Read Kuranko 1 Ko-Kɔrɔta-Karan 19 Bible Online

1 Ko-Kɔrɔta-Karan 19 - Kuranko bible

1 Ko-Kɔrɔta-Karan 19

¹A ma mɛ kɛ kɔma, Amon Mansa Nɛhasi fagara. Ala den Henɔn sigira a gbɛ rɔ.

²Mansa Dawuda ya a fɔ ko, “Fɔ n ba Henɔn kɛ ma n diyana-mɔgɛ la iko mabɛ a fa Nɛhasi manɛ nya min nun.” Wo le ya a ma, a ya kilayɛnu nata a fa saya-kɔndɔli-kɛ-tinɛ. Kilayɛ wonu kenɛ Amon nyamanɛ rɔ, anu tara anu dantɛgɛ Mansɛ Henɔn ye.

³Kɔnɔ Amon mɔgɔ-banu ya Mansa Henɔn manyinika ko, “Ile lara a la ko Dawuda ya mɔgɛ kɛnu nana i fa saya-kɔndɔli-kɛ-tinɛ le? Kɛnu ma na wo la. Anu nara mala nyamani lakɔrɔsi tinɛ le alako anu si fɛrɛ sɔrɔn nya min ka ma nɔ.”

⁴Henɔn ya a ma, anu ya Mansa Dawudala kilayɛ wonu bira. Anu ya anu dɛ masii. Wo kɔma, anu ya anuna duruku-yan-bɛnu tɛgɛ a la purunsan! Anu ya anu gben.

⁵Mansɛ ya wo lamɔɛn nkɛkuna, a ya mɔgɛ donu nata wonu nabɛn tinɛ, Amonnu bara minnu namiliya wo la. A ya a sara anu bara, a ko anu ni to sigini Yɛrikɔ ha anu buyɛ ni bɔ tun. Wo kɔma, anu ni na to nala Yerusalɛm.

⁶Amonnu anubɛ anuna Mansa Henɔn ya a lɔn min kɛ ko anu bara Mansa Dawuda ma anu yoge la, anu tara Mɛsopotemiya nyamanɛ kantɔ-wara la anubɛ Meyaka soe anubɛ Soba soe Siriya nyamanɛ rɔ ka kirindi-laburilɛnu anubɛ anuna kirindinu masan wodi-gbɛ siyaman na. Wodi-gbɛ wola gbiliyɛ anubɛ fui-fan bɔrɔ kɛmɛ lolila gbiliyɛ rakɛn de!

⁷Kɛlɛ-dan kirindi-tigi mɔgɔ waga bi-sawa ani mɔgɔ waga fila (32,000), wonu wulita ka ta kofu Meyaka mansɛ anubɛ ala kɛlɛ-dannu ma. Anu dama wulita Mansa Dawuda kan ma ka ta anu daga makɛ Midaba soe dafɛ. Wo kɔma, Amonnuna kɛlɛ-dan damasi wulita Mansa Dawuda kɛlɛ kan ma.

⁸Mansa Dawuda fanan ya wo lamɔɛn min kɛ, a ya ala kɛlɛ-den-kunyɛ Yohabu anubɛ ala kɛlɛ-dan bɛɛsi lata Amonnu kɛlɛ tinɛ.

⁹Amonnu ya anu sɔ-bole rabɛn anuna so-karantan-tarɛ-don-dɛ la min tɔgɛ Raba. Anu ya kɛlɛ-dan minnu masan, wonubɛ anuna mansɛnu fanan tara anu sɔ-bole rabɛn Mansa Dawuda kan ma gbɛkole ma.

¹⁰Yohabu ya a yen ko a ye kɛlɛ tɛma gbɛ, kɛnu bi a yarɔ, kɛnu bi a kɔma, woletɔ ala kɛlɛ-dan minnu tagbɛlɛ, a ya wonu bi ka wonu natugu Siriyanu ma minnu bi gbɛkole ma.

¹¹A ya a na-kelen-nyɔgɛ Abisayi sɔ kɛlɛ-dan toenu yarɔ. Wonu tara Amonnu kɛlɛ tinɛ minnu bi soe tarɛ-don-dɛ la.

¹²Yohabu ya a fɔ a na-kelen-nyɔgɛ wo ye ko, “Ni i ya a yen, Siriyanu bara fɔlɔn n nɔla, wo na n dɛnbɛ de! Ni nde fanan ya a yen, Amonnu bara fɔlɔla wo nɔla, n si ta wo dɛnbɛ.

¹³Wo ni wo yisi gbɛlɛya ka wo kerinteya. Ma ni kɛlɛ kɛ mala nyamanita-mɔgɛnu ye bawo Alla halalɛ le ma dama la. Alamɛ Mari sako kɛra!”

¹⁴Yohabu anubɛ ala kɛlɛ-dannu tara Siriyanu kɛlɛ tinɛ gbɛkole wo ma. Siriya wonu ya anu buri Yohabu kɔrɔ.

¹⁵Amonnu ya a yen min kɛ, Siriyanu bara anu buri, anu denu fanan ya anu buri Abisayi kɔrɔ ka don tarɛ burɔ. Yohabu anubɛ ala kɛlɛ-dannu sɛgira Yerusalɛm.

¹⁶Siriyanu ya a lɔn yati ko Isirɛla mɔgɛnu bara anu nɔ. Anu ya anu nyɔgɔn kundɛn kan-tina-kelen. Soba Mansa Hadadisa ya kilayɛnu nata anu ta-nyɔgɛ Siriyanu ma minnu bi Yufereti bɛ tele-bɔɛ wara la ka wonu kele. Wonu nara kofu Mansa Hadadisala kɛlɛ-dannu ma. Mansɛla kɛlɛ-kunyɛ min tɔgɛ Sofaki, wo le ye anu kun na.

¹⁷Mansa Dawuda fanan ya wo lamɔɛn min kɛ, a ya Isirɛla kɛlɛ-dannu kundɛn kan-tina-kelen. Wonu ya Yorodan bɛ tɛgɛ ka ta Siriyanu magbenna. Anu ya anu sɔ-bole rabɛn Siriyanu kan ma ka anu kɛlɛ dabira.

¹⁸Siriya wonu ya anu buri Mansa Dawudala kɛlɛ-dannu kɔrɔ. Kɛlɛ-dan minnu bi kirindinu naburila, Isirɛla mɔgɛnu ya wonu mɔgɔ waga wɔrɔnfila (7,000) faga. Minnu bi tagamana anu kian ma, Isirɛla mɔgɛnu ya wonu mɔgɔ waga bi-nani (40,000) faga. Isirɛla mɔgɛnu ya Siriya kɛlɛ-den-kunyɛ Sofaki faga.

¹⁹Mansa Hadadisala so-tiginu ya a yen min kɛ ko Dawudala kɛlɛ-dannu bara anu nɔ, anu ya anu nyɛrɛ latenbi Mansa Dawuda ma. Anu tora ale kɔrɔ. Siriyanu kilanta Amonnu dɛnbɛn-koe ma tun.