Read Kuranko Ɛsira 7 Bible Online

Ɛsira 7 - Kuranko bible

Ɛsira 7

¹San-siyaman tenbinɛ, wo tumɛ Atasakasi ye mansayɛ la Pasiya nyamanɛ rɔ, kei do ye nyɔ nun min tɔgɛ Ɛsira. Saraka-Masɔla-Kun-Tigi-Wɛ Aruna matiyi le ale la. Ale Ɛsira fa tɔgɛ le Sɛraya. Sɛraya wo fa tɔgɛ le Asaraya. Asaraya wo fa tɔgɛ le Helikaya.

²Helikaya wo fa tɔgɛ le Salumu. Salumu fa tɔgɛ le Sedoki. Sedoki wo fa tɔgɛ le Ahituba.

³Ahituba wo fa tɔgɛ le Amaraya. Amaraya wo fa tɔgɛ le Asaraya. Asaraya wo fa tɔgɛ le Mɛrayoti.

⁴Mɛrayoti wo fa tɔgɛ le Sɛrahaya. Sɛrahaya wo fa tɔgɛ le Yusayi. Yusayi wo fa tɔgɛ le Buki.

⁵Buki wo fa tɔgɛ le Abisuwa. Abisuwa wo fa tɔgɛ le Finihasi. Finihasi wo fa tɔgɛ le Ɛliyesa. Ɛliyesa wo fa le ale Saraka-Masɔla-Kun-Tigi-Wɛ Aruna la.

⁶Ɛsira kɛ, karan-mɔgɔ le ale la, ado Isirɛlata Mari Alla ya tɔn minnu di Musa ma, a ya wo lɔn dɔgɔma-ma-de! Ɛsira ya Pasiya mansɛ manyinika fenfen ma, a si wo di a ma bawo a ye ata Mari Allata duwɛ kɔrɔ. Atasakasila mansayɛ san wɔrɔnfila nyɔgɛ ma, Ɛsira anubɛ nyama ya Babilɔn boloka ka ta Yerusalɛm. Minnu tara a fɛ, wo le kɛnu na, saraka-masɔlɛnu wo, Lifayinu wo, Bato-Bon-sigi-salɛnu wo, Bato-Bon-makandannɛnu wo, anubɛ Bato-Bonna-wɔli-kɛlɛnu.

⁸Anu bɔra Babilɔn san wo karɛ fɔlɛ, a tele fɔlɔtɛ le ma. Anu donta Yerusalɛm soe burɔ Alla baraka rɔ san wo karɛ loli nyɔgɛ, a tele fɔlɔtɛ ma.

¹⁰Ɛsira ara a nyɛrɛ to Marita tɔn karan anubɛ ka a bira anubɛ ka Isirɛla mɔgɛnu karan a la.

¹¹Saraka-Masɔla Ɛsira wo min ya Isirɛlata Marita tɔn lɔn a nya-bɛrɛbɛrɛ ma, Mansa Atasakasi ya kɛdi do di ale ma. Min sanɛ kɛdi wo rɔ, wo le kɛ la. A ko,

¹²“Nde, Pasiya Mansa Atasakasi le wara kɛdi kɛ sɛbɛ Saraka-Masɔla Ɛsira ma, San-Kole-Allata tɔn-karan-mɔgɛ, kɔni.

¹³“N bara ban a latɛgɛla ko ni ta-sɔgɛ ye minnu na, a saraka-masɔla wo, a Lifayi bɔnsɔn-mɔgɔ-to wo, a Isirɛla mɔgɔ-to wo, bɛɛ ni ta i fɛ Yerusalɛm.

¹⁴Malebɛ nna mɔgɔ-ba wɔrɔnfilɛ le wara ile Ɛsira boloka ka ta Yuda nyamanɛ anubɛ Yerusalɛm soe lakɔrɔsi. A sɔgɛ ye ma la ka a lɔn, ni anu bi ita Allata tɔn birala a kila-bɛrɛbɛrɛ fɛ, ado ile ya tɔn wonu lɔn kosɛbɛ!

¹⁵Mabɛ nta mɔgɔ-banu bi sɛnɛ anubɛ wodi-gbɛ minnu bɔla ka a di Isirɛlata Alla ma, minta Bato-Bɔn ye Yerusalɛm, kɔni, a sɔgɛ ye ma la, i ni ta wonu na i bolo.

