kuma. Mɔgɔ waga bi-wɔrɔnfila (70,000) ye nyɔ ka kuri wonu maduni.

¹⁶Wo kɔma, Mansa Silamɛni ya mɔgɔ waga sawa ani mɔgɔ kɛmɛ sawa (3,300) bi ka wonu ma Adonaram kan-kɔrɔ-sigilɛnu na alako ka wɔli-kɛlɛnu mafɛlɛn.

¹⁷Anu ya kuru-kinama-wɛ siyaman nabɔ kɔnkɛ rɔ ka wonu ma Bato-Bɔn-kurukɛ-fan la iko Mansa Silamɛni ya a fɔ nya min.

¹⁸Woletɔ Mansa Silamɛnita wɔli-kɛlɛnu anubɛ Mansa Hairamta wɔli-kɛlɛnu, wonubɛ Kibali sigisɔn-mɔgɛnu ya kuri anubɛ kɔlɔmanu nadɛn Bato-Bɔn wo sɔ-koe rɔ.