Read Kuranko 2 Ko-Kɔrɔta-Karan 4 Bible Online

2 Ko-Kɔrɔta-Karan 4 - Kuranko bible

2 Ko-Kɔrɔta-Karan 4

¹ Ale Mansa Silamɛni ya saraka-mintan-tinɛ ladan silɛɛ la. Wo kɔnɛ nunkan-nya mogan, a lɔngbɔn nunkan-nya mogan, a sɔɛ nunkan-nya tan.

²A ya yi-sigi-kunan-kinama-wɛ do ladan silɛɛ la. A latintannɛ sii! Ka a bi a da-gbole doi kɛ ma ka ke a da-gbole doi ma, nunkan-nya tan. A burɛ rayanyɛ ya nunkan-nya loli bɔ. Ala minɛ ya bolo-bira-nya bi-kɔnɔntɔ bɔ.

³A da-gbole dugula, a ya turɛla muninyɛnu nadan tala a ma. A ya wonubɛ yi-sigi-kunan wo ladan nya-kun-kelen. Nunkan-nya kelen wo nunkan-nya kelen, a ya tura tanla muninyɛ ladan wonu ma gbaranda fila-filanyɛ ma.

⁴Yi-sigi-kunan kɛ siginɛ tura tan-ni-filɛla muninyɛ kuma minnu nadannɛ silɛɛ la. Tura sawa yɛ lamununnɛ kantɔ-waralɛ la, sawɛ fanan yɛ lamununnɛ tele-yigi waralɛ la, sawɛ doi fanan yɛ lamununnɛ dugula-waralɛ la, sawɛ doi fanan yɛ lamununnɛ tele-bɔɛ waralɛ la.

⁵Yi-sigi-kunan wo da-gbengbe si bira kelen bɔ. A ya a da-gbole ladan iko yi-yawore fere-dɛ firɔnnɛ ye nya min. Yi-durɔmu-nya kɛmɛ sawa le si kun a rɔ.

⁶ A ya yi-sigi-miran tan nadan. Lolɛ doi ye Bato-Bɔn dugula wara la. Lolɛ ye Bato-Bɔn kantɔ-wara la. Yi min kɛnɛ wonu tɔ, wonu bi nyɔ ka saraka-mintantɛnu soge maku. Yi min bi yi-sigi-kunan-kinama-wɛ wo rɔ, wo ye nyɔ alako saraka-masɔlɛnu ni to anu kula wo la.

⁷ A ya sɛnɛ-lɛnpu sigi-fen tan ladan iko a fɔnɛ a ye nya min nun. Anu ya tebulu tan fanan nadan ka wonu sigi Bato-Bɔn burɔ. A ya tebulu loli anubɛ lɛnpu loli sigi a tɔnkɔn doi rɔ. Wo kɔma, a ya tebulu loli anubɛ lɛnpu loli sigi a tɔnkɔn doi fanan tɔ. Wo kɔma, anu ya yi-sigi-miran kɛmɛ fanan nadan sɛnɛ la.

⁹A ya kata-burɔtɛ ladan saraka-masɔlɛnu ye. Wo kɔma, a ya kata-kɔmatɛ fanan nadan. A ya kata-burɔ-kankannu nadan ka silɛɛ sa wonu ma.

¹⁰A ya yi-sigi-kunan-wɛ sigi Bato-Bɔn dugula tele-bɔɛ wara la.

¹¹Huram ya dagɛnu nadan anubɛ bugura-makɔ-fannu anubɛ miran-mɛsɛnu. Ale Huram kɛ ya Mansa Silamɛni yili-madiya Bato-Bon-miran min bɛɛsi ladan-koe la, a ya wo damasi ladan, a sɛnbɛrɛn-kɔn filɛ wo, sɛnbɛrɛn-kɔn wonu kun-tɛma-soro filɛ wo minnu nakuru-kurunnɛ iko yi-sigi-kunan wo, yɔlɔkɛ minnu bi kun-tɛma-soro filɛ wonu ma wo, pamakaranila muninya kɛmɛ nanɛ minnu gbaranda fila-filɛ dunnɛ kun-tɛma-sore wonu na wo, tebulu tan wo, yi-sigi-kunan tan wo, yi-sigi-kunan-kinama-wɛ wo, tura tan-ni-filɛla muninyɛ minnu siginɛ yi-sigi-kunan kelan wo kɔrɔ wo, dagɛ wonu wo, bugura-makɔ-fannu wo, anubɛ sogo-sɔgɔ-fannu. Boloma-wɔli-kɛlɛ Huram ya miran kɛ damasi ladan silɛɛ la min manunkunɛ ye a bolo pinapina! A ya kɛ damasi ladan Mari Bato-Bɔnla ko la iko Mansa Silamɛni ya a fɔ nya min.

¹⁷A ya silɛɛ wo bɛɛ lalee sulubondɔn rɔ Yorodan-ba-lɛɛ rɔ Sukɔti soe anubɛ Sarati soe tɛma nun. A ya sila-laleenɛ wonu wuya dugi ma alako ka mirannu nadan wonu na. A ya miran kɛ bɛɛsi ladan nyɔ le.

¹⁸Mɔgɔ-wo-mɔgɔ ma silɛɛ wonu gbiliyɛ-yirika lɔn bawo anu ya miran-siyaman nadan ale le tɔ.

¹⁹Mansa Silamɛni ya miran minnu nadan sɛnɛ la Mari Bato-Bɔnla ko la, wo le kɛnu na. Saraka-mintan-tina wo, anubɛ tebulu anu si biredi sa min kuma Alla ye wo, a ya wonu nadan sɛnɛ la.

²⁰Lɛnpu anubɛ a sigi-fan nadannɛ sɛnɛ la. Wonu bi malanna Sɛnima-Sɛnima-Tinɛ wara la iko a fɔnɛ a ye nya min.

²¹A ya kɔn-ferenuna-muninyɛ ladan sɛnɛ la. Lɛnpunu anubɛ barannu, a ya wonu fanan nadan sɛnɛ la.

²²Wo kɔma, a ya yi-lafɛnu anubɛ lɛnpu ladufen-fannu nadan. A ya isɛnti mintan tinɛnu anubɛ ta-kɔ-mirannu nadan. A ya wo damasi ladan sɛnɛ-bɛrɛbɛrɛ le la. Bato-Bɔn da-wɛ wo, Sɛnima-Sɛnima-Tinɛ dɛnu wo, sɛnɛ sanɛ wo dama ma.