Read Kuranko 1 Mansɛnu 8 Bible Online

1 Mansɛnu 8 - Kuranko bible

1 Mansɛnu 8

¹ Wo kɔma, Mansa Silamɛni ya Isirɛla mɔgɛnuna kun-tigi damasi kele kan-tina-kelen. A bɔnsɔn-kun-tigi wo, a kebila-kun-tigi wo, a ya wo bɛɛsi kele Yerusalɛm soe burɔ. Mansa Silamɛni ya anu kele alako anu ni ta tɔn-kenkirɛ bi a fa Dawuda halala-soe burɔ min tɔgɛ Sayɔn ka ta a to Mari Bato-Bɔn la.

² Ladɛn wo ye kela anuna san karɛ wɔrɔnfila nyɔgɛ[5] le ma Mansa Silamɛni warɛ. Ladɛn wo bɛnta Lele-Sɔɛ-Ladɛn le ma.

³Isirɛla kun-tiginu nara tumɛ min, saraka-masɔlɛnu tara tɔn-kenkirɛ bi tinɛ.

⁴Anu ya a bi ka ta a la Mari Bato-Bɔn dafɛ. Lifayi bɔnsɔn-mɔgɛnu anubɛ saraka-masɔlɛnu tara Marita Fani-Bɔn nyɛrɛ bi anubɛ a miran bɛɛsi ka ta anu to Bato-Bɔn la.

⁵Wo kɔma, Mansa Silamɛni anubɛ Isirɛla mɔgɛ bɛɛ ladɛnta tɔn-kenkirɛ yarɔ. Anu ya sagɛ anubɛ ninki min nyɔgɛ ma sarakɛ la, anu ma wonu yatɛ lɔn bawo anu siya kati!

⁶Anu ban saraka-bɔɛ wo la, saraka-masɔlɛnu ya Marita tɔn-kenkirɛ wo ladon Bato-Bɔn la ka a sigi melika wonuna muninyɛ kɔrɔ Sɛnima-Sɛnima-Tinɛ rɔ.

⁷Anu kanbannu bi tɔn-kenkirɛ anubɛ a bi-kɔlɔmanu kuma.

⁸Mɔgɛ tenbi bɔn wo burɔ, a si a bi-kɔlɔma wonu sungban yen Sɛnima-Sɛnima-Tinɛ rɔ bawo anu yan. Kɔnɔ ni mɔgɛ ye luyi ma, a ti ke anu yenna. (Ha bi,[6] wonu bi nyɔ.)

⁹ Fenfen sa tɔn-kenkirɛ wo burɔ fɔ Musa ya kuru-walan filɛ minnu sa a rɔ Sinayi kɔnkɛ dafɛ. Isirɛla mɔgɛnu bɔra Iyipiti tumɛ min, Mari ya tɔn sɛbɛ kuru-walan wonu denu ma alako anubɛ Isirɛla mɔgɛnu si sarama-kan kiri anu nyɔgɔn tɛma nya min.

¹⁰ Saraka-masɔlɛnu ya anu kunyɛ labɔ Sɛnima-Sɛnima-Tinɛ rɔ tumɛ min, banda-fin-gbɛ, Marita gbiliyɛ, kɔni, wo ya bɔn wo bɛɛ lafa. Wo le ya a ma, saraka-masɔlɛ wonu bɔra luyi ma. Anu ma ke sɛgila nyɔ wo wati rɔ ka anuna wɔlɛ kɛ.

¹¹

¹² Wo kɔma, Mansa Silamɛni ya baraka bira Mari ye ka a tanto. A ko, “E, Mari, ile le wara a fɔ nun ko i si taran banda-fin-gbɛ rɔ.

¹³Kɔnɔ n bara bon-nyimɛ sɔ i ye, i si to kan min habadan!”

¹⁴Wo kɔma, ale mansɛ ya a kolan lamunun Isirɛla mɔgɛnu na ka duwa anu ye.

¹⁵A ko, “Gbiliyɛ ni di Isirɛlata Mari Alla ma bawo a ya lanyiri min kiri n fa Dawuda ye, a ara wo latɔnbagaya. A ya a fɔ n fa ye nun ko,

¹⁶ kebi a nara ata mɔgɛnu na ka bɔ Iyipiti, a ma so-wo-so yabɔ Isirɛla nyamanɛ rɔ, ata Bato-Bɔn si sɔ kan min. Kɔnɔ a ya n fa Dawuda yabɔ ka a sigi mansayɛ la ata mɔgɛnu kuma.”

