Read Kuranko 1 Ko-Kɔrɔta-Karan 21 Bible Online

1 Ko-Kɔrɔta-Karan 21 - Kuranko bible

1 Ko-Kɔrɔta-Karan 21

¹A sɔgɛ ya Setanɛ bira ka Isirɛla mɔgɛnu tɔrɔ. Woletɔ a ya Mansa Dawuda yisi kɔrɔtugu alako wo ni ala nyamanita-mɔgɛnu dan.

²Mansɛ ya a fɔ ala kɛlɛ-den-kunyɛ Yohabu ye ko, “Ta ila mɔgɔ-banu na i bolo. Ka a bi Isirɛla nyamanɛ-dan doi ma ka a sigi a dan doi la, wo ni ke bɔnsɔn damasi ma ka a mɔgɛnu dan. A sɔgɛ ye n na, n ni a lɔn mɔgɛ min nyɔgɔn yatɛ ye nyamanɛ kɛ rɔ.”

³Kɔnɔ Yohabu ya a fɔ ale mansɛ ye ko, “N tigi, alamɛ ita Mari ya a ma, kɛlɛ-dan min nyɔgɔn bi nyɔ kaka, wo nyɔgɔn kɛmɛ ni sa anu kuma. Kɔnɔ n tigi, hali wo mara, itɛ le anu dama la. Nfenna i ye wo mala ka hakɛ lana ila nyamanita-mɔgɛnu kuma?”

⁴Kɔnɔ mansɛta kumɛ wo tora a gbɛ rɔ. Yohabu ya Isirɛla nyamanɛ wo bɛɛ ratagama. A sɛgira Yerusalɛm.

⁵Mɔgɛ min nyɔgɔn yirika si ke kɛlɛ kɛla nyamanɛ rɔ, Yohabu ya wo yatɛ fɔ Mansa Dawuda ye. A ko mɔgɔ miliyɔn kelen, mɔgɔ waga kɛmɛ (1,100,000), wo le Isirɛla nyamanɛ rɔ. Mɔgɔ waga kɛmɛ nani, mɔgɔ waga bi-wɔrɔnfila (470,000), wo le Yuda nyamanɛ rɔ.

⁶Kɔnɔ Yohabu ma Lifayi bɔnsɔn-mɔgɛnu anubɛ Bɛnyamɛ bɔnsɔn-mɔgɛnu dan bawo mansɛ ara a sɔ wɔli min na wo la, wo ma diya a ye.

⁷Mansa Dawuda ya min ma wo la, wo ma diya Alla ye. Wo le ya a ma, Alla ya Isirɛla mɔgɛnu tɔrɔ.

⁸Mansa Dawuda ya a fɔ Alla ye ko, “N bara min ma kɛ la, n bara hakɛ kɛ ka bila ile, Alla le la wo la. I yandi, n makoto. N bara kun-takolonya-koe le ladan kɛ la.”

⁹Ko-rayennɛ min bi Mansa Dawudata wati wo rɔ, wo tɔgɛ le Kadi. Mari ya a fɔ wo ye ko,

¹⁰“Ta a fɔ Dawuda ye ko ko sawa ye nyɔ n bi min yirala a la, a ni kelen bi wonu tɔ. A wa fenfen bi kɛ sawɛ rɔ, ale le wo la.”

¹¹Mari kumara Kadi ye, Mansa Dawudala ko-rayennɛ, kɔni. Wo ya Mari kuman-kan wo latenbi a ma. A ko, “I ni ita bi kɛ sawɛ rɔ,

¹²san sawɛ kɔnkɔ-fitinɛ wo, karɛ sawa wo ye wo burila wo yogenu kɔrɔ wo, tele sawɛ kiraya-fitinɛ wo. Ale Allata niyi-bɔ-melika si Isirɛla mɔgɛnu faga tele sawɛ wo kɔrɔ. Mari ko, i miri a kilɛ fɛ. I ni ita bi kɛnu tɔ. N ni ta wo fɔ Mari ye.”

¹³Mansa Dawuda ya a fɔ Kadi ye ko, “Kɔndɔfili-bɛrɛbɛrɛ le kɛ la n bolo. A ma di n ye, n hadama-den-nyɔgɛ ni n tɔrɔ. Yanni wo ni ma, Mari nyɛrɛ ni n tɔrɔ bawo kinikini ye ale rɔ.”

¹⁴Wo le ya a ma, Mari ya kiraya-fitinɛ layigi anu kuma. Mansa Dawudala nyamanɛ mumɛ bɛɛ rɔ, mɔgɔ waga bi-wɔrɔnfila (70,000), wole kunyɛ tora kiraya-fitinɛ wo rɔ.

