Read Kuranko 2 Ko-Kɔrɔta-Karan 23 Bible Online

2 Ko-Kɔrɔta-Karan 23 - Kuranko bible

2 Ko-Kɔrɔta-Karan 23

¹San wɔrɔ tenbinɛ, Saraka-Masɔla Yɛhoyada ya a latɛgɛ ko a wati ara ke ka koe do ladan. A ya a ma, anubɛ kɛlɛ-den-kun mɔgɔ loli kunta kan kelen ma. Kɛlɛ-den-kunyɛ wonu tɔgɛ le kɛnu na, Yɛrohamna den Asaraya wo, Yihohenanla den Sumanyila wo, Obɛdila den Asaraya wo, Adayala den Meyaseya wo, anubɛ Sikirila den Ilaisefati.

²Anu ya Yuda nyamanɛ ratagama ka Isirɛla bɔnsɔn kebila-kun-tiginu anubɛ Lifayi bɔnsɔn-mɔgɛnu kele alako anu ni na Yerusalɛm soe burɔ.

³ Anu dama ke Yerusalɛm soe burɔ, anu tara ladɛn kɛ Bato-Bɔn burɔ. Mɔgɔ-ba wonubɛ mansɛla den Yohasi ya sarama-kan kiri anu nyɔgɔn tɛma. Yɛhoyada wo ya a fɔ mɔgɔ-ba wonu ye ko, “Mala mansɛ min tenbira, wo ma ala dan yen? Iko Mari ara Mansa Dawuda yili-madiya nya min nun ko a bɔnsɔn si to mala mansɛ la mala nyamanɛ kɛ rɔ, nba, dennɛ kɛ si ma mala mansɛ la.

⁴Nba, ma si min ma wona, n ni wo fɔ wo ye. Saraka-masɔlɛnu anubɛ Lifayi wonu ba ta anuna wɔli-kɛ-tinɛ Sulen-Tele ma, anu ni anu tatala kurun sawa la. Kurun kelan si Bato-Bɔn don-dɛ makandan.

⁵Kurun doi si to mansɛla bolɔn makandanna. A to kurun kelan si to tarɛ-don-dɛ la min tɔgɛ ‘Kurukɛ.’ Lifayi bɔnsɔn ma mɔgɛ minnu na, wonu na si dɛn Bato-Bon-kata burɔ.

⁶Mɔgɔ-wo-mɔgɔ kana don Bato-Bɔn nyɛrɛ burɔ fɔ saraka-masɔlɛnu nyɛrɛ-nyɛrɛ minnu bi anuna saraka-masɔ-wɔlɛ kɛla nyɔ rɔ. Wonu denu dɔrɔn si don a burɔ bawo mɔgɔ-dantɛgɛnɛ le wonu na. Kɔnɔ a mɔgɛ toenu, fɔ wo ni to luyi ma ka Marita kumɛ to a gbɛ rɔ.

⁷Lifayi mɔgɛ kɛnu si anuna faannu bira anu bole tɔ ka mansa-kurɛ kɛ lafoo. Mansɛ kɛ tenbi tala kan-bo-kan, anu ni to bilani a fɛ. Ni wo ya mɔgɔ-gbɛrɛ yen a kunyɛ ladonna Bato-Bɔn kɛ la, wo ni wo faga.”

⁸Lifayi bɔnsɔn-mɔgɛnu anubɛ Yuda nyamanita-mɔgɛnu ya Saraka-Masɔla Yɛhoyadala kumɛ bira anu bolo filɛ la. Ni mɔgɛ minnu ya anuna wɔlɛ boloka wo, anubɛ minnu bi wɔlɛ dabirala wo, wonu damasi ye kɛlɛ-den-kunyɛnuna sarati kɔrɔ.

⁹Mansa Dawudala tanbɛnu anubɛ nɛgɛ-walan minnu namaranɛ Bato-Bɔn wo la nun, Saraka-Masɔla Yɛhoyada ya wonu bi ka wonu don Lifayi mɔgɔ-banu bolo.

¹⁰Saraka-masɔlɛ ya Lifayi bɔnsɔn-mɔgɛnu sɔ-bole rabɛn Bato-Bɔn dandan kɔrɔ. Anu sɔnɛ bɔla kantɔ-wara la ha dugula wara la. Faannu biranɛ wonu bolo la alako ka mansa-kurɛ wo makandan.

