Read Kuranko 2 Mansɛnu 15 Bible Online

2 Mansɛnu 15 - Kuranko bible

2 Mansɛnu 15

¹Mansa Yɛrabowamila mansayɛ san mogan-ni-wɔrɔnfilɛ ma Isirɛla nyamanɛ kun na, Mansa Hamasala den Yusaya mara mansɛ la Yuda nyamanɛ rɔ san wo le la.

²A mansayara a sɔrɔn-san tan-ni-wɔrɔ nyɔgɛ le ma. San bi-loli ani san fila kɔrɔ, a ye mansayɛ la Yerusalɛm soe burɔ. A na tɔgɛ le Yɛkolaya. Yerusalɛm kɛ le a na wo la.

³A ya koe min bɛɛsi ma ala mansayɛ kɔrɔ, wo ya Mari hɛnɛ bawo a ya a fa Mansa Hamasa sɔn bi.

⁴Kɔnɔ hali wo, a ma ban Alla-batobɛlɛnuna bɛsi-kɔ-tinɛnu tinyana. Alla-batobɛlɛ wonu tora sarakɛnu bɔla ka isɛnti mintan kan-tina-mayɛlɛnɛ wonu tɔ.

⁵Mari ya a ma, Yusaya ya kiraya-yogomɛ do sɔrɔn a fɛrɛ ma, ado kirayɛ wo tora a ma ha a lakirayara. Ka a tɛgɛ kirayɛ wo ma, a tora sigini bɔn do la a dan na. Ale ma mansaya-wɔli kɛ tun fɔ ala den Yotam, a ya wo le ma ala nyamani-kumafɛlɛnnɛ la.

⁶Mansa Yusaya ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Yuda Mansɛnuna Buku do rɔ.

⁷ Mansa Yusaya ya so-sɛgi-kɛ. Anu ya a togon Mansa Dawuda halala-luyi ma Yerusalɛm soe burɔ. Ala den Yotam sigira a gbɛ rɔ.

⁸Mansa Yusayala mansayɛ san bi-sawa ani san segin nyɔgɛ ma Yuda nyamanɛ kun na, Mansa Yɛrabowamila den Sakaraya mara mansɛ la Isirɛla nyamanɛ rɔ san wo le la. Karɛ wɔrɔ kɔrɔ, Sakaraya ye mansayɛ la Samariya soe burɔ.

⁹Ale fanan ya hakɛ kɛ iko a benba Nebatila den Mansa Yɛrabowami ya a ma nya min, min ya Isirɛla nyamanita-mɔgɛnu nabila hakɛ kɛ la.

¹⁰Yebɛsila den Salumu ya dɔn don Mansa Sakaraya ma. A kɛra a ma mɔgɛnu yala ka a faga. Ale Salumu mara mansɛ la Mansa Sakaraya gbɛ rɔ.

¹¹ Mari ya lanyiri min kiri Mansa Yehu ye ko, “Ka a bi ile Yehuta mansayɛ ma ha i bɔnsɔn nani nyɔgɛ, mansayɛ si to wonu bolo Isirɛla nyamanɛ rɔ,” wo ara kanbali. Mansa Sakaraya ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Isirɛla mansɛnuna buku do rɔ.

¹³Mansa Yusayala mansayɛ san bi-sawa ani san kɔnɔntɛ nyɔgɛ ma Yuda nyamanɛ kun na, Yebɛsila den Salumu mara mansɛ la Isirɛla nyamanɛ rɔ san wo le la. Salumu kɛ ya karɛ kelen pe le bɔ mansayɛ la Samariya soe burɔ.

¹⁴Mansa Salumu ya koe min bɛɛsi ma ala mansayɛ kɔrɔ, katarala a ya dɔn min don Mansa Sakaraya ma ka a faga, anu ya wo bɛɛ sɛbɛ Isirɛla mansɛnuna buku do rɔ. Kadila den Mɛnahɛmu bɔra Tirisa soe burɔ ka ta Mansa Salumu faga Samariya soe burɔ. A sigira a gbɛ rɔ.

¹⁶Lunyɛ do, Mansa Mɛnahɛmu anubɛ ala kɛlɛ-dannu bɔra Tirisa soe burɔ ka ta Tapuwa. A ya Tapuwa mɔgɛ bɛɛsi faga hali mɔgɛ minnu bi soe wola foolɛ rɔ bawo wonu ma sɔn ata mansayɛ ma. Hali nyagana-kolomɛnu, a ya wonu buyi laka.

¹⁷Mansa Yusayala mansayɛ san bi-sawa ani san kɔnɔntɔ nyɔgɛ ma Yuda nyamanɛ kun na, Kadila den Mɛnahɛmu mara mansɛ la Isirɛla nyamanɛ rɔ san wo le la. Mansa Mɛnahɛmu kɛ ya san tan bɔ mansayɛ la Samariya soe burɔ.

¹⁸Ale fanan ya hakɛ kɛ iko a benba Mansa Nebatila den Mansa Yɛrabowami ya a ma nya min, min ya Isirɛla nyamanita-mɔgɛnu nabila hakɛ la.

¹⁹Asiriya Mansa Pulu tara bui Isirɛla nyamanita-mɔgɛnu ma. Wo le ya a ma, Isirɛla Mansa Mɛnahɛmu ya wodi-gbɛ makele nɔnfulu-tiginu bolo ala nyamanɛ rɔ fɔrɔsɛ la. Nɔnfulu-tigi kelen-kelennamɛ-bɛɛ ya wodi-gbɛ-gbu bi-loli bi-loli labɔ. Mansa Mɛnahɛmu ya wodi-gbɛ min nadɛn, wola gbiliyɛ anubɛ fui-fan bɔrɔ kɛmɛ loli rakɛn de. A ya wo di Mansa Pulu ma alako wo ni sɔ a fɛ. A ya wo ma alako a sɛnbɛ ni koloya Isirɛla mɔgɛnu kuma. Wodi-gbɛ wo ya Mansa Pulu hɛnɛ. A sɛgira a warɛ nyamanɛ rɔ.

²¹Mansa Mɛnahɛmu ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Isirɛla mansɛnuna buku do rɔ.

²²Mansa Mɛnahɛmu fagara tumɛ min, anu ya a togon. Ala den Pɛkahaya sigira a gbɛ rɔ.

²³Yuda Mansa Yusayala mansayɛ san bi-loli nyɔgɛ ma, Mansa Mɛnahɛmula den Pɛkahaya mara mansɛ la Isirɛla nyamanɛ rɔ san wo le la. A ya ala mansayɛ kɛ Samariya soe burɔ san fila kɔrɔ.

²⁴A ya hakɛ kɛ Mari la ka bila Mansa Yɛrabowami gbɛ fɛ min ya Isirɛla mɔgɛnu nabila hakɛ la.

²⁵Mansa Pɛkahayala kɛlɛ-den-kunyɛ, Rɛmalayala den Peka, kɔni, wonubɛ Kaliyadi kɛ mɔgɔ bi-loli ya yanfɛ kiri Mansa Pɛkahaya ma. Anu tara a faga ala bolɔn la. Anubɛ ala mɔgɔ-ba fila, Agabi anubɛ Ariyɛ[13] fanan kunyɛ tora-a-rɔ. Peka sigira a gbɛ rɔ mansayɛ la.

²⁶Mansa Pɛkahaya ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Isirɛla mansɛnuna buku do rɔ.

²⁷Yuda Mansa Yusayala mansayɛ san bi-loli ani san fila nyɔgɛ ma, Mansa Rɛmalayala den Peka mara mansɛ la Isirɛla nyamanɛ rɔ san wo le la. A ya ala mansayɛ kɛ Samariya soe burɔ san mogan kɔrɔ.

²⁸A ya hakɛ kɛ Mari la ka bila Mansa Yɛrabowami gbɛ fɛ min ya Isirɛla mɔgɛnu nabila hakɛ kɛ la.

²⁹Mansa Pekata wati kɔrɔ, Asiriya Mansa Pulu nara so-kun loli bi Isirɛla nyamanɛ rɔ. So-kun loli, wo le kɛnu na, Iyɔn wo, Ebɛli-Bɛti-Meyaka wo, Yanowa wo, Kɛdɛsi wo, anubɛ Hesɔ. A ya Isirɛla nyamani-kun sawa fanan bi, Kaliyadi wo, Kalili wo anubɛ Nafatali. A tara nyɔ-mɔgɛ bɛɛ la a warɛ Asiriya.

³⁰Yuda Mansa Yusayala den Yotam, wola mansayɛ san mogan nyɔgɛ ma, Ilamna den Hoseya ya yanfɛ kiri Mansa Peka ma ka a faga Isirɛla nyamanɛ rɔ. A sigira a gbɛ rɔ san wo le la.

³¹Mansa Peka ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Isirɛla mansɛnuna buku do rɔ.

³²Mansa Rɛmalayala den Pekala mansayɛ san fila nyɔgɛ ma Isirɛla nyamanɛ rɔ, Mansa Yusayala den Yotam mara mansɛ la Yuda nyamanɛ rɔ san wo le la.

³³Wo ya a taran, Mansa Yotam sɔrɔn ara san mogan-ni-loli bɔ. A ya ala mansayɛ kɛ Yerusalɛm soe burɔ san tan-ni-wɔrɔ kɔrɔ. A na le Sedokila den Yerusa la.

³⁴A ya koe min bɛɛsi ma ala mansayɛ kɔrɔ, wo ya Mari hɛnɛ bawo a ya a fa Mansa Yusaya sɔn bi.

³⁵Kɔnɔ hali wo, a ma ban Alla-batobɛlɛnuna bɛsi-kɔ-tinɛnu tinyana. Alla-batobɛlɛ wonu tora sarakɛnu bɔla ka isɛnti mintan kan-tina-mayɛlɛnɛ wonu tɔ. Mansa Yotam le ya Mari Bato-Bɔn kantɔ-waralɛ tenbi-bolɔn ladan.

³⁶Mansa Yotamta wati kɔrɔ, Mari ya Siriya Mansa Risen anubɛ Isirɛla Mansa Peka nata ka bui Yuda nyamanita-mɔgɛnu ma. Mansa Yotam ya so-sɛgi-kɛ tumɛ min, anu ya a togon Mansa Dawuda halala-luyi ma Yerusalɛm soe burɔ. Ala den Ehasi sigira a gbɛ rɔ. Mansa Yotam ya koe min bɛɛsi ma ala mansayɛ kɔrɔ anu ya wo bɛɛ sɛbɛ Yuda Mansɛnuna Buku do rɔ.