Read Kuranko 1 Ko-Kɔrɔta-Karan 29 Bible Online

1 Ko-Kɔrɔta-Karan 29 - Kuranko bible

1 Ko-Kɔrɔta-Karan 29

¹Mansa Dawuda ya a fɔ nyama-ladɛnnɛ wo ye ko, “Nna den Silamɛni, Alla ara wo le yabɔ ka a ma mansɛ la. Kɔnɔ hali wo, a dɔgɔ, ado a ma duru mansaya-koe la. Bato-Bɔn sɔ-ko-wɔlɛ kɛ makawara bawo mɔgɛnuta mansa-bɔn sɔ-ko-wɔli ma kɛ la fɔ Mari Allatɛ.

² N bara n se-koe-bɛɛ kɛ ka n taya Bato-Bon-mirannu-nyinɛ ma. Sɛnɛ wo, wodi-gbɛ wo, sila wo, nɛgɛ wo, kɔlɔma-lɔngbɔn wo, dugu-kɔrɔ-nɔnfulu-su bɛɛsi wo, kuru-lɛsɛtɛnu wo, n bara wonu nadɛn Bato-Bon sɔ-ko-wɔlɛ kɛla ko la.

³Wo bɛɛni-ata, n bara sɛnɛnu anubɛ wodi-gbɛnu bɔ n gbu rɔ ka a kofu doi kɛnu ma Bato-Bɔn sɔ-koe rɔ. N ya wo ma le bawo Allata Bɔn kɛ di n ye kati!

⁴N ya fan minnu bɔ n nyɛrɛ gbu rɔ, wonu yatɛ le kɛnu na. N bara sɛnɛ-hakikɛ min bɔ, wola gbiliyɛ anubɛ fui-fan bɔrɔ waga kelen ani kɛmɛ lolila (1,500) gbiliyɛ rakɛn de! N bara wodi-gbɛ min bɔ, wola gbiliyɛ anubɛ fui-fan bɔrɔ waga sawa ani kɛmɛ lolila (3,500) gbiliyɛ rakɛn de! N ya wo bɛɛ labɔ alako ka Bato-Bɔn dandan yamatogon wonu na.

⁵N ya wo bɛɛ labɔ alako boloma-wɔli-kɛlɛnu ni Bato-Bon-miran donu nadan wonu na fanan. Nde ara min di Marita wɔlɛla ko la, wo le kɛnu na. Ni min bi a fɛ ka atɛ di Mari ma, awa, wo si atɛ di.”

⁶A bɔnsɔn-kun wo, a kebila-kun wo, a kɛlɛ-den-kun wo, a fen-makandanna wo, anu damasi sɔnta wo ma ka anu bole ladɛn.

⁷Anu ya minnu nadɛn Marita Bɔn sɔ-koe rɔ ka a sa mansɛtɛ kuma, wo le kɛnu na. Anu nara sɛnɛ la minna gbiliyɛ anubɛ fui-fan bɔrɔ waga fila ani kɛmɛ loli anubɛ bɔrɔ kelenta (2,501) gbiliyɛ rakɛn. Anu nara wodi-gbɛ la minna gbiliyɛ anubɛ fui-fan bɔrɔ waga lolila (5,000) gbiliyɛ rakɛn. Anu nara silɛɛ la minna gbiliyɛ anubɛ fui-fan bɔrɔ waga kɔnɔntɔla (9,000) gbiliyɛ rakɛn. Anu nara nɛgɛ la minna gbiliyɛ anubɛ fui-fan bɔrɔ waga bi-lolila (50,000) gbiliyɛ rakɛn.

⁸Dugu-kɔrɔ-nɔnfuli ye minnu bolo anu tɛma, wonu fanan ya wonu don Bato-Bɔn fen-namaralɛnu bolo. Fen-namaralɛ wonuna kun-tigi le Lifayi bɔnsɔn-mɔgɛ do la min tɔgɛ Yɛhiyɛli. Kɛrisɔn kebila-mɔgɛ do le ale la.

⁹Mɔgɛnu sewanɛ ya fan wonu nabɔ Marila wɔlɛla ko la. Anu dama ya a yen min kɛ ko fen-siyamɛ wo nyɔgɔn bara bɔ, anu dama sewara anubɛ anuna mansɛ.

¹⁰Mansa Dawuda ya Mari tanto nyama wo yala nyɔ rɔ. A ya Alla matara, a ko, “Ma benba Yakobata Mari Alla, i ni to tantolɛ sɔrɔnna habadan!

¹¹ E, Mari, i makawara. Sɛnbɛ-tigi anubɛ gbiliya-tigi le ile la. Mansɛ-bɛɛta-mansɛ le ile la. Fan min bɛɛsi ye san-kole anubɛ dugu-kole ma, iletɛ le wonu na. Duninya-bɛɛ-mara-mansɛ le ile la.

¹²Nɔnfuli anubɛ gbiliyɛ ye bɔla ile le bolo. Fan bɛɛsi ye ita mansaya-sɛnbɛ le kɔrɔ. Ile le si ke sɛnbɛ anubɛ tɔgɛ dila mɔgɔ ma.

¹³Woletɔ male ye baraka birala i ye ka tantolɛ di ile mata Alla ma.

