Read Kuranko 2 Mansɛnu 1 Bible Online

2 Mansɛnu 1 - Kuranko bible

2 Mansɛnu 1

¹Isirɛla Mansa Ehabu lakirayanɛ, Mohabu nyamanita-mɔgɛnu murutiyara Isirɛla nyamanita-mɔgɛnu ma.

²Wonu bi murutiyɛ wo kun na tumɛ min, Mansa Ehasaya[1] bɔra porokɔlɔla san-bɔn la Samariya soe burɔ ka bui dugi ma. A ya a tanban boloko-yogomɛ-kɛ. A ya kilayɛnu nata bolo tafɛlɛn tinɛ Filisitinuna bɛsɛ do ma min tɔgɛ Beyali-Sibubu min bi Ɛkirɔn soe burɔ. A ya wo ma alako a ni a lɔn ni a si kisi, ni a ti kisi.

³Kɔnɔ Marita melika tara a fɔ Nɛbi Ilaya Tisibi kɛ ye ko, “I ni ta Samariya mansɛla kilayɛ wonu taran kilɛ la. I wa anu taran, i ni anu manyinika ko, ‘Nfenna wo ye tala wo bolo-tafɛlɛnna Ɛkirɔn mɔgɛnuta bɛsɛ wara min tɔgɛ Beyali-Sibubu? Wole lara a la ko Alla sa Isirɛla nyamanɛ rɔ, wa?’

⁴Wo ta Mari kuman-kan kɛ latenbi ko a kunyɛ ti bɔ kirayɛ kɛ rɔ muk, ado a ye fagala le.” Nɛbi Ilaya tara ka kilayɛ wonu taran ka Mari kuman-kan latenbi anu ma.

⁵A banta wo fɔla tumɛ min, kilayɛ wonu sɛgira Mansa Ehasaya wara. Anu ke, mansɛ ya anu manyinika ko, “Nfenna wo ara sɛgi?”

⁶Wonu ya a fɔ a ye ko, “Kei do bɛnta ma la kilɛ la. Wo le ya ma lasɛgi i wara ko ma ni Mari kuman-kan latenbi i ma. A ko, ‘Nfenna i ye kilayɛnu natala bolo tafɛlɛn tinɛ Ɛkirɔn kɛnuta bɛsɛ Beyali-Sibubu wara?’ A ko, ‘Ile lara a la ko Alla sa Isirɛla nyamanɛ rɔ, wa?’ Kei wo ya a fɔ ma ye ko ma ni na Mari kuman-kan kɛnu natenbi i ma ko, ‘Bawo i ya kilayɛnu nata bolo tafɛlɛn tinɛ, woletɔ i kunyɛ ti bɔ kirayɛ kɛ rɔ muk, ado i ye fagala le.’ ”

⁷Mansɛ ya anu manyinika ko, “Kei wo manɛ kama?”

⁸ Anu ya a fɔ a ye ko, “Gbolo-siyimɛ donnɛ a kan na. A bu takirinɛ gbole la.” Mansɛ ya a fɔ wo le ma ko, “Tisibi kɛ Nɛbi Ilaya le wo la, yɔ!”

⁹Wo kɔma, mansɛ ya ala kɛlɛ-den bi-loli bila ala kɛlɛ-den-kunyɛ do fɛ ko anu ni ta Nɛbi Ilaya bira. Wonu tara a siginɛ taran kɔnkɛ do kuma. Kɛlɛ-den-kunyɛ wo ya a fɔ Nɛbi Ilaya ye ko, “Ile Allata mɔgɛ, mansɛ ko i ni yigi yan!”

¹⁰Nɛbi Ilaya ya a fɔ kɛlɛ-den-kunyɛ wo ye ko, “Ni Allata mɔgɛ le nde la, alamɛ tɛ bɔra san ma ka wobɛ ila mɔgɛ kɛnu mintan.” Tiriyante wo rɔ, Alla ya tɛ layigi ka anu halaki!

¹¹Wo kɔma, ale mansɛ ya a nyɔgɔn mɔgɔ bi-loli anubɛ kɛlɛ-den-kun kelen nata tun nɛbi bira tinɛ. Wonu fanan ke Nɛbi Ilaya ma, kɛlɛ-den-kunyɛ ya a fɔ Ilaya ye ko, “Ile Allata mɔgɛ, mansɛ ko i ni yigi yan tiriya!”

¹² Nɛbi ya a fɔ ko, “Ni Allata mɔgɛ le nde la, alamɛ tɛ bɔra san ma ka wobɛ ila mɔgɛ kɛnu mintan.” Tiriyante wo rɔ, Alla ya tɛ layigi ka anu halaki!

¹³Wo kɔma, mansɛ wo ya ala kɛlɛ-den bi-loli bila ala kɛlɛ-den-kunyɛ do fanan fɛ tun ko anu ni ta Nɛbi Ilaya bira. Wonu fanan ke nɛbi ma, kɛlɛ-den-kunyɛ wo ya kɔnkɛ yɛlɛ ka ta a taran. A ke a ma, a ya a nyɛnkin a kɔrɔ. A ko, “Ile Allata mɔgɛ, i yandi, mabɛ nna mɔgɛ kɛnu niyi latanka.

¹⁴Kɛlɛ-kun filɛ anubɛ anuna mɔgɛ minnu nara, tɛ ara bɔ san ma ka wonu faga. Kɔnɔ i yandi, kinikini nde ma! I kana n bɔnɔ n niyi rɔ.”

¹⁵Anu tora wo le la, Marita melika ya a fɔ Nɛbi Ilaya ye ko, “Hali i ma kilan. Bila a fɛ. I ni ta.” Nɛbi Ilaya bilara a fɛ. Anu tara mansɛ taran.

¹⁶Anu ke, a ya a fɔ mansɛ ye ko, “Mari ko, Alla sa Isirɛla nyamanɛ rɔ min bi a tola, i ye kilayɛnu natala bolo tafɛlɛn tinɛ Ɛkirɔn kɛnuna Bɛsi Beyali-Sibubu wara, wa? A ko fanan bawo i wara wo ma min kɛ, woletɔ i ti bɔ i gbɛ kɛ rɔ. I niyi ye bɔla yan de!”

¹⁷Ale Mansa Ehasaya fagara a gbɛ wo rɔ nyɔ iko Mari ya a fɔ Nɛbi Ilaya ye nya min. A na-kelen-nyɔgɛ Yɔram sigira a gbɛ rɔ mansayɛ la bawo den-kei sa ale bolo. Kɛ mara wati min, wo ya a taran, Mansa Yɛhosafatila den Yɛhoramla mansayɛ ara san fila bɔ Yuda nyamanɛ rɔ.

¹⁸Mansa Ehasaya ya ko-gbɛrɛ minnu ma ala mansayɛ kɔrɔ, anu ya wonu sɛbɛ Isirɛla Mansɛnuna buku-gbɛrɛ rɔ.