Read Kuranko 2 Ko-Kɔrɔta-Karan 35 Bible Online

2 Ko-Kɔrɔta-Karan 35 - Kuranko bible

2 Ko-Kɔrɔta-Karan 35

¹Mansa Yosaya ya Kanan-Ko-Ladiyɛ kɛ Yerusalɛm soe burɔ alako ka Mari gbiliya. Karɛ fɔlɛ, a tele tan-ni-nani ma, anu ya saga-dannu faga Kanan-Ko-Ladiyɛla ko la.

²Ale Mansa Yosaya ya wɔlɛ tala saraka-masɔlɛnu na iko a bɛnta, anu ni wɔli nya min. A ya anu manugu-nɛgɛ alako anu ni anu sɛbɛ don wɔlɛ wonu ma.

³Lifayi mɔgɛ minnu dantɛgɛnɛ Mari ma nun Isirɛla mɔgɛnu karan-koe la, a ya a fɔ wonu ye ko, “Mansa Dawudala den Mansa Silamɛni ya tɔn-kenkirɛ min nadan nun, wo ni wo bi ka a ladon Mari Bato-Bɔn burɔ. Wo kana to tala a la kan-tina-gbɛrɛkɛnu tɔ. Wo leta wɔli ma fenfen na fɔ ka wɔli wota Mari Alla anubɛ ata Isirɛla mɔgɛnu ye.

⁴ Bɛɛ ni ta ata sɔ tinɛ bi iko Mansa Dawuda anubɛ Mansa Silamɛni ya a tala nya min Lifayinu tɛma.

⁵Wo ni a rabɛn wo nyɔgɔn tɛma alako wole saraka-masɔlɛ donu si ke denbaya-tigi kelen-kelennamɛ-bɛɛ dɛnbɛna nya min.

⁶Wo ni saga-dannubɛ baanu faga Kanan-Ko-Ladiyɛ kuma. Wo ni wo nyɛrɛ sɛninya iko tɔn ya a fɔ nya min. Wo ni sarakɛ wonu bɔ a nya ma alako wo ta-nyɔgɛ Isirɛla mɔgɛnu ni kumɛ bira iko Mari ya a fɔ Musa ye nya min.”

⁷Ka a tɛgɛ Kanan-Ko-Ladiyɛ kɛ ma, ale mansɛ ya saga-dan anubɛ baa-dan minnu bɔ, wo bɛnta waga bi-sawa (30,000) ma. Wo kɔma, a ya tura waga sawa (3,000) bɔ.

⁸Ala mɔgɔ-banu fanan ya donu nabɔ ka ale mansɛ magben wo la alako ka Lifayinu, anubɛ saraka-masɔlɛnu, anubɛ ala mɔgɛnu dɛnbɛ nya min. Saraka-Masɔla-Kun-Tigi-Wɛ Helikaya wo, Sakaraya wo, anubɛ Yɛhiyɛli, kun-tigi le wonu na Bato-Bɔn la. Mɔgɔ sawɛ kɛnu ya saraka-masɔlɛnu dɛnbɛ saga-dan anubɛ baa-dan minnu na, wo le yirika bɛnta waga fila, kɛmɛ wɔrɔ (2,600) ma ani tura kɛmɛ sawa (300). Anu ya wonu ma Kanan-Koe sarakɛnu na.

⁹Lifayi mɔgɔ-ba wɔrɛ kɛ, Konanaya anubɛ Sɛmaya anubɛ wo na-kelen-nyɔgɛ Natanɛli, anubɛ Hasabaya anubɛ Yeyiyɛli anubɛ Yosabadi, wonu ya anu ta-nyɔgɛ Lifayinu dɛnbɛ saga-dan anubɛ baa-dan minnu na, wo le yirika bɛnta waga loli (5,000) ani tura kɛmɛ loli (500) ma.

¹⁰Anu ban ko-nya bɛɛ rabɛnna, Lifayinu anubɛ saraka-masɔlɛnu ya anuna sɔ tinɛnu bi iko mansɛ ya a fɔ anu ye nya min.

¹¹Anu ban saga-dan anubɛ baa wonu fagala, saraka-masɔlɛnu ya anu yele bi ka a pusen saraka-mintan-tinɛ ma. Lifayinu ya kolo-fan wonu gbole bɔ.

¹²Wo kɔma, anu ya saraka-mintantɛnu kɛndɛ tatala mɔgɛnu na iko anuna kebilɛ ye nya min alako anu ni sarakɛ wonu bɔ iko a sɛbɛnɛ Musata tɔn-buku rɔ nya min.

¹³ Lifayinu ya Kanan-Koe saraka-sogenu mintan iko a bɛnta, anu ni a ma nya min. Wo kɔma, anu ya daga-wɛnu anubɛ daga-mabɛnnɛnu anubɛ daga-dɔgɔmanɛnu bi alako ka sogo-sɛnimɛ wonu te. Anu ban anu tela, anu ya a ratala mɔgɛnu na.

¹⁴Lifayinu ban soge wonu tatalala mɔgɛnu na, anu ya anuta niyi bi anubɛ saraka-masɔlɛ minnu bɔra Aruna kegeyɛ rɔ, ado ka a bi sɔgɔma ha wurɛ la, saraka-masɔlɛnu nyagbanɛ telenta sarakɛnu anubɛ saraka-soge wonu kɛɛnnu mintan la.

¹⁵ Fɔli-kɛlɛ minnu bɔra Esafi kebilɛ rɔ, wonu ya anuta sɔ tinɛnu bi iko Mansa Dawuda ya a fɔ anu ye nya min nun, Esafi anubɛ Himan anubɛ Yɛdutun, kɔni.

¹⁶Anu ya Kanan-Ko-Ladiyɛ kɛ nya min wo, anu ya sarakɛnu mintan nya min wo, anu ya wonu ma le alako ka Mari bato wulɔn iko Mansa Yosaya ya a fɔ anu ye nya min nun.

¹⁷ Isirɛla mɔgɛ minnu bɛɛsi nara Yerusalɛm soe burɔ, wonu ya Kanan-Koe anubɛ Biredi-Yɛlɛbɛlɛ-Dɔn-Ladɛn kɛ tele wɔrɔnfila kɔrɔ dɛgɛdɛgɛ!

¹⁸Ka a bi Nɛbi Samuwɛlita wati ma, ha ka a sigi ale Mansa Yosayata wati la, mansa-wo-mansa ma Kanan-Ko-Ladiyɛ kɛ sufa ma fɔlɔn iko Mansa Yosaya anubɛ saraka-masɔlɛnu anubɛ Lifayinu anubɛ Isirɛla anubɛ Yuda anubɛ Yerusalɛm kɛnu bara a ma nya min kɛ la.

¹⁹Ladɛn kɛ kɛra Mansa Yosayala mansayɛ san tan-ni-segin nyɔgɛ le ma.

²⁰Ale Mansa Yosaya ban Bato-Bɔn wo ladanna, Iyipiti Mansa Niko tara ala kɛlɛ-dannu na Kakemisi soe burɔ min bi Yufereti bɛ dafɛ. Wo le ya a ma, ale Mansa Yosaya tara kilɛ tɛgɛ tinɛ Iyipiti mansɛ wo ma.

²¹Ale Mansa Niko ya kilayɛnu nata Mansa Yosaya ma. A ko, “N bi tala kɛlɛ min kɛ tinɛ kɛ la, ile Yuda mansɛta sa wo rɔ. N ma na ile kɛlɛ tina. N nara n yogenu denu kɛlɛ tinɛ. Alla ko n ni ta tiriya! Alla ye n fɛ. Hali i ma n matanbani. Ni wo ma, ale si i halaki.”

²²Kɔnɔ Mansa Yosaya yisi sɔnɛ a kɛlɛ-koe la sokesoke! Mansa Niko ara Allata kumɛ min fɔ a ye wo la, ale Mansa Yosaya ma a wɔlɔ matɔlɔ wo la. A ya a nyɛrɛ mayɛlɛma ka ta Niko kɛlɛ tinɛ Magidɔ lɛɛ rɔ.

²³Anu bi kɛlɛ wo kun na, Iyipiti kɛnuna kalabɛn tara bɛn ale Mansa Yosaya la. A ya a fɔ ala wɔli-kɛlɛnu ye ko, “Wo ta n na. N bara tanban boloko-yogomɛ-kɛ.”

²⁴A ye kirindi min tɔ nun, anu ya a bɔ wo rɔ ka a sa ala kirindi doi rɔ ka ta a la Yerusalɛm. A fagara nyɔ le. Anu ya a togon mansɛnuna kaburu-soe la. Yuda nyamanita-mɔgɛnu anubɛ Yerusalɛm kɛnu dira ala ko la.

²⁵Nɛbi Yɛrɛmaya ya kinikini-sigi do sa Mansa Yosayala sayɛ kuma. Wo mara Isirɛla mɔgɛnuna namunyɛ la. Ni min bi dila Mansa Yosaya kɛla ko la, wo tigi si sigi kɛ sa. Anu ya sigi wo sɛbɛ saya-sigi-buku rɔ.

²⁶Mansa Yosaya ya koe min bɛɛsi ma, katarala a ya a latelan min kɛ Mari ye ka ala tɔnnu bira,

²⁷ka a bi a lawulan anubɛ a laban ma, anu ya wo bɛɛ sɛbɛ Isirɛla anubɛ Yuda mansɛnuna buku do rɔ.