Read Kuranko 1 Ko-Kɔrɔta-Karan 23 Bible Online

1 Ko-Kɔrɔta-Karan 23 - Kuranko bible

1 Ko-Kɔrɔta-Karan 23

¹ Mansa Dawuda kɔrɔyara tumɛ min kɔbɔkɔbɔ, a ya ala den Silamɛni sigi mansayɛ la Isirɛla mɔgɛnu kun na.

²Mansa Dawudala Isirɛla mɔgɔ-ba wo, a saraka-masɔla wo, a Lifayi bɔnsɔn-mɔgɔ wo, a ya wo damasi kundɛn kan-tina-kelen.

³Lifayi bɔnsɔn-kei minnu sɔrɔn ara san bi-sawa ani a kɔɛ bɔ, Mansa Dawuda ya wonu dan. Wonu yatɛ bɛnta mɔgɔ waga bi-sawa ani waga segin (38,000) ma.

⁴Mansa Dawuda ya mɔgɔ waga mogan-ni-nani (24,000) bi wonu tɔ alako wonu ni Bato-Bon-kurɛ wo bato-ko-wɔlɛ kɛ. A ya mɔgɔ waga wɔrɔ (6,000) bi kɛnu tɔ tun alako wonu ni ma sɛbɛli-kɛlɛnu anubɛ kiti-salɛnu na.

⁵A ya mɔgɔ waga nani (4,000) bi alako wonu ni to kan tinɛ wo makandanna. A ya a nyɔgɔn waga nani (4,000) bi tun alako wonu ni to Mari tantola tolon-fannu na Mansa Dawuda ya minnu nadan bato-ko-wɔlɛ wola ko la.

⁶Mansɛ ya Lifayi bɔnsɔn wo rafara kurun sawa la iko anu kebilɛ ye nya min, Kɛrisɔn bɔnsɔn wo, Kohati bɔnsɔn wo, Mɛrari bɔnsɔn wo.

⁷Kɛrisɔn ya den-kei mɔgɔ fila sɔrɔn, Leyadan anubɛ Simayi.

⁸Leyadan ya den-kei mɔgɔ sawa sɔrɔn, Yehiyɛli anubɛ Setami anubɛ Yowɛli.

⁹Mɔgɔ sawɛ kɛ minnu bɔra Leyadan rɔ, kebila-kunyɛ le wonu na. A dɔgɛ Simayi ya den-kei mɔgɔ sawa sɔrɔn, Sɛlomiti wo, Hesiyɛli wo, anubɛ Hɛran.

¹⁰Simayi wo ya den-kei mɔgɔ nani sɔrɔn tun. Ala sarɛ le Yehati la. Wo dɔgɛ le Sisa la. Wo fanan dɔgɛ le Yewusi anubɛ Bɛriya la. Yewusi anubɛ Bɛriya ma den-siyaman sɔrɔn, woletɔ anu denu tora kebila kelen tɔ.

¹²Kohati ya den-kei mɔgɔ nani sɔrɔn, Amiram wo, Isihari wo, Hiburɔn wo, anubɛ Yusiyɛli.

¹³ Ala sarɛ, Amiram, wo ya Aruna anubɛ Musa sɔrɔn. (Alla ya Aruna anubɛ a kegeyɛnu yabɔ alako anu ni ma ata mɔgɔ-yabɔnɛnu na burubukai! Anu si to sarakɛnu mintanna Mari ye. Anu si to miran-sɛnimɛnu fɛ-birala ka duwa mɔgɛnu ye ale Alla tɔgɛ rɔ.

¹⁴Allata mɔgɛ ye Musa min na, wo fananta dannu bi Lifayi bɔnsɔn kɛnu tɛma.)

¹⁵Nɛbi Musala den-kei filɛ, wonu tɔgɛ le kɛnu na, Kɛrisɔn anubɛ Ɛliyesa.

¹⁶Kɛrisɔnna sarɛ le Subeyɛli la.

¹⁷Ɛliyesa wo ya den-kei kelen de sɔrɔn. Wo tɔgɛ le Rehabaya kɔnɔ Rehabaya wo yirita bui!