¹⁶Min sanɛ wo kuma, i ni sɛnɛ anubɛ wodi-gbɛ makele mɔgɛnu bolo Babilɔn nyamanɛ bɛɛ rɔ. Wo kɔma, saraka-masɔlɛnu anubɛ Isirɛla mɔgɛnu ya hɛniki-sarakɛ minnu di Isirɛlata Alla Bato-Bɔnla ko la, i ni ta wonu na.

¹⁷“I si wodi wo lawɔli i hɛnkili la ka sarakɛnu san a la. I ye min sanna sarakayɛ la, wo le kɛ la, tura-bulun-hakikɛnu wo, saga-yiginu wo, saga-dannu wo, anubɛ fui-fen-sarakɛnu anubɛ minni-sarakɛnu. I wa ke anu na nyɔ, i si anu mintan saraka-mintan-tinɛ kuma Bato-Bɔn la Yerusalɛm.

¹⁸Sɛnɛ anubɛ wodi-gbɛ-toe min bi tola, wo ni a lawɔli wota Alla sako la iko a di wobɛ i na-kelen-nyɔgɛnu ye nya min.

¹⁹N bara miran min bɛɛsi don i bolo ka anu nawɔli Bato-Bɔn la, i ni ta wonu dantɛgɛ Alla ma Yerusalɛm soe burɔ.

²⁰I nyinita fenfen ma Bato-Bɔn wola ko la, i si wo sɔrɔn nde, mansɛla fen-kolomɛnu namara tinɛ.

²¹“N bara a fɔ nyamani-fen-namaralɛ bɛɛ ye minnu bi Yufereti bɛ tele-yigi wara la ko anu ni ile Saraka-Masɔla Ɛsira makoe bɛɛ nyinya, ile min ya San-Kole-Allata tɔn lɔn, kɔni.

²²Anu bi fan min nyɔgɔn donna i bolo, n bara wonu dan latɛgɛ anu ye. N bara sɔn ko anu ni wodi-gbɛ don i bolo minna gbiliyɛ ma tenbi fui-fan bɔrɔ bi-loli la. Anu ni fui-fen don i bolo min ma tenbi bɔrɔ kɛmɛ fila ani bɔrɔ bi-loli la. Anu ni gbɛɛ don i bolo min ma tenbi durɔmu tan la. Tuli fanan bi wo nya na. Kɔgɛ, wo yatɛ latɛgɛni ma.

²³San-Kole-Alla nyinita fenfen ma a Bato-Bɔnla ko la, i si wo makele fen-namaralɛnu bolo. Ni wo ya wo ma, tumado Alla ti kɔrɔtɔ mabɛ nna dannu ma minnu si ma mansɛ la n gbɛ rɔ.

²⁴Kɔnɔ wo ka fenfen makele saraka-masɔlɛ anubɛ Lifayi anubɛ Bato-Bon-sigi-salɛnu anubɛ Bato-Bon-makandannɛnu anubɛ Bato-Bonna-wɔli-kɛlɛnu na. Hali min kian donnɛ Bato-Bon-ko-wɔlɛ rɔ, wo kana fen bɔ dutiyɛ la.

²⁵“Alla ara hɛnkili min di ile Ɛsira ma, i si wo lawɔli. Minnu bi ita Allata tɔn birala Yufereti bɛ tele-yigi wara la, ile Ɛsira si kun-tiginu anubɛ kiti-tɛgɛlɛnu yabɔ wonu tɔ, ado ni minnu ma Allata tɔn lɔn, i si wonu karan a la.

²⁶Ni min ya Allata tɔn kɛ masɔsɔ anubɛ nyamanita tɔnnu, wo ni wo tigi tɔrɔ tiriya! Ni a di i ye, i ni wo tigi faga. Ni wo ma, i ni a gben. Ni wo fanan ma, i ni a bolo-fannu toronde a la. Ni wo fanan ma, i ni a sa yele la.”

²⁷Saraka-Masɔla Ɛsira ya a fɔ ko, “N si ma benbanuta Mari Alla tanto bawo a ara a ma, mansɛ ara kɛ nyɔgɔn sufa gbiliyɛ di Mari Bato-Bɔn ma Yerusalɛm soe burɔ.

²⁸Ale Mari baraka le wara a ma, n bara diya mansɛ anubɛ a makawandilɛnu anubɛ ala mɔgɔ-ba-sɛnbɛlamɛnu na. Nta Mari Alla ara sɛnbɛ di n ma ka kuma Isirɛla bɔnsɔn kebila-kun-tigi-siyaman ye alako anu ni sɛgi n fɛ Yerusalɛm soe burɔ.”