Read Kuranko 2 Mansɛnu 10 Bible Online

2 Mansɛnu 10 - Kuranko bible

2 Mansɛnu 10

¹Mansa Ehabu kegeyɛ minnu bi Samariya soe burɔ, wonu mɔgɔ bi-wɔrɔnfila le. Mansa Yehu ya kɛdinu sɛbɛ ka do lata Samariya mɔgɔ-ba-sɛbɛnɛnu ma. Wo kɔma, a ya kɛdi do lata mɔgɔ bi-wɔrɔnfilɛ kɛnu makandannɛnu ma. Min sɛbɛnɛ kɛdi wonu tɔ ko,

²“Wole minnu bi Mansa Ehabu kegeyɛnu makandanna, ale mansɛla soeenu, anubɛ ala kirindinu anubɛ ala kɛlɛ-kɛ-fannu, wo bɛɛ ye wole le bolo, ado wo ye so-latankanɛ le tɔ. Wo wa kɛdi kɛnu takaran wati min,

³mansa-kegeyɛ min hɛnkili kolo, ado a ya ko lɔn, wo ni wo yabɔ ka a sigi a fa Mansa Yɔram gbɛ rɔ. Wo ni kɛlɛ kɛ a ye ka a kunka.”

⁴Samariya mɔgɔ-ba wonu ya kɛdi wonu karan tumɛ min, anu kilanta. Mɔgɔ-ba wonu ko, “Mansa Yɔram anubɛ Mansa Ehasaya ma ke Mansa Yehu nɔla kan min, male le si ke a nɔla nyɔ, wa?”

⁵Mansɛla mɔgɔ-banu wo, nyɔ-so-tigi wo, mɔgɔ-ba-sɛbɛnɛnu wo, anubɛ mansa-makandannɛnu wo, wonu ya anu kundɛn ka kilayɛ lata Yehu ma ko, “Ita wɔli-kɛlɛ le male la. I wa fenfen fɔ, male si wo ma kɔnɔ male ti mɔgɛ yabɔ yan ka wo ma mansɛ la. Ni koe min telennɛ ile yala, ile si wo ma.”

⁶Kilayɛ ban kɛ rakaranna Mansa Yehu ye, a ya kɛdi do sɛbɛ anu ma tun ko, “Ni wo ye n fɛ, ado a sɔgɛ ye wo la ka nna sereyanu bira, kɛ nyɔgɔn tumɛ sina, n ni Mansa Ehabu kegeya bi-wɔrɔnfilɛ wonu kunyɛ yen Yɛsɛreli soe burɔ yan.” Mɔgɔ bi-wɔrɔnfilɛ kɛnu namaranɛ Samariya mɔgɔ-banu denu bolo.

⁷Anu ya Mansa Yehula kɛdi rakaran tumɛ min, anu ya Mansa Ehabu kegeya bi-wɔrɔnfilɛ wonu kunyɛ tɛgɛ a la. Anu ya wonu sa sendenu tɔ ka wonu nata Mansa Yehu ma Yɛsɛreli soe burɔ.

⁸Anu ya a fɔ Mansa Yehu ye min kɛ ko anu bara na Mansa Ehabu kegeyɛ wonu kunyɛnu na, a ya a fɔ anu ye ko anu ni ta wonu nadɛn kan-tina fila soe tarɛ-don-dɛ dafɛ ka anu to nyɔ ha sina sɔgɔma.

⁹Wo wulun sɔgɔma, Mansa Yehu tara nyɔ rɔ. A sɔra mɔgɛnu tɛma nyɔ rɔ. A ko, “Nde le ya Mansa Yɔram faga. Fɛɛ sa wo le la a faga-koe rɔ kɔnɔ kunyɛ minnu bi kɛ la, yon ya kɛnu faga nun?

¹⁰Kɛ ara a yira n na ko Mari ya kumɛ min bɛɛsi fɔ n ye Mansa Ehabu anubɛ ala denbayɛnu bara-koe rɔ, wo ara bɔ-a-la. Mari ya min fɔ Nɛbi Ilaya ye, wo bɛɛ ara bɔ a la.”

¹¹ Wo kɔma, Mansa Ehabu diyana-mɔgɔ wo, ala mɔgɔ-ba wo, ala saraka-masɔla wo, ala mɔgɛ minnu bi Yɛsɛreli soe burɔ wo, Mansa Yehu ya wo dama faga hali a tugura min na, a fereta min na.

