Read Kuranko 2 Mansɛnu 22 Bible Online

2 Mansɛnu 22 - Kuranko bible

2 Mansɛnu 22

¹ Yosaya ya mansayɛ sɔrɔn Yuda nyamanɛ rɔ a sɔrɔn-san segin nyɔgɛ le ma. San bi-sawa ani san kelen, a ye mansayɛ la Yerusalɛm soe burɔ. A na le Adayala den Yɛdaida min bɔra Bɔsikati soe burɔ.

²Yosaya ya a benba Mansa Dawuda sɔn-nyimɛ bi. A ya Allata tɔn bɛɛ bira, ado a ya min bɛɛ ma, wo ya Mari hɛnɛ.

³Mansa Yosayala mansayɛ san tan-ni-segin nyɔgɛ ma, ala kɛdi-sɛbɛlɛ min tɔgɛ le Safan, a ya wo sɔ Mari Bato-Bɔn la. Safan kɛ fa tɔgɛ le Asalaya. A benba tɔgɛ le Mɛsulam.

⁴Mansa Yosaya ya a fɔ ale Safan ye ko, “Ta Saraka-Masɔla-Kun-Tigi-Wɛ Helikaya wara. A fɔ a ye ko saraka-masɔlɛ minnu bi wodi makelela batoli-kɛlɛnu bolo bonda-dɛ la, ni anu bara min nyɔgɔn sɔrɔn, anu ni wo dan.

⁵Anu ni wodi wo do bi ka a don Bato-Bɔn fɛ-birala wɔli-kunyɛnu bolo.

⁶Wonu si wodi wo bi ka bon-sɔlɛnu anubɛ bon-sigilɛnu anubɛ bon-tuwalɛnu sara. Wo kɔma, anu ni fɛrannu anubɛ kuru-lɛsɛnɛnu san wodi wo toe la.

⁷ Wɔli-kunyɛ wonu natelenta nya min, hali mɔgɔ ma anu manyinika wodi wo lawɔli-nya ma.”

⁸Saraka-Masɔla-Kun-Tigi-Wɛ Helikaya ya a fɔ Safan ye ko, “N bara Marita tɔn-sɛbɛnɛnu yen Bato-Bɔn la.” A ya tɔn wo don Safan bolo. Wo ya a karan.

⁹Ale Safan tara mansɛ wara. A ya a fɔ a ye ko, “Ila wɔli-kɛla saraka-masɔlɛnu tara wodi wonu natenbi Bato-Bon-wɔli-kunyɛnu ma.”

¹⁰Wo kɔma, a ya a fɔ mansɛ ye tun ko, “I ma buku do yen Saraka-Masɔla-Kun-Tigi-Wɛ Helikaya ya min don n bolo?” A donta buku wo karan rɔ mansɛ ye.

¹¹Kumɛ minnu sɛbɛnɛ buku wo rɔ, ale mansɛ ya wo lamɔɛn tumɛ min, a ya ala duruki rafara yisi-tinyɛ bolo.

¹²Saraka-Masɔla-Kun-Tigi-Wɛ Helikaya wo, Safanla den Ahaikam wo, Masikayala den Akibori wo, mansɛ fɛ-birala Asaya wo, anubɛ ale Safan nyɛrɛ wo, mansɛ ya a fɔ anu ye ko,

¹³“Wo ta Mari manyinika mabɛ nta nyamanita-mɔgɛnu ye ka a tɛgɛ buku kɛ karanla ko ma. Mari ara diminya ma ma bawo ma fanu ma tagama iko a sɛbɛnɛ buku kɛ rɔ nya min.”

¹⁴Nɛbi-musi do siginɛ Yerusalɛm kan-tina-kurɛ do rɔ, a tɔgɛ Hulada. Nɛbi-musi kɛla kei le Tekefala den Salumu na. Salumu wo benba tɔgɛ le Harahasi. Bato-Bɔn wo durukinu namaralɛ le ale Salumu na. Koe min bɛɛ mara, anu ya wo rakaran nɛbi-musi wo ye.

¹⁵Hulada ya Marita sarakanɛ fɔ anu ye ko,

¹⁶“Mari ko a ye nala Yerusalɛm kɛnu tɔrɔla iko mansɛ ara a rayen buku wo rɔ nya min.

¹⁷Yerusalɛm kɛnu ya anu ban ale Mari la ka sarakɛ bɔ anubɛ ka isɛnti mintan anuna bɛsɛnu ye. Woletɔ Mari fonde ara bɔ. A ko fenfen sa nyɔ min si ala fondo-bɔɛ makimɛ.

¹⁸Kɔnɔ Yuda mɔgɛnuna mansɛ min ya wo sɔ n barɛ Mari manyinika tinɛ, n ko wo ni Marita sarakanɛ fɔ a ye ka a tɛgɛ kumɛ min sɛbɛnɛ Marita buku rɔ. Mari ko

¹⁹bawo mansɛ ara a yen, ale Mari ye nala Yerusalɛm kɛnu tɔrɔyala nya min ka Yerusalɛm soe ma kan-tina-makilannɛ la, ado nyɔ-tɔgɛ si ma dankalɛ la mɔgɛnu bolo. Wo yen mansɛ bolo, a tubira ka a nyɛrɛ famayigi ale Mari ye. A donta diyi-kɛ rɔ ka ala duruki rafara yisi-tinyɛ bolo. Woletɔ Mari ko a ara ale mansɛla matarali-kan lamɔɛn.

²⁰A ti tɔrɔyɛ wo lana Yerusalɛm soe ma fɔ ale mansɛ wa faga tumɛ min. Mari ko a si a ma, ale mansɛ ni faga yisi-kimɛ rɔ.” Mɔgɛ wonu tara sarakanɛ wo lake Mansa Yosaya ma.