¹¹A ban kɛ mumɛ bɛɛsi rabɛnna, Saraka-Masɔla Yɛhoyada tara mansa kurɛ kɛ bi ka a labɔ Bato-Bɔn luyi ma. A ya mansaya-fulɛ sigi Yohasi kunyɛ la. Tɔn minnu namaranɛ, a ya wonu don a bolo. Mansaya-tɔn minnu namaranɛ, a ya wonu don a bolo fanan. Saraka-Masɔla Yɛhoyada anubɛ ala dannu ya dantɛgɛ-tuli kɛ mansa-kurɛ wo salɛ rɔ ka a ma mansɛ la. Mɔgɛnu ya a lasɔnkɔ ka a fɔ ko, “Alamɛ mala mansɛ mɛra ma kuma!”

¹²Musu-mansa Atalaya ya mɔgɛnu sɔnkɔ-kan lamɔɛn tumɛ min, a burimatoe tara anu magbenna Bato-Bɔn la nyɔ.

¹³A ke nyɔ, a ya mansa kurɛ sɔnɛ taran Bato-Bɔn don-dɛ la sɛnbɛrɛn-kɔn dafɛ mansɛnu duruta sɔla kan min. Mansa-kurɛ kɛ lafoonɛ kɛlɛ-den-kunyɛnu na anubɛ buru-fɛlɛnu. Anu damasi ye a lawɔyɔla sewɛ bolo. Anu bi burinu fanan fɛla. Bato-Bɔn fɔli-fannu kɛnɛ a rɔ fɔli-kɛlɛnu bolo. Ale Atalaya ya wo rayen min kɛ, a ya ala duruki rafarafara yisi-tinya bolo. A ya a kuli mayɛlɛ ka a fɔ ko, “Wo ye n nabu-koe le tɔ kɛ la. Wo ara bɔ n kɔrɔ.”

¹⁴Bawo a ma di Saraka-Masɔla Yɛhoyada ye ko anu ni Atalaya faga Bato-Bɔn dafɛ nyɔ, woletɔ a ya a fɔ kɛlɛ-den-kunyɛnu ye ko, “Wo ni a bi ka a labɔ. A ni ta kɛlɛ-den-kunyɛnu tɛma. Ni mɔgɔ-wo-mɔgɔ ya a fɔ ko a ye a lakisila, wo ni wo tigi faga.”

¹⁵Anu ya ale musi bira ka ta a la mansɛla tenbi-bolɔn wara la. Anu ya a faga kata-don-dɛ la soeenu si don kan min.

¹⁶Saraka-Masɔla Yɛhoyada ya a ma, mansa-kurɛ wonubɛ ala mɔgɛnu ya sarama-kan kiri Mari ye ko anu ti bɔ Mari fɛ muk!

¹⁷Mɔgɛ wo damasi wulita ka ta Beyali kɔ tinɛ tinya. Anu ya saraka-bɔ-tinɛnu tinya. Anu ya bɛsɛ wonu tinya. Anu ya bɔn wo fanan tinya. Wo kɔma, anuna bɛsi-kɔlɛ min tɔgɛ Matan, anu ya wo fanan faga bɛsi-kɔ-tinɛ yarɔ nyɔ.

¹⁸Saraka-Masɔla Yɛhoyada ya a ma, Lifayi bɔnsɔn-mɔgɛnu anubɛ saraka-masɔlɛnu tora Mari Bato-Bon-wɔlɛ kun na. Wonu tora wɔlila Bato-Bɔn burɔ iko Mansa Dawuda ara wɔlɛ tala anu na nya min nun. Anu tora sarakɛnu mintanna Mari ye iko Nɛbi Musa ya Marita tɔnnu fɔ anu ye nya min nun. Anu bi sigi-sɛ anubɛ ladɛn kun na fanan.

¹⁹Saraka-Masɔla Yɛhoyada ya da-makandannɛ donu to Mari Bato-Bɔn makandan tinɛ nyɔ alako mɔgɔ-sɛninyabɛlɛnu kana anu kunyɛ ladon Bato-Bɔn la.

²⁰Saraka-Masɔla Yɛhoyada wo, kɛlɛ-den-kunyɛnu wo, mɔgɔ-ba-sɛbɛnɛnu wo, a mɔgɔ-ba-toenu wo, anubɛ a mɔgɛ toenu kofura anu ma ka bɔ Mari Bato-Bɔn la ka ta mansa-kurɛ wo to tinɛ ala bolɔn la. Anu donta don-da-wɛ la. Mansa Yohasi sigira mansaya-waganɛ rɔ.

²¹Mɔgɛ bɛɛ sewara. Kɔnɔ soe tora yisi-kimɛ rɔ bawo anu bara Atalaya faga.