Read Kuranko 2 Mansɛnu 8 Bible Online

2 Mansɛnu 8 - Kuranko bible

2 Mansɛnu 8

¹ Nɛbi Ilaisa ya Sunam musi minna dan lakɛndɛya nun, a ya musi wo makawandi ko kɔnkɔ-fitinɛ ye nala nyamanɛ wo rɔ san wɔrɔnfila kɔrɔ. A ko a ni ala denbayɛnu bi ka ta anu na kan-tina-gbɛrɛkɛ!

²Musi wo ya ata kumɛ wo bira ka ata denbayɛ bi. Anu tara sigi Filisitinuna nyamanɛ rɔ san wɔrɔnfila kɔrɔ.

³San wɔrɔnfilɛ wo tenbinɛ, a sɛgira a gbɛ rɔ Isirɛla nyamanɛ rɔ. A tara mansɛ wara. A ya ala bɔn anubɛ ala dugi manyinika mansɛ bolo alako a ni wonu sɔrɔn tun.

⁴A ye kela mansɛ ma tumɛ min, a ya a taran, mansɛ ye Nɛbi Ilaisata wɔli-kɛlɛ Kɛhasi wo manyinikala nɛbila kabana-koenuna ko ma.

⁵Nɛbi Ilaisa ara furi lakɛndɛya nya min, Kɛhasi ye wo rakaranna mansɛ ye tumɛ min, musi kɛ ya a bolo-fannu manyinika wati wo le. Kɛhasi ya a fɔ mansɛ ye ko, “Mansɛ, Nɛbi Ilaisa ya dan min nakɛndɛya, wonubɛ a na le kɛ la.”

⁶Mansɛ wo ya musi wo fanan manyinika ala dan wara-koe la. Musi wo ya a rakaran a ye iko Kɛhasi ya a fɔ nya min. Mansɛ wo ya ala mɔgɔ-ba kelen kele ka a fɔ a ye ko, “Musi kɛ bolo-fan bɛɛsi lasɛgi a ma. Hali anu bara fan minnu sɔrɔn ala ki-fannu tɔ san wɔrɔnfilɛ kɛ kɔrɔ, anu ni wonu wodi lasɛgi a ma.”

⁷Lunyɛ do, Siriya Mansa Bɛnhedadi kirayara Damasika soe burɔ. Wo le bɛnta Nɛbi Ilaisala tɛ ma nyɔ. Anu ya a fɔ mansɛ ye tumɛ min ko Nɛbi Ilaisa ye soe wo burɔ,

⁸ala mɔgɔ-ba min tɔgɛ Hasiyɛli, mansɛ ya wo lata nɛbi fanda tinɛ. A ya a fɔ ale Hasiyɛli ye ko, “I ni a fɔ ale nɛbi ye ko a ni Mari manyinika n ye ni n si beli, ka, n ti beli.”

⁹Hasiyɛli ya Damasika fen-koloma-hakika-siyaman bi ka wonu kiri nyomo bi-nani kɔ tɛma. A tara fen-kolomɛ wonu ma Nɛbi Ilaisala fandɛ la. A ban a fandala, a ya a fɔ a ye ko, “Ila wɔli-kɛlɛ Siriya Mansa Bɛnhedadi, wo le ya n sɔ i wara ko n ni i manyinika ni a si beli, ka, ni a ti beli.”

¹⁰Nɛbi Ilaisa ya a fɔ a ye ko, “Mari ara a yira n na feu, ko a ti beli mumɛ! Kɔnɔ i wa ke a ma, i ni a fɔ a ye ko a ye kɛndɛyala le.”

¹¹Nɛbi Ilaisa ban kɛ fɔla, a ya a yɛ gbangban Hasiyɛli la. Nɛbi yakɔrɛ makilanta wati-kundu-nɛ wo kɔrɔ. Wo ya a ma, Hasiyɛli miliyara. Wo kɔma, Nɛbi Ilaisa ya-yi yigira biribiri!

¹² Hasiyɛli ya a manyinika, a ko, “N fa, i ye dila nfen na?” Nɛbi Ilaisa ko, “Ile ye nala koe min sigila Isirɛla mɔgɛnu ma yarɔ, wo le ye a mala, n bi dila ka. Ile si tɛ tugu anuna so-hakikɛnu na. I si Isirɛla kemini-mɛsɛnu mɔnima-fagɛ-kɛ, ado i si anuna dannu bi ka anu gbesi dugi la ha anu ni faga. I si nyaganɛ-kolomɛnu buyi laka.”

¹³ Hasiyɛli ya a fɔ a ye ko, “Fenfen ma nde min na, nde si wo fanka sɔrɔn kama?” Nɛbi Ilaisa ya a fɔ a ye ko, “Mari ara a yira n na serr, ko ile si ma Siriyanuna mansɛ la.”

¹⁴Hasiyɛli sɛgira ala mansɛ wara tumɛ min, mansɛ ya a manyinika ko, “Nɛbi wo ya nfen fɔ i ye nun?” Hasiyɛli ya a fɔ a ye ko, “A ya a fɔ n ye le ko i ye kɛndɛyala le serr!”

¹⁵Kɔnɔ wo banda kɛ, Hasiyɛli ya birinkan-belebele bi ka a kimɛ. Wo kɔma, a tara wo la mansɛ wara ka wo dɛndɛ mansɛ sunyɛ anubɛ a dɛ la ha mansɛ fagara. Hasiyɛli ban mansɛ fagala, ale sigira mansɛ gbɛ rɔ.

¹⁶Mansa Ehabula den Yɔramta mansayɛ san loli nyɔgɛ ma Isirɛla nyamanɛ rɔ, Mansa Yɛhosafatila den Yɛhoram mara mansɛ la Yuda nyamanɛ rɔ.

¹⁷Yɛhoram kɛ mara mansɛ la a sɔrɔn-san bi-sawa ani san fila nyɔgɛ le ma. San segin kɔrɔ, a ye mansayɛ la Yerusalɛm soe burɔ.

¹⁸Isirɛla Mansa Ehabu min lakirayara, wola dunmusi le tora Mansa Yɛhoram ye Yuda nyamanɛ rɔ. Ale mansɛ kɛ ya a biran-kei sɔn-yogomɛ bi iko Isirɛla mansɛnu fanan bi nya min. A ya hakɛ kɛ Mari la

¹⁹ kɔnɔ hali wo, Mari ma sɔn Yuda nyamanɛ halakila ala sɔn-yogomɛ wola ko la bawo a ara ban a latɛgɛla ko Mansa Dawuda kegeyɛ si to mansayɛ la Yuda nyamanɛ kun na burubukai!

²⁰ Yɛhoram ye mansayɛ la wati min tɔ, Idɔm nyamanita-mɔgɛnu murutiyara a ma ko anu bi tola anu nyɛrɛ ma le gbɛ! Anu ya anu nyɛrɛta mansɛ sigi.

²¹Mansa Yɛhoram ya ala kɛlɛ-dannu anubɛ ala kirindinu bi ka ta bɛ kɔgɔma Sairi soe burɔ Idɔm kɛnu kɛlɛ tinɛ. Anu ke nyɔ, Idɔm kɛlɛ-dannu ya kurɔn don anu ma. Suyi rɔ, ale Mansa Yɛhoram anubɛ ala kirindi laburi kun-tiginu ya anu taya ha anu ya fɛrɛ sɔrɔn ka tenbi anu yogenu tɛma. Ala kɛlɛ-den-toenu tanyɛnsɛnta. Bɛɛ tara a wara.

²²Ka a bi wati wo ma ha a mɛra, Idɔm nyamanɛ ye a nyɛrɛ ma le. Wati kelan wo le tɔ fanan, Libina so-burɔ-mɔgɛnu murutiyara.

²³Mansa Yɛhoram ya min ma ala mansayɛ kɔrɔ, anu ya wo bɛɛsi sɛbɛ Yuda Mansɛnuna Buku do rɔ.

²⁴A fagara tumɛ min, anu ya a togon Mansa Dawuda halala-luyi ma Yerusalɛm soe burɔ. Ala den Ehasaya sigira a gbɛ rɔ.

²⁵Mansa Ehabula den Yɔramta mansayɛ san tan-ni-fila nyɔgɛ ma Isirɛla nyamanɛ rɔ, Mansa Yɛhoramla den Ehasaya mara mansɛ la Yuda nyamanɛ rɔ.

²⁶Mansa Ehasaya kɛ mara mansɛ la a sɔrɔn-san mogan-ni-fila nyɔgɛ le ma. A ya san kelen pe le bɔ mansayɛ la Yerusalɛm soe burɔ. A na tɔgɛ le Atalaya, Mansa Ehabula dunmusi, kɔni. Atalaya benba tɔgɛ le Mansa Hɔmɔri, Isirɛla mansa-kɔrɛ, kɔni.

²⁷Mansa Ehasaya fanan ya a biran-kei, Mansa Ehabu sɔn-yogomɛ bi. Ale fanan bilara Mari la iko Mansa Ehabu anubɛ ala denbayɛ ya a ma nya min.

²⁸Yuda Mansa Ehasaya kɛ anubɛ Isirɛla Mansa Yɔram ya anu kundɛn ka ta Siriya Mansa Hasiyɛli kɛlɛ. Anu ya kɛlɛ wo kɛ Remɔti-Kaliyadi soe dafɛ kɔnɔ Mansa Yɔram tanbanta kɛlɛ wo rɔ.

²⁹A sɛgira a kɔma Yɛsɛreli soe burɔ ka ala tɛlɛnu dandan. Yuda Mansa Ehasaya tara a kɔndɔn tinɛ nyɔ.