Read Kuranko 2 Mansɛnu 13 Bible Online

2 Mansɛnu 13 - Kuranko bible

2 Mansɛnu 13

¹Mansa Ehasayala den Yohasila mansayɛ san mogan-ni-sawa nyɔgɛ Yuda nyamanɛ rɔ, Mansa Yehula den Yɛhowahasi mara mansɛ la Isirɛla nyamanɛ rɔ san wo le la. A ya ala mansayɛ kɛ Samariya soe burɔ san tan-ni-wɔrɔnfila kɔrɔ.

²Kɔnɔ hali wo, Mansa Yɛhowahasi benba Mansa Yɛrabowami ya hakɛ minnu nadan, ale mansɛ ma fara wonu na, ado a benba wo taranta Isirɛla nyamanita-mɔgɛnu nabilala wo le la. A ma sɔn ka a sɔn-yogomɛnu boloka.

³Wo le ya a to, Mari fonde bɔra Isirɛla nyamanɛ kuma. Mari ya a ma, Siriya Mansa Hesiyɛli anubɛ ala den Bɛnhedadi mɛra Isirɛla mɔgɛnu kun na.

⁴Wo kɔma, Mansa Yɛhowahasi ya a kan nabɔ Mari ma. Mari sɔnta ala kan-nabɔɛ ma bawo a ya Isirɛla mɔgɛnuna tɔrɔya-nya yen Siriya mansɛ bolo.

⁵Mari ya kunkalɛ do lata min tara anu kunka ka anu bɔ Siriyanu bolo. Wo kɔma, Isirɛla mɔgɛnu sigira lafɛrɛ rɔ iko anu bi nya min nun fɔlɔ.

⁶ Kɔnɔ hali wo, anu benba Mansa Yɛrabowami ya anu nabila ko-yogomɛ minnu na, anu ma wonu boloka, ado anu tora wo le kun na burubukai! Min sanɛ wo kuma, kɔlɔma min lɛsɛnɛ musila muninyɛ la, anu bi min kelela ko Asura, anu tora wo kɔla Samariya soe burɔ.

⁷Siriya mansɛ ya Mansa Yɛhowahasila kɛlɛ-dannu nunku iko foni-fɔrɔn. Kɛlɛ-den fenfen ma to fɔ so-laburila mɔgɔ bi-loli, kirindi tan, anubɛ kɛlɛ-dan mɔgɔ waga tan. Wonu denu dɔrɔn tora.

⁸Mansa Yɛhowahasi ya minnu ma ala mansayɛ kɔrɔ, katarala a ya kerinteyɛ min kɛ, anu ya wo bɛɛ sɛbɛ Isirɛla Mansɛnuna buku do rɔ.

⁹Ale Isirɛla Mansa Yɛhowahasi lakirayara. Anu ya a togon Samariya soe burɔ. Ala den Yɛhowasi sigira a gbɛ rɔ.

¹⁰Yuda Mansa Yohasila mansayɛ san bi-sawa ani san wɔrɔnfila (37) nyɔgɛ ma, Mansa Yɛhowahasila den Yɛhowasi mara mansɛ la Isirɛla nyamanɛ rɔ san wo le la. A ya ala mansayɛ kɛ Samariya soe burɔ san tan-ni-wɔrɔ kɔrɔ.

¹¹A ya hakɛ kɛ Mari la ka bila Mansa Yɛrabowami gbɛ fɛ min ya Isirɛla mɔgɛnu labila hakɛ la.

¹²Mansa Yɛhowasi ya koe min bɛɛsi ma ala mansayɛ kɔrɔ katarala a ya kerinteyɛ min sɔrɔn ka Yuda Mansa Hamasa kɛlɛ, anu ya wo bɛɛ sɛbɛ Isirɛla Mansɛnuna buku do rɔ.

