Read Kuranko 2 Ko-Kɔrɔta-Karan 24 Bible Online

2 Ko-Kɔrɔta-Karan 24 - Kuranko bible

2 Ko-Kɔrɔta-Karan 24

¹Anu ya Yohasi ma mansɛ la Yuda nyamanɛ rɔ a sɔrɔn-san wɔrɔnfila nyɔgɛ le ma. San bi-nani a ye mansayɛ la ka bɔ Yerusalɛm soe burɔ. Mansa Yohasi na tɔgɛ le Sibeya ka bɔ Biri-Siba soe burɔ.

²Fananta Saraka-Masɔla Yɛhoyada ye a kɛndɛ la, Mansa Yohasi ya koe min bɛɛsi ma ala mansayɛ kɔrɔ, wonu ya Mari hɛnɛ.

³Saraka-masɔlɛ ya musu fila nyini ale mansɛ ye. Wonu ya den-keinu anubɛ dunmusinu sɔrɔn a ye.

⁴Yohasila mansayɛ mɛnɛ doni, a ya Bato-Bɔn mabɛn-koe latɛgɛ.

⁵A ya a fɔ saraka-masɔlɛnu anubɛ Lifayi bɔnsɔn-mɔgɛnu ye ko anu ni ta gbɛsɛ-gbɛsɛ makele Yuda nyamanɛ soe bɛɛ rɔ alako anu ni Bato-Bɔn mabɛn iko anu duruta a mala nya min san-bo-san. Ale mansɛ ya a fɔ anu ye ko anu ni anu natiriya gbɛsɛ-gbɛsɛ wo kundɛnna kɔnɔ anu ya anu kun kimaya.

⁶ Woletɔ a ya anuna kun-tigi Saraka-Masɔla Yɛhoyada kele. A ya wo manyinika, a ko, “Nfenna i ma Lifayinu manyinika ni anu bara gbɛsɛ-gbɛsɛ makele Yerusalɛm soe anubɛ soe doinu tɔ Yuda nyamanɛ kɛ rɔ iko Marita wɔli-kɛlɛ Nɛbi Musa ya a ma nya min nun fɔlɔ Marita Fani-Bɔn mabɛn-koe rɔ?”

⁷(Minnu bilanɛ Atalaya sɔn-yogomɛ fɛ, wonu bara Bato-Bon-dɛ keri nun. Miran minnu bi nyɔ nun Alla Bato-koe la, anu ya wo siyaman bi ka anu ma anuna bɛsi Beyali kɔ-fan la.)

⁸Ale Mansa Yohasi ya a fɔ Lifayinu ye tun ko anu ni wodi-lamara-kenkirɛ bi ka wo sigi Bato-Bɔn don-dɛ dafɛ luyi ma.

⁹Anu ya kilayɛnu tanyɛnsɛn Yerusalɛm soe anubɛ soe bɛɛ rɔ Yuda nyamanɛ rɔ ko bɛɛ ni na ata gbɛsɛ-gbɛsɛ la Mari ye iko Allata wɔli-kɛlɛ Nɛbi Musa ya a fɔ nya min wulɛ rɔ nun fɔlɔ.

¹⁰Ala sarakanɛ wo ya a diya don kun-tiginu anubɛ anuna mɔgɛnu tɔ. Anu nara gbɛsɛ-gbɛsɛ wonu na ha kenkirɛ wo lafara.

¹¹Lifayi mɔgɛ minnu bi kenkirɛ wo makandanna, tele-wo-tele, wonu si ta kenkirɛ wo la anuna kun-tigi wara. Kun-tigi wo wa kenkirɛ wo lafanɛ taran wodi la tumɛ min, a si mansɛla kɛdi-sɛbɛlɛ anubɛ saraka-masɔla-wɛ wola gbarɔ-sɔlɛ do kele ka ta kenkirɛ wo raka anu yala ka ta a sigi a gbɛ rɔ tun. Anu ya wodi-siyaman kundɛn wo nya le.

¹²Mansɛ anubɛ Saraka-Masɔla Yɛhoyada si wodi wo bi ka a don wɔli-kunyɛnu bolo minnu ya Bato-Bɔn wo rabɛn. Wonu si kuru-lɛsɛlɛnu anubɛ fɛrɛn-tiilɛnu anubɛ nunakɛnu sara minnu bi Bato-Bon-wɔlɛ wo kɛla.

¹³Wɔli-kɛlɛ wonu wɔlita kosɛbɛ! Anu ya Bato-Bɔn wo mabɛn a kilɛ fɛ iko a ye nya min nun fɔlɔ.

¹⁴Anu ban Bato-Bɔn wo mabɛnna, sɛnɛ anubɛ wodi-gbɛ-toe minnu tora, anu ya wonu don Mansa Yohasi anubɛ Saraka-Masɔla Yɛhoyada bolo. Anu ya wonu bi ka anu ma Bato-Bon-miran-nadan-fan la. Saraka-Masɔla Yɛhoyadala wati kɔrɔ, anu tora sarakɛnu bɔla a kilɛ fɛ tolon!