¹⁴“Kɔnɔ hali wo, malebɛ nta mɔgɛnu ma ke fenfen dila i ma kamasɔrɔn kɔ-fan bɛɛ ye bɔla ile le kɔɛn rɔ. Male ye fan min sɔrɔnna i bolo, male ye wo le lasɛgila i ma.

¹⁵E, Mari, i ya a lɔn ko sundan le ma la duninya kɛ rɔ yan iko ma benbanu bi nya min nun. Saya masangba tina sa ma bolo. Ma ye yan iko ninɛ.

¹⁶E, mata Mari Alla, ma ara nɔnfuli kɛ bɛɛsi ladɛn kan-tina-kelen yan tɔ ita Bɔn sɔ-koe le la alako ka i tɔgɔ-sɛnimɛ gbiliya, ado kɛ dama bɔra ile le kɔɛn rɔ. Ile letan ye a dama la.

¹⁷Nta Alla, ile le si mɔgɔ damasi kɔrɔbɔ, ado fɔ mɔgɔ-latelennɛnu, wonu denu bi i hɛnɛna. N bara kɛ damasi latenbi i ma n yisi bɛɛ la. Mɔgɛ min bɛɛsi ladɛnnɛ, anu ya min bɛɛsi labɔ, anu ya a labɔ anu yisi-gbɛnɛ le la.

¹⁸Ma benba Iburayima anubɛ Isiyaka anubɛ Yakobata Mari Alla, alamɛ i ya a ma, ita mɔgɛnu ni to anu sɛbɛ donna i wara-koe ma. Anu kana bɔ i kɔma mumɛ!

¹⁹Mari, i ni yili-latɛgɛ di nna den Silamɛni ma. Wo si a ma, a ni ita kumɛ bira, ado n bara miran min bɛɛsi ladɛn Bato-Bɔn sɔ-koe rɔ, a si wonu bi ka bɔn sɔ i ye.”

²⁰Wo kɔma, Mansa Dawuda ya a fɔ mɔgɛnu ye ko, “Wo ni wota Mari Alla tanto.” Mɔgɔ damasi ya anu benbanuta Mari Alla tanto. Anu ya anu madu ka Mari anubɛ anuna mansɛ gbiliya.

²¹Wo banda kɛ, anu ya saraka-siyaman bɔ Mari ye. Wo kɔma, anu ya saraka-soge wo do di mɔgɛnu ma. Anu ya tura waga kelen bi anubɛ saga-yigi waga kelen anubɛ saga-den waga kelen. Anu ya kɛ dama ma saraka-mintantɛ la. Wo kɔma, anu ya nɔnbɔ-gbɔ-yinu ma kɔ-fan la.

²²Anu bi fen dɔnla wulɔn tele rɔ, anu sewara ka fen-dɔn-kɛ Mari yala. Anu ya Silamɛnina mansayɛ lawasa Mari tɔgɛ rɔ, ado kɛ le mara a fila nyɔgɛ la. Wo kɔma, anu ya Sedokila saraka-masɔ-wɔlɛ lawasa ka dantɛgɛ-tuli kɛ anubɛ mansɛ salɛ rɔ.

²³ Wo le ya a ma, Silamɛni sigira a fa Mansa Dawuda gbɛ rɔ. Ata mansayɛ sabatira. Isirɛla mɔgɛ bɛɛ ya a gbiliya.

²⁴A mɔgɔ-ba wo, a kɛlɛ-den wo, hali mansɛla dan damasi, wonu ya lanyiri kiri ko anu ti bɔ ale Silamɛni kɔma muk!

²⁵Mari ya a ma, Isirɛla mɔgɛ bɛɛsi kawara Mansa Silamɛni ma. Mari ya a ma fanan, ala mansaya-sɛnbɛ koloyara Isirɛla mansɛ bɛɛtɛ ko minnu bara mansayɛ kɛ fɔlɔ nun.

²⁶ Yɛsila den Mansa Dawuda ya san bi-nani le bɔ mansayɛ la Isirɛla mɔgɛnu kuma. San wɔrɔnfila, a siginɛ Hiburɔn soe burɔ. San bi-sawa ani san sawa, a siginɛ Yerusalɛm soe burɔ.

²⁸A kɔrɔyara kɔbɔkɔbɔ, a nara to so-sɛgi-kɛla. A ya so-sɛgi-kɛ fen-tigiyɛ anubɛ gbiliyɛ rɔ. Ala den Silamɛni sigira a gbɛ rɔ.

²⁹Ka a bi Mansa Dawudala wulɛ ma ha ka a sigi ala ban la, koe min bɛɛsi mara a wara-koe rɔ, nɛbi mɔgɔ sawa, wo le ya wo sɛbɛ, Nɛbi Samuwɛli wo, Nɛbi Netan wo, anubɛ Nɛbi Kadi, kɔni.

³⁰A ya mansayɛ kɛ nya min anubɛ a ya fanka sɔrɔn nya min, anu ya wo dama sɛbɛ. Koe min bɛɛsi mara Mansa Dawuda la anubɛ koe min bɛɛsi kɛra nyamanɛ doinu tɔ, anu ya wonu fanan sɛbɛ tɛrr!