Read Kuranko 2 Mansɛnu 3 Bible Online

2 Mansɛnu 3 - Kuranko bible

2 Mansɛnu 3

¹Yuda Mansa Yɛhosafatila san tan-ni-wɔrɔnfilɛ mansayɛ la, a san tan-ni-segin nyɔgɛ ma, Mansa Ehabula den Yɔram mara mansɛ la Isirɛla nyamanɛ rɔ san wo le la. San tan-ni-fila[5] kɔrɔ, a ye mansayɛ la Samariya soe burɔ.

²Mansa Yɔram bilara Mari la kɔnɔ a ma yogo iko a fa anubɛ a na sɔn ye nya min. A fa ara muninyɛ min nadan nun, anu si anuna bɛsi Beyali kɔ min na, a ya wo tinya.

³Kɔnɔ hali wo, a ma ko-yogoma-kɔrɛ wonu boloka Nebatila den Mansa Yɛrabowami ya Isirɛla mɔgɛnu nadon minnu tɔ.

⁴Mansa Mesa min bi Mohabu nyamanɛ rɔ, saga-waga-siyaman-tigi le wo la. San-bo-san, a si saga-den waga kɛmɛ (100,000) di Isirɛla mansɛ ma anubɛ a siyi ka bɔ saga waga kɛmɛ ma dutiyɛ la.

⁵Kɔnɔ Mansa Ehabu faganɛ, Mansa Mesa wo murutiyara Isirɛla nyamanɛ ma.

⁶Wo le ya a ma, Mansa Yɔram bɔra Samariya soe burɔ ka ta Isirɛla kɛlɛ-dan bɛɛsi kundɛn kan-tina-kelen.

⁷A ya kilayɛ lata Mansa Yɛhosafati ma Yuda nyamanɛ rɔ ko, “Mohabu mansɛ ara murutiya Isirɛla nyamanɛ ma. I ti n dɛnbɛ anu kɛlɛla?” Mansa Yɛhosafati ya a yabi ko, “N bara sɔn ka wo dɛnbɛ. Nna kɛlɛ-dannu, ita kɛlɛ-dan le wonu na. Nna soeenu, ita soee le wonu na.

⁸Ma si bɔ kilɛ mintan fɛ ka bui anu ma?” Mansa Yɔram ya a yabi ko, “Ma ye miniminina le ka bɔ Idɔm wulɛ rɔ.”

⁹Isirɛla mansa wo, Yuda mansa wo, Idɔm mansa wo, wonubɛ anuna kɛlɛ-dannu wulita. Tele wɔrɔnfila, anu bi tagama-kilɛ ma. Min-kɛ-yi banta anu bolo. Yi-wo-yi ma to anu bolo hali anuna soeenu mintɛ.

¹⁰Mansa Yɔram ko, “Matɛ ara ban! Mari ara male mansa sawɛ ladɛn ka ma don Mohabu mansɛ bolo bi, nyɛ?”

¹¹Mansa Yɛhosafati ya a fɔ anu ye ko, “Nɛbi sa yan min si Mari manyinika ma ye, wa?” Mansa Yɔramla kɛlɛ-den-kunyɛ do ko, “Safatila den Nɛbi Ilaisa ye yan. Nɛbi Ilayala karan-den le wo la nun.”

¹²Mansa Yɛhosafati ya a fɔ anu ye ko, “Nɛbi-bɛrɛbɛrɛ le wo la.” Wo kɔma, mansa mɔgɔ sawɛ kɛnu wulita ka ta a taran.

¹³Anu ke a ma, Nɛbi Ilaisa ya a fɔ Isirɛla mansɛ ye ko, “Nfen ko ye ma tɛma? Nfenna i ma ta Beyalita nɛbi wonu manyinika i fa anubɛ i na duruta minnu manyinikala?” Kɔnɔ Mansa Yɔram ko, “Ma ti wo ma bawo Mari le wara ma don Mohabu mansɛ bolo kɛ la.”

