Read Kuranko 1 Ko-Kɔrɔta-Karan 15 Bible Online

1 Ko-Kɔrɔta-Karan 15 - Kuranko bible

1 Ko-Kɔrɔta-Karan 15

¹Mansa Dawuda ya ata luyi datɛgɛ a nyɛrɛ ye Yerusalɛm soe burɔ. Wo kɔma, a ya kan tinɛ do rabɛn Allata tɔn-kenkirɛ ye ka fani-bɔn sɔ a ye.

² Mansɛ ko, “Fɔ Lifayi bɔnsɔn-mɔgɛnu, wonu denu dɔrɔn si tɔn-kenkirɛ kɛ dunu bawo kebi fɔlɔfɔlɔ Mari le ya anu yabɔ wɔlɛ kɛla ko la, ado anu si to wo kun na habadan!”

³Mansa Dawuda ya Isirɛla mɔgɛ damasi kele Yerusalɛm soe burɔ alako ka ta tɔn-kenkirɛ bi ka na a sigi kan tinɛ wo rɔ a ya min tabɛn ala ko la.

⁴Wo kɔma, a ya kilayɛ lata Aruna kegeyɛnu ma anubɛ Lifayi bɔnsɔn-mɔgɛnu ka anu kele.

⁵Woletɔ Lifayi kegeya-mɔgɛ Yuriyɛli bɔra Kohati kebilɛ rɔ anubɛ a na-kelen-nyɔgɔn mɔgɔ kɛmɛ ani mɔgɔ mogan (120) na a bolo.

⁶Asaya bɔra Mɛrari kebilɛ rɔ anubɛ a na-kelen-nyɔgɔn mɔgɔ kɛmɛ fila ani mɔgɔ mogan (220) na a bolo.

⁷Yowɛli bɔra Kɛrisɔn kebilɛ rɔ anubɛ a na-kelen-nyɔgɔn mɔgɔ kɛmɛ ani mɔgɔ bi-sawa (130) la a bolo.

⁸Sɛmaya bɔra Ilaisefan kebilɛ rɔ anubɛ a na-kelen-nyɔgɔn mɔgɔ kɛmɛ fila (200) la a bolo.

⁹Iliyɛli bɔra Hiburɔn kebilɛ rɔ anubɛ a na-kelen-nyɔgɔn mɔgɔ bi-segin (80) na a bolo.

¹⁰Aminadabu bɔra Yusiyɛli kebilɛ rɔ anubɛ a na-kelen-nyɔgɔn mɔgɔ kɛmɛ ani mɔgɔ tan-ni-fila (112) la a bolo.

¹¹Wo kɔma, Mansa Dawuda ya saraka-masɔla filɛ Sedoki anubɛ Abiyatari kele anubɛ Lifayi mɔgɔ wɔrɔ, Yuriyɛli wo, Asaya wo, Yowɛli wo, Sɛmaya wo, Iliyɛli wo, anubɛ Aminadabu.

¹²A ya a fɔ Lifayi mɔgɔ wɔrɛ wonu ye ko, “Lifayi bɔnsɔn-mɔgɛnuna kun-tigi le wole la. Wole Lifayi bɔnsɔnnu, wo ni wo nyɛrɛ sɛninya, woletɔ wo si ke nala Isirɛlata Marita tɔn-kenkirɛ la ka a sigi kan tinɛ wo rɔ, n bara min tabɛn ala ko la.

¹³Ni i ya a yen, mata Mari Alla diminyara ma ma a fɔlɔtɛ kɛ nun bawo ma ma a bato a kilɛ fɛ, ado wole ma tɔn-kenkirɛ duni.”

¹⁴Saraka-masɔlɛnu anubɛ Lifayi bɔnsɔn-mɔgɛ minnu bi Isirɛla mɔgɛnuta Mari Allata tɔn kenkirɛ bila, wonu ya anu nyɛrɛ sɛninya iko tɔn ya a fɔ nya min.

