Read Kuranko 2 Mansɛnu 7 Bible Online

2 Mansɛnu 7 - Kuranko bible

2 Mansɛnu 7

¹Nɛbi Ilaisa ya a fɔ a ye ko, “Mansɛ, i wɔlɔ matɔlɔ Marita kumɛ la. Mari ko, yanni kɛ nyɔgɔn tumɛ sina, i si ke dɛgɛ-munke pani-kunbɛ-nya sawa sanna wodi-gbɛ-gbu-ni kelen na Samariya soe burɔ, ado, i si fui-fan pani-kunbɛ-nya wɔrɔ san wodi-gbɛ-gbu-ni kelen na.”

²Ale mansa-makandannɛ ya a fɔ Nɛbi Ilaisa ye ko, “Wo ti ma mumɛ! Hali Mari ya fui-fan bɛɛ layigi a nyɔgɔn fɛ, kɛ ti ma hali!” Nɛbi ya a fɔ a ye ko, “Ile nyɛrɛ si a yen i yɛ la sina kɔnɔ i ti fen dɔn a rɔ muk!”

³Wati wo ya a taran, kunato mɔgɔ nani siginɛ tarɛ-don-dɛ kɔma. Wonu bi a fɔla anu nyɔgɔn ye ko, “Nfen ya a to, male siginɛ yan saya makɔnɔ tinɛ.

⁴Ni ma tara soe burɔ, fɔ ma wa faga kɔnkɛ bolo, ado ni ma tora yan fanan, fɔ ma wa faga. Min fisa, ma ta Siriyanuna dagɛ rɔ ka ma nyɛrɛ di anu ma. Tumado, ma kunyɛ si bɔ-a-rɔ, ma kɛndɛ si to. Kɔnɔ ni ma kunyɛ tora-a-rɔ, ale le wo la fanan.”

⁵Wurala-tumɛ kenɛ, anu tara Siriyanuna dagɛ rɔ kɔnɔ anu ma mɔgɔ-wo-mɔgɔ taran nyɔ.

⁶Mari ya a ma, Siriyanu ya anu buri. Mari ya a ma anu na iko Siriya wonu bara kɛlɛ-den-siyamɛ anubɛ anuna kirindinu anubɛ anuna soeenu na-kan le lamɔɛn. Siriya wonu miri nun ko Isirɛla mansɛ ara Hɛti kɛlɛ-dannu anubɛ Iyipiti kɛlɛ-dannu masan anu kan ma.

⁷Wulɔn nyɛrɛ wurɛ la, Siriya wonu ya anuna fani-bɔnnu boloka anubɛ anuna soeenu anubɛ anuna sofɛlɛnu anubɛ dagɛ nyɛrɛ ka anu buri tala kilan bolo.

⁸Kunato nanɛ wonu ke Siriyanuna dagɛ dan la, anu donta fani-bon kelen na. Anu ya fan dɔn furr! Wo kɔma, anu ya wodi-gbɛ anubɛ sɛnɛ anubɛ kurɛ minnu taran nyɔ, anu ya wonu bi. Anu tara wonu dogon. Wo kɔma, anu tara tun ka don fani-bɔn do la tun. Anu ya fan donu bi nyɔ rɔ ka ta wonu fanan dogon.

⁹Anu ya a fɔ anu nyɔgɔn ye ko, “Ma ye koe min kun na kɛ la, ko-nyima ma. Ni ma ara ko-nyimɛ su kɛ rayen, ma kana ma da burun kɛ ma. Ni ma ya a to ha sɔgɔma, anu si ma tɔrɔ. Ma ta ma burila ka a fɔ mala Isirɛla mansɛla mɔgɔ-banu ye.”

¹⁰Anu bɔra nyɔ ka sɛgi Samariya. Anu ke soe tarɛ-don-dɛ ma, anu ya anu kan nakɛ tara-kandannɛnu ma. Anu ya a fɔ wonu ye ko, “Ma bɔ-san le Siriyanuna dagɛ rɔ. Ma ma mɔgɛ yen nyɔ, ado ma ma mɔgɔ kan namɔɛn nyɔ. Anuna soeenu anubɛ anuna sofɛlɛnu, anu ma wonu denu fan fulen. Anuna fani-bɔnnu bi anu gbɛ rɔ yiri, iko anu ya anu to nya min.”

¹¹Tara-kandannɛ wonu ya kumɛ wo latenbi mansɛta mɔgɛnu ma soe wo burɔ. Kumɛ wo kera mansɛ ma.

¹²Kɛ mara su-talɛ le, hali wo, mansɛ ya a lasɔ. A ya a fɔ ala mɔgɔ-banu ye ko, “N bara a lɔn Siriyanu bi min kun na gbɛ! Anu bara a lɔn ko ma ye kɔnkɛ le tɔ yan. Anu bara dagɛ boloka ka ta anu dogon dagɛla foolɛ rɔ. Siriya kɛnu miri le ko male wa mala soe kɛ boloka ka ta dɔn-fen bi tinɛ anuna dagɛ rɔ, anu ni ma bira ka mala soe bi ma bolo.”

¹³Ala mɔgɔ-ba kelen bi nyɔ, wo ya a fɔ ko, “Ila so-burɔ-mɔgɛ kɛnu ma ara lɔfɔkɔrɔya. Ma ni keminɛ donu nata anubɛ so loli ka bɔ soee toenu tɔ. Wonu ni ta nyɔ mafɛlɛn ka a lɔn ni min mara. Ni ma ma ko-wo-ko ma, ma ye nala fagala iko donu bara faga nya min.”

¹⁴Wo le ya a ma, mansɛ ya kirindi fila bi ka wonubɛ keminɛ donu nata Siriyanuna dagɛ wo mafɛlɛn tinɛ alako ka a lɔn ni min mara Siriya kɛlɛ-dan wonu na.

¹⁵Keminɛ wonu ya Siriya wonu bolo-fannu yuluyulunɛ yen tala kilɛ la ha ka ta ke Yorodan bɛ ma. Wonu fanan sɛgira ka anu dantɛgɛ Isirɛla mansɛ ye.

¹⁶Samariya mɔgɛ bɛɛ tugura wuu, ka ta Siriyanuna dagɛ rɔ ka anu bolo-fan bɛɛsi bi. Wo le ya a ma, dɛgɛ-munke pani-kunbɛ-nya sawa santa wodi-gbɛ-gbuni kelen na. Iko Mari ya a fɔ nya min nun, fui-fan fanan, pani-kunbɛ-nya wɔrɔ santa wodi-gbɛ-gbu-ni kelen na.

¹⁷Mansa-makandannɛ min ya a fɔ nun ko, “Hali Mari ya fui-fan bɛɛ layigi a nyɔgɔn fɛ, kɛ ti ma mumɛ!” Mɔgɛnu bara wuli tala Siriyanuna dagɛ rɔ tumɛ min, mansɛ ya ale mɔgɔ kelan le sigi tarɛ dɛ makandan tinɛ. Mɔgɛnu tugura tumɛ min ka daga warata-kilɛ bira, a buira mɔgɛnu kɔrɔ, ado anu tora tagamana a kuma ha a fagara. Iko Nɛbi Ilaisa ya a fɔ ale mansa-makandannɛ ye nya min ko a si dɔn-fan wonu yen a yɛ la kɔnɔ a ti fen dɔn a rɔ, a mara wo nya le.