Read Kuranko 2 Ko-Kɔrɔta-Karan 36 Bible Online

2 Ko-Kɔrɔta-Karan 36 - Kuranko bible

2 Ko-Kɔrɔta-Karan 36

¹Yuda nyamanita-mɔgɛnu ya Mansa Yosayala den Yɛhowahasi yabɔ ka wo sigi a gbɛ rɔ Yerusalɛm soe burɔ.

²Yɛhowahasi ya mansayɛ sɔrɔn Yuda nyamanɛ rɔ a sɔrɔn-san mogan-ni-sawa nyɔgɛ le ma. Karɛ sawa pe, a ye mansayɛ la ka bɔ Yerusalɛm soe burɔ.

³Iyipiti Mansa Niko nara ale bira ka ta a la. Mansa Niko kɛ ya a ma, Yuda nyamanita-mɔgɛnu ya duti di ale ma. Anu ya wodi-gbɛ labɔ minna gbiliyɛ anubɛ fui-fan bɔrɔ bi-loli rakɛn de! Anu ya sɛnɛ fanan nabɔ minna gbiliyɛ anubɛ fui-fan bɔrɔ tala rakɛn de!

⁴ Ale Mansa Niko ya Yosayala dan do ma mansɛ la Mansa Yɛhowahasi gbɛ rɔ. Wo tɔgɛ le Ilayakim kɔnɔ Iyipiti Mansa Niko ya a tɔgɛ yɛlɛma ko Yahoyakim. Mansa Niko tara a dɔgɔ Mansa Yɛhowahasi la Iyipiti nyamanɛ rɔ.

⁵ Mansa Yahoyakim ya mansayɛ sɔrɔn Yuda nyamanɛ rɔ a sɔrɔn-san mogan-ni-loli nyɔgɛ le ma. San tan-ni-kelen, a ye mansayɛ la ka bɔ Yerusalɛm soe burɔ kɔnɔ a bilara ata Mari Alla la.

⁶ Wati tenbinɛ, Babilɔn Mansa Nɛbukanasa tara bui Yuda nyamanita-mɔgɛnu ma. A ya Mansa Yahoyakim bira ka ta a la Babilɔn nyamanɛ rɔ. A kirinɛ yɔlɔkɛ la.

⁷Mansa Nɛbukanasa tara fen-kolomɛ donu bi Mari Bato-Bɔn la ka wonu nadon ala bolɔn la Babilɔn.

⁸Mansa Yahoyakim ya koe min bɛɛsi ma ala mansayɛ kɔrɔ katarala a ya kisimiriya-koenu anubɛ ko-yogomɛ minnu ma, anu ya wonu sɛbɛ Isirɛla anubɛ Yuda mansɛnuna buku do rɔ. Ala den Yɛhoyasin sigira a gbɛ rɔ.

⁹Yɛhoyasin ya mansayɛ sɔrɔn Yuda nyamanɛ rɔ a sɔrɔn-san tan-ni-segin nyɔgɛ le ma. A ye mansayɛ la ka bɔ Yerusalɛm soe burɔ karɛ sawa tele tan kɔnɔ Mansa Yɛhoyasin fanan bilara Mari la.

¹⁰ San kurɛ kenɛ, Mansa Nɛbukanasa tara ale Mansa Yɛhoyasin anubɛ Mari Bato-Bɔn fen-kolomɛnu na a bolo Babilɔn. Wo kɔma, a ya Mansa Yɛhoyasin fa dɔgɔma Sɛdɛkaya ma mansɛ la ale Yɛhoyasin gbɛ rɔ Yuda nyamanɛ anubɛ Yerusalɛm soe kun na.

¹¹ Sɛdɛkaya ya mansayɛ sɔrɔn Yuda nyamanɛ rɔ a sɔrɔn-san mogan-ni-kelen nyɔgɛ le ma. San tan-ni-kelen, a ye mansayɛ la ka bɔ Yerusalɛm soe burɔ.

¹²A bilara Mari la, ado a ma a wɔlɔ matɔlɔ Nɛbi Yɛrɛmayala kumɛ la min si Marita kumɛ fɔ a ye.