¹²Mansa Yehu bɔra Yɛsɛreli soe burɔ ka ta Samariya. A tamatoe bɛnta Yuda Mansa Ehasayala mɔgɛ donu na kan tinɛ min tɔgɛ Saga-Fɛ-Biralɛnuna Dagɛ. A ya anu manyinika ko, “Yon bi wole la?” Wonu ko, “Mansa Ehasaya na-kelen-nyɔgɛ le male la. Ma ye tala Yɛsɛbɛli saya-kɔndɔli-kɛ-tinɛ.”

¹⁴Mansa Yehu ya a fɔ a gba-fɛ-bilalɛnu ye ko, “Wo ni kɛnu bira.” Anu tara anu na denka-rayan-bɛ do dafɛ ka anu faga nyɔ. Anu ya minnu faga wo la, wonu mɔgɔ bi-nani ani mɔgɔ fila (42). Hali mɔgɔ-den-kelen ma to a niyi la wonu tɔ.

¹⁵Mansa Yehu ban mɔgɛ kɛnu fagala, a ya Samariya kilɛ bira tun. A ya Rekabula den Yonadabu taran kilɛ la. Mansa Yehu ya wo kɔndɔn ka a fɔ a ye ko, “N lanɛ a la, ile wo, nde wo, sɔndɔma kelen de ma bolo. I ti kofu n ma?” Yonadabu ko, “Tana ma wo la.” Mansa Yehu ya a fɔ a ye ko, “Ni i wara sɔn, i bole lana.” A ya a bole lata. Mansa Yehu ya a layɛlɛ ala kirindi rɔ.

¹⁶Mansɛ ya a fɔ a ye ko, “N bara n nyɛrɛ latenbi Mari ma nya min, ile fanan nyɛrɛ ni ta wo rayen.” Anu tara Samariya ala kirindi rɔ.

¹⁷Anu kera Samariya soe burɔ tumɛ min, Mansa Ehabula mɔgɛ toe minnu bi Samariya soe burɔ, Mansa Yehu ya wonu damasi lato dogbe iko Mari ya a fɔ Nɛbi Ilaya ye nya min.

¹⁸Mansa Yehu ya Samariya mɔgɛ bɛɛsi kundɛn kan-tina-kelen. A ya a fɔ anu ye ko, “Mansa Ehabu ya wola bɛsi Beyali kɔ doni kɔnɔ ndetɛ ye tenbila le atɛ la.

¹⁹Wo ni Beyalita nɛbinu kele anubɛ a kɔlɛnu anubɛ minnu si saraka bɔ a ye. Mɔgɔ-wo-mɔgɔ kana kilɛ madasa bawo n bi saraka-belebele bɔla Beyali ye. Ni min ma bɛn wo rɔ, wo ye fagala le.” (Yaga, Mansa Yehu ye nala kɛwuyɛ sigila anu na alako a ni Beyali-kɔlɛ bɛɛ faga.)

²⁰A ya a fɔ anu ye tun ko, “Ma ni kun wona tele kelen ma, ma si Beyali kɔ min ma.” Anu dama sarata tele kelan wo ma.

²¹Mansa Yehu ya wo kilayɛ ranyɛnsɛn Isirɛla nyamanɛ bɛɛ rɔ. Tele wo nyɛrɛ kenɛ, Beyali-kɔlɛ bɛɛ nara. Mɔgɔ-wo-mɔgɔ ma foo ladɛn wo rɔ. Anu dama donta Beyali kɔ tinɛ wo la ha bɔn wo lafara pen!

²²Mɔgɛ min bi Beyali kɔ-durukinu namarala, Mansa Yehu ya a fɔ wo ye ko a ni ta duruku-ba wonu bi ka anu don kɔli-kɛlɛ wonu bolo, ado a ya wo ma.

²³Mɔgɛnu ban duruki wonu donna, Mansa Yehu anubɛ Yonadabu nyɛrɛ donta bɛsi-kɔ-bɔn wo la. Mansa Yehu ya a fɔ wonu ye bɔn wo la ko, “Wo ni wo yɛ lakalan wo nyɔgɔn tɛma tumado kɔrɛ, Mari-batolɛ donu bi wo tɛma. Beyali-kɔlɛnu denu dɔrɔn ni taran yan.”

