Read Kuranko 2 Ko-Kɔrɔta-Karan 10 Bible Online

2 Ko-Kɔrɔta-Karan 10 - Kuranko bible

2 Ko-Kɔrɔta-Karan 10

¹Mansa Silamɛnila dan Rihobowami tara Sɛkɛm soe burɔ, Isirɛla kantɔ-mɔgɛnu ya anu nadɛn kan min ka a ma mansɛ la.

²Nebatila den Yɛrabowami min ya a buri Mansa Silamɛni kɔrɔ ka ta Iyipiti mansɛ warɛ, a lamɔɛn wo bolo nyɔ rɔ ko anu bara Rihobowami ma mansɛ la, a bɔra nyɔ rɔ ka sɛgi a warɛ Isirɛla nyamanɛ rɔ.

³Isirɛla mɔgɛ minnu siginɛ kantɔ-wara la, wonu ya ale fanan kele. A nanɛ, anu tara Mansa Rihobowami wara ka a fɔ a ye ko,

⁴“I fa Mansa Silamɛni ya ma bira boloko-yogomɛ-kɛ ka a lagbɛlɛya ma kuma. Ni ile ya do bɔ dunɛ wo la ma ye ka ma kun-nadiya, i ya ko-wo-ko fɔ ma ye, ma si wo ma.”

⁵Ale Mansa Rihobowami wo ya anu yabi ko, “Wo sɛgi, tele fila a sawa nyɔgɛ, wo ni na. N si wo yabi.” Anu sɛgira anu kɔma.

⁶Mansa Rihobowami tara hɛnkili nyini a fa makawandilɛnu bolo. A ya wonu manyinika ko, “N si mɔgɛ kɛnu yabi kama?”

⁷Mɔgɔ-ba wonu ya a fɔ Mansa Rihobowami ye ko, “Ni a sɔgɛ ye i la, wobɛ mɔgɛ kɛnu ni wɔli wo nyɔgɔn fɛ, fɔ i wa anu sako kɛ ka anu yisi-sa-kumɛ fɔ. Ni i ya wo ma, anu si ma ila wɔli-kɛlɛnu na burubukai!”

⁸Kɔnɔ a ma sɔn mɔgɔ-ba wonuna kawandili-kan wonu birala. Fɔ a tara a kemini-mɛsɛ-nyɔgɛnu denu bara ka wonu manyinika. Wonu denu mara a makawandilɛnu na wo wati rɔ.

⁹A ya wonu manyinika kantɔ-mɔgɛ wonuna ko ma. A ko, “Mɔgɛ minnu bara na n bara kɛ la, anu ko n ni do bɔ anuna dunɛ la. Nde si nfen ma wonuna ko rɔ?”

¹⁰Keminɛ wonu ya a labila, anu ko, “I ye a fɔla anu ye ka le ko ile bolo-nɔlɔnɛ kolo i fa lenkan ko.

¹¹Wo kɔma, i ni a fɔ anu ye ko i fa ya dunɛ sigi anu kuma kɔnɔ ileta dunɛ si tenbi i fatɛ la. I ni a fɔ anu ye fanan ko i fa ya anu gbesi bosɛ le la kɔnɔ ileta bosa-dumɛ si wara anu ma iko bondalɛ wa mɔgɔ bon.”

¹²Tele fila, a sawa nyɔgɛ wo kɔma, Yɛrabowami anubɛ ala mɔgɛnu tara Mansa Rihobowami wara tun iko a ya a fɔ anu ye nya min.

¹³Ale Mansa Rihobowami ma kuma mɔgɛ kɛnu ye iko a fala mɔgɔ-banu ya a labila nya min. A ya kuma-gbondanɛ le fɔ anu ma

¹⁴iko a ta-nyɔgɔ-kemini-mɛsɛ wonu ya a labila nya min. Ale mansɛ ya a fɔ anu ye ko, “N fa ya dunu-belebele sigi wo kuma kɔnɔ nde ye dunɛ min sigila wo kuma, wo si tenbi n fatɛ la. N fa ya wo gbesi bosɛ le la kɔnɔ ndeta bosa-dumɛ si wara wo ma iko bondalɛ wa mɔgɔ bon.”

¹⁵Mansa Rihobowami ya a ban mɔgɛnu bolo alako Mari ya kumɛ min fɔ Yɛrabowami ye Nɛbi Ahaya Sailo kɛ baraka rɔ, wo ni bɔ-a-la.

¹⁶ Mɔgɛ wonu ya a yen min kɛ ko Mansa Rihobowami sa a tole masɔla anu na, anu ya sɔnkɛ tɛgɛ. Anu ko, “Ma sa nyinina Mansa Dawuda anubɛ a kebilɛ ma tun! Anu bara nfen ma ma ye? Isirɛla mɔgɔ damasi, bɛɛ ni sɛgi a warɛ! Fɔ ni ile Rihobowami tora mansayɛ la i fala denbayɛnu kun na.” Anu ban wo fɔla, Isirɛla mɔgɛ bɛɛsi sɛgira anu barɛ murutiyɛ rɔ.

¹⁷Fɔ Isirɛla mɔgɛ minnu siginɛ Yuda nyamanɛ rɔ, Mansa Rihobowami tora wonu denu dɔrɔn kun na mansayɛ la.

¹⁸Minnu bi wɔlɛ kɛla fɔrɔsɛ la, Adonaram ye wonu kun na. Mansa Rihobowami ya wo lata Isirɛla kantɔ-warala-mɔgɛnu makawandi tinɛ a ye. Wo ke Isirɛla mɔgɛnu ma, anu ya a mabon ha a fagara. Ale mansɛ ya wo lamɔɛn min kɛ, a ya a latiriya ala kirindi bila. A ya a buri anu kɔrɔ ka ta Yerusalɛm soe burɔ.

¹⁹Ka a bi wo wati ma ha ka a sigi kaka la, Isirɛla mɔgɛ minnu siginɛ kantɔ-wara la, wonu murutiyanɛ Mansa Dawudala mansaya-bɔn ma.