Read Kuranko 2 Ko-Kɔrɔta-Karan 6 Bible Online

2 Ko-Kɔrɔta-Karan 6 - Kuranko bible

2 Ko-Kɔrɔta-Karan 6

¹Wo kɔma, Mansa Silamɛni ya baraka bira Mari ye ka a tanto. A ko, “E, Mari, ile le wara a fɔ nun ko i si to banda-fin-gbɛ rɔ.

²Kɔnɔ n bara bon-nyimɛ sɔ i ye i si to kan min burubukai!”

³Isirɛla mɔgɛ bɛɛsi sɔnɛ nyɔ rɔ, ale mansɛ ya a tintan Isirɛla mɔgɛ wonu na ka Allala duwɛ kɛ anu ye.

⁴A ko, “Gbiliyɛ ni di Isirɛlata Mari Alla ma bawo a ya lanyiri min kiri n fa Mansa Dawuda ye, a ara wo latɔnbagaya. Bawo a ya a fɔ n fa ye nun ko

⁵kebi a nara ata mɔgɛnu na ka bɔ Iyipiti nyamanɛ rɔ, a ma so-wo-so yabɔ Isirɛla nyamanɛ rɔ anu si ata Bato-Bɔn sɔ kan min. Wo kɔma, a ma mɔgɔ-wo-mɔgɔ yabɔ min si to ata mɔgɛnu yarɔ.

⁶Kɔnɔ kaka, a ara Yerusalɛm soe yabɔ, wo si a bato kan min. Wo kɔma, a ya n fa Mansa Dawuda yabɔ ka a sigi mansayɛ la ata mɔgɛnu kun na.”

⁷Mansa Silamɛni ya a fɔ tun ko, “Isirɛlata Mari Alla Bato-Bɔn sɔ-sɔgɛ ye n fa Mansa Dawuda la nun

⁸kɔnɔ ale Mari ya a fɔ ko wo sɔgɛ ara n fa bira min kɛ, wo ara a hɛnɛ.

⁹ Kɔnɔ a ko n fa ti bɔn wo sɔ fɔ nde, a nyɛrɛta dan, wo le si ata Bato-Bɔn sɔ a ye.”

¹⁰“Mari ara ala kumɛ wo latɔnbagaya kaka. N bara sigi n fa gbɛ rɔ mansayɛ la iko Mari ya lanyiri kiri nya min, ado kaka, n bara Bato-Bɔn sɔ Isirɛlata Mari Alla ye.

¹¹N bara kan tinɛ do rabɛn bɔn wo burɔ tɔn-kenkirɛ anubɛ kuru-walan filɛ wonu si to kan min. Wole Isirɛla mɔgɛnu bɔra Iyipiti nyamanɛ rɔ tumɛ min, a ya tɔn sɛbɛ kuru-walan minnu ma, wonu denu sanɛ kenkirɛ wo burɔ.”

¹²A ban wo fɔla, ale Mansa Silamɛni sɔra Marita saraka-mintan-tinɛ yarɔ Isirɛla mɔgɛ bɛɛ yakɔrɔ. A ya a bole sigi san ma.

¹³(Mansa Silamɛni ya bɛndɛ do ladan silɛɛ la nun ka wo sɔ kata-kɔmatɛ burɔ. Bɛndɛ wo lɔngbɔn nunkan-nya loli, a kɔnɛ nunkan-nya loli, a sɔɛ nunkan-nya sawa. A yɛlɛta bɛndɛ wo kuma, a ya a nyɛnkin mɔgɛ bɛɛ yala nyɔ. A ya a bolo filɛ sigi san ma.)

¹⁴A ya Alla matara, a ko, “E, Isirɛlata Mari Alla, i nyɔgɔn sa san-kole rɔ anubɛ dugu-kole ma! Minnu bi tagamana ila kilɛ fɛ anu yisi-gbɛnɛ la, i ya ila lanyiri latɔnbagaya anu ye ka ila keninteyɛ yira anu na.

¹⁵I ya ila lanyiri min kiri n fa ye, i wara wo bɛɛsi dafa bi.

