Read Kuranko 2 Ko-Kɔrɔta-Karan 30 Bible Online

2 Ko-Kɔrɔta-Karan 30 - Kuranko bible

2 Ko-Kɔrɔta-Karan 30

¹ Isirɛla mɔgɛnu ma ke Kanan-Ko-Ladiyɛ kɛla a wati-latɛgɛnɛ rɔ san wo karɛ fɔlɛ ma bawo saraka-masɔlɛ minnu sɛninyanɛ, wonu ma siya wo wati rɔ, ado mɔgɔ-siyaman ma na wɛ Yerusalɛm soe burɔ wo tumɛ. Mansɛ anubɛ ala mɔgɔ-banu anubɛ Yerusalɛm kɛnu sɔnta ka saraka-bɔɛ wo to san wo karɛ fila nyɔgɛ la. Mansɛ ya kilayɛnu tanyɛnsɛn Isirɛla anubɛ Yuda nyamanɛ bɛɛ rɔ. A ya kɛdi sɛbɛ Isirɛla nyamanita-mɔgɛ bɛɛ ma katarala Ifɛrɛm anubɛ Manasa bɔnsɔn-mɔgɛnu ma alako ka anu kele ladɛn wo kuma. Anu bi ladɛn wo kɛla alako ka anuta Mari Alla gbiliya.

⁴Anu ya a yen min kɛ ko koe bɛɛ ye tala a kilɛ fɛ iko anu miriya ye a ma nya min,

⁵anu ya Isirɛla mɔgɛ bɛɛ kele tɛrr, ka a bi Dan soe ma kantɔ-wara la, ha Biri-Siba soe ma dugula wara la. A sɔgɛ ye anu na, anu ni Kanan-Ko-Ladiyɛ kɛ min nyɔgɔn ma ma wɛ fɔlɔn.

⁶Kilayɛ wonu tara Yuda nyamanɛ anubɛ Yerusalɛm soe rɔ iko mansɛ anubɛ ala mɔgɔ-banu ya a fɔ nya min. Min sɛbɛnɛ kɛdi wo rɔ, a ko, “Wole Isirɛla mɔgɛ toe minnu tora wo niyi la Asiriyanuna kɛlɛ rɔ, wo ni wo ya-lamunun ma benbanu Iburayima anubɛ Isiyaka anubɛ Yakobata Mari Alla la. Ni wo ya wo ma, ale fanan si a ya-lamunun wo la.

⁷Wo kana ma iko wo benbanu anubɛ wo ta-nyɔgɛ Isirɛla mɔgɛ minnu ma anu telen anuta Mari Alla ye. Wo ya a yen, a ya anu tɔrɔ boloko-yogomɛ-kɛ nya min.

⁸Wo kana wo tole gbere iko anu denu. Wo ni Marita kumɛ bira. Wo na Marita Bon-sɛnimɛ la Yerusalɛm soe burɔ, wota Mari Alla ara min ma kan-tina-sɛnimɛ la, kɔni. Wo ni to Mari batola, woletɔ a ti to diminyala wo ma.

⁹Ni wo sɛgira Mari ma, kɛlɛ tara wo na-kelen-nyɔgɛ minnu na, anu si kinikini anu ma ka anu nasɛgi wo ma. Mari Alla fanɛ ko-nyimɛ anubɛ kinikinɛ la. Ni wo nara a ma, a si sɔn wo la ka wo bira tun.”

¹⁰Kilayɛ wonu tara Manasa anubɛ Ifɛrɛm bɔnsɔn-mɔgɛnu bara soe bɛɛ rɔ. Anu tara pon fɔɔ Sɛbulɔn bɔnsɔn-mɔgɛnuna soenu tɔ kantɔ-wara la kɔnɔ mɔgɛnu yɛlɛnta kilayɛ wonu ma ka anu nafɛya.

¹¹Kɔnɔ hali wo, Asɛra bɔnsɔn-mɔgɛ donu wo, Manasa bɔnsɔn-mɔgɛ donu wo, anubɛ Sɛbulɔn bɔnsɔn-mɔgɔ donu sɔnta ta-koe ma Yerusalɛm.

¹²Kɔnɔ hali wo, Alla ye wɔlila Yuda bɔnsɔn-mɔgɛnu yisi rɔ alako anu ni to kan kelen tɔ ka mansɛ anubɛ ala mɔgɔ-banu kan to a gbɛ rɔ.

¹³A karɛ fila nyɔgɔn ma, mɔgɔ-siyaman nadɛnta Yerusalɛm alako ka Biredi-Yɛlɛbɛlɛ-Dɔn-Ladɛn kɛ.

¹⁴Mɔgɛnu bi sarakɛ anubɛ isɛnti mintanna bɛsɛnu ye saraka-mintan-tinɛ min kuma nun Yerusalɛm soe burɔ, anu ya saraka-mintan-tinɛ wo damasi lafili Kidirɔn lɛɛ rɔ.

¹⁵Karɛ wo tele tan-ni-nani nyɔgɛ ma, anu ya saga-dannu faga Kanan-Ko-Ladiyɛ sarakayɛ la. Kɛ wati ya a taran, Lifayi bɔnsɔn-mɔgɛ anubɛ saraka-masɔlɛ minnu sɛninyani ma, wonu miliyara[14] furr, ha anu ya anu nyɛrɛ dantɛgɛ Mari ma tun iko tɔn ya a fɔ nya min. Wo kɔma, anu nara to mala saraka-masɔla-bɛrɛnu na.

¹⁶Anu ya anuna sɔ tinɛnu bi saraka-masɔ-wɔlɛ rɔ iko Allata mɔgɛ Nɛbi Musa ya anu nabila nya min. Lifayinu ya saraka wonu yele don saraka-masɔlɛnu bolo alako anu ni yele wo purupuru saraka-mintan-tinɛ ma.

¹⁷Kɔnɔ mɔgɔ-siyaman ma ke Kanan-Koe saga-dan kɛnu fagala bawo mɔgɛ wonu sɛninyani ma. Wo le ya a ma, Lifayinu ya saga-dan wonu faga anu ye ka saga-dan wonu dantɛgɛ Mari ma.

¹⁸Min sanɛ wo kuma, minnu nara ka bɔ Ifɛrɛm anubɛ Manasa anubɛ Isakari anubɛ Sɛbulɔn bɔnsɔnnu tɔ, wonu mɔgɔ-siyaman ma anu nyɛrɛ sɛninya iko tɔn ya a fɔ nya min. Anu ma Kanan-Ko-Ladiyɛ kɛ a kilɛ fɛ! Wo le ya a ma, Mansa Hɛsakaya ya matarali kɛ anu ye, a ko,

¹⁹“E, ma benbanuta Mari Alla, ila mɔgɛ minnu sɛninyani ma kɔnɔ anu bi i batola anu yisi bɛɛ la, ka a tɛgɛ ita ko-nyimɛ ma, i yandi, anu makoto.”

²⁰Mari ya Mansa Hɛsakayata matarali-kan wo lamɔɛn. Mari ma ko-wo-ko ma mɔgɛ wonu na. A ya anu to nyɔ.

²¹Tele wɔrɔnfila dɛgɛdɛgɛ, mɔgɛ minnu nadɛnta Yerusalɛm soe burɔ, wonu ya Biredi-Yɛlɛbɛlɛ-Dɔn-Ladɛn kɛ sewɛ la. Tele-wo-tele, Lifayinu anubɛ saraka-masɔlɛnu ya Mari tanto anu sɛbɛ-kuna-wɛ la.

²²Mansa Hɛsakaya ya Lifayinu matɔgɔ ka a tɛgɛ anu ya Mari bato nya min ka ladɛn kɛ a kilɛ fɛ. Tele wɔrɔnfila dɛgɛdɛgɛ, Isirɛla mɔgɛnu bi sarakɛnu bɔla anuta Mari Alla ye. Wo kanɛ a la,

²³anu damasi ya a latɛgɛ ko anu ni a nyɔgɔ tele wɔrɔnfila sa ladɛn wo kuma. Anu sewara kosɛbɛ!

²⁴Mansa Hɛsakaya ya tura waga kelen (1,000) anubɛ saga waga wɔrɔnfila (7,000) labɔ ala nyamanita-mɔgɛnu ye. Ala mɔgɔ-banu ya tura waga kelen (1,000) anubɛ saga waga tan (10,000) sa mansatɛ wo kuma. Saraka-masɔla-wa-siyaman ya anu nyɛrɛ sɛninya iko tɔn ya a fɔ nya min.

²⁵Yuda nyamanita-mɔgɛnu wo, saraka-masɔlɛnu wo, Lifayinu wo, Isirɛla nyamanita-mɔgɛ minnu bɔra kantɔ-wara la wo, anubɛ sundan minnu siginɛ Isirɛla mɔgɛnu tɛma anubɛ Yuda mɔgɛnu tɛma, wonu damasi sewara ladɛn wola ko la.

²⁶Yerusalɛm soe lafara sewɛ la bawo ka a bi Mansa Silamɛnita wati ma ha ka a sigi kaka la, kɛ-nyɔgɔn-ladɛn ma kɛ wɛ.

²⁷Saraka-masɔlɛnu anubɛ Lifayinu duwara mɔgɛnu ye Mari tɔgɛ rɔ. Anuna matarali-kan wo kera Mari ma a warɛ Arinyɛni tɔ.