²⁴Wo kɔma, anubɛ Yonadabu donta saraka-mintantɛ anubɛ sarakɛ donu bɔɛ rɔ Beyali ye, kolo-fannu, kɔni. Wo ya a taran, Mansa Yehu ara mɔgɔ bi-segin sɔ kɔ tinɛ wola foolɛ rɔ. A ara a fɔ wonu ye nun ko, “Mɔgɛ min bɛɛsi ye kɔ tinɛ kɛ la, wo ni wonu bɛɛsi faga. Ni mɔgɔ kelen ya a porokɔlɔ min bolo, wo si faga mɔgɔ-porokɔlɔnɛ wo gbɛ rɔ.”

²⁵Mansa Yehu ban sarakɛ wonu bɔla, a ya a fɔ mɔgɔ bi-segan wonubɛ anuna kun-tiginu ye ko, “Wo don de gbɛ anu kuma ka anu dama faga.” Mɔgɔ bi-segan wonu donta anuna faannu na anu bolo Beyali-kɔlɛ wonu kuma. Anu ba min faga, anu ni wo sagan ka a labɔ luyi ma. Wo kɔma, anu donta kɔli-kɛ-bɔn wo burɔ, anu bi anuna bɛsi Beyali lamarala konko min tɔ.

²⁶Anu ya anuna bɛsi Beyali gbu labɔ luyi ma ka wo mintan.

²⁷Anu ya Beyali anubɛ a kɔ tinɛ wo nyɛrɛ tinya ka le. Anu ya kɔ tinɛ wo nyɛrɛ ma bo-kɛ-tinɛ la ha bi.[8]

²⁸Mansa Yehu ya kɛwuyɛ sigi Beyali-kɔlɛnu na ka le ha a ya anu nato dogbe!

²⁹ Kɔnɔ hali wo, Mansa Yehu ya a sanka Mansa Yɛrabowami ma bawo Mansa Yɛrabowami ya ninki-danla muninyɛ ladan min kɛ Bɛtɛli soe burɔ anubɛ Dan soe burɔ, ale Mansa Yehu ma wonu tinya, ado a ya anu kɔ. Min kolo wo ko, Mansa Yɛrabowami ya a ma, Isirɛla mɔgɛnu donta wonu kɔɛ rɔ.

³⁰Mari ya a fɔ Mansa Yehu ye ko, “I wara a ma Ehabula mɔgɛnu na iko n miriya ye a ma nya min. Ka a tɛgɛ wo ma, mansayɛ si to ila bɔn la ha i mamani-mamanɛ bolo Isirɛla nyamanɛ rɔ.”

³¹Kɔnɔ Mansa Yehu ma Isirɛlata Mari Allata kumɛ bira a yisi bɛɛ la fɔ ka Mansa Yɛrabowamita kɛ-nyanu bi min ya Isirɛla mɔgɛnu nadon hakɛ rɔ.

³²Mansa Yehuta wati wo rɔ, Mari wulita ka do bɔ Isirɛla nyamanɛ la. Siriya Mansa Hasiyɛli ya Isirɛla nyamanɛ tɔnkɔn do bi

³³tele-bɔɛ wara la Yorodan bɛ kɔgɔma. A ya kan tinɛ min bi Yorodan bɛ kɔgɔma dugula wara la, wo le tara furr, ha Arɔra soe min bi Anɔn bɛ dafɛ. Kaliyadi nyamanɛ anubɛ Basan nyamanɛ le nyɔ waralɛ la nun. Kɔnɔ Kadi bɔnsɔn anubɛ Rubɛn bɔnsɔn anubɛ Manasa bɔnsɔn-talɛ denu siginɛ nyɔ rɔ.

³⁴Mansa Yehu ya minnu ma ala mansayɛ kɔrɔ, katarala a ya mansayɛ kɛ a sɛnbɛ-wɛ min na, anu ya wo bɛɛ sɛbɛ Isirɛla Mansɛnuna buku do rɔ.

³⁵Mansa Yehu fagara tumɛ min, anu ya a togon Samariya. Ala den Yɛhowahasi sigira a gbɛ rɔ.

³⁶San mogan-ni-segin kɔrɔ, Yehu ye mansayɛ la Isirɛla nyamanɛ rɔ Samariya soe burɔ.