¹⁵Wo kɔma, Alla ya niyi-bɔ-melika lata Yerusalɛm kasara tinɛ. Kɔnɔ yanni niyi-bɔ-melika ni wuli mɔgɛnu fagala Yerusalɛm soe burɔ tumɛ min, Mari kinikinita Isirɛla mɔgɛnu ma ka a miriya yɛlɛma. A ya tɔn sigi anu kasarɛ la. A ya a fɔ ala melika wo ye ko, “A to ka. Minnu bara faga kɛ la, wo ara a bɔ!” Wo ya a taran, niyi-bɔ-melika wo ara ke Arɔnala gbere-kole ma. Yɛbusi mɔgɛ le ale Arɔna la.

¹⁶Mansa Dawuda ya ale niyi-bɔ-melika yen sɔnɛ san anubɛ dugu tɛma. Faan ye a bole la. A ye Yerusalɛm kasara-koe rɔ. Mansɛ anubɛ ala mɔgɔ-banu ya kasa-duruki don anu kan na. Anu damasi ya anu madu ka anu kunyɛ gbangban dugu ma.

¹⁷A ya Mari matara, a ko, “Ko-tinyanɛ ye nde le la. Nde le wara ko-yogomɛ ma mɔgɛnu-dan-koe rɔ. Mɔgɔ-makinikininɛ kɛnu bara nfen ko-yogoma ma? Nta Mari Alla, a bɛnnɛ tɔrɔyɛ kɛ ni sigi mabɛ nna denbayɛ le la ka ila mɔgɛ kɛnu nakisi.”

¹⁸Melika ya a fɔ Nɛbi Kadi ye ko a ni ta a fɔ Mansa Dawuda ye ko a ni ta saraka-mintan-tinɛ ladan Mari ye Arɔnala gbere-kole ma.

¹⁹Mansɛ ya Marita kumɛ bira ka a ma iko Nɛbi Kadi ya a fɔ a ye nya min.

²⁰Wo ya a taran, Arɔna anubɛ ala den-kei mɔgɔ nanɛ ye fui-fan gbesila gbere-kole wo ma. Wonu ya melika wo yen tumɛ min, ala dan wonu ya anu buri ka ta anu dogon.

²¹Arɔna ya a yɛ lata ka Mansa Dawuda yen nala ala sɛnɛ rɔ. A bɔra gbere-kole wo ma ka ta a sa dugu ma Mansa Dawuda kɔrɔ.

²²Mansɛ ya a fɔ a ye ko, “N nara ila gbere-kole kɛ le san tinɛ i ma alako n ni saraka-mintan-tinɛ sɔ Mari ye. Wo le si a ma, tɔn ni sigi kiraya-fitinɛ kɛ la. N si a san iko a dɛ ye nya min.”

²³Arɔna ya a fɔ a ye ko, “N tigi, hali i ma fenfen bɔ. Gbere-kole kɛ dama bi. I ma nna sara-ninkinu yen? Wonu ni ma saraka-mintantɛ la Mari ye. I ma fui-fen-tatɛn-kɔlɔmanu yen? Wonu ni ma saraka-mintan-sɔgɛ la. I ma dɔn-fen-kole fanan nadɛnnɛ yen? Wo fanan ni ma kɔ-fan la Mari ye. N bara wo dama di i ma.”

²⁴Kɔnɔ Mansa Dawuda ya a fɔ a ye ko, “Fɔ n ba anu san i ma le serr, bawo ni n ma wusi tirindi fan minna ko la, n ti wo di Mari ma, ado itɛ le wo la.”

²⁵A ya gbere-kole wo san sɛnɛ-gbu kɛmɛ wɔrɔ la Arɔna ma.

²⁶A ya saraka-mintan-tinɛ sɔ nyɔ Mari ye. A ya Mari matara ka saraka-mintantɛ anubɛ yisi-kima-sarakɛnu bɔ. Mari sɔnta ala sarakɛnu na ka sarakɛ wonu mintan-tɛ labɔ Arinyɛnɛ rɔ ka a layigi a ye.

²⁷Mari ya a fɔ niyi-bɔ-melika wo ye ko a ni ala faan don a lɛɛ rɔ. A ya wo ma.

²⁸Mansɛ ya a lɔn wonu denu ma ko Mari ara sɔn ata matarali-kan la. Woletɔ a tora sarakɛ bɔla Mari ye nyɔ.

²⁹Nɛbi Musa ya Marita Fani-Bɔn anubɛ saraka-mintan-tinɛ min nadan wulɛ rɔ, wonu bi Kibiyon soe burɔ nun kɛ wati rɔ.

³⁰Mansa Dawuda ma fɛrɛ sɔrɔn ka ta Mari matara nyɔ bawo a kilannɛ Marita melika wola faan la.