Read Kuranko 1 Ko-Kɔrɔta-Karan 16 Bible Online

1 Ko-Kɔrɔta-Karan 16 - Kuranko bible

1 Ko-Kɔrɔta-Karan 16

¹Mansa Dawuda ya fani-bɔn min sɔ tɔn-kenkirɛ wola ko la, anu tara kenkirɛ wo sigi bɔn wo la. Anu ban wo la, anu ya saraka-mintantɛ anubɛ yisi-kima-sarakɛnu bɔ Alla ye.

²Mansɛ ban saraka-bɔɛ wo la, a duwara mɔgɛnu ye Mari tɔgɔ rɔ.

³A ya dɔn-fan tala Isirɛla mɔgɛ bɛɛsi la. A ya biredi-lɔngbɔn kelen-kelen anubɛ sogo-mintannɛ anubɛ nɔnbɔ-gbɔ-gbalanɛ donu di anu kelen-kelennamɛ-bɛɛ ma, kei wo, musu wo.

⁴Lifayi bɔnsɔn-mɔgɛnu ba wuli Isirɛlata Mari Alla batola, Mansa Dawuda ya a bole sɔ wo donu na ko anu ni sɔ mɔgɛnu yarɔ. Wonu si sigi sa ka Alla tanto tɔn-kenkirɛ yarɔ.

⁵A ya sɔrɔn-fɔlɛ minnu yabɔ, wonu tɔgɛ le kɛnu na, Yeyiyɛli wo, Sɛmiramoti wo, Yehiyɛli wo, Matetaya wo, Ɛliyabu wo, Bɛnaya wo, Obɛdi-Idɔm wo, anubɛ Yeyiyɛli. Wonu kun-tigi le Esafi la. Wo tatugunnɛ le Sakaraya la. Esafi wo, karanya-fɔlɛ le ale fanan na.

⁶Saraka-masɔla mɔgɔ fila Bɛnaya anubɛ Yahasayɛli tora buri fɛla anuta wati sanɛ ma tɔn-kenkirɛ yarɔ.

⁷Wulɔn tele mara a fɔlɔtɛ la, Mansa Dawuda ya ata Mari-tanto-bɛti di ale Esafi anubɛ a na-kelen-nyɔgɛ ma. A ya tantoli-bɛti min di ale Esafi ma, wo le kɛ la.

⁸Wo ni baraka bira Mari ye. A ye ko-makawanɛ minnu kɛla, wo ni wonu fɔ sibolo-gbɛrɛnu ye.

⁹Wo ni baraka-bira-bɛtinu bɔ Mari ye. A ara kabana-koe min bɛɛsi ma wo ye, wo ni wonu takaran.

¹⁰Wo ni sewa bawo Mari halalɛ le male la. Min damasi ye ale batola, wonu ni sewa.

¹¹Wo ta wo makoenu na Mari wara. Ale le si wo dɛnbɛ. Wo ni to ale le kelen pe batola burubukai!

¹²Wole Yakoba kegeyɛnu, Alla ara wole min yabɔ ka ata wɔlɛ kɛ, wo ni wo miri kabana-koenu ma Alla ara minnu ma wo ye. A ara ala kiti-tɛgɛ-telennɛ minnu sa wo ye, wo ni wo miri wonu ma fanan.

¹⁴Mata Mari le ale Alla la. Sɛnbɛ ye ale le bolo duninya kɛ rɔ.

¹⁵ Alla ara sarama-kan min kiri mabɛ ma benba Iburayima anubɛ Isiyaka ye, a si a yili to wo ko habadan, ado tele kelen ko ma wo la!

¹⁷A ya sarama-kan wo le kiri ma benba Yakoba ye fanan, ado wo ti tinya mumɛ!

¹⁸ A ko a si Kenan nyamanɛ kɛ di ma ma. A ko nyɔ si ma matɛ la habadan!

¹⁹Fɔlɔ nun, Allata mɔgɛnu ma siya. Anu bi sundanyɛ le la Kenan nyamanɛ kɛ rɔ.

²⁰Anu bi yilan-yilanna sibolo-gbɛrɛnu tɛma. Anu bi bɔla anuta nyamanɛnu tɔ ka ta nyamani-gbɛrɛkɛnu tɔ.

²¹ Kɔnɔ Alla ma sɔn anu tɔrɔ koe ma mɔgɔ-wo-mɔgɔ bolo. A ya sibolo-gbɛrɛ-mansɛnu makawandi.

²²A ko anu kana na ko ma ata mɔgɔ-yabɔnɛnu na. A ko anu kana na ko-yogoma ma ala nɛbinu fanan na.

²³Duninya-mɔgɛ bɛɛsi ni bɛti bɔ Mari ye. A ye ma lakisila nya min, anu ni to wo rakaranna tuma-wo-tuma.

