Read Kuranko 2 Mansɛnu 20 Bible Online

2 Mansɛnu 20 - Kuranko bible

2 Mansɛnu 20

¹Kɛ wati ya a taran, Mansa Hɛsakaya kun ma ara kɔ kirayɛ bolo. A tora doni, a ni lakiraya. Emɔsila den Nɛbi Aiseya tara a kɔndɔn tinɛ. A ya a fɔ a ye ko, “Mari ko yanni i ni faga, i ni i fɛ-koe mumɛ bɛɛ rabɛn bawo a ko i ti kirayɛ kɛ nɔ.”

²Mansa Hɛsakaya ya a tintan dandan la ka matarali kɛ. A ko,

³“E, Mari, i miri n ma. N ya ko-latelennɛ kɛ ka ita kumɛnu to anu gbɛ rɔ. N ya n taya ka i sako bɛɛ kɛ.” Ala matarali-kɛ wo ya a laban diyi kɛ ma a bolo.

⁴Nɛbi Aiseya ya a warata-kilɛ bira. Yanni a ni tenbi mansɛla kata la, Mari ya a fɔ a ye ko,

⁵“Mansa Hɛsakaya min bi nna mɔgɛnu kuma, sɛgi i kɔma wo wara. I wa ke, i ni a fɔ a ye ko nde, a benba Dawudata Mari Alla ko n bara ata matarali-kan lamɔɛn ka a ya-yi yen. A fɔ a ye ko n si a lakɛndɛya ken! Tele fila a sawa nyɔgɛ, a si ke tala n Bato-Bɔn la.

⁶N si a ma, a ni san tan-ni-loli bɔ tun. N si ale anubɛ Yerusalɛm soe latanka Asiriya mansa-masibɛ ma. N si soe kɛ latanka ka a tɛgɛ nta gbiliyɛ anubɛ nta lanyiri ma n ya min kiri nta wɔli-kɛla Dawuda ye.”

⁷Aiseya ban wo fɔla mansɛ ye, a ya a fɔ mansa-fɛ-biralɛ wonu ye ko anu ni toro-gbɔ-ratugunɛ sa mansɛla sumunɛ la. Wo si a lakɛndɛya le.

⁸Mansa Hɛsakaya ya Nɛbi Aiseya manyinika ko, “Ka a fɔ ko Mari si n nakɛndɛya, ado tele fila a sawa nyɔgɛ, n si ke tala Mari Bato-Bɔn la, nfen si ma wo tamasere la?”

⁹Nɛbi Aiseya ya a fɔ a ye ko, “I tonya. Mari si tamasere di i ma ka a yira i la ko a ye ala lanyiri latɔnbagayala le. Ninɛ kɛ ma ni ta yarɔ le, ka, a ma ni sɛgi a kɔma le?”

¹⁰Mansa Hɛsakaya ya a fɔ Nɛbi Aiseya ye ko, “Ninɛ mata-koe yarɔ, wo ma gbɛlɛ. A ma le, a la ni sɛgi kɔma.”

¹¹Nɛbi Aiseya ya Mari matara. Mansɛ fa Mansa Ehasi ya wati-lɔn-fan min nadan kɔrɔma la, Mari ya a ma, ninɛ wo masɛgira a kɔma wo le ma ha kin-fa tan nyɔgɔn.

¹²Wo wati ya a taran, Baladanla dan Mɛrodaki ye mansayɛ la Babilɔn nyamanɛ rɔ. Wo ya a lamɔɛn ko Mansa Hɛsakaya ma kɛndɛ Yuda nyamanɛ rɔ. A ya kɛdi sɛbɛ ka wonubɛ a sanbɛnu don ala kilayɛnu bolo ka wonu nata a kɔndɔn tinɛ.

¹³Wonu ke Mansa Hɛsakaya ma, a ya wonu sɛnibɔ. Fen-kolomɛ min bɛɛ lamaranɛ ale Mansa Hɛsakaya bolo, a ya wonu yira sundan wonu na. Sɛnɛ wo, wodi-gbɛ wo, dɔn-fen ladiya-fan anubɛ fen-suma-diyamɛ wo, kɛlɛ-kɛ-miran minnu maranɛ a bolo wo, a ya wo bɛɛ yira sundan kɛnu na. Fenfen sa ala nyamanɛ wo rɔ a ma min yira sundan wonu na.

¹⁴Nɛbi Aiseya tara ale mansɛ manyinika ko, “Sundan kɛnu bɔra mintɔ? Anu ya nfen fɔ i ye nun?” Mansa Hɛsakaya ko, “Anu bɔra fɔɔ Babilɔn nyamanɛ rɔ pon!”

¹⁵Nɛbi Aiseya ko, “Anu ya nfen yen ila bolɔn la nun?” Mansa Hɛsakaya ko, “Fenfen sa nyɔ anu ma min yen anu yɛ la. Nna bolonna-fen wo, nna fen-namara-tinata-fen wo, n ya wo bɛɛ yira anu na.”

¹⁶Ale nɛbi ya a fɔ mansɛ ye ko, “Nba, Mari Sɛnbɛ-Bɛɛ-Tigi ko

¹⁷ wati do ye nala, i wara fen-kolomɛ minnu nadɛn ila bolɔn la wo, i benbanu bara fen-kolomɛ minnu nadɛn wo, wo bɛɛ si ta Babilɔn nyamanɛ rɔ. A ko hali wo kelen ti to yan.

¹⁸ A ko hali ile mansɛ bɔnsɔn donu si ta. Wo donu si ma tɛgannu na minnu si to wɔlila Babilɔn mansɛla bolɔn la.”

¹⁹Mansa Hɛsakaya ya a lɔn kumɛ wo le ma ko ata wati si ma yisi-kimɛ anubɛ lafɛrɛ la. Woletɔ a ya a fɔ nɛbi wo ye ko, “I wara Marita kilayɛ min nakɛ n ma kɛ la, wo kin fasai!”

²⁰Mansa Hɛsakaya ya yi lɛngban ladan nya min wo, a ya kɔnkɛ punsɔgɔ, yi tenbira ka don soe burɔ nya min wo, anubɛ a ya kerinteyɛ min kɛ, wo bɛɛ sɛbɛnɛ Yuda Mansɛnuna Buku do rɔ.

²¹Mansa Hɛsakaya ya so-sɛgi-kɛ. Ala den Manasa sigira a gbɛ rɔ.