¹⁵ Lifayi bɔnsɔn-mɔgɛnu ya a bi a bi-kɔlɔma filɛ ma anu kan ma ka ta a la iko Mari ya a fɔ Musa ye nya min nun.

¹⁶Mansa Dawuda ya a fɔ Lifayi mɔgɔ-banu ye ko anu ni anu ya-lakalan anu kurun tɔ ka anu bole sɔ sigi-salɛnu anubɛ fɔli-fen-fɔlɛnu na minnu bi sɔrɔnnu anubɛ karanyanu fɔla. Wo kɔma, anu ni tolɔn kɛ a rɔ.

¹⁷Minnu kusan karanya gbesila, wonu tɔgɛ le kɛnu na. Yowɛlita den Himan wo, a kebila-nyɔgɛ Esafi min fa tɔgɛ Bɛrɛkaya wo, anubɛ Kusayala den Itan min bɔra Mɛrari kebilɛ rɔ. Minnu kusan sɔrɔn fɔla, wonu fanan tɔgɛ le kɛnu na. Sakaraya wo, Yeyasiyɛli wo, Sɛmiramoti wo, Yehiyɛli wo, Yuni wo, Ɛliyabu wo, Meyaseya wo, anubɛ Bɛnaya. Minnu kusan bɔlɔn fɔla, wonu fanan tɔgɛ le kɛnu na. Matetaya wo, Ilefɛle wo, Mikineya wo, Asasaya wo, anubɛ anuna bato bɔn da kandannɛnu, Obɛdi-Idɔm anubɛ Yeyɛli.

²²Anu ya Kɛnɛnaya ma tolonnɛ wonuna kun-tigi la bawo a kusan tolon koe la dɔgɔma-ma.

²³Anu ya Bɛrɛkaya anubɛ Ɛlakena yabɔ ko wonu ni wɔli Obɛdi-Idɔm anubɛ Yɛhaya fɛ tɔn-kenkirɛ wo makandan tinɛ. Saraka-masɔlɛ minnu si buri fɛ tɔn-kenkirɛ yarɔ, wonu tɔgɛ le kɛnu na. Sɛbanaya wo, Yasafati wo, Natanɛli wo, Amasayi wo, Sakaraya wo, Bɛnaya wo, anubɛ Ɛliyesa.

²⁵Mansa Dawuda anubɛ Isirɛla mɔgɔ-banu anubɛ ala kɛlɛ-den-kunyɛnu tara Obɛdi-Idɔmla bɔn la Marita tɔn-kenkirɛ bi tinɛ. Anu ya tolon-belebele kɛ a rɔ.

²⁶Anu sɛgimatoe Yerusalɛm soe burɔ, Lifayi bɔnsɔn-mɔgɛ minnu ya tɔn-kenkirɛ duni, wonu ya tura wɔrɔnfila anubɛ saga wɔrɔnfila ma sarakɛ la Mari ye bawo Mari ara anu dɛnbɛ.

²⁷Mansa Dawuda wo, tolonnɛla kun-tigi Kɛnɛnaya wo, tolonnɛ wonu wo, anubɛ Lifayi bɔnsɔn-mɔgɛ minnu bi tɔn-kenkirɛ bila, anu dama ya duruku-ba-wɛ don anu kan na minnu nadannɛ linɛn-kura-hakikɛ la. Mansa Dawuda fanan ya linɛn fɔlɔnfalan don duruku-ba-wɛ wo kuma.

²⁸Isirɛla mɔgɔ damasi ye tala tɔn-kenkirɛ wo la anu bolo tumɛ min Yerusalɛm soe burɔ, anu bi gbele-gbelenna sewɛ bolo. Tolɔn kɛnɛ a rɔ, a buru wo, a karanya wo, a sɔrɔn wo.

²⁹Anu ya anu kun nabɔ soe ma tumɛ min, Mansa Sɔlila dunmusi Makali min tora Dawuda ye, wo ya a yɛ labɔ wundan la. A ya mansɛ sewamatoe yen nala a dɔnna a sɛbɛ-kuna-wɛ la. A bɔrɔbɔra a ye.