¹⁶ Nba, wola ko la, Isirɛlata Mari Alla, i ni ila lanyiri doi fanan natɔnbagaya i ya min kiri n fa ye nun. I ya a fɔ nun ko ni ala dannu tora ila kilɛ fɛ ka i sako kɛ iko ale, n fa ya a ma nya min, i ko mansayɛ si to a bɔnsɔn bolo Isirɛla mɔgɛnu tɛma tolon!

¹⁷Woletɔ Isirɛlata Mari Alla, ila kumɛ bɛɛsi ni bɔ-a-la iko i ya a fɔ n fa Mansa Dawuda ye nya min nun.

¹⁸ “Kɔnɔ nta Alla, duninya kɛ dɔgɔ i yala bawo i ti ke sigila mɔgɛnu tɛma. Hali san-kole min kolo, wo ti a bɔ i ye. I si kun bon-nɛ kɛ la kama worɔ?

¹⁹Nta Alla, ila wɔli-kɛlɛ le nde la. Hali wo, i ni i wɔlɔ matɔlɔ n di-kɛ-kan anubɛ nta matarali-kan la.

²⁰ I wara kan tinɛ kɛ min yabɔ i bato-koela ko la, i yandi, Mari, i ni i fonde to bɔn kɛ ko su-ni-tele. Nba woletɔ, Mari, n ba n ya-lamunun bɔn kɛ la tumɛ min, i ni i wɔlɔ matɔlɔ nta mataralɛ la n bi min nakɛla i ma.

²¹Isirɛla mɔgɛnu fanan ba anu ya-lamunun bɔn kɛ la tumɛ min, i yandi, i ni i wɔlɔ matɔlɔ anuta matarali-kɛ-kan la. I ni ma kan lamɔɛn i warɛ Arinyɛni tɔ ka ma makoto ma hakɛ la.

²²“Ni mɔgɛ do ya tɔgɛ layɛlɛ a ta-nyɔgɛ ma, tɔgɛ layɛlɛta min ma wo la, wo ni na a sɔ saraka-mintan-tinɛ kɛ yarɔ. Ni a ya a keli ka a fɔ ko a sɔn sa a rɔ,

²³E, Mari, i ni i wɔlɔ matɔlɔ Arinyɛni tɔ ka ko sufa wo kiti tɛgɛ. I ni mɔgɔ-yilikinɛ tɔrɔ iko a hakɛ ye nya min ka tonya-tigi wo yo sa iko ata yoe ye nya min.

²⁴“Isirɛla mɔgɛnu ba hakɛ kɛ i la tumɛ min, ni wo ya a ma, anu yogenu ni nɔ-ko sɔrɔn anu ma, ni anu nara bɔn kɛ la tumɛ min ka anu famayigi i ye i matara tinɛ anu hakɛla ko la,

²⁵i ni i wɔlɔ matɔlɔ anu na ka anu makoto anu hakɛ la. I ni anu nasɛgi anuna nyamanɛ rɔ tun i ya min di anubɛ anu benbanu ma.

²⁶“Ni i ya filiyan sɔ kamasɔrɔn ila mɔgɛnu bara hakɛ kɛ i la, ni anu ya anu ya-lamunun kan tinɛ kɛ la ka anu sɔ anu hakɛ la,

²⁷E, Mari, i ni wo lamɔɛn Arinyɛni tɔ ka Isirɛla mɔgɛnu makoto. I ni anu nabila ko-nyimɛ-kɛ la anu si to min kɛla. Wo kɔma, i ya nyamanɛ min ma anu halalɛ la, i ni bandɛ lana nyɔ tun.

²⁸“Ni kondɔnnu, ni wo ma, tunbinu ya a ma, kɔnkɔ-fitinɛ ni nɔ-ko sɔrɔn mɔgɛ kɛnu ma, hali fui-fan la ara kerun, ni anu ya i matara, i ni anu makoto. Ni anu yogenu nara ka anu namini anu kɛlɛ-koe la, ni wo ma, kiraya-yogomɛ ni anu tɔrɔ, ni anu ya i matara, i ni anu makoto.

