Read Kuranko 1 Ko-Kɔrɔta-Karan 20 Bible Online

1 Ko-Kɔrɔta-Karan 20 - Kuranko bible

1 Ko-Kɔrɔta-Karan 20

¹ Wo san nasɛgi, mansɛnuna-kɛlɛ-wati kenɛ, Yohabu ya ala kɛlɛ-dannu bi. Anu tara bui Amon nyamanɛ ma. Lunyɛ do, anu tara bui anuna so-karantan do ma min tɔgɛ Raba ka a kasara. Kɔnɔ hali wo, Mansa Dawuda ma a maga Yerusalɛm soe burɔ.

²Mansa Dawuda ya anuna mansɛla mansaya-fulɛ bi a kunyɛ la ka a don a nyɛrɛ salɛ la. Fulɛ wo, sɛnɛ le wo la. Kuru-da-gbɛlɛnu nɔrɔnɛ a ma tala. Fulɛ wola gbiliyɛ anubɛ fui-fan bɔrɔ-talɛla gbiliyɛ rakɛn de! Wo kɔma, kɛlɛ ya fen-kolomɛ minnu bira, a ya wonu bi.

³Tɛgɛran wo, dɛɛ wo, sɛrɛ wo, a ya wonu don Amon wonu bolo ka anu ma ala yɔɔnnu na. Amonnuna soe wo bɛɛ rɔ, a ya a ma anu dama la wo nya na le tɛrr! A ban wo mala, a ya ala kɛlɛ-nyama bi. Anu sɛgira Yerusalɛm.

⁴Wati tenbinɛ, kɛlɛ do taranta Filisitinu anubɛ Isirɛla mɔgɛnu tɛma Kisari soe burɔ. Wati wo rɔ, Husayi kɛ Sibɛkayi ya Filisiti mɔgɔ-yan-bɛ do faga min tɔgɛ Sepeyai. Kɛ mara nkɛkuna, Isirɛla mɔgɛnu ya Filisitinu nɔ.

⁵ Wo kɔma, anubɛ Filisitinu ya kɛlɛ do kɛ tun. Wo wati rɔ, Yɛrila den Ɛlihenan, wo ya Kati kɛ do faga min tɔgɛ Lami, Kolati na-kelen-nyɔgɛ, kɔni. Kolati wola tanbɛ wo donnɛ kɔlɔma min na, wola kunbayɛ anubɛ yese-dan-kɔn rakɛn de!

⁶Anu tara ka Kati kɛnu kɛlɛ tun. Mɔgɔ-yan-bɛ do ye nyɔ, a bolo-kɔlɔni wɔrɔ, a kin-kɔlɔni wɔrɔ. Wonu dama lakofunɛ mogan-ni-nani. Mɔgɔ-yan-bɛnu bɔnsɔn do le ale la.

⁷Wo tara a kɔgɔ raka Isirɛla mɔgɛnu telen tɔ, Mansa Dawuda na-kelen-nyɔgɛ Sama, wola den Yonatan, wo ya a faga.

⁸Mɔgɛ kɛ minnu faganɛ kɛ la, mɔgɔ-sɛnbɛlamɛ minnu bi Kati soe burɔ, wonu kegeyɛ le kɛnu na. Mansa Dawuda anubɛ ala kɛlɛ-dannu denu ya wonu faga.