Read Kuranko 2 Mansɛnu 5 Bible Online

2 Mansɛnu 5 - Kuranko bible

2 Mansɛnu 5

¹Siriya kɛlɛ-den-kunyɛ do ye nyɔ nun min tɔgɛ Neyaman. Wo ye gbiliyɛ rɔ Siriya mansɛ bolo bawo Mari ara ale Neyaman dɛnbɛ ko a ni nɔ-ko sɔrɔn a yogenu ma, ado kurugba-bɛrɛbɛrɛ le ale la kɔnɔ yaga, kiraya-yogomɛ do ye a fɛrɛ ma.

²Lunyɛ do, Siriyanu tara bui Isirɛla nyamanɛ ma, anu ya Isirɛla sunkurun-ni kelen bira ka ta wo ma Neyamanna musila yɔɔn la. -

³Kɔnɔ lunyɛ do, yɔɔn-sunkurun-nɛ wo ya a fɔ Neyamanna musi ye ko, “Ni n tigi Neyaman kɛ tara Samariya soe burɔ, nɛbi min bi nyɔ, wo si a dandan de!”

⁴Neyaman ya kala sɔrɔn kumɛ kɛ ma tumɛ min, ale Neyaman nyɛrɛ ya a lasɔ ka ta dennɛ wola kumɛ rakaran mansɛ ye.

⁵Mansɛ wo ya kɛdi do don a bolo, a ko, “Ta kɛ la, i ni a don Isirɛla mansɛ bolo.” Min sɛbɛnɛ kɛdi wo rɔ, wo le ko, “Nna kɛlɛ-den-kunyɛ le kɛ la min tɔgɛ Neyaman. A sɔgɛ ye n na, i ni a dandan n ye.” Neyaman ya wodi-gbɛ bi minna gbiliyɛ anubɛ fui-fan bɔrɔ loli rakɛn de! A ya sɛnɛ bi minna gbiliyɛ anubɛ fui-fan bɔrɔ kelen rakɛn de! A ya fɛrɛya-bɔ-hakika tan fanan bi ka ta wonu na a bolo Isirɛla mansɛ wara.

⁷Isirɛla mansɛ wo ya kɛdi wo karan tumɛ min, a ya ala duruki rafara yisi-tinyɛ bolo. A ya a fɔ ko, “Siriya mansɛ kɛ mirinɛ ko kiraya-dandannɛ le nde la, wa? A miri le ko Alla le nde la, wa? Sɛnbɛ ye nde bolo ka mɔgɔ faga anubɛ ka furi niyi bila a rɔ? N bara a lɔn kɛ le ma ko n kɛlɛ-sɔgɛ ara a bira.”

⁸Nɛbi Ilaisa ya a lamɔɛn tumɛ min ko Isirɛla mansɛ ara ala duruki rafara a kan na, a ya kilayɛ lata a ma. A ko, “I yisi kana tinya. Hali i ma ila duruki rafara nun. Mɔgɛ min tara i wara wo la, a lana n ma. N si a yira a la ko nɛbi ye Isirɛla nyamanɛ kɛ rɔ yan!”

⁹Mansɛ wo ya Neyaman lata Ilaisa ma. Wo le ya a ma, Neyaman ya ala soeenu anubɛ ala kirindi bi ka ta. A tara wonu nasɔ Ilaisa wara bonda-dɛ la.

¹⁰Nɛbi Ilaisa ya ala wɔli-kɛlɛ sɔ ka a fɔ Neyaman ye ko a ni ta a ku Yorodan bɛ rɔ iko wɔrɔnfila. Ni a ya wo ma, a si kɛndɛya feu!

¹¹Neyaman ya wo lamɔɛn tumɛ min, a yisi bɔra. A tara a ye. Ale Neyaman tamatoe, a ye a fɔla ko, “Nde ya a lɔn nun ko nɛbi kɛ ye bɔla le nun n bara ka ata Mari Alla madiya n ye ka a bole dun nna kirayɛ kɛ kuma alako n ni kɛndɛya.

¹²Yanni n ni n ku Isirɛla bɛ kɛnu tɔ, nfenna n ti ta n ku Damasika bɛnu tɔ iko Abana bɛ, ni wo ma, Fapa bɛ rɔ? Wonu gbɛra ka tenbi Isirɛla bɛ kɛnu na. N ti n ku wonu tɔ ka kɛndɛya?” A tara a yisi ma a ye.

¹³Ale Neyamanna wɔli-kɛlɛnu nara a fɔ a ye ko, “Ma tigi, ni nɛbi kɛ ya a lagbɛlɛya i kuma, fɔ i wa i nyɛrɛ don i kɔndɔfili-koe rɔ nun. Kɔnɔ a ara a fɔ i ye min kɛ dɔrɔn ko i ni ta i ku, i ni kɛndɛya, nfenna i ma sɔn wo ma?”