¹³Mansa Yɛhowasi fagara. Anu ya a togon Samariya mansɛnuna kaburu-soe rɔ. Mansa Yɛrabowami tɔgɔma sigira Mansa Yɛhowasi gbɛ rɔ.[9]

¹⁴ Sa-kirayɛ do ya Nɛbi Ilaisa bira. Kirayɛ gbɛlɛyara tumɛ min, Isirɛla Mansa Yɛhowasi nara a kɔndɔn tinɛ. A ke nɛbi wo ma, a dira. A ko, “E, n fa, Isirɛla kandan-natugu-ragbɛlɛ le ile la.”

¹⁵Nɛbi Ilaisa ya a fɔ ale Mansa Yɛhowasi ye ko, “Ta ka kalɛ anubɛ bɛn donu bi.” Mansɛ tara wonu bi.

¹⁶Nɛbi ya a fɔ a ye ko a ni kalabɛn wo bira a bole rɔ. Kalabɛn wo tora a bole rɔ, Nɛbi Ilaisa ya a kɔɛnnu sa mansɛ wo kɔɛnnu kuma.

¹⁷A ya a fɔ mansɛ wo ye ko, “Wundan min bi tele-bɔɛ telen tɔ Siriyanu bara la, wo laka.” A ya wo laka tumɛ min, Nɛbi Ilaisa ya a fɔ a ye ko, “A lakɛ.” A ya bɛn wo lakɛ. Nɛbi Ilaisa ya a fɔ a ye tun ko, “Ile si ma iko Marita kalabɛn ka Siriyanu nɔ. Ile si Siriyanu kɛlɛ Afɛki soe burɔ ha i ni anu nɔ.”

¹⁸Nɛbi Ilaisa ya a fɔ mansɛ wo ye tun ko, “I ni kalabɛn-toe wonu bi. I ni anu nakɛ dugu ma.” Mansɛ wo ya anu nakɛ dugu ma iko sawa. A danta wo ma.

¹⁹Wo ya a ma, Nɛbi Ilaisa fonde bɔra. A ya a fɔ mansɛ ye ko, “Hali i ya a lakɛ iko loli, ni wo ma, wɔrɔ, wo si a ma, i ni nɔ-ko-bɛrɛbɛrɛ sɔrɔn Siriyanu kuma. Kɔnɔ kaka gbɛ, i si anu nɔ iko sawa pe.”

²⁰Nɛbi Ilaisa ya so-sɛgi-kɛ. Anu ya a togon. (San-bo-san dabirɛ, Mohabu kɛnu si ta bui Isirɛla mɔgɛnu ma.

²¹Lunyɛ do, Isirɛla mɔgɛnu bi furu-togɔn la, anu ya Mohabu kɛnu yen nala anu kɛlɛ tinɛ. Tiriyante wo rɔ, anu ya furi wo lakɛ Nɛbi Ilaisa furi kuma kaburu rɔ. Anu ya anu natiriya tala. Furi wo tugura Nɛbi Ilaisa kolenu na tumɛ min, furi wo niyi bilara a rɔ. A ya a lasɔ.)

²²Mansa Yɛhowahasi siyi-tele-bɛɛ rɔ ala mansayɛ kɔrɔ, Siriya Mansa Hesiyɛli ye a yakɔrɔ-mamɔla.

²³Kɔnɔ hinɛ anubɛ kinikinɛ ye Mari rɔ. A ma sɔn Isirɛla mɔgɛnu nato-koe ma. A ya anu dɛnbɛ bawo a ara sarama-kan kiri Iburayima anubɛ ala den Isiyaka anubɛ wola den Yakoba ye nun, ado ha kaka, a ma nyina ala mɔgɛnu ko.

²⁴Siriya Mansa Hesiyɛli fagara tumɛ min, ala den Bɛnhedadi sigira a gbɛ rɔ.

²⁵Wo wati rɔ fanan, Isirɛla Mansa Yɛhowasi ya nɔ-ko sɔrɔn Mansa Bɛnhedadi ma iko sawa. Mansa Bɛnhedadi fa ara Isirɛla soe minnu bi Mansa Yɛhowasi fa Mansa Yɛhowahasi bolo nun Isirɛla nyamanɛ rɔ, Mansa Yɛhowasi ya wonu bi Mansa Bɛnhedadi bolo.