Read Kuranko 1 Ko-Kɔrɔta-Karan 11 Bible Online

1 Ko-Kɔrɔta-Karan 11 - Kuranko bible

1 Ko-Kɔrɔta-Karan 11

¹Wo kɔma, Isirɛla mɔgɔ damasi nara Dawuda warɛ Hiburɔn soe burɔ. Anu ya a fɔ a ye ko, “Yele kelen de ma dama la.

²Kebi Mansa Sɔli ye a kɛndɛ la wati min, ile le sɔnɛ ma yarɔ kɛlɛ rɔ, ado mata Mari Alla ara ban lanyiri kirila i ye ko ile le ye sɔla male yarɔ ka ma mala mansɛ la.”

³Woletɔ Isirɛla kun-tiginu bara a lakiri gben yisi-kimɛ rɔ ka to kan kelen tɔ. Anu ya dantɛgɛ-tuli kɛ Dawuda kunyɛ rɔ ka a ma anuna mansɛ la Hiburɔn soe burɔ iko Mari ya a fɔ Nɛbi Samuwɛli ye nya min.

⁴ Mansa Dawuda anubɛ ala kɛlɛ-dannu tara bui Yerusalɛm soe ma. Soe wo tɔgɛ le nun Yɛbusi. Kɔnɔ Yɛbusi mɔgɛ minnu bi nyɔ nun, wonu ma bɔ nyɔ.

⁵Yɛbusi wonu ya a fɔ Dawuda ye ko a ti a kunyɛ ladon anuna soe wo burɔ kɔnɔ Dawuda ya soe wo bi anu bolo, hali anuna kan-tina-latankanɛ min tɔgɛ Sayɔn. Anu ya soe wo kele ko Dawudata luyi.

⁶Dawuda ya a fɔ ala kɛlɛ-dannu ye ko, “Ni min fɔlɔn ya Yɛbusi mɔgɛ do faga, n si wo ma nna kɛlɛ-den-kunyɛ la.” Sɛruya Yohabu fɔlɔn donta Yɛbusi soe wo burɔ ka nyɔ-mɔgɛnu kɛlɛ. Woletɔ ale mara Dawudata kɛlɛ-den-kunyɛ la.

⁷Dawuda nara sigi nyɔ min kɛ, anu ya nyɔ kele ko Dawuda halala-luyi.

⁸Dawuda ya Yerusalɛm soe sɔ a kurɛ la ka a dabira tele-bɔɛ wara la lɛnbɛn-lɛnbɛnya rakɛ tinɛ. Tɔ-a-la, Yohabu ya wɔlɛ wo toe laban.

⁹Dawuda tora fanka sɔrɔnna ala mansayɛ rɔ bawo Mari Alla Sɛnbɛ-Bɛɛ-Tigi ye a fɛ.

¹⁰Dawudala kɛlɛ-kɛla-nyana le kɛnu na. Wonu denubɛ Isirɛla mɔgɛ toenu kofura ale Dawuda ma ka a ma mansɛ la iko Mari ya a fɔ nya min. Anu ya a ma, ala mansayɛ ya fanka sɔrɔn.

¹¹Ala kɛlɛ-nyana fɔlɔtɛ tɔgɛ le Yasabɛyami. Hakimɔ kebila-mɔgɛ do le ale la. Anu kɛlɛ-kurugba sawɛ kunyɛ le ale la fanan. Lun kelen, ale ya mɔgɔ kɛmɛ sawa kɛlɛ ka wonu damasi faga ala tanbɛ la.

¹²A fila nyɔgɛ le Dodola den Ɛliyasa la. Aho kebila-mɔgɛ do le Ɛliyasa kɛ la.

¹³Lunyɛ do, Filisitinu nara Dawuda kɛlɛ tinɛ Pasidami soe dafɛ. Anu ya Isirɛla kɛlɛ-dannu kɛlɛ sɛnɛ do rɔ kɔnɔ Isirɛla kɛlɛ-den-toenu ya anu buri ka ale Ɛliyasa anubɛ Dawuda to sɔni nyɔ.

¹⁴Anubɛ Dawuda sɔni tora sɛnɛ wo tɛma ka Filisitinu kɛlɛ. Mari ya a ma, anu ya nɔ-ko sɔrɔn.

¹⁵Lunyɛ do, kɛlɛ-kurugba sawɛ kɛnu tara Adulam faran la Dawuda dogonnɛ kan min. Wati kelan wo rɔ fanan, Filisitinu nara anu daga makɛ Rɛfɛn lɛɛ rɔ.

¹⁶Wati wo rɔ, Dawuda ye kan-tina-latankanɛ wo rɔ. Filisiti donu bara ta Bɛtalehɛm soe bira-a-la.

¹⁷Dawuda warɛ-sɔgɛ ya a bira, a ko, “Kɔlɔn min sinnɛ Bɛtalehɛm soe tarɛ-don-dɛ dafɛ, ni mɔgɛ do nara wo yi do la n ye kaka, wo si diya n ye kosɛbɛ!”

¹⁸Kɛlɛ-kurugba sawɛ kɛ min tara Dawuda taran nyɔ, wonu ya anu taya ha anu tenbira Filisitinu tɛma. Anu tara yi bi kɔlɔn wo rɔ Bɛtalehɛm tarɛ dafɛ. Anu sɛgira yi wo la anu bolo Dawuda wara. Kɔnɔ Dawuda ma sɔn yi wo minna fɔ ka yi-kimɛ wo labɔn Mari ye.

