Read Kuranko 2 Ko-Kɔrɔta-Karan 26 Bible Online

2 Ko-Kɔrɔta-Karan 26 - Kuranko bible

2 Ko-Kɔrɔta-Karan 26

¹Hamasala den Yusaya sɔrɔn-san tan-ni-wɔrɛ ma, Yuda nyamanita-mɔgɛ bɛɛsi ya ale ma anuna mansɛ la a fa gbɛ rɔ.

²(Mansa Yusaya kɛ fala sayɛ kɔma, a ya Ilati soe bi anu yogenu bolo tun ka a sɔ-kurɛ-kɛ.)

³Yusaya ya mansayɛ sɔrɔn a sɔrɔn-san tan-ni-wɔrɔ nyɔgɛ le ma. San bi-loli ani san fila, a ye mansayɛ la ka bɔ Yerusalɛm soe burɔ. A na tɔgɛ le Yɛkolaya. Yerusalɛm kɛ le wo la.

⁴Mansa Yusaya ya a fa Mansa Hamasa sɔn bi ka Mari hɛnɛ.

⁵Sakaraya min ya Mansa Yusaya labila Mari wara-koe la, wo ye a niyi la tumɛ min, mansɛ ya Alla hɛnɛ, ado Allata duwɛ tora a kuma.

⁶Ale Mansa Yusaya tara Filisitinu kɛlɛ ka anuna so-sawa-tarɛnu keri, Kati wo, Yabini wo, anubɛ Asadadi. Wo kɔma fanan, a ya so-siyaman sɔ ka tarɛ mini wonu ma Asadadi so-kɔrɛ dafɛ anubɛ Filisiti nyamanɛ kan tinɛ donu tɔ.

⁷Filisitinu wo, Arabu minnu siginɛ Kuru-Beyali wo, anubɛ Mɛhunnu wo, Alla ya ale Mansa Yusaya dɛnbɛ ka wonu nɔ.

⁸Amonnu tora duti dila ale Mansa Yusaya ma. Ala mansayɛ ya sɛnbɛ sɔrɔn tumɛ min, a mankan kera fɔɔ Iyipiti nyamanɛ ma.

⁹Ale Mansa Yusaya ya Yerusalɛm soe tarɛ sɔ fanka rɔ ka tenbi a fɔlɔtɛ la. A ya bondɔn-nayan-bɛ donu sɔ. A ya kelan sɔ Tonke Don-Dɛ la. A tara kelan sɔ don-dɛ la fanan min bi lɛɛ telen tɔ. A tara kelan sɔ tarɛ radura kan min.

¹⁰Wo kɔma, a ya nyamanɛ-kumafɛlɛn-bɛndɛ-layan-bɛ donu sɔ wulɛ rɔ. A ya kɔlon-siyaman sin kɔnkɛ kɔrɔ anubɛ lɛɛnu tɔ bawo kolo-fen-siyaman bi a bolo nyɔ rɔ. Sɛni-sɛ di a ye min kɛ, a ya mɔgɔ-siyaman lata ala sɛnɛnu tɔ minnu si sɛnɛnu wɔrɔ ka ki-fannu ki a ye.

¹¹Tuma-wo-tuma, anubɛ ala kɛlɛ-den-siyamɛnu tabɛnnɛ kɛlɛ-kɛ-koe la fasai! Ala kɛdi-sɛbɛla Yeyiyɛli anubɛ Meyaseya, wonu bi wɔlila Hananaya kɔrɔ, ale mansɛla mɔgɔ-ba do, kɔni. Koe minnu sɛbɛnɛ kɛlɛ-dannu wara-koe rɔ, kɛnu denu ya wonu namara.

¹²Kɛlɛ-den-kun-tigi minnu bi anu kun na, wonu yatɛ bɛnnɛ mɔgɔ waga fila mɔgɔ kɛmɛ wɔrɔ (2,600) ma.

