Read Kuranko 1 Ko-Kɔrɔta-Karan 28 Bible Online

1 Ko-Kɔrɔta-Karan 28 - Kuranko bible

1 Ko-Kɔrɔta-Karan 28

¹Mansa Dawuda ya kilayɛ lata Isirɛla mɔgɔ-ba damasi ma ka anu kele Yerusalɛm soe burɔ. A bɔnsɔn-kun-tigi wo, a kebila-kun-tigi wo, a kɛlɛ-den-kun wo, ala fen-makandanna wo, a kurugba wo, mansɛla-fen-namarala wo, anu damasi kundɛnta Yerusalɛm soe burɔ.

²Mansa Dawuda ya a lakɔɛnma ka a fɔ anu ye ko, “Nna nyamanita-mɔgɛnu, wo ni wo tole masɔ n na. A sɔgɛ ye n na nun, n ni bɔn sɔ Marita tɔn-kenkirɛla ko la. Wo si ma mata Mari Alla mayigi tinɛ[23] la. N bara fen-siyaman nadɛn nun bɔn wo sɔ-koe rɔ.

³Kɔnɔ ale Alla ko nde ti bɔn wo sɔ bawo n bara kɛlɛ-kurugbayɛ kɛ ka yele-siyaman bɔ.

⁴Isirɛlata Mari Alla, wo le ya Yuda bɔnsɔn yabɔ bɔnsɔn doinu tɛma. Wo kɔma, a ya n fala denbayɛ yabɔ Yuda bɔnsɔn-mɔgɛnu tɛma. Wo kɔma fanan, a ya nde, Dawuda yabɔ n fata denbayɛnu tɛma ka n ma mansɛ la Isirɛla mɔgɛnu kun na. A ya den-kei-siyaman di n ma. A ya Silamɛni yabɔ nna dan wonu tɛma ka wo ma mansɛ la Marita nyamanɛ kɛ kun na. Ale Mari le wara nde yabɔ ka mabɛ n kegeyɛnu ma mansɛ la wo kun na tɛban!

⁶“Ale Mari ya a fɔ n ye nun ko nna den Silamɛni, wo le ye ale Mari Bato-Bɔn sɔla. A ya a fɔ n ye tun ko nna dan wo fa le ale Alla la. A ko ala dan le nna den Silamɛni wo la.

⁷ A ya a fɔ tun ko a si a ma, nna danla mansayɛ ti ban mumɛ! Alako tun nna dan wo ye ata tɔnnu birala a kilɛ fɛ iko a ye a mala nya min kɛ la kaka.

⁸“Nba, wole nna mɔgɛ minnu nadɛnnɛ Isirɛla nyamanɛ kɛ rɔ mata Mari Alla yala kaka, wo ni a ma wo fɛrɛma. Wo ni ale wota Mari Allata tɔnnu bira. Wo si a ma, nyamanɛ kɛ ni ma wo halalɛ la. Hali wo mamanɛnu, a ti bɔ anu bolo mumɛ!”

⁹A ya a tintan ala den Silamɛni na ka a fɔ a ye ko, “Nna den, i ni nta Alla wara-koe lɔn ka ata wɔlɛ kɛ i yisi bɛɛ la. Alla ya ma miriya anubɛ mala natanu lɔn. Ni i ya i gbɛrɛn a ma, a si i rabira. Kɔnɔ ni i ya i kan-kɔ sɔ a la, a si a ban i la feufeu!

¹⁰Wo le, ile ni a lɔn ko Alla le nyɛrɛ-nyɛrɛ ya ile yabɔ ko i ni ata Bato-Bon-sɛnimɛ sɔ a ye. Woletɔ kaka, i ni i sɛbɛ don ka i wakila wɔlɛ kɛ ma.”

¹¹Mansa Dawuda ya Bato-Bɔn sɔ-bole yira ala den Silamɛni na. A fen namara tina wo, a konko wo, katarala Sɛnima-Sɛnima-Tinɛ ma, hakɛ yama si togon kan min.

¹²A ya a kata sɔ-bole yira a la fanan iko a ya a miri a ma nya min nun. Kɔ-fan minnu dantɛgɛnɛ Mari ma, wonu namara tina wo, Bato-Bon-miran namara tina wo, a ya wonu fanan sɔ-bole yira a la.

¹³Saraka-masɔlɛnu anubɛ Lifayi bɔnson-toenu si anuna wɔlɛ kɛ nya min, anubɛ anu si Bato-Bɔn anubɛ a burɔ-mirannu fɛ-bira nya min, Mansa Dawuda ya wo sɔ-bole fanan yira Silamɛni na.

¹⁴Sɛnɛ anubɛ wodi-gbɛ min nyɔgɔn yirika la si dan Bato-Bɔn wo mirannu na, a ya wo fanan fɔ a ye.

¹⁵A lɛnpunu anubɛ anu gbaga-kuru-makɛ-tina wo,

¹⁶a wodi-gbɛ-tebulu wo, anu bi biredi-dantɛgɛnɛ sala sɛnɛ-tebulu min kuma wo, Mansa Dawuda ya ala dan labila wonu nadan-bole la.

¹⁷Sɛnɛ-hakikɛ min nyɔgɔn yatɛ si bɛn Bato-Bon-miran-mɛsɛ-yirika ma, a ya wonu yira a la. A sogo-sɔgɔ-fen wo, a ku-musu wo, a yi-lafa wo, a pileti wo, kɛnu nadannɛ sɛnɛ wo le tɔ. Wodi-gbɛ ye pileti wonu fanan ma.

¹⁸Sɛnɛ-hakikɛ min nyɔgɔn yatɛ la si dan isɛnti mintan tinɛ la wo, anubɛ melikala muninya filɛta kirindi min na si dan Marita tɔn-kenkirɛ kuma wo, mansɛ ya wonu yira a la.

¹⁹Mansa Dawuda ya a fɔ ko, “Mari nyɛrɛ ya bɔn sɔ-bole yira n na nya min, n bara a sɛbɛ wo nya na le kɛ la.”

²⁰Mansa Dawuda ya a fɔ ala den Silamɛni ye ko, “I kerinteya ka i yisi gbɛlɛya. I ni wɔlɛ dabira. Fenfen kana ila wɔlɛ tinya. Nde ye nta Mari Alla min sako kɛla, wo si to i fɛ, ado a ti i boloka muk! Ka tenbi wo la, a ti bɔ i fɛ Bato-Bɔn sɔ-ko-wɔlɛ kɛ rɔ.”

²¹Saraka-masɔlɛ anubɛ Lifayi bɔnsɔn-mɔgɛ toenu sɔnta anuta wɔlɛ ma Alla Bato-Bɔn burɔ. Boloma-wɔli-kɛlɛ minnu kusan, wonu tabɛnnɛ i dɛnbɛn-koe ma. Nyamanita-mɔgɛnu anubɛ anuna kun-tiginu tabɛnnɛ ka ita kumɛ bira Bɔn sɔ-koe kɛ rɔ.