¹⁸Kohatila den-kei fila nyɔgɛ min tɔgɛ Isihari, wo ya den-kei sɔrɔn min tɔgɛ Sɛlomiti. Wo mara kebila-kunyɛ la.

¹⁹Kohatila den sawa nyɔgɛ min tɔgɛ Hiburɔn, wo ya den-kei mɔgɔ nani sɔrɔn, Yɛraya wo, Amaraya wo, Yahasayɛli wo, anubɛ Yɛkamiyami.

²⁰Kohatila den-kei nani nyɔgɛ min tɔgɛ Yusiyɛli, wo ya den-kei mɔgɔ fila sɔrɔn, Maika anubɛ Isisiya.

²¹Mɛrari ya den-kei mɔgɔ fila sɔrɔn, Mahali anubɛ Muhusi. Mahali wo ya den-kei mɔgɔ fila sɔrɔn, Ɛliyasa anubɛ Kisa.

²²Kɔnɔ Ɛliyasa wo fagara, a ma den-kei wo den-kei sɔrɔn fɔ dunmusinu. Dunmusi kɛnu tora anu fa dɔgɔma, Kisala dannu ye.

²³Mɛrarila den fila nyɔgɛ min tɔgɛ Muhusi, wo ya den-kei mɔgɔ sawa sɔrɔn, Mahali, Idɛri, anubɛ Yɛrɛmoti.

²⁴Ma ara min madan kɛnu na, Lifayi bɔnsɔn le wonu na iko anuna kebilɛ anubɛ anu bɔnsɔn ye nya min. Anu kebila-kunyɛ le dama tɔgɛ sɛbɛnɛ kɛ la. Anuna kebilɛ rɔ min siyi wa san mogan bɔ, wo si wɔlɛ do sɔrɔn Mari Bato-Bɔn la.

²⁵Mansa Dawuda ya a fɔ ko, “Isirɛla mɔgɛnuta Mari Alla ara yisi-kimɛ di ala mɔgɛnu ma. Alla nyɛrɛ si to sigini Yerusalɛm burubukai!

²⁶ A mako ma taran Lifayi bɔnsɔn-mɔgɛnu na ko anu ni to Fani-Bɔn anubɛ a fɛ-miran-sɛnimɛnu madununa.”

²⁷Iko Mansa Dawuda ya a latɛgɛ nya min, Lifayi bɔnsɔn-mɔgɛ min sɔrɔn wa san mogan bɔ, anu si ta wo tɔgɔ sɛbɛ ka wɔlɛ do di a ma Mari Bato-Bɔn la.

²⁸Donu si to Aruna kegeyɛnu dɛnbɛna saraka-masɔ-wɔlɛ la. Anu si Bɔn wonubɛ a fɛ le sɛninya woletɔ ni fan minnu sɛninyanɛ, wonu ti kɔsɔ iko tɔn ya a fɔ nya min.

²⁹Donu si to biredi-dantɛgɛnɛ mintanna tele-wo-tele. Anu si bu-gbɛngbɛnnɛ fɛ-bira min bi mala sarakɛ la. Anu si biredi-yɛlɛbɛlɛ fanan fɛ-bira, anubɛ biredi min yilannɛ pani-tasangbɛ rɔ. Anu si dɛgɛ-munke fɛ-bira fanan min yabasannɛ tuli la. Mɔgɛnu bi nala kɔ-fan min damasi la, anu si wonu fanan suma.

³⁰Donu fanan si to Mari tantola sɔgɔma ani wurɛ la.

³¹Anu ba wuli Sulen-Tele-sarakɛ bɔla anubɛ anuna Karɛ-Kurɛ-Ladiyɛ anubɛ anuna ladiyɛ donu, anu si to Mari tantola. Anu bi wɔli kɛla iko a bɛnta, anu ni a kɛ nya min. Anu denu si to Alla batola tuma-wo-tuma.

³² Anu denuta wɔlɛ le wo la ka to Marita Fani-Bɔn fɛ-birala fɔlɔ nun. Kaka, anu bi anu na-kelen-nyɔgɛ Aruna kegeyɛnu madɛnbɛna Mari Bato-Bɔn wo burɔ.