²⁴Alla gbiliyanɛ nya min anubɛ a ye kabana-koe minnu mala, wo ni wonu fɔ duninya-mɔgɛ bɛɛ ye.

²⁵Mari makawara. A bɛnta, mɔgɛ ni ale le bato. Mɔgɛ ni kilan a la ka tenbi bɛsɛnu na.

²⁶Sibolo-gbɛrɛnu bi minnu kɔla, bɛsɛ le wonu na dɔrɔn! Kɔnɔ mata Mari, wo le ya san-kole dan.

²⁷A mayiginɛ kinyɛ anubɛ gbiliyɛ tɛma. Ata Bato-Bɔn lafanɛ sɛnbɛ anubɛ sewɛ la.

²⁸Mɔgɛ bɛɛsi ni Mari tanto duninya kɛ rɔ ka a tɛgɛ ata gbiliyɛ anubɛ ata sɛnbɛ ma.

²⁹Wo ni Mari tanto a tɔgɔ-gbiliyanɛla ko la. Wo na kɔ-fannu na wo bolo a bato tinɛ. Wo ni wo madu a kɔrɔ ka a bato.

³⁰Duninya-mɔgɛ bɛɛsi ni yɛrɛyɛrɛn a kɔrɔ. Ale le ya dugu-kole kɛ sigi ka a balan, ado a la ti maga.

³¹Wole san-kole anubɛ dugu-kole, wo ni sewa. Wo ni a fɔ sibolo-gbɛrɛnu ye ko, “Mari le mansɛ la.”

³²Kɔgɔ-yi, i ni to tugula a rɔ. Nima-fan minnu bi i rɔ, wonu ni a lawɔyɔ. Ile dugi, i ni nɔrɔn ki-fannu kɔrɔ ka sewa.

³³Mari wa na kiti tɛgɛ tinɛ lunyɛ min, wole gbɔngbɔn-kɔlɔmanu, wo ni a lawɔyɔ sewɛ la.

³⁴ Wo ni baraka bira Mari ye bawo a si nyimayɛ kɛ, ado ala keninteyɛ dan sa mumɛ!

³⁵Wo di Mari dala. Wo ni a fɔ ko, “Alla, ma lakisi. I ni ma kundɛn kan-tina-kelen. I ni ma tanka sibolo-gbɛrɛnuna masibɛ ma. Wo si a ma, ma ni baraka bira i ye ka i tɔgɔ-sɛnimɛ gbiliya.”

³⁶Tantolɛ ni di Isirɛlata Mari Alla ma ka to a tantola burubukai! Wo kɔma, mɔgɔ damasi ko, “Amina.” Anu ya Mari tanto!

³⁷Mansa Dawuda ya Esafi yabɔ anubɛ a ta-nyɔgɛ Lifayi bɔnsɔn-mɔgɛ donu alako wonu ni sɔ mɔgɛnu yakɔrɔ bato tinɛ tɔn-kenkirɛ wo siginɛ kan min. Anu si to wɔlɛ wo mala tuma-wo-tuma.

³⁸A ya Yɛdutunla den Obɛdi-Idɔm yabɔ anubɛ wo na-kelen-nyɔgɔ mɔgɔ bi-wɔrɔ ani mɔgɔ segin (68) yabɔ alako anu ni ale Esafi wo dɛnbɛ. Hosa anubɛ Obɛdi-Idɔm, wonu bi Bato-Bɔn da makandan la.

³⁹Mansɛ ya Saraka-Masɔla Sedoki anubɛ a ta-nyɔgɔ-saraka-masɔlɛ donu sɔ mɔgɛnu yakɔrɔ Mari bato tinɛ fani-bɔn la Kibiyon soe burɔ.

⁴⁰Saraka-masɔlɛ kɛnu tora saraka-gbuinu mintanna sɔgɔma ani wurɛ la iko Mari ya tɔn di Isirɛla mɔgɛnu ma nya min nun.

⁴¹Wo kɔma, Mansa Dawuda ya Himan anubɛ Yɛdutun anubɛ mɔgɛ donu tɔgɛ yabɔ ko anu ni mɔgɛ donu dɛnbɛ tantoli-bɛtinu bɔla Mari ye ka a tɛgɛ ata hina-wɛ ma.

⁴²Isirɛla mɔgɛnu si fɔli-fan minnu fɔ, anu tenbi tantoli-bɛtinu bɔla Mari ye, a buru wo, a karanya wo, a fɔli-fen-to wo, Himan anubɛ Yɛdutun le wonu namarala. Yɛdutunla den-keinu, wonu denu bi nyɔ-da makandan la.

⁴³ Ladɛn wo kanɛ a la, Isirɛla mɔgɛ bɛɛsi sɛgira a warɛ. Mansa Dawuda fanan sɛgira a warɛ ka wati do kɛ ata denbayɛ fɛ.