¹⁵A siyi ke san kɛmɛ ani san bi-sawɛ rɔ, a ya so-sɛgi-kɛ.

¹⁶Anu ya a togon mansɛnu fɛ Mansa Dawuda halala-luyi ma Yerusalɛm soe burɔ ka a tɛgɛ ala ko-nyimɛ ma a ya min ma Isirɛla mɔgɛnu ye anubɛ Alla anubɛ Bato-Bɔn wara-koe rɔ.

¹⁷Saraka-Masɔla Yɛhoyada faganɛ, Yuda mɔgɔ-banu nara Mansa Yohasi wara. Anu ya a manugu-nɛgɛ-kumɛnu fɔ a ye alako anu miriyanu ni bɔ.

¹⁸Mɔgɛnu ya anu ban anu benbanuta Mari Alla bato-koe ma Bato-Bɔn wo la. Anu donta bɛsi-kɔ-koe rɔ anubɛ bɛsɛ min nadannɛ musila muninyɛ la anu bi min kelela Asura. Ka a tɛgɛ anu sɔn-yogomɛ wola ko ma, Alla fonde bɔra Yerusalɛm so-burɔ-mɔgɛnu anubɛ Yuda nyamanita-mɔgɛnu kuma.

¹⁹Mari ya nɛbi donu nata anu makawandi tinɛ alako anu ni sɛgi ale Mari ma. Kɔnɔ mɔgɛnu ya anu tole gberen.

²⁰Wo kɔma, Allata sɛnbɛ yigira Saraka-Masɔla Yɛhoyadala den Sakaraya ma. A sɔra gbɛ rɔ mɔgɛnu si a yen kan min. A ya a kuli mayɛlɛ ko, “Mari Alla ye nyinikalɛ sala ko nfenna wo ye ata tɔnnu tinyana ka kasarɛ lana wo nyɛrɛ kuma. Wo ara wo kan-kɔ sɔ ale la, woletɔ ale fanan ara a kan-kɔ sɔ wole la.”

²¹ Woletɔ mansɛ anubɛ ala mɔgɔ-banu ya yanfɛ don ale Sakaraya ma. Mɔgɛnu ya Sakaraya mabon Bato-Bon-kata burɔ iko Mansa Yohasi ya a fɔ anu ye nya min.

²²Hali ka a miri Sakaraya fa Saraka-Masɔla Yɛhoyadala wɔli-nyimɛ ma, a ya min ma a ye, a ma wo ma. Sakaraya ye fagala tumɛ min, a ya a dɛ sa-a-rɔ, a ko, “Wo ye minnu mala n na kɛ la, alamɛ Mari ya wo yen. A ni wole fanan tɔrɔ.”

²³San-kurɛ nɛ, Siriyanu tara bui Yerusalɛm soe anubɛ soe doinu ma Yuda nyamanɛ rɔ. Anu ya kun-tigi bɛɛ faga ka fen-siyamɛ bi ka ta anu na Damasika soe burɔ.

²⁴Hali Siriyanu ma siya, Mari sɔnta ko anu ni Yuda kɛlɛ-den-siyamɛnu nɔ bawo anu bara anu kan-kɔ sɔ anu benbanuta Mari Alla la. Mari ya Mansa Yohasi tɔrɔ nya min, wo le kɛ la.

²⁵A tanban boloko-yogomɛ-kɛra kɛlɛ rɔ. Anu yoge wonu bi sɛgila tumɛ min, ala mɔgɔ-ba fila ya yanfɛ don Mansa Yohasi ma. Anu ya a faga ala sa-fan rɔ. Anu ya Yɛhoyadala den Saraka-Masɔla Sakaraya tayili sara a la. Anu ya a togon Mansa Dawuda halala-luyi ma kɔnɔ mansɛ doinu dafɛ ma de!

²⁶Mɔgɔ filɛ minnu ya yanfɛ don a ma, wonu tɔgɛ le kɛnu na, Sebadi anubɛ Yɛhosabadi. Sebadi wo na tɔgɛ le Simɛyati. Amon kɛ le wo la. Yɛhosabadi wo na tɔgɛ le Semereti. Mohabu kɛ le wo la.

²⁷Mansa Yohasila den-keinu bara-koe wo, anubɛ nɛbi minnu bara wɔlɔyiya-kumɛ fɔ a kan ma, wonu bara-koe wo, anubɛ a ya Bato-Bɔn rabɛn nya min, wo wara-koe wo, anu ya wo damasi sɛbɛ mansɛnuna buku-wɛ rɔ. Ala den Hamasa sigira a gbɛ rɔ.