Read Kuranko 2 Mansɛnu 19 Bible Online

2 Mansɛnu 19 - Kuranko bible

2 Mansɛnu 19

¹Mansa Hɛsakaya ya kumɛ wonu namɔɛn tumɛ min, a ya ala duruki rafara yisi-tinyɛ bolo. A tara kasa-kurɛ[21] don a kan na. A tara Mari Bato-Bɔn la.

²Ilayakim min bi ala bolon-mafɛlɛnna wo, Sɛbana min bi ala kɛdi-sɛbɛla wo, anubɛ saraka-masɔla-kun-tiginu wo, Mansa Hɛsakaya ya wonu nata Emɔsila den Nɛbi Aiseya ma. Wonu fanan tara kasa-kurɛ la anu kan na.

³Mansa Hɛsakaya ya a fɔ anu ye ko anu ni a fɔ Nɛbi Aiseya ye ko, “Tɔrɔ-tele le bi la. Ma ye tɔrɔyɛ anubɛ yarabiyi kɔrɔ bi. Ma mani de iko musi min bi mui-koe rɔ kɔnɔ sɛnbɛ sa a bolo tun den sɔrɔn tinɛ.

⁴Asiriya mansɛ ara ala kandɛ lana Alla-nimɛ masɔrɔn tinɛ. Alamɛ ita Mari Alla ya a masɔrɔn-kan wo lamɔɛn ka a masɔrɔnnɛ wo tɔrɔ. Woletɔ male Yakoba kegeya-toe minnu tonɛ, i ni Alla matara ma ye.”

⁵Nɛbi Aiseya ya Mansa Hɛsakayata kilayɛ lamɔɛn tumɛ min,

⁶ale fanan ya a sara Mansa Hɛsakaya wara. A ko, “Ni Asiriyanu bi a fɔla ko Mari ti ke a kisila, hali kumɛ wo ma a rakilan.

⁷Mari si a ma, Asiriya mansɛ ni kumɛ do lamɔɛn. Wo si a ma, anubɛ ala mɔgɛnu ni anu buri tala anuta nyamanɛ rɔ. Mari si a ma, ale mansɛ ni faga nyɔ rɔ.”

⁸Asiriya mansɛla kandɛ sɛgira ala mansɛ ma tumɛ min, wo ya a lamɔɛn ko anuna mansɛ ara bɔ Lesi soe burɔ ka ta Libina kɛnu kɛlɛ tinɛ. Kandɛ wo tara a manyinika tinɛ.

⁹Asiriya Mansa Sɛnakaribu ya a lamɔɛn tumɛ min ko Sudan Mansa Teriheka ara na Iyipiti kɛlɛ-dannu na a bolo a kan ma Asiriya nyamanɛ rɔ, ale Mansa Sɛnakaribu ya kɛdi sɛbɛ Mansa Hɛsakaya ma Yuda nyamanɛ rɔ.

¹⁰Min sanɛ kɛdi wo rɔ, a ko, “Ile lanɛ ita Alla min na, wo ara a fɔ i ye ko i ti sa nde, Sɛnakaribu bolo tɔ. Kɔnɔ i kana sɔn, a ni i mayuwaya.

¹¹N bara nyamanɛ doinu kasara nya min, i wara wo lamɔɛn, nyɛ? I lanɛ a la ko i kunyɛ si bɔ n bolo tɔ, wa?

¹²N benbanu ya Koson kɛnu nɔ anubɛ Hɛran kɛnu anubɛ Resɛfu kɛnu anubɛ Idɛn kɛnu minnu bi Tɛlasa nyamanɛ rɔ, ado wonuna bɛsɛnu ma ke anu kunkala anu benba wonu bolo.

¹³Hamati kɛnuna mansɛ ye mintɔ gbɛ? Arapadi kɛnuna mansɛ ye mintɔ gbɛ? Sifafeyim kɛnuna mansɛ ye mintɔ gbɛ? Hena kɛnuna mansɛ ye mintɔ gbɛ? Ifa kɛnuna mansɛ ye mintɔ gbɛ?”

¹⁴Kɛdi wo ke Mansa Hɛsakaya ma Yuda nyamanɛ rɔ, a ya wo rakaran. A tara Mari Bato-Bɔn la ka kɛdi wo sa nyɔ rɔ Mari ye.

¹⁵ A donta matarali-kɛ rɔ, a ko, “E, Isirɛlata Mari Alla, ile min mayiginɛ melika filɛ muninyɛ tɛma tɔn-kenkirɛ kuma. Alla, ile le kelen pe le duninya rɔ. Ile le ya san-kole anubɛ dugu-kole dan.

¹⁶Kɔnɔ Mari, i kolan maka. I ni a yen min bi sigila ma ma. E, Alla-nimɛ, i wɔlɔ matɔlɔ i masɔrɔn-kan la Sɛnakaribu bolo.

¹⁷Mari, bɛɛ ya a lɔn ko Asiriya mansɛnu bara nyamani-siyaman kasara

¹⁸ka anuna bɛsɛnu mintan, ado ma ya a lɔn ko alla ma wonu na. Kɔlɔma anubɛ kuru-lɛsɛnɛ le wonu na dɔrɔn! Anu nadannɛ hadama-dan bolo la.

