Read Kuranko 1 Ko-Kɔrɔta-Karan 13 Bible Online

1 Ko-Kɔrɔta-Karan 13 - Kuranko bible

1 Ko-Kɔrɔta-Karan 13

¹Kɛlɛ-den-kunyɛ minnu bi mɔgɔ kɛmɛ-kɛmɛnu kun na anubɛ minnu fanan bi mɔgɔ waga-waganu kun na, Mansa Dawuda anubɛ kun-tigi wonu ya anu kun nayigi kan-tina-kelen.

²Wo kɔma, Mansa Dawuda ya a fɔ Isirɛla mɔgɛnu ye ko, “Ni wole sɔnta, ado ni mata Mari Alla sɔnta, ma ni kilayɛnu nata ma na-kelen-nyɔgɛnu ma Isirɛla nyamanɛ kɛ rɔ. Ma si kilayɛnu nata saraka-masɔlɛnu anubɛ Lifayi bɔnsɔn-mɔgɛnu ma anuna soenu tɔ alako anu damasi ni na kofu ma ma yan tɔ.

³Anu ba ke yan tumɛ min, ma damasi si wuli ka ta Allata tɔn-kenkirɛ bi. Mansa Sɔli ye a kɛndɛ la wati min, mala ko sa kenkirɛ wo wara-ko rɔ nun.”

⁴Kumɛ wo diyara Isirɛla mɔgɛ damasi ye. Anu sɔnta kenkirɛ wo bi-koe ma.

⁵ Ka a bi dugula-warala-dan ma Iyipiti dafɛ ha ka ta a sigi Hamati kɔnkɔ-gbɛran la kantɔ-wara la, Mansa Dawuda ya wo mɔgɔ damasi ladɛn alako anu ni ta tɔn-kenkirɛ bi Yirɔm soe burɔ ka ta a la Yerusalɛm.

⁶ Mansa Dawuda tara wonu na tɔn-kenkirɛ bi tinɛ Yirɔm soe burɔ Yuda nyamanɛ rɔ. (Soe wo tɔgɛ le fanan Beyala.) Mari Alla mayigi tinɛ le melikala muninya filɛ wonu tɛmɛ la minnu bi tɔn-kenkirɛ wo kuma. Mari tɔgɛ le sanɛ kenkirɛ wo kuma.

⁷Anu ya tɔn-kenkirɛ labɔ Abinadabula bɔn la ka a sigi kirindi-kurɛ rɔ. Yusa anubɛ Ahiyo tara kirindi wo la.

⁸Mansa Dawuda anubɛ ala mɔgɛnu bi tala anu dɔnna anu sɛbɛ-kuna-wɛ la. Anu bi sigi sala anu sɛnbɛ bɛɛ la. Sɔrɔnnu anubɛ yonbenu anubɛ wasanbɛnu anubɛ burinu kɛnɛ a rɔ ka Alla gbiliya.

⁹Anu ke Kidɔnna gbere-kole ma, sara-ninki minnu bi kirindi wo saganna, wonu ya anu kiannu natugu. Yusa ya a bole lata ka a tugu tɔn-kenkirɛ wo la alako a ni a latelen.

¹⁰Mari fonde bɔra Yusa la. A ya a faga a gbɛ wo le tɔ bawo a ara a bole tugu tɔn-kenkirɛ la.

¹¹Mansa Dawuda fanan diminyara bawo Mari fonde ara bɔ ka Yusa faga. Anu ya kan tinɛ wo kele ko Yusa Tɔrɔ Tinɛ.[19]

¹²Wo ya a ma, Mansa Dawuda kilanta Alla la. A ya a fɔ ko, “Nde si ta tɔn-kenkirɛ kɛ la n barɛ kama kɛ rɔ?”

¹³A ma ta a la Yerusalɛm tun. Anu ya Yerusalɛm kilɛ boloka ka ta a ladon Obɛdi-Idɔmla bɔn la. Kati kɛ le wo la.

¹⁴ Karɛ sawa tɔn-kenkirɛ wo siginɛ kei wo warɛ, ado Mari duwara ale Obɛdi-Idɔm anubɛ ala denbayɛ ye. A bolo-fan bɛɛsi sabatira.