Read Kuranko 2 Ko-Kɔrɔta-Karan 21 Bible Online

2 Ko-Kɔrɔta-Karan 21 - Kuranko bible

2 Ko-Kɔrɔta-Karan 21

¹Mansa Yɛhosafati ya so-sɛgi-kɛ tumɛ min, anu ya a togon Mansa Dawuda halala-luyi ma Yerusalɛm soe burɔ. Ala den Yɛhoram sigira a gbɛ rɔ.

²Mansa Yɛhosafatila den Yɛhoram wo dɔgɛ mɔgɔ wɔrɔ ye nyɔ nun. A dɔgɛ wonu tɔgɛ le kɛnu na, Asaraya wo, Yɛhiyɛli wo, Sakaraya wo, Asarayahu wo, Maikali wo, anubɛ Sɛfataya.

³Anu fa Mansa Yɛhosafati ye a kɛndɛ la wati min, a ya sɛnɛ anubɛ wodi-gbɛ anubɛ fen-koloma-siyaman di anu ma. A ya ala dan kɛnu ma so-tiginu na Yuda so-latankanɛnu tɔ. Yɛhoram min bi ala sarɛ la, a ya a ma, wo tora ale gbɛ rɔ mansayɛ la.

⁴Yɛhoram kɛ kunta Yuda nyamanɛ ma tumɛ min, a ya a dɔgɔ mɔgɔ wɔrɔ wonubɛ nyɔ-mɔgɔ-ba donu faga.

⁵Yɛhoram kɛ mara mansɛ la a sɔrɔn-san bi-sawa ani san fila nyɔgɛ le ma. San segin, a ye mansayɛ la ka bɔ Yerusalɛm soe burɔ.

⁶Isirɛla Mansa Ehabu min lakirayara, wola dunmusi le tora Mansa Yɛhoram ye Yuda nyamanɛ rɔ. Ale mansɛ kɛ ya a biran-kei sɔn-yogomɛ bi iko Isirɛla mansɛnu fanan bi nya min. A ya hakɛ kɛ Mari la

⁷ kɔnɔ hali wo, Mari ma sɔn Yuda nyamanɛ halakila a sɔn-yogomɛ wola ko la bawo Mari ara sarama-kan kiri Mansa Dawuda ye ko a kegeyɛnu si to mansayɛ la Yuda nyamanɛ kun na burubukai!

⁸ Yɛhoram bi mansayɛ la wati min, Idɔm nyamanita-mɔgɛnu murutiyara a ma ko anu bi tola anu nyɛrɛ ma le gbɛ, ado anu ya mansa-kurɛ sigi anu kuma.

⁹Mansa Yɛhoram ya ala kɛlɛ-dannu anubɛ ala kirindinu bi ka ta Idɔm kɛnu kɛlɛ tinɛ. Anu ke nyɔ, Idɔm kɛlɛ-dannu ya kurɔn don anu ma. Suyi rɔ, ale mansɛ anubɛ ala kɛlɛ-dannu ya anu taya ha anu ya fɛrɛ sɔrɔn ka anu yogenu masangba.

¹⁰Ka a bi wati wo ma ha a mɛra Idɔm nyamanɛ ye a nyɛrɛ ma le. Wati kelan wo le tɔ fanan, Libina so-burɔ-mɔgɛnu murutiyara a ma bawo Mansa Yɛhoram bara a kan-kɔ sɔ Mari la, a benbanuta Alla, kɔni.

¹¹Mansa Yɛhoram kɛ ya bɛsi-kɔ-tinɛnu nadan Yuda kɔnkɔ-nyamanɛ rɔ. A sɔra Yuda kɛnu anubɛ Yerusalɛm kɛnu yarɔ ka hakɛ kɛ Mari la.

¹²Nɛbi Ilaya ya kɛdi sɛbɛ ale Mansɛ Yɛhoram ma. Min sɛbɛnɛ kɛdi wo rɔ a ko, “I benba Mansa Dawudata Mari Alla ara a ban i la bawo i ma i fa Mansa Yɛhosafati sɔn bi fɔ i benba Mansa Esa.

¹³Kɔnɔ i ya Isirɛla mansɛnu sɔn bi ka sɔ Yerusalɛm kɛnu anubɛ Yuda kɛnu yarɔ telenbɛliyɛ rɔ Mari yala iko Mansɛ Ehabu ya a ma nya min Isirɛla nyamanɛ rɔ. I ya i dɔgɛnu faga nun, ado wonu tenbira i la.

¹⁴Ka a tɛgɛ i sɔn wola ko ma, Mari si ila mɔgɛnu tɔrɔ anubɛ ila dannu anubɛ ila musinu. A si i bolo-fan bɛɛ tinya pɔ!

¹⁵Wo si a ma, i si kiraya-dandanbɛlɛ sɔrɔn i nugi rɔ ha anu ni bɔ gbɛ rɔ.”

¹⁶Arabu minnu siginɛ Sudan nyamanɛ dafɛ, Mari ya wonubɛ Filisitinu natugu Mansa Yɔram kan ma.

¹⁷Wonu tara bui Yuda nyamanɛ ma. Anu ya fan bɛɛ kankan mansɛ wola bolɔn la hali ala dannu anubɛ ala musinu, anu ya wonu bira. Anu tara wonu na pon fɔ ala den naban min tɔgɛ Ehasaya, wo le kelen pe tora.

¹⁸Kɛ bɛɛ rɔ, Mari ya a ma, ale mansɛ ya kiraya-yogomɛ do sɔrɔn a nugi rɔ.

¹⁹San fila kɔrɔ dɛgɛdɛgɛ, kirayɛ wo ye tagbayala a ma. Tɔ-a-la, a nugi bɔra gbɛ rɔ. A fagara duma-wɛ rɔ. Hali berenni-tɛ, anu ma wo ladɛn a saya-koe rɔ iko anu ya a ma a benbanutɛ rɔ nya min nun.

²⁰Mansa Yɛhoram kɛ mara mansɛ la a sɔrɔn-san bi-sawa ani san fila nyɔgɛ le ma. San segin, a ye mansayɛ la ka bɔ Yerusalɛm soe burɔ. A fagara tumɛ min, mɔgɔ-wo-mɔgɔ ma di. Anu ya a togon Mansa Dawuda halala-luyi ma kɔnɔ anu ma a sa mansɛ doinu dafɛ.