Read Kuranko 1 Ko-Kɔrɔta-Karan 17 Bible Online

1 Ko-Kɔrɔta-Karan 17 - Kuranko bible

1 Ko-Kɔrɔta-Karan 17

¹Lunyɛ do, Mansa Dawuda siginɛ ala bon-kurɛ la, a ya a fɔ Nɛbi Netan ye ko, “Nde siginɛ bon-hakikɛ la min nadannɛ kɔlɔma-kinyanɛ la kɔnɔ Marita tɔn-kenkirɛ siginɛ fani-bɔn le la.”

²Netan ya a fɔ a ye ko, “Ni ko-wo-ko ma-sɔgɛ ye i la, wo ma bawo Alla ye i fɛ.”

³Kɔnɔ wulɔn suyi nyɛrɛ rɔ, Alla ya a fɔ Nɛbi Netan ye ko,

⁴“Ta a fɔ nna wɔli-kɛla Dawuda ye ko ale ti nna bɔn sɔ.

⁵Kebi n bɔra nta mɔgɛnu na Iyipiti tumɛ min, ha ka a sigi kaka la, ha bi, bato-bɔn ma sɔ wɛ nde ye n si sigi kan min. Nde duruta sigila fani-bɔn le la ka to yilan-yilanna Isirɛla mɔgɛnu fɛ.

⁶N bara tagama min bɛɛsi kɛ anu fɛ, n bara min bɛɛsi ma kun-tigi la ha bi, n ma a fɔ wɛ wo do-wo-do ye ko a ni bato-bon-hakikɛ sɔ n ye kɔlɔma-kinyanɛ la.

⁷“Woletɔ a fɔ nna wɔli-kɛlɛ Dawuda ye ko nde, Mari Sɛnbɛ-Bɛɛ-Tigi kan le kɛ la. N ko n ya ale bi sagɛnu denu fɛ ka a ma mansɛ la Isirɛla nyamanɛ mumɛ bɛɛ kun na.

⁸A tara kan-bo-kan, n bi a fɛ, ado a tara kan tinɛ min bɛɛsi rɔ, n ya a yogenu nɔ a yarɔ. N si a ma, ala mansaya-mankan ma ni yɛlɛ duninya rɔ iko tɔgɔlama-wɛ minnu bi duninya rɔ.

⁹Nde le ya kan tinɛ nyini nta Isirɛla mɔgɛnu ye anu si anu sigi kan min, ado n bara ban anu sigi-bole rabɛnna nyɔ anu yoge ti ko ma anu na kan min iko a dabirɛ. Kebi anu nara nyamanɛ kɛ rɔ, karagbɛlɛnu bi anu kɛlɛla kɔnɔ wo ti ma tun. N bara lanyiri kiri ko n si ale Dawuda latanka a yogenu masibɛ ma ka kegeyɛnu di a ma.

¹¹A wa faga tumɛ min, n si a ma, ala dan do ni to a gbɛ rɔ min si ala nyamanɛ to fanka rɔ.

¹²Wo le ye n bato-bɔn sɔla. Mansayɛ ti bɔ dan wola bɔn la.

¹³ Nde si ma a fa la. Ale si ma nta dan la. Kɔnɔ n ti bɔ ale fɛ iko n bɔra Sɔli fɛ nya min. Nde le ya mansayɛ bɔ Sɔli bolo ka a di ale Dawuda ma.

¹⁴N si ale Dawudala dan wo sigi mansayɛ la nna mɔgɛnu kun na, ado mansayɛ ti bɔ a kegeyɛnu bolo muk!”

¹⁵Alla ya min bɛɛ fɔ Nɛbi Netan ye, a tara wo bɛɛ rakaran Mansa Dawuda ye.

¹⁶Mansa Dawuda tara Marita Fani-Bɔn la. A ya a mayigi dugi ma nyɔ Mari yala ka a madiya ko, “E, Mari Alla, i wara ko-nyimɛ min bɛɛ kɛ nde ye, a ma bɛn, malebɛ nna denbayɛ ni wo sɔrɔn.

¹⁷Kɔnɔ hali wo, i ye sarama-kan kirila mabɛ nna denbayɛ ye anubɛ minnu ma sɔrɔn bɛ. E, Mari Alla, i wara n ma iko n nyɔgɔn sa.

¹⁸Mari, nde si nfen fɔ i ye gbɛ? I ya nde, ila wɔli-kɛlɛ lɔn kɔnɔ hali wo, i wara n gbiliya.

¹⁹Ile le wara ban kɛ latɛgɛla. I ko fɔ i wa a ma. Kabana-koe minnu bi kɛla n ye yarɔ, i wara wonu yira n na kaka.

²⁰E, Mari Alla, i nyɔgɔn sa! Ka a dabira fɔlɔ ma ha ka a sigi kaka la, ma ya i kelen pe le lɔn Alla la.

²¹Isirɛla mɔgɛnu fanan nyɔgɔn sa! I wara ma kunyɛ labɔ yɔɔnyɛ rɔ ka male ma ile halalɛ la. E, Mari, i ya kabana-koe minnu kɛ ma benbanu ye, wo ya a ma le, ile tɔgɔ tara pɔn ka ke duninya tonke bɛɛ rɔ. I ya ila mɔgɛ minnu kunyɛ bɔ gbaran rɔ Iyipiti kɛnu bolo, wonu taranta tala yarɔ nya min, i tora sibolo-gbɛrɛnu gbenna anu yarɔ wo nya na le.

²²I wara male Isirɛla mɔgɛnu ma i halalɛ la tɛban, ado ile Mari le mata Alla la.

²³“Nba, Mari Alla, a sɔgɛ ye n na, i ni ila sarama-kan latɔnbagaya mabɛ n kegeyɛnu ye iko i wara a fɔ nya min nun.

²⁴Wo si a ma, i mankan ni koloya ha duninya-mɔgɛ bɛɛsi ni a fɔ ko ile Mari Sɛnbɛ-Bɛɛ-Tigi ye Allayɛ la Isirɛla mɔgɛnu kun na, ado i ti mansayɛ bɔ nta bɔn la mumɛ!

²⁵Nta Alla, ni i ya a yen, n bi i madiyala kɛ nya kaka, n yili latɛgɛnɛ de bawo ile le wara a sa gbɛ ma n ye ko mansayɛ ti bɔ nna bɔn la.

²⁶Ile Mari le nta Alla la. I wara sarama-kan-nyimɛ kiri n ye.

²⁷N bi i matarala, i ni ita duwɛ layigi n kegeyɛnu kuma. Wo si a ma, anu ni to ila duwɛ kɔrɔ tuma-wo-tuma. Ile Mari Alla ara sarama-kan kɛ kiri, ado n kegeyɛnu ti foo ila sarama-kan kɛ la mumɛ!”