¹⁹A ko, “Nta Alla, n ti yi kɛ min. Ni n ya yi kɛ min, a mani de wo rɔ iko n bara mɔgɔ sawɛ kɛnu yele le min minnu bara anu niyi fili ka ta yi kɛ bi.” A ma sɔn yi wo min-koe ma. Kɛlɛ-kurugba sawɛ kɛnu ya ko-makawanɛ kɛnu denu denu ma.

²⁰Yohabu dɔgɔ Abisayi, wo le ye kɛlɛ-kurugba bi-sawa kun na. Abisayi wo le ya mɔgɔ kɛmɛ sawa faga ala tanbɛ la.

²¹Wo le ya a ma, ale tɔgɔ bɔra mɔgɔ bi-sawa kɛnu tɛma ka ma anuna kun-tigi la. Kɔnɔ ale ma tɔgɛ sɔrɔn iko mɔgɔ sawɛ kɛnu.

²²Yɛhoyadala den Bɛnaya, Kabisili kɛ, kɔni, kɛlɛ-kɛla-wɛ do le ale fanan na. Ale fanan ya kerinteya-ko-siyaman kɛ. Mohabu kɛnuna kɛlɛ-kɛla-nyana mɔgɔ fila ye nyɔ, ale ya wonu faga. Lun kelen kima-wati rɔ, ado dugi manamanɛ, a donta denkɛ la ka yara kelen faga nyɔ.

²³Lunyɛ do fanan tun, a tara ke Iyipiti kei-belebele-wɛ do ma, tanba-belebele ye wo bolo la. Bɛnaya wola yanyɛ, nunkan-nya wɔrɔ. Bɛnaya ya ala gbelekɛ bi ka kei wo ragbɛrɛn. A ya wola tanbɛ bɔ a bolo ka a faga wo la.

²⁴Bɛnaya ya kerinteya-koe kɛ le ma kɛlɛ-kurugba bi-sawɛ kɛnu tɛma.

²⁵A ya gbiliyɛ sɔrɔn mɔgɔ bi-sawɛ kɛnu tɛma kɔnɔ ale ma ke mɔgɔ sawɛ wonu tɔ. Dawuda ya ale ma a makandannɛnuna kun-tigi la.

²⁶Kɛlɛ-nyana wonu tɔgɛ le kɛnu na. Yohabu dɔgɛ, Asahɛli Dodola den Ɛlihenan ka bɔ Bɛtalehɛm soe burɔ

²⁷Sama ka bɔ Harod tenke wara la Hɛlɛsi ka bɔ Pelɛti soe burɔ

²⁸Ikisila den Aira ka bɔ Tekoya soe burɔ Abiyɛsa ka bɔ Anatɔti soe burɔ

²⁹Sibikayi ka bɔ Husa soe burɔ Ilayi ka bɔ Aho soe burɔ

³⁰Maharayi ka bɔ Nɛtofa soe burɔ Bayanala den Hɛlɛbu ka bɔ Nɛtofa soe burɔ

³¹Rebayila den Itayi ka bɔ Kibiya soe burɔ Bɛnyamɛ bɔnsɔn nyamanɛ rɔ Bɛnaya ka bɔ Pairetɔn soe burɔ

³²Hurayi ka bɔ Keyasi soe wo lɛɛnu bara la Abiyɛli ka bɔ Araba soe burɔ

³³Asamafɛti ka bɔ Bahurim soe burɔ Ɛliyaba ka bɔ Salibona soe burɔ

³⁴Yasanla dannu ka bɔ Kison soe burɔ Sagila den Yonatan ka bɔ Hara soe burɔ

³⁵Sakala den Ahiyamu ka bɔ Hara soe burɔ Yurila den Ɛlifali

³⁶Hifa ka bɔ Mɛkera soe burɔ Ahaya ka bɔ Pɛlon soe burɔ

³⁷Hɛsirɔ ka bɔ Kamɛli soe burɔ Ɛsibayila den Neyarayi

³⁸Netan na-kelen-nyɔgɛ Yowɛli Hagarila den Mibihari

³⁹Sɛlɛki ka bɔ Amonnuna nyamanɛ rɔ Naharayi, Yohabula kɛlɛ-miran-madununɛ ka bɔ Bɛroti soe burɔ

⁴⁰Aira anubɛ Karɛbu ka bɔ Yatiri soe burɔ

⁴¹Yuraya ka bɔ Hitanuna nyamanɛ rɔ Alayila den Sebadi

⁴²Saisala den Adina (Kun-tigi le ale la Rubɛn bɔnsɔn-mɔgɛnu tɛma. Kɛlɛ-dan mɔgɔ bi-sawa ye ale fanan bolo.)

⁴³Meyakala den Henan Yasafati ka bɔ Maitan soe burɔ

⁴⁴Yusaya ka bɔ Asitɔra soe burɔ Hotamila dannu Sama anubɛ Yeyiyɛli ka bɔ Arɔra soe burɔ

⁴⁵Simirila dannu Yɛdiyɛyɛli anubɛ Yoha ka bɔ Tesi soe burɔ

⁴⁶Iliyɛli ka bɔ Mahafa soe burɔ Ɛlineyamila dannu Yɛribayi anubɛ Yosafaya Itima ka bɔ Mohabu nyamanɛ rɔ

⁴⁷Iliyɛli anubɛ Obɛdi anubɛ Yeyasiyɛli ka bɔ Soba soe burɔ