¹⁷Ale Mansa Silamɛni ya a fɔ tun ko, “Isirɛlata Mari Alla Bato-Bɔn sɔ-sɔgɛ ye n fa Dawuda la nun

¹⁸ kɔnɔ Mari ya a fɔ n fa ye ko, a ara a miri ko-nyimɛ le ma wo la.

¹⁹ Kɔnɔ ale Mari ya a fɔ ko n fa kana bɔn wo sɔ fɔ a nyɛrɛta dan, wo le si ata Bato-Bɔn sɔ a ye.”

²⁰Ale Mansa Silamɛni ya a fɔ tun ko, “Mari ara ala kumɛ wo latɔnbagaya kaka. N bara sigi n fa Dawuda gbɛ rɔ mansayɛ la iko Mari ya lanyiri kiri nya min. Kaka, n bara Bato-Bɔn sɔ Isirɛlata Mari Alla ye.

²¹N bara kan tinɛ do rabɛn bɔn wo burɔ tɔn-kenkirɛ anubɛ kuru-walan filɛ wonu si to kan min. Ma benba Isirɛla mɔgɛnu bɔra Iyipiti tumɛ min, a ya sarama-kan sɛbɛ kuru-walan minnu ma, wonu denu sanɛ kenkirɛ wo burɔ.”

²²A ban wo fɔla, ale Mansa Silamɛni sɔra Marita saraka-mintan-tinɛ yarɔ Isirɛla mɔgɛ bɛɛ yakɔrɔ. A ya a bole rasigi san ma.

²³A ya Alla matara, a ko, “E, Isirɛlata Mari Alla, i nyɔgɔn sa san-kole anubɛ dugu-kole rɔ! Mɔgɛ minnu bi tagamana ila kilɛ fɛ anu yisi gbɛnɛ la, i ye ila lanyiri latɔnbagayala anu ye ka ila keninteyɛ yira anu na.

²⁴I ya ila lanyiri min kiri n fa Dawuda ye Bato-Bɔn sɔ-koe rɔ, i wara wo bɛɛsi dafa bi.

²⁵ Nba, wola ko la, Isirɛlata Mari Alla, i ya ila lanyiri doi min kiri n fa Dawuda ye nun, i ni wo fanan natɔnbagaya. I ya a fɔ nun ko ni ala dannu tora ila kilɛ fɛ ka i sako kɛ iko ale n fa ya a ma nya min, mansayɛ si to a bɔnsɔn bolo Isirɛla mɔgɛnu tɛma habadan!

²⁶Woletɔ Isirɛlata Mari Alla, ila kumɛ bɛɛsi ni bɔ a la iko i ya a fɔ n fa Dawuda ye nya min nun.

²⁷ “Kɔnɔ n Mari Alla, duninya kɛ dɔgɔ i yala. Hali san-kole min kolo, wo ti a bɔ i ye. I si kun i Bato-Bon-nɛ kɛ la kama worɔ?

²⁸E, Mari Alla, ila wɔli-kɛlɛ le nde la. Hali wo, i ni i wɔlɔ matɔlɔ n di-kɛ-kan anubɛ nna matarali-kan la.

²⁹ I wara kan tinɛ kɛ min yabɔ i bato-koela ko la, i yandi Mari, i ni i fonde to bɔn kɛ ko su-ni-tele. Nba, woletɔ Mari, n ba n ya-lamunun bɔn kɛ la tumɛ min, i ni i wɔlɔ matɔlɔ nta madiyalɛ la n bi min nakɛla i ma.

³⁰Isirɛla mɔgɛnu fanan ba anu ya-lamunun bɔn kɛ la tumɛ min, i yandi, i ni i wɔlɔ matɔlɔ anuta matarali-kɛ-kan la. I ni ma kan lamɔɛn i warɛ san-kole rɔ ka ma makoto ma hakɛ la.

³¹“Ni mɔgɛ do suira a ta-nyɔgɛ ma ka tɔgɛ layɛlɛ a ma, tɔgɛ layɛlɛta min ma wo la, wo ni na a sɔ saraka-mintan-tinɛ kɛ yakɔrɔ. Ni a ya a keli ka a fɔ ko a sɔn sa a rɔ,

³²E, Mari, i ni i wɔlɔ matɔlɔ san-kole rɔ ka ko sufa wo kiti tɛgɛ. I ni mɔgɔ-yilikinɛ tɔrɔ iko ala hakɛ ye nya min ka tonya-tigi wo yo sa iko ata yoe ye nya min.