¹⁴ Makawandili-kan wo le ya a ma, Neyaman tara a ku Yorodan bɛ rɔ iko wɔrɔnfila iko Allata mɔgɛ ya a fɔ a ye nya min. A kɛndɛyara ken! A fɛrɛ nunkura a ma pinapina iko kemini-nawuli-san.

¹⁵Anubɛ ala wɔli-kɛ-dan wonu sɛgira Nɛbi Ilaisa wara. Anu ke a ma, a ko, “Ka a bi bi ma, n bara a lɔn ko alla-wo-alla sa nyɔ Isirɛlata Alla kɔma. I yandi n fa, n bara na i sanbɛ minnu na, wonu bira n bolo.”

¹⁶Nɛbi Ilaisa ya a fɔ a ye ko, “N bi wɔlila Mari-nimɛ min ye, n bara n keli wo tɔgɛ rɔ ko n ti fenfen bira i bolo.” Neyaman nɔrɔta a ma kɔnɔ a ma sɔn.

¹⁷Neyaman ya a fɔ a ye worɔ ko, “I yandi, ni i ma sɔn i sanbɛ kɛnu na, a ma, n ni wota dugi kɛ bɔnku dunu fila[6] bi. Nna sofɛlɛnu ni ta wonu na. N ti saraka-wo-saraka bɔ tun saraka-mintantɛ bɛsi-wo-bɛsi ye fɔ Isirɛlata Mari.

¹⁸Siriyanuna bɛsɛ min tɔgɛ Rimɔn, ni n bilara nna mansɛ fɛ ka ta wo kɔ tinɛ, alamɛ Mari ya n makoto.”

¹⁹Nɛbi Ilaisa ya a fɔ a ye ko, “Alamɛ i yisi-kimanɛ tara.” Neyaman tara. Neyaman tanɛ doni,

²⁰ala wɔli-kɛla Kɛhasi gbɛngbɛrɛnta a nyɛrɛ ma ko, “N tigi Nɛbi Ilaisa ara Neyaman kɛ boloka wo nya na fufafu! Hali a nara fan minnu na ka a di a ma, a ma sɔn wonu na. N fotɛ Mari-nimɛ, fɔ n ba Neyaman kɛ sagaran, n ni ta fan do tara a bolo.”

²¹Wo le ya a ma, ale Kɛhasi ya Neyaman sagaran. Neyaman ya mɔgɛ do yen nala a sagaranna min kɛ, a ya ala soee lasɔ. A yigira ka a makɔni. Kɛhasi kenɛ Neyaman ma, Neyaman yigira ka bɔ ala kirindi rɔ ka a manyinika ko, “Nfen mara?”

²²Kɛhasi ya a fɔ a ye ko, “Ko ma ma. N tigi le ya n sɔ i wara ka a fɔ i ye ko nɛbi-karan-den fila ara na kaka ka bɔ Ifɛrɛm kɔnkɔ-nyamanɛ rɔ. I ni a madɛnbɛ wodi-gbɛ minna gbiliyɛ anubɛ fui-fan bɔrɔ-talɛ rakɛn anubɛ fɛrɛya-bɔ-hakika fila la.”

²³Neyaman ya a fɔ a ye ko, “Tana ma wo la. N si wodi-gbɛ-gbu waga wɔrɔ (6,000) di a ma.” Neyaman nɔrɔta a ma. A ya wodi-gbɛ wo lakiri bɔrɔ fila rɔ. A ya fɛrɛya-bɔ-hakika fila bɔ ka a sa wo kuma. A ya dunɛ wonu bi ka wonu sa a nyɛrɛta wɔli-kɛla mɔgɔ fila kuma ka wonu sɔ Kɛhasi yarɔ.

²⁴Nɛbi Ilaisa siginɛ kɔnkɛ min kuma, dunu-bilɛ wonu kenɛ wo kɔrɔ, Kɛhasi ya dunɛ wonu bi ka ta anu na bɔn la. A ya Neyamanna wɔli-kɛlɛ wonu nasɛgi.

²⁵A don bɔn la, Nɛbi Ilaisa ya a manyinika ko, “Ile bɔnɛ mintɔ kɛ la?” Ale Kɛhasi ko, “N ma ta kan-bo-kan.”

²⁶Kɔnɔ Nɛbi Ilaisa ya a fɔ a ye ko, “Kei wo ye bɔla ala kirindi rɔ wati min ka sɔ dugi ma, n kuntɔ-yɛ ye nyɔ nun. Wodi-gbɛ anubɛ kura-bira-wati ma kɛ la. Ki-fen wo, kolo-fen wo, wɔli-kɛla wo, wonu bira-wati ma kɛ la.

²⁷Nba, ka a tɛgɛ i sɔn kɛ ma, kirayɛ min bi Neyaman ma nun, wo si bɔ ile ma. Kirayɛ wo si to bɔla i kegeyɛnu ma burubukai!” Kɛhasi bɔnɛ a dafɛ nyɔ, kirayɛ wo wuyara a ma pi! A fɛrɛ gbɛra a ma iko bɛgi-gbɛ.