Read Kuranko 2 Ko-Kɔrɔta-Karan 5 Bible Online

2 Ko-Kɔrɔta-Karan 5 - Kuranko bible

2 Ko-Kɔrɔta-Karan 5

¹ Mansa Silamɛni ban Mari Bato-Bɔn sɔla, a fa Mansa Dawuda ara miran min bɛɛ dantɛgɛ Mari ma nun, a ya miran wo bɛɛsi ladon Bato-Bɔn wo fen namara tinɛnu tɔ. A ya miran minnu nadon, wo le kɛnu na, sɛnɛ-mirannu wo, wodi-gbɛ-mirannu wo, anubɛ fen-kolomɛnu. A ya wo bɛɛ sa fen namara tinɛnu tɔ Mari Bato-Bɔn la.

² Wo kɔma, Mansa Silamɛni ya Isirɛla mɔgɛnuna kun-tigi damasi kundɛn kan-tina kelen Yerusalɛm soe burɔ. A bɔnsɔn-kun-tigi wo, a kebila-kun-tigi wo, a ya wo bɛɛsi kele. Mansɛ ya anu kele alako anu ni ta tɔn-kenkirɛ bi Mansa Dawudala luyi ma Yerusalɛm soe burɔ ka ta a to Mari Bato-Bɔn la.

³Anuna ladɛn wo bɛnta Lele-Sɔɛ-Ladɛn le ma.

⁴Isirɛla kun-tiginu nara tumɛ min, Lifayi bɔnsɔn-mɔgɛnu tara tɔn-kenkirɛ bi tinɛ.

⁵Anu ya a bi ka ta a la Mari Bato-Bɔn dafɛ. Wo kɔma, Lifayi bɔnsɔn-mɔgɛnu anubɛ saraka-masɔlɛnu tara Marita Fani-Bɔn nyɛrɛ bi anubɛ a miran bɛɛsi ka ta anu to Bato-Bɔn la.

⁶Wo kɔma, Mansa Silamɛni anubɛ Isirɛla mɔgɛ bɛɛ ladɛnta tɔn-kenkirɛ yarɔ. Anu ya ninki anubɛ sagɛ min nyɔgɔn ma sarakɛ la, anu ma wonu yatɛ lɔn bawo anu siya kati!

⁷Anu ban saraka-bɔɛ wo la, saraka-masɔlɛnu ya Marita tɔn-kenkirɛ wo ladon Bato-Bɔn la ka a sigi melikanuna muninyɛ wonu kɔrɔ Sɛnima-Sɛnima-Tinɛ rɔ.

⁸Anu kanbannu bi tɔn-kenkirɛ anubɛ a bi-kɔlɔmanu kuma.

⁹Mɔgɛ tenbi bɔn don-dɛ wo burɔ, a si a bi-kɔlɔma wonu sungban yen Sɛnima-Sɛnima-Tinɛ rɔ bawo anu yan. Kɔnɔ ni mɔgɛ ye luyi ma, a ti ke anu yenna. (Ha bi,[7] wonu bi nyɔ.)

¹⁰ Fenfen sa tɔn-kenkirɛ wo burɔ fɔ Musa ya kuru-walan filɛ minnu sa a rɔ Sinayi kɔnkɛ dafɛ. Isirɛla mɔgɛnu bɔra Iyipiti nyamanɛ rɔ tumɛ min, Mari ya tɔn sɛbɛ kuru-walan wonu denu ma alako anubɛ Isirɛla mɔgɛnu si lanyiri kiri anu nyɔgɔn tɛma nya min.

¹¹ Saraka-masɔlɛ min bɛɛsi bɛnta wo rɔ, a bɔra kebila-wo-kebila rɔ, wonu ya anu nyɛrɛ dantɛgɛ Mari ma. Esafi wo, Himan wo, Yɛdutun wo, anubɛ anu kebilɛnu, Lifayi fɔli-kɛlɛ le kɛnu na. Wonu ya linɛn-kura-hakikɛnu don anu kan na. Anu sɔra anu sansan-yili ma saraka-mintan-tinɛ tele-bɔɛ wara la karanya anubɛ sɔrɔnnu anubɛ seremanu bi anu bolo. Min sanɛ wo kuma, saraka-masɔla mɔgɔ kɛmɛ ani mɔgɔ mogan (120) bi buri fɛla anu fɛ. A fɔli-kɛla wo, a buru-fɛla wo, a sigi-sala wo, wo bɛɛ tara anu nyɔgɔn fɛ a kin na! Anu bi Mari tanto sigi sala ko, “Mari ni tanto bawo a kin. Ala keninteyɛ ti ban habadan!” Saraka-masɔlɛ wonu bi anu kunyɛ labɔla nyɔ rɔ kawo, Marita wan-belebele ya waan raka Bato-Bɔn wo burɔ ka bɔ Marita banda-fin-gbɛ rɔ waran! Anu ma ke batoe wo labanna.