³³“Isirɛla mɔgɛnu ba hakɛ kɛ i la tumɛ min, ni wo ya a ma, anu yogenu ni nɔ-ko sɔrɔn anu ma, ni anu nara bɔn kɛ la tumɛ min ka anu famayigi i ye i matara tinɛ anuna hakɛla ko la,

³⁴i ni i wɔlɔ matɔlɔ anu na ka anu makoto anuna hakɛ la. I ya nyamanɛ min di anu benbanu ma, i ni anu nasɛgi nyɔ rɔ tun.

³⁵“Ni i ya filiyan sɔ kamasɔrɔn ila mɔgɛnu bara hakɛ kɛ i la, ni anu ya anu ya-lamunun kan tinɛ kɛ la ka anu sɔ anuna hakɛ la,

³⁶i ni wo lamɔɛn san-kole rɔ ka Isirɛla mɔgɛnu makoto. I ni anu nabila ko-nyimɛ-kɛ la anu si to min kɛla. I ya nyamanɛ min di anu ma, i ni bandɛ lana worɔ tun.

³⁷“Ni kondɔnnu anubɛ tunbinu ya a ma, kɔnkɔ-fitinɛ ni nɔ-ko sɔrɔn mɔgɛ kɛnu ma, ni wo ma, fui-fannu ma wa fɔsɔ ka kɛrin, ni anu ya i matara, i ni anu makoto. Ni anu yogenu nara ka anu namini anu kɛlɛ-koe la, ni wo ma, kasarɛ, hali kiraya-yogomɛ ni anu tɔrɔ, ni anu ya i matara, i ni anu makoto.

³⁸Ni min nara bɔn kɛ yakɔrɔ ka nimisa a sɔn-yogomɛla ko la ka a bole sigi san ma bɔn kɛ telen tɔ, i ni wo tigi kan lamɔɛn ka wo makoto bawo ile le kelen pe ya mɔgɔ-burɛ lɔn. A bɛnta, i ni min ma mɔgɛ wo la, i si wo ma.

³⁹

⁴⁰Woletɔ anu tenbi anu benbanuna nyamanɛ kɛ rɔ tumɛ min, anu si to i gbiliyala tele-wo-tele ka ila kumɛ bira.

⁴¹“Sibolo-gbɛrɛ minnu siginɛ wula-yan la, ni wo do ya i tɔgɔ-wɛ wo lamɔɛn anubɛ kabana-ko-wɛ, i wara minnu kɛ ila mɔgɛnu ye, ni wo mɔgɔ-sufa nara ka matarali-kɛ bɔn kɛ telen tɔ,

⁴²

⁴³i ni ala matarali-kan wo lamɔɛn san-kole rɔ. I ni anu makoe nyinya iko anu bi a fɔla i ye nya min. Woletɔ duninya-mɔgɛ bɛɛ si i tɔgɛ lɔn ka ila kumɛ bira iko Isirɛla mɔgɛnu bi ila kumɛ birala nya min. Anu si a lɔn worɔ ko n bara Bato-Bɔn min sɔ kɛ la, a bɛnta bɛɛ ni i bato nyɔ.

⁴⁴“I wa ila mɔgɛnu nata anu yogenu kɛlɛ tinɛ tumɛ min, anu ba i matara ka anu ya-lamunun ita so-yabɔnɛ anubɛ bɔn kɛ la tumɛ min n ya min sɔ i ye,

⁴⁵i yandi, i ni anuna matarali-kan lamɔɛn san-kole rɔ. I ni anu yabi ka nɔlɛ di anu ma.

⁴⁶“Mari, ni ila mɔgɛnu ya hakɛ kɛ i la tumɛ min, ado mɔgɔ-wo-mɔgɔ sa nyɔ min ti hakɛ kɛ, tumado i si diminya anu ma ha i ni anu don anu yogenu bolo. Wonu ni anu bira ka ta anu na anu barɛnu tɔ hali anu taranta wula-yan la.

⁴⁷Kɔnɔ tɔ-a-la, ni anu ya anu yisi yɛlɛma nyɔ, anu ni tubi worɔ ka a fɔ ko anu bara bila ile Alla la,

⁴⁸ni anu ya i matara ka anu ya-lamunun Bɔn kɛ la min sɔnɛ Yerusalɛm soe burɔ Isirɛla nyamanɛ kɛ rɔ, ile Mari min bi san-kole rɔ, i ni anuna matarali-kan wo lamɔɛn ka kinikini anu ma. Ile Mari ara soe kɛ yabɔ ka nyamanɛ kɛ di ma benbanu ma.