²⁹Ni min nara bɔn kɛ yarɔ ka nimisa a sɔn-yogomɛla ko la, i ni wo tigi kan lamɔɛn ka wo makoto bawo ile le kelen pe ya mɔgɔ-burɛ lɔn. A bɛnta, i ni min ma mɔgɛ kɛ la, i si wo ma, woletɔ

³¹anu tenbi anu benbanuna nyamanɛ kɛ rɔ tumɛ min, anu si to i gbiliyala tele-wo-tele ka ila kumɛ bira.

³²“Sibolo-gbɛrɛ minnu siginɛ wula-yan la, ni wo do ya ila kabana-ko-wɛ anubɛ ila sɛnbɛ lamɔɛn i wara minnu kɛ ila mɔgɛnu ye, ado i rabɛnnɛ anu dɛnbɛn-koe la, ni wo mɔgɔ-sufa nara ka matarali-kɛ bɔn kɛ telen tɔ,

³³i ni ala matarali-kan wo lamɔɛn i warɛ Arinyɛni tɔ. I ni anu makoe nyinya iko anu bi a fɔla i ye nya min. Woletɔ duninya-mɔgɛ bɛɛ si i tɔgɛ lɔn ka ila kumɛ bira iko Isirɛla mɔgɛnu bi ila kumɛ birala nya min. Anu si a lɔn wo rɔ ko n bara Bato-Bɔn min sɔ kɛ la, a bɛnta, bɛɛ ni i bato nyɔ.

³⁴“I wa ila mɔgɛnu nata anu yogenu kɛlɛ tinɛ tumɛ min, anu ba i matara ka anu ya-lamunun ita so-yabɔnɛ anubɛ bɔn kɛ la tumɛ min n ya min sɔ i ye,

³⁵i yandi, i ni anuna matarali-kan lamɔɛn san-kole rɔ. I ni anu yabi ka nɔlɛ di anu ma.

³⁶“Mari, ni ila mɔgɛnu ya hakɛ kɛ i la tumɛ min, ado mɔgɔ-wo-mɔgɔ sa nyɔ min ti hakɛ kɛ, tumado i si diminya anu ma ha, i ni anu don anu yogenu bolo. Wonu ni anu bira ka ta anu na anu barɛnu tɔ hali anu taranta wula-yan la.

³⁷Kɔnɔ tɔ-a-la, ni anu ya anu yisi yɛlɛman, a fisa, anu ni tubi worɔ ka a fɔ ko anu bara bila ile Alla la.

³⁸Wo kɔma, ni anu ya i matara ka anu ya-lamunun Bato-Bɔn kɛ la min sɔnɛ Yerusalɛm soe burɔ Isirɛla nyamanɛ kɛ rɔ, ile Mari min bi Arinyɛni tɔ, i ni anuna matarali-kan wo lamɔɛn ka kinikini anu ma ka anu makoto anu hakɛ la. Ile Mari ara soe kɛ yabɔ ka nyamanɛ kɛ di ma benbanu ma.

⁴⁰“E, nta Alla, ma wa i rakele tumɛ min, i ni kinikini mabɛ ila mɔgɛnu ma ka i wɔlɔ matɔlɔ ma di-kɛ-kan la kan-tina-yabɔnɛ kɛ rɔ.

⁴¹E, Mari Alla, i lakɔɛnma. Ta i mayigi Bato-Bɔn burɔ ila tɔn-kenkirɛ ye kan min ado wo manɛ ila sɛnbɛ-tamasere la. I si to nyɔ burubukai! Ila saraka-masɔlɛnu bi koe min bɛɛsi mala, ita duwɛ layigi anu kuma wonu tɔ. Ka a tɛgɛ ila ko-nyimɛ ma, alamɛ mɔgɛ bɛɛ sewara.

⁴² Mari, ile ara mansɛ min yabɔ, i kana i ban wo la. I miri ita keninteyɛ ma i ya min yira ila wɔli-kɛla Mansa Dawuda la.”