¹³Kɛlɛ-dan minnu bi kun-tigi kɛnu kɔrɔ, wonu yatɛ bɛnnɛ mɔgɔ waga kɛmɛ sawa mɔgɔ waga wɔrɔnfila ani mɔgɔ kɛmɛ loli (307,500) ma. Wonu kusan anu yogenu kɛlɛla Mansa Yusaya ye.

¹⁴Mansa Yusaya ya nɛgɛ-walannu, tanbɛnu, nɛgɛ-fulɛ, nɛgɛ-duruki, kalabɛn anubɛ lenfiran-kurinu don ala kɛlɛ-dannu bolo.

¹⁵Ala siyaki minnu kɛwu, wonu ya kɛlɛ-kɛ-fen-kurɛ donu nadan anu si to kuru-wɛnu nafilila min na. Wo kɔma, anu ya donu nadan fanan anu si kalabɛnnu nakɛ min na wula-yan-bɛ la. Anu si wonu sɔ tarɛ-tonkenu tɔ anubɛ nyamanɛ-kumafɛlɛn-bɛndɛ-layan-bɛnu tɔ. Ka a tɛgɛ ata sɛnbɛla ko ma Alla ya min di a ma, ale Mansa Yusaya tɔgɛ tara pon!

¹⁶Mansa Yusaya ya sɛnbɛ sɔrɔn mansayɛ rɔ wati min, a wasira. Wo le ya a bɔ mansayɛ la. Bawo a ma bɛn, ale nyɛrɛ ni ta ata Mari Alla Bato-Bɔn la ka isɛnti mintan nyɔ kɔnɔ ale le bilara Mari la wola ko la.

¹⁷Saraka-Masɔla Asaraya anubɛ saraka-masɔla mɔgɔ bi-segin minnu kerinte, wonu bilara Mansa Yusaya fɛ Bato-Bɔn la.

¹⁸ Anu ya a fɔ a ye ko, “Mansɛ, a ma bɛn, ile ni saraka-wo-saraka mintan yan tɔ Mari ye. Fɔ Aruna kegeyɛnu yɛ! Wonu denu dantɛgɛnɛ wɔlɛ wola ko la. Bɔ kan-tina-sɛnimɛ kɛ rɔ. I wara bila Mari Alla la, ado ala duwa sa i fɛ tun.”

¹⁹Mansa Yusaya sɔnɛ isɛnti mintan tinɛ dafɛ Bato-Bɔn burɔ. Ta-kɔ-miran ye a bolo tɔ. A wuli diminyala saraka-masɔlɛ kɛnu ma, fɛrɛma-kiraya-yogomɛ do bɔra a telɛ ma nyɔ rɔ.

²⁰Saraka-masɔlɛ wonu ya kirayɛ wo yen a telɛ ma min kɛ, anu kumakɔra kilan bolo. Anu ya a labɔ Bato-Bɔn la tiriya! Ale fanan ya a latiriya bɔla bawo a ara a lɔn ko Mari ara a tɔrɔya.

²¹Ka a tɛgɛ ala kirayɛ wo ma, a ma sɛninya a siyi-toe kɔrɔ tun iko tɔn ya a fɔ nya min. A tora sigini bɔn la yiri! A ya ala den Yotam ma ala bolɔn anubɛ ala nyamani-kumafɛlɛnnɛ la, ado a ma ke tala Bato-Bɔn la tun.

²²Ale Mansa Yusaya ya koe min bɛɛsi ma ala mansayɛ kɔrɔ, Emɔsila den Nɛbi Aiseya ya wo bɛɛsi sɛbɛ.

²³ Mansɛ fagara tumɛ min, ka a tɛgɛ ala kiraya-yogomɛ wo ma, anu ma a basan mansa-kɔrɛnu na fɔ mansɛnuna dugi rɔ nyɔ dafɛ. Ala den Yotam sigira a gbɛ rɔ.