⁴⁹

⁵⁰E, Mari, i yandi, i ni kinikini ila mɔgɔ-murutiyanɛnu ma. I ni a ma, anu yogenu ni anu bira boloko-nyimɛ-kɛ ka kinikini anu ma fanan

⁵¹bawo ita mɔgɛ le kɛnu na i nara minnu na ka bɔ Iyipiti, anuta sulubondɔn, kɔni.

⁵²“E, Allatala, ma wa ma kan nabɔ tumɛ min, i ni kinikini mabɛ ila mɔgɛnu ma ka i wɔlɔ matɔlɔ ma di-kɛ-kan la.

⁵³I ya Isirɛla mɔgɛnu yabɔ duninya-mɔgɛnu tɛma ka anu ma itɛ la iko i ya a fɔ Nɛbi Musa ye nya min wo tumɛ i ye anu nabɔla Iyipiti nyamanɛ rɔ.”

⁵⁴Kɛ dama rɔ, Mansa Silamɛni nyɛnkinnɛ Marita saraka-mintan-tinɛ yakɔrɔ, a bole rasiginɛ san ma Alla ye. A banta mataralɛ kundonna tumɛ min, a ya a lakɔɛnma

⁵⁵ka duwa Isirɛla mɔgɛ bɛɛ ye a kulu-mayɛlɛnɛ la. A ko,

⁵⁶ “Alamɛ gbiliyɛ dira Mari ma min bara yisi-kimɛ di ala mɔgɛnu ma iko a ya a fɔ anu ye nya min. Hali lanyiri-kelen-bɛrɛn ma tinya a ya min fɔ Musa ye Isirɛla mɔgɛnuna ko la.

⁵⁷Alamɛ mata Mari kana ma boloka dɛɛ! A ni to ma fɛ iko a tora ma benbanu fɛ nya min.

⁵⁸A ni ma dɛnbɛ alako ma yɛ ni to ale la ka ala tɔnnu bira iko a ya a fɔ ma benbanu ye nya min.

⁵⁹Alamɛ mata Mari Alla fonde tora nna mataralɛ kɛnu ko burubukai! A ni to mabɛ Isirɛla mɔgɛnu dɛnbɛna ma makoenu na tele-wo-tele.

⁶⁰Woletɔ duninya-mɔgɛ bɛɛ si a lɔn ko ale Mari le Alla la. Alla-gbɛrɛkɛ sa ale kɔma.

⁶¹Alamɛ wo sɔndɔmɛ gbɛra mata Mari Alla ye ka to ata tɔn bɛɛ birala iko wo ye a mala nya min kaka.”

⁶²Wo kɔma, Mansa Silamɛni anubɛ ala nyamanita-mɔgɛnu ya sarakɛnu bɔ Mari ye.

⁶³Mansa Silamɛni ya ninki waga mogan-ni-fila (22,000) anubɛ saga waga kɛmɛ kelen ani saga waga mogan (120,000) ma yisi-kima-sarakɛnu na. Mansɛ anubɛ ala nyamanita-mɔgɛnu ya sarakɛ wonu bɔ ka Bato-Bɔn wo dantɛgɛ Mari ma.

⁶⁴Saraka mintan tinɛ min nadannɛ silɛɛ la, wo dɔgɔ sarakɛ wonuna ko la min kɛ, wo le ya a ma tele wo nyɛrɛ rɔ, mansɛ ya Bato-Bɔn lu-kolo-toe fanan sɛninya alako ka saraka-mintantɛnu nabɔ nyɔ anubɛ fui-fen-sarakɛnu anubɛ kɛɛn min bɔra yisi-kima-saraka-sogenu tɔ.

⁶⁵Anu ban Bato-Bɔn wo dantɛgɛla tele wɔrɔnfila kɔrɔ, Mansa Silamɛni anubɛ ala nyamanita-mɔgɛ minnu bɔra Isirɛla nyamanɛ tɔnkɔn nani bɛɛ rɔ, wonu ya Lele-Sɔɛ-Ladɛn kɛ Bato-Bɔn dafɛ a nyɔgɔn tele wɔrɔnfila kɔrɔ tun.

⁶⁶Wo banda kɛ, a tele segin nyɔgɛ ma, mansɛ ya nyama latenbi. Anu ya mansɛ wɔlɔbɔ. Anu dama kɔntɔ-diyanɛ tara anu barɛnu tɔ kamasɔrɔn Mari Alla ara ko-nyimɛ min bɛɛ kɛ Mansa Dawuda anubɛ Isirɛla mɔgɛ bɛɛ ye.