Read Kuranko 2 Ko-Kɔrɔta-Karan 17 Bible Online

2 Ko-Kɔrɔta-Karan 17 - Kuranko bible

2 Ko-Kɔrɔta-Karan 17

¹Yɛhosafati sigira a fa Mansa Esa gbɛ rɔ mansayɛ la. A ya ala sɔ tinɛ makofu alako Isirɛla mɔgɛnu kana na a kɛlɛ.

²Yuda nyamanɛ so-latankanɛnu wo, Yuda soe doinu wo, hali a fa Mansa Esa ara soe minnu bira-a-la nun Ifɛrɛm bɔnsɔn-mɔgɛnuna nyamanɛ rɔ wo, Mansa Yɛhosafati ya kɛlɛ-dannu sigi wonu dama rɔ.

³Mari ya ata duwɛ layigi Yɛhosafati kuma bawo a ya a fa sɔn fɔlɔtɛ bi. A ma Bɛsi Beyali kɔ.

⁴A ya a fata Alla bato ka ata tɔnnu bira. A ma Isirɛla mansɛnu sɔnnu bi.

⁵Mari ya Yuda nyamanɛ lasabati Yɛhosafati ye. Ala mɔgɛnu tora a sanbala ha a mara nɔnfulu-tigi anubɛ tɔgɔlamɛ la.

⁶A sewara Mari bato-koe la. A ya Alla-batobɛlɛnuna bɛsi-kɔ-tinɛnu tinya. Bɛsɛ min tɔgɛ Asura, a ya wola muninyɛ bɛɛ tinya Yuda nyamanɛ rɔ.

⁷Yɛhosafatila mansayɛ san sawa nyɔgɛ ma, a ya ala mɔgɔ-ba loli lata Yuda mɔgɛnu karan tinɛ. Minnu tara, wonu tɔgɛ le kɛnu na, Bɛnhayɛli wo, Hɔbadaya wo, Sakaraya wo, Natanɛli wo, anubɛ Mɛkaya.

⁸A ya Lifayi mɔgɔ kɔnɔntɔ anubɛ saraka-masɔla fila lata anu fɛ. Lifayi mɔgɔ kɔnɔntɛ wonu tɔgɛ le kɛnu na, Sɛmaya wo, Nɛtanaya wo, Sebadaya wo, Asahɛli wo, Sɛmiramoti wo, Yɛhɔnatan wo, Adonaya wo, Tobaya wo, anubɛ Tobadonaya. Saraka-masɔla filɛ wonu tɔgɛ le kɛnu na, Ilasama anubɛ Yɛhoram.

⁹Anu tara Marita Tɔn-Kitabu la ka mɔgɛnu karan Yuda-tonko-nani bɛɛ rɔ.

¹⁰Mari ya a ma, Yuda nyamanɛla foolɛ bɛɛ kilanta Mansa Yɛhosafati kɛlɛ-koe la,

¹¹ado Filisiti donu nara wodi-gbɛ anubɛ fen-koloma-siyaman na a ye. Arabu donu nara saga waga wɔrɔnfila ani saga kɛmɛ wɔrɔnfila (7,700) la anubɛ baa waga wɔrɔnfila ani baa kɛmɛ wɔrɔnfila (7,700) la ka wonu di ale mansɛ ma.

¹²Mansa Yɛhosafati sabatira bɛrɛkɛ! A ya tarɛ mini soe donu ma Yuda nyamanɛ rɔ ka kan-tina-latankanɛ donu sɔ

¹³ala fen namara tinɛnu bi minnu tɔ, kɔni. A ya ala kɛlɛ-kurugbɛ donu nasigi Yerusalɛm soe burɔ

¹⁴iko anuna kebilɛnu bi nya min. Yuda kɛlɛ-den-kunyɛ le Adina la. Kɛlɛ-dan mɔgɔ waga kɛmɛ sawa (300,000) ye wo kɔrɔ.

¹⁵Adina tatugunnɛ le Yɛhɔhanan na. Kɛlɛ-dan mɔgɔ waga kɛmɛ fila anubɛ mɔgɔ waga bi-segin (280,000) bi ale fanan kɔrɔ.

¹⁶Wo fanan tatugunnɛ le Sikirila den Amasaya la. Kɛlɛ-dan mɔgɔ waga kɛmɛ fila (200,000) ye ale kɔrɔ. (Amasaya kɛ le ya a nyɛrɛ bɔ ka ma Marita kɛlɛ-dan do la.)

¹⁷Bɛnyamɛ bɔnsɔn kɛlɛ-den-kunyɛ le Ilayada la, ado a kusan kɛlɛ kɛla kati! Kɛlɛ-dan mɔgɔ waga kɛmɛ fila (200,000) ye ale fanan kɔrɔ. Nɛgɛ-walan anubɛ kalabɛn bi anu bolo.

¹⁸Yɛhosabadi tugunnɛ wo la. Kɛlɛ-dan mɔgɔ waga kɛmɛ ani mɔgɔ waga bi-segin (180,000) bi ale bolo. Kɛlɛ-mirannu bi anu bolo duk!

¹⁹Kɛlɛ-den-kunyɛ le anu denu na Yerusalɛm soe burɔ. Wo kɔma, mansɛ ya kɛlɛ-dan donu nata Yuda soenu tɔ tarɛ mininɛ minnu ma.