¹⁴Nɛbi Ilaisa ya anu yabi ko, “N bara n keli Mari-nimɛ Sɛnbɛ-Bɛɛ-Tigi ye, n bi minta wɔlɛ la, ni Mansa Yɛhosafati wara-koe ma, n ti n da bila wo wara-koe rɔ.

¹⁵Wo ta bɔlon-fɔlɛ do kele.” Bɔlon-fɔlɛ wola nɛ ka bɔlon-fɔɛ wo dabira, Marita sɛnbɛ yigira Nɛbi Ilaisa kuma.

¹⁶A ko, “Mari ko wo ni yi-woron-kɔrɛ kɛ rawɔrɔ.”

¹⁷A ko fanan, “Hali banda ma fin, fɔnyɔ ma bɔ, yi-worɔn kɛ la si fa yi la tɛf! Wobɛ wola kolo-fannu si yi-siyaman sɔrɔn.”

¹⁸Wo kɔma, Nɛbi Ilaisa ya a fɔ anu ye ko, “A dɔgɔmɛ le kɛ la Mari yala. Min sanɛ wo kuma, wo ni la a la serr, ko a si Mohabu mɔgɛnu don wo bolo.

¹⁹Wo si anuna so-latankanɛ bɛɛ nɔ. Wo si anuna ki-fan bɛɛ tinya. Wo si anuna tenke bɛɛ gberen. Wo si anuna dugu-nyimɛnu nafa kuri la.”

²⁰Wo banda kɛ, anuna subagama-saraka-bɔ-wati, yaga, yi ara tugu a worɔn kun na ka bɔ Idɔm nyamanɛ telen tɔ. A ya dugi bɛɛ yamatogon.

²¹Mohabu nyamanita-mɔgɛnu ya a lamɔɛn min kɛ ko mansa sawa ara na anu kɛlɛ kan ma, anuna nyamanita-mɔgɛ-keimɛ bɛɛ ya anu nadɛn anuna nyamani-dan la, ka a bi a dɔgɔmɛ ma ka a sigi a kinamɛ la, alako minnu si ke kɛlɛ-kɛ-fan bila.

²²Wo fanan banda kɛ, Mohabunu ya teleta waan yen yi kuma. A rawulennɛ iko yele.

²³Anu bɛɛsi ya a lasɔnkɔ ko, “Yele le! A manɛ iko mansa sawɛ kɛ anubɛ anuna mɔgɛnu bara anu nyɔgɔn matɛgɛtɛgɛ. Wo na, ma ni ta anuna dagɛ rɔ ka ma wasakara maka anuna bolo-fannu tɔ!”

²⁴Kɔnɔ anu ke dagɛ wo rɔ, Isirɛla mɔgɛnu wulita anu kan ma ka sɛgi anu gbenna. Anu ya Mohabu mɔgɔ-siyaman faga!

²⁵Anu ya anuna soenu halaki. Anu tenbi belenna sɛni-dugu-nyimɛ minnu na, wo kelen-kelennamɛ-bɛɛ si kuri bi ka a lakɛ dugi wo rɔ. Anu ya anuna dugu-nyimɛ bɛɛ lafa kuri la. Anu ya anuna tenkenu gberen ka anuna ki-fan bɛɛ tinya. Fɔ anuna so-karantan min tɔgɛ Kiri-Harɛsɛti min tora. Kɔnɔ tɔ-a-la, lenfiran-tiginu ya a mini so-karantan wo ma ka wuli anu kan ma.

²⁶Mohabu mansɛ ya a lɔn min kɛ ko a ti Isirɛla mɔgɛ kɛnu nɔ, a ya faan-tigi mɔgɔ kɛmɛ wɔrɔnfila bi. A ya anu sɔ a yarɔ alako a ni ke Idɔm mansɛ ma kɔnɔ anu ma anu nɔ mumɛ!

²⁷Mohabu mansɛ wo ke soe tun, a ya ala den-kei fɔlɔtɛ bi min si sigi a gbɛ rɔ nun ka wo ma saraka-mintantɛ la soe wo tarɛ kuma. Isirɛla mɔgɛnu ya wo yen min kɛ, anu ma sisi wo mafɛlɛnna. Anu sɛgira anu barɛnu tɔ.