¹⁹I yandi, mata Mari Alla, ma tanka Asiriyanu masibɛ ma alako duninya bɛɛ ni a lɔn ko ile Mari kelen pe le Alla la.”

²⁰Wo kɔma, Nɛbi Aiseya ya kilayɛ lata Mansa Hɛsakaya ma. A ko, “Mari ara ila matarali-kan yabi.

²¹A ko Yerusalɛm kɛnu si tɛgɛ Asiriya Mansa Sɛnakaribu rɔ ka a bɔrɔbɔ.

²²A ko ale Sɛnakaribu mirinɛ ko a ye yon nafɛyala? A sa Isirɛlata Mari Alla-sɛnimɛ gbiliyala,

²³fɔ a ye kilayɛnu nanala ka a nyɛrɛ matɔgɔ. A ko Mansa Sɛnakaribu ye a fɔla ko anubɛ ala kirindinu ya Lɛbanan kɔnkɔ-layan-bɛnu nɔ ka kɔlɔma-layan-bɛnu nawuya nyɔ hali ka ta gbɔngbɔn-makilannɛ bɛɛ kɔrɔ.

²⁴A ye a nyɛrɛ matɔgɔla ko a ye kɔlɔnnu sinna sibolo-gbɛrɛnu barɛnu tɔ. A ko anubɛ ala kɛlɛ-dannu bara Iyipiti bɛnu gbala anu kian la.

²⁵“A ko Mansa Sɛnakaribu ma a lamɔɛn ko Marita miriya le kɛ la, ado a ye wo dafa tinɛ le, wa? Mari le ya sɛnbɛ di ale Asiriya mansɛ ma ka so-kunbɛnu yɛlɛma tonbɔnnu na.

²⁶Mɔgɛ minnu bi so-kunbɛ wonu tɔ, wonu kumakɔra. Anu kilanta dɔgɔma-ma-de! Mɔgɛ wonu kun-mayɛlɛmanɛ iko taraba-tele wa sɔ yerima-fɛrɛn san la.

²⁷“Mari ko a ya Mansa Sɛnakaribu wara-koe bɛɛ lɔn, ado a ko a ya a don-woe anubɛ a bɔ-woe lɔn. Mari ko a ya a lɔn Mansa Sɛnakaribu ye diminyala a ma nya min.

²⁸A ko a ara diminya min kɛ, Mari ara wo nya-yen. A ko a ara ala wasinteyɛ lɔn. Mari ko a si a sunyɛ sɔgɔ lunyɛ la ka karafɛ kɛ a dɛ ma ka a lasɛgi a gbere fɛ a bɔra kan min.”

²⁹Wo kɔma, Nɛbi Aiseya ya a fɔ Mansa Hɛsakaya ye tun ko, “Nyina, fɔ wo ya ki-fen-bananu dɔn. Yari, fɔ wo wa wonu gba-mabunsannu dɔn. Yari kɔ, wo si wola ki-fannu ki ka wola fui-fannu fui. Wonu ba ke tumɛ min, wo ni wonu tɛgɛ. San sawa ko-nya kɛnu si ma tamasere la wo ye ko

³⁰a mɔgɛ toe min tonɛ Yuda nyamanɛ rɔ, wonu si sabati iko ki-fan min bi a suli layigila dugi rɔ pon, ka gbɔ-nyimɛ kɛ.

³¹Mɔgɛnu si to anu niyi la Yerusalɛm soe burɔ nyɔ kɔnkɛ kuma bawo Mari ara ban a latɛgɛla wo nya na le.”

³²Nɛbi Aiseya ya a fɔ Mansa Hɛsakaya ye tun ko, “Mari ara kɛ le fɔ Asiriya mansɛ wara-koe rɔ ko a ti a kunyɛ ladon soe kɛ burɔ hali ka kalabɛn-kelen-bɛrɛn nakɛ soe kɛ burɔ yan, wo ti ma tun! Hali ala kɛlɛ-dannu ti gbɛrɛn soe kɛ ma tun! Hali ka bɔnkɛ ladɛn tarɛ fɛ, anu si yɛlɛ min ma, wo ti ma anu bolo muk!

³³Mari ko a nara gbere min fɛ, a ye sɛgila wo le fɛ. A ti a kunyɛ ladon soe kɛ burɔ.

³⁴Mari ko ka a tɛgɛ ata gbiliyɛ anubɛ ata lanyiri ma a ya min kiri Mansa Dawuda ye, a si soe kɛ latanka.”

³⁵Wulɔn-suyi-nyɛrɛ rɔ, Marita melika yigira Asiriyanuna dagɛ rɔ. A ya mɔgɔ waga kɛmɛ kelen mɔgɔ waga bi-segin ani mɔgɔ waga loli (185,000) faga Asiriyanu tɔ. Bandɛ kanɛ, wonu furi taranta nyɔ.

³⁶Woletɔ Mansa Sɛnakaribu sɛgira a kɔma Ninɛfa soe burɔ.

³⁷Lunyɛ do, Mansa Sɛnakaribu ye ala bɛsi Nisirɔki kɔ tinɛ tumɛ min, ala den fila Adamɛlɛki anubɛ Sarisa tara anu fa wo faga nyɔ. Wonu ya anu buri tala Ararati nyamanɛ rɔ. Ala dan do min tɔgɛ Isahadɔn, wo sigira a gbɛ rɔ.