Read Kuranko 2 Mansɛnu 16 Bible Online

2 Mansɛnu 16 - Kuranko bible

2 Mansɛnu 16

¹Rɛmalayala den Mansa Peka, ala mansayɛ san tan-ni-wɔrɔnfila nyɔgɛ ma Isirɛla nyamanɛ rɔ, Mansa Yotamna den Ehasi mara mansɛ la Yuda nyamanɛ rɔ san wo le la.

²Ehasi mansayara a sɔrɔn-san mogan nyɔgɛ le ma. A ya ala mansayɛ kɛ Yerusalɛm soe burɔ san tan-ni-wɔrɔ kɔrɔ. Ale ma a benba Mansa Dawuda sɔn-nyimɛ bi, ado a ya min ma, wo ma ata Mari Alla hɛnɛ.

³ A ya Isirɛla mansɛnu sɔn bi hali ka a halala-den-kei ma saraka-mintantɛ la bɛsɛnu ye. Min kolo wo ko, Mari ya mɔgɛ minnu gben nyamanɛ wo rɔ nyɔ nun, wonu taranta kisimiriya-koe kɛ le sufa mala nun.

⁴Ale Mansa Ehasi kɛnɛna sarakɛnu bɔla ka isɛntinu mintan Alla-batobɛlɛnuna kɔ tinɛnu tɔ kɔnkɛnu anubɛ kɔlɔma-kuru-wɛnu kɔrɔ.

⁵ Isirɛla Mansa Peka anubɛ Siriya Mansa Risen tara bui Yerusalɛm soe ma Yuda nyamanɛ rɔ kɔnɔ anu ma Mansa Ehasi nɔ kɛlɛ rɔ.

⁶Wati kelan wo le tɔ, Idɔm mansɛ ya Yuda mɔgɛnu gben ka Ilati soe bi anu bolo. Ha bi, Idɔm kɛnu siginɛ soe wo burɔ. Soe wo ye anutayɛ la ha bi.[14]

⁷Yuda Mansa Ehasi ya kilayɛnu nata Asiriya Mansa Pulu ma. A ya a fɔ kilayɛ wonu ye ko ala wɔli-kɛlɛ le ale la. A ko a ni na anubɛ ala mɔgɛnu kunyɛ bɔ gbaran rɔ Siriya mansɛ anubɛ Isirɛla mansɛ bolo.

⁸Mansa Ehasi ya Alla Bato-Bɔn sɛnɛ anubɛ wodi-gbɛ bi hali min bi ala bolɔn fen namara tinɛ fanan. A ya wonu bi ka anu nata Mansa Pulu ma alako wo ni na a dɛnbɛ kɛlɛ rɔ.

⁹Kilayɛ wonu ke, wonu ya anu dantɛgɛ. Woletɔ ka a yira Mansa Ehasi la ko a ara sɔn, Mansa Pulu tara bui Damasika kɛnu ma Siriya nyamanɛ rɔ. A ya soe wo bi Siriyanu bolo ka nyɔ-mansɛ Risen faga. A tara nyɔ-mɔgɛnu na Kira soe burɔ.

¹⁰Wo kɔma, Mansa Ehasi tara Asiriya Mansa Pulu kɔndɔn tinɛ Damasika soe burɔ. A ye nyɔ tumɛ min, a ya Damasika kɛnuna saraka-mintan-tinɛ do yen. A ya wola muninyɛ ladan-mɔlɔnɛ bɛɛ sɛbɛ ka wo lata ala Saraka-Masɔla Yuraya ma alako wo ni wo nyɔgɔn nadan.

¹¹Yanni ale Mansa Ehasi ni sɛgi a warɛ, a ya a taran, Saraka-Masɔla Yuraya ara ban saraka-mintan-tinɛ wo sufa ladanna.

¹²Ale Mansa Ehasi ya a taran min kɛ ko saraka-mintan-tinɛ wo la ara ban danna,

¹³a ya saraka-su bɛɛ bɔ. A ya saraka-mintantɛ bɔ, a ya bu-gbɛngbɛnni-sarakɛ bɔ, a ya minni-sarakɛ bɔ, a ya yisi-kima-sarakɛ yele purupuru saraka-mintan-tinɛ wo ma.

¹⁴ A ya Marita saraka-mintan-tinɛ wo sigi saraka-mintan-tina-kurɛ anubɛ Mari Bato-Bɔn tɛma ka a lata kantɔ-wara la.

¹⁵A ya a fɔ Saraka-Masɔla Yuraya ye ko, “Sarakɛ minnu bi mintanna sɔgɔma wo, bu-gbɛngbɛnnɛ minnu bi mintanna wurɛ la wo, mabɛ nna mɔgɛnu bi nala saraka-mintantɛ anubɛ bu-gbɛngbɛnni-sarakɛ minnu na wo, anubɛ mɔgɛnu bi nala minni-sarakɛ minnu na wo, i ni to wonu bɔla nna saraka-mintan-tina-kurɛ kɛ kuma yan. I ni to saraka-mintantɛnu anubɛ sarakɛ doinu yele purupurula saraka-mintan-tina-kurɛ kɛ ma yan. Marita saraka-mintan-tina-kɔrɛ wo si ma nna bolo tafɛlɛn tinɛ la.”

¹⁶Saraka-Masɔla Yuraya ya a ma iko Mansa Ehasi ya a fɔ a ye nya min.

¹⁷ Mansa Ehasi ya yi-sigi-kunannu bɔ anu sigi-kenkirɛnu kuma ka kenkirɛ wonu wayan. Wo kɔma, a ya sila-kunan-belebele-wɛ bɔ tura tan-ni-filala muninyɛ kuma minnu nadannɛ silɛɛ la. A ya kunan-belebele wo sigi kurinu denu kuma.

¹⁸Ale mansɛ ya ala waganɛ wo sɔ tinɛ labɔ Bato-Bɔn kata kɔma. Ale mansɛ si tenbi kan min ka don Mari Bato-Bɔn kata burɔ, a ya nyɔ lafaga. A ya wo bɛɛ ma alako a ni Asiriya Mansa Pulu hɛnɛ.

¹⁹Mansa Ehasi ya koe min bɛɛsi ma ala mansayɛ kɔrɔ, anu ya wo bɛɛ sɛbɛ Yuda Mansɛnuna Buku do rɔ.

²⁰ Mansa Ehasi fagara tumɛ min, anu ya a togon mansɛnuna kaburu-soe Mansa Dawuda halala-luyi ma Yerusalɛm soe burɔ. Ala den Hɛsakaya sigira a gbɛ rɔ.