¹³ Babilɔn mansɛ ya a ma, a ni a keli Alla tɔgɛ rɔ ko Yuda Mansa Sɛdɛkaya ni to a fɛ. Kɔnɔ ale Mansa Sɛdɛkaya murutiyara Babilɔn Mansa Nɛbukanasa ma. Wo kɔma, a ya a ban bila-koe ma Isirɛlata Mari Alla fɛ.

¹⁴Min sanɛ wo kuma, kun-tiginu anubɛ saraka-masɔlɛnu anubɛ Isirɛla mɔgɛnu tora ko yogomɛ mala iko sibolo-gbɛrɛ minnu bi anuna foolɛnu tɔ. Mari nyɛrɛ ara a Bato-Bɔn min sɛninya nun, anu ya wo latinya.

¹⁵Anu benbanuta Mari Alla tora nɛbinu nanala anu makawandi tinɛ bawo a sɔgɛ ye a la, a ni ata mɔgɛnu anubɛ a Bato-Bɔn lakisi.

¹⁶Kɔnɔ hali wo, anu tora Allata kilayɛnu manyinina. Anu bi anu tengberenyala Marita kuma-lamɔɛn-koe ma ka ata nɛbinu mayɛlɛn. Kɔnɔ tɔ-a-la, Marita diminyɛ warata anu kuma ha anu bɔ-kunya ma sɔrɔn tun Marita diminya kɔrɔ.

¹⁷ Wo le ya a ma, Mari ya Babilɔn mansɛ latugu anu kan ma. Ala kɛlɛ-dannu tora Yuda kemini-mɛsɛnu fagala hali minnu bi Bato-Bɔn la. Anu ma kinikini mɔgɔ-wo-mɔgɔ ma. Kei wo, musi wo, denni wo, kina wo, a kirayato wo, Alla ya wonu damasi kunyɛ don anu bolo.

¹⁸Babilɔn mansɛ wo tara Bato-Bɔn fen-kolomɛ bɛɛ la a bolo a warɛ pon! Hali Yuda mansɛ anubɛ ala mɔgɔ-banuna bolo-fannu, a tara wo damasi la.

¹⁹Ale Babilɔn mansɛ ya soe tarɛ keri ka soe anubɛ a Bato-Bɔn mintan gburr!

²⁰Minnu tora anu niyi la, anu tara wonu na Babilɔn nyamanɛ rɔ. Wonu kunyɛ ma bɔ yɔɔnyɛ rɔ ha Babilɔn kɛnu mamanɛnu sɔrɔnta. Wo wati le tɔ, Pasiya kɛnu nara Babilɔn nyamanɛ bi.

²¹ Mari ara min fɔ Nɛbi Yɛrɛmaya ye nun, wo le wara bɔ-a-la kɛ la bawo a ya a fɔ nun ko, “Yuda dugi si a sulen san bi-wɔrɔnfila kɔrɔ, ka a tɛgɛ anuna san wɔrɔnfilɛ[17] sulanla ko ma.”

²²Mansa Sairasila mansayɛ san fɔlɔtɛ Pasiya nyamanɛ rɔ, Marita Nɛbi Yɛrɛmayata nɛbiya-kumɛ bɔra-a-la. Mari ya Mansa Sairasi yisi-kɔrɔ-tugu alako ka kilayɛ kɛ ranyɛnsɛn ala nyamanɛ mumɛ bɛɛ rɔ.

²³ Min sɛbɛnɛ kɛdi rɔ a ko, “Nde, Pasiya Mansa Sairasi kuman-kan le kɛ la. Arinyɛnitɔ Mari Alla, wo le wara n ma mansɛ la ka duninya mumɛ bɛɛ mara. A ara a Bato-Bɔn sɔ-ko-wɔlɛ di n ma Yerusalɛm soe burɔ Yuda nyamanɛ rɔ. Woletɔ ni Allata mɔgɛ ye ile min na, i ni sɛgi i kɔma ita nyamanɛ rɔ. Min ba sɛgi, alamɛ wota